¹ Pali kalya kene kashita abasambi balishile kuli Yesu nokulanda ati, "Nani umukulu mu bufumu bwa mumulu?"

² Yesu umwine epakwita akana akanono, epa kukemika pakati kabo, ³ nokulanda ati, "Icine cine ndimukumyeba ati, kanofye mwapilibuka nokuba ngo twana utunono lyena tekuti mukwate inshila iya kuya ingila mubufumu bwa mumulu. ⁴ Eico, uyo onse uuli mukuicefya ngotu utwana utunono euli nokuba umukulu mubufumu bwa mumulu. ⁵ Uyo uuli mukusekelela akana akanono nga akaa mwishina lyandi ninshi apokelela nebo. ⁶ Lelo uyo uwalufyanya kamo akapali aka akasumina mwishina lyandi akapunwisha, camuwamina uyu muntu ukumukulikila ilibwe mu mukoshi wakwe, nokumuposa umwashika sana mu cimana.

⁷ "Ubulanda ku calo pamulandu wa cakuipuntulako! Pantu cili mukwisa peka icakuipuntulako, lelo ubulanda buli nokuba ku muntu uyo uo icakuipuntulako fyaishilako! ⁸ Eico ukuboko nakalimo ulukasa lobe lwa kutwala mu cipunwisho, ulingile ukuputulako nokuciposa ukucifumyako. Cakuwamina webo ukwingila mu bumi uwabulisha napamo icilema ukucila ukuya poswa mu mulilo wapee mukuba uwakumanisha ifi lundwa mukuba namaboko yabili nakalimo amakasa yabili. ⁹ Nga ilinso lyobe ngalya kutwala mucakuipuntulako, ulitonkolemo nokuliposa uko ukulifumya kuli webo. Cilimukuwamisha webo ukuya ingila mu bumi ne linsofye limo ukucila ukuposwa mu Gehena ya mulilo mukukwata amenso yonse. ¹⁰ Moneni ukuti mwaba abashilimuka ukuti tamusulilepo nangu kamo pali untu twana utunono. Pantu ndimukulanda kuli mwebo ukweba ati mu mulu mulya abangeli lyonse bali mukulolesha pa cinso cakwa Tata wandi uuli mu mulu. ¹¹ "Pantu umwana wa muntu aishile mukupususha abo abaluba." ¹² Bushe ulimukutontonkanya shani? Nga kuliko umuntu umo aliko ne mikoko umwanda umo, peka naumo pali isho waluba, bushe tengasha isho amakumi pabula-napabula mu ncende yakapili nokuya mukufwailisha iya luba? ¹³ Ngaisanga, icine ndimukumyeba mwebo, alasansamuka pali iyo ukucilapo pali isho amakumi pabula na pabula isho ishilipo ishabula ukuluba. ¹⁴ Mu musangofye umo wine, tacaba mubufwayo ubwakwa Tata wenu mu mulu ukuti kamo pali utu utunono kamo ukonaika.

¹⁵ "Nga munonko wenu akulufyanya napeka, uli mukulinga ukuyako nokumukalipila pakati kaiwe na ena mwaikala nao mweka. Peka nga kuti aumfwa kuli webo, mufwile mwabweshanya pamo. ¹⁶ Nomba nga ali mukukana ukumfwa kuli webo, kabiye kasende umo nakalimo babili bambi aba kuli webo pakuti patunwa twabo tubili nakalimo batatu bakambone cila lishiwi lifwile lyasininkishiwa. ¹⁷ Napeka nga nakalimo ali mukukana kuli mwebo, mulingile umulandu wenu mwaishibishako aba cilonganino cenu. Nga peka alimukutwalillila ukukana ukumfwa nakuba cilonganino, kuli mwebo mupangenifye abe umusenshi nakalimo umusangushi. ¹⁸ Ndi mukulanda kuli mwebo icine, fyonse ifintu ifyo muli muku kaka pano calo fili mukukakwa namu mulu. Peka fyonse ifintu ifyo muli mukukakula pano calo napeka mumulu fili mukukakulwa. ¹⁹ Napeka ndimukulanda kuli mwebo, nga babili aba pali mwebo bali mukusuminishanya pano calo pamulandu wafintu fimo ifyo balomba, fili nokupelwa kuli bena ukupitila muli Tata wandi uwa mu mulu. ²⁰ Nipali ici apali babili nakalimo batatu abali mukulongana pamo mwishina lyandi, ndimu mukubapo pakati kabo."

²¹ Nomba Petro alishile nokulanda kuli Yesu ati, "Kuuku, mikuinga nakalimo munyinane nga ampuntula napeka namwelela? Imiku cine lubali?"

²² Yesu alilandile kuli ena ati, "Nebo nshili mukukweba imiku cine lubali iyo, lelo ntile amakumi cine lubali ukufushiwako cine lubali (70 x 7). ²³ Eico ubufumu bwa mumulu bwapalanako ku mfumu iyalefwaya ukulubulwisha ababomfi bakwe. ²⁴ Elo yatampile ukulubulwisha, baleteleko umo uwapababomfi bakwe uwakwete inkongole amakana ikumi limo amatalanta. ²⁵ Ico ukufumafye apo apokele alimukufilwa ukulipilamo, shikulu wakwe ali konkomeshe ukuti ashitishe fyonse pamo nabakashi nabana bakwe pamofye nafyonse ifyo akwata pakutila engalipila inkongole. ²⁶ Eico uyo mubomfi awile panshi, akontama kuli ena, 'Shikulu, tekanyeni pali nebo ndinoku mulipilafye fyonse. ²⁷ Eico shikulu wakwa ulya musha, ico aliumfwile inkumbu, alimukakwile noku mubelela uluse pa nkongole shonse. ²⁸ Nomba ulya wine umubomfi ilyo afumine palya nokuya ailesanga umo uwa mubabomfi nga ena, uwa mukwatile inkongole umwanda umo demarii. Atampile ukumufina pamukoshi ati kanofye ulipile inkongole shandi; ²⁹ "Eico umubomfi munankwe ali wile panshi nokumupapatila pamaka, alandile ati, ntekanishisheniko nebo, peka ndinokumulipila inkongole.' ³⁰ Nomba ulya umubomfi wa kutampilapo alikene. Kabinge, alile peka nokuya muposa mu cifungo nokutila ati kanofye ukandipile inkongole. ³¹ Elo ababomfi banankwe bamwene ifyacitike, baliketwe ubulanda nokupelelwa. Balisile nokulanda fyonse kuli shikulu fyonse ifyacitike.

³² "Nomba ulya mubomfi wakwa shikulu wakwe alimukutile, nokulanda kuli ena ati, "we mubomfi uwabipa, Nebo nalikubelele uluse pa nkongole shonse pantu wali mukumpapatile. ³³ Nomba iwe wafilwa ukubelela umubomfi munobe, peka Nebo nshakukwatile uluse? ³⁴ Nomba shikulu wakwe alikalipe icibi peka amubulile nokumupela kuli bakalungulusha nokubakonkomesha ati uyu tekwesha ukumulekako ukufuma mpakamfye akalipile inkongole. ³⁵ Efyo peka na Tata wamumulu akacita cimo cine kuli mwebo nga tamuli mukubelela bamunyinenwe uluse ukufuma panshi yamutima wenu."