¹ Ilyo Yesu apwile ukulaanda aya mashiwi, ali fumine mu Galili nokuya mu Yudea bushilya lya mumana wa Yordani. ² Necintu bwingi cikalamba calimu konkele, nao alebondapo kulya kwine.

³ Aba farise balishile kuli ena, balemwesha no kulanda kuli ena ati, "Calisuminishiwa umwaume ukukana umukashi wakwe pamulandu uuli onse?"

⁴ Yesu alyaswike ati, "Tamwabelenga ati uwaba bumbile kukutapa ababumbile umwaume no mwanakashi? ⁵ Uwababumbile alandile ukuti, 'Napamulandu uyu eco umwaume akasha wishi na nyina no kukambatila ku mukashi wakwe, naba babili baba umubili umo.' ⁶ Tabali babili peka, nomba umubili umo. Eico ico Lesa akambatika, takuli nangu umo uwinga kambatula."

⁷ Balandile kuli ena ati, "Nicinshi Mose atukonkomeshe ukupeela icitupa cakulekana no kumutamfya?"

⁸ Alandile kuli bena ati, "Bunkosa mitima bwenu, ebwalengele Mose ukumisuminisha ukuleka abakashi benu, nokutampilafye ku kwamba tafyali muli iyo nshila. ⁹ Ndelanda kuli mwebo ati, uyo onse uutamfya umukashi wakwe, apabula umulandu kano pabulalelale, aupa naumbi, acita ubucende; no mwaume uwaupa umwanakashi uo batamfya acita ubucende."

¹⁰ Abasambi balandile kuli Yesu ati, "Uyo nga emulandu waba pamwaume nomukashi wakwe, cawamapo nokukanaupa."

¹¹ Nomba Yesu alandile kuli bena ati, "Tebonse bengasumina kuli ayamashiwi, lelo kuli abocapeelwa. ¹² Kwaliba abaume abashaba namaka yakupa pantu efyo bafyalwa ukufuma munda muli banyinabo, peka kwaliba nabambi abatungulwafye nabantu, peka kwaliba bamutungwi abaisangula ifyofine pamulandu wabufumu bwamumulu. Uwingapokelela ayamashiwi, nayapokelele."

¹³ Nomba bamo abana banono baletelwe kuli ena pakutila engabika amaboko yakwe palibena nokuba pepelela, nomba abasambi bali bakalipilile. ¹⁴ Nomba Yesu alandile ati, "Lekeni abana banono, mwibakanya ukwisa kuli nebo, pantu ubufumu bwamumulu bwaba ngababefi." ¹⁵ Atambalike namaboko pabana, nokufumako nokuya kumbi.

¹⁶ Moneni, umuntu alishile kuli Yesu nokulanda ukuti, "Mwekafundisha, fintunshi ifisuma mfwile ukupanga pakuti kwate ubumi bwakubelelela?"

¹⁷ Yesu alandile kuli ena ati, "Nicinshi wangipushisha palwacisuma? Kwabafye umo umusuma, nomba ngaulefwaya ukwingila mubumi bwakubelelela sunga amafunde."

¹⁸ Umwaume alandile kuli ena ati, "Mafundenshi?" Yesu alimwaswike ati, "Wilaipaya, Wilacita bucende, Wilaiba, Wilabepesha abanobe ubufi, ¹⁹ uleumfwila bawiso nabanoko, nokutemwa umwina mupalamano obe ngawemwine," ²⁰ Umulumendo umunono alandile kuli ena ati, "Ifi fyonse nalisunga. Nifinshi fimbi ningakabila?"

²¹ Yesu alandile kuli ena ati, "Ngaulefwaya ukuba uwakaele, kabiye, kashitishe fyonse ifyabunonshi bobe, upele nendalama kubapina, lyena walakwata icuma kumulu; elyo wise, unkonke." ²² Nomba ilyo umulumendo aumfwile ifyo Yesu amwebele, alifuminepo uwabulanda pantu alikwete ifyuma ifingi.

²³ Yesu alandile kubasambi bakwe ati, "Icine cine ndelanda kuli mwebo, calikosa umuntu wafyuma ukwingila mubufumu bwamumulu. ²⁴ Peka Nebo ndelanda kuli mwebo, calyangukapo ingamali ukupita palinso lya nshindano ukucila uwafyuma ukwingila mubufumu bwakwa Lesa."

²⁵ Ilyo abasambi baumfwile, palici bapapile sana nokulanda ati, "Nani uwinga pusuka?"

²⁶ Yesu alibaloleshe nokulanda ati, "Kubantu tekuti ficitike, nomba kuli Lesa ifintu fyonse fyalyanguka." Elyo.

²⁷ Petro amwaswike nokulanda kuli ena ati, "Moneni, twalishiile fyonse nokumikonka. Finshi tukakwata?"

²⁸ Yesu alandile kuli bena ati, "Icine cine ndelanda kuli mwebo ati, mukulengwa cipya ilyo Umwana mwaume wamuntu akekala pa citebe cabukata bwakwe, mwebo mwebankonka mukekala pafitebe ukumi limo nafibili, mukalapingula nemitundu ikumi limo na ibili iya bena Israeli. ²⁹ Onse uwasha ing'anda, bamunyina, bankashi yakwe, bawishi, banyina, abana, nangu nimpanga pamulandu weshina lyandi akapokelela imiku umwanda umo elyo nokupoka ubumi bwakubelela. ³⁰ Nomba abengi abakutampa bakaba abanuma, nabanuma bakaba abakutampa.