पाठ 24
1
अब्राहम अब बुढ़वा हो गयल रहलन, अऊर ओनकर उमर बहुत रहल, अऊर यहोवा सब बतियन मे ओनके आशीष देहले रहलन।
2
अब्राहम अपने ऊ दास से, जवन ओनके घरे में पुरनिया अऊर ओनके सब सम्पत्ति पे अधिकारी रहलन, कहलन, "आपन हाथ हमरे जंघा के नीचे रखा;
3
अऊर हमसे आकाश अऊर धरती के परमेश्वर यहोवा के ए विषय मे शपथ खा, कि तू हमरे लड़का बदे कनानी लड़कियन में से, जेकरे बीच में हम रहीला, केहू के न ले के अईबा।
4
लेकिन तू हमरे देश में हमरे ही कुटुम्बियन के लग्गे जाके हमरे लड़का इसहाक बदे एक लड़की ले अईबा।"
5
दास ओनसे कहलन, "कदाचित ऊ लड़की ई देश मे हमरे साथे आवअ के न चईहन; त का हमके तोहरे लड़का के ऊ देश में जहा से तू आयल हया ले जाए के पड़ी?"
6
अब्राहम ओनसे कहलन, "चौकस रहा, हमरे लड़का के ऊहाँ कभो ना ले जईहा।"
7
स्वर्ग क परमेश्वर यहोवा, जे हमके हमरे पिता के घरे से अऊर हमरे जनम भूमि से, ले आके, हमसे शपथ खाके कहलन, की "हम ई देश तोहरे वंश के देब; ओनही आपन दूत तोहरे आगे-आगे भेजीहन, कि तू हमरे लड़का बदे ऊहाँ से एक स्त्री ले आवा।
8
अऊर अगर ऊ लड़की तोहरे साथे आवअ के न चईहन तब तू हमरे ई शपथ से छूट जईबा; लेकिन हमरे लड़का के ऊहाँ मत ले जईहा।"
9
तब ऊ दास अपने स्वामी अब्राहम के जांघ के नीचे आपन हाथ रख के ओनसे ई बात क शपथ खईलन।
10
तब ऊ दास अपने मालिक के ऊटन मे से दस ऊँट छांट के ओनकरे सब उत्तम-उत्तम पदार्थन में से कुछ-कुछ लेके चललन; अऊर मेसोपोटामिया मे नाहोर के नगर के लग्गे पहुंचलन।
11
अऊर ऊ ऊंटन के नगर के बहरे कुआं के लग्गे बईठईलन। ऊ संझा क समय रहल, जउने समय लड़कियन पानी भर बदे निकलत रहलिन।
12
ऊ कहअ लगलन, "हे हमार मालिक अब्राहम क परमेश्वर यहोवा, आज हमरे काम के सिद्ध करा, अऊर हमरे मालिक अब्राहम पे करुणा करा।
13
देखा, हम पानी क ई सोता के लग्गे खड़ा हई; अऊर नगरवासियन क बिटिया पानी भर बदे निकलल आवत हईन।
14
एहि से अईसन होए दा कि जवन कन्या से हम कही, 'आपन गगरी हमरे ओर लटकावा, कि हम पीई,' अऊर ऊ कहअ, 'ला, पी ला, बाद में हम तोहरे ऊँटन के भी पिलाईब,' ई ऊहअ हो जेके तू अपने दास इसहाक बदे ठहरईले हया; एहि तरीके से हम जान लेब की तू हमरे मालिक पे करुणा कईले हया।"
15
अऊर अईसन भयल की जब ऊ कहत ही रहलन कि रिबका, जे अब्राहम के भाई नाहोर क जन्मावल मिल्का क बेटवा, बतूएल क बिटिया रहलिन, ऊ कंधा पे गगरी लेहले अईलिन।
16
ऊ बहुत सुन्दर, अऊर कुवारी रहलिन, अऊर कऊनों अदमी क मुंह ना देखले रहलिन। ऊ कुआँ में सोता के लग्गे उतर गईलिन, अऊर आपन गगरी भर के ऊपर अईलिन।
17
तब ऊ दास ओनसे भेंट करअ बदे दउड़लन अऊर कहलन, "अपने गगरी मे से थोड़ा से पानी हमके पिया दा।"
18
ओन कहलिन, "हे हमार प्रभु, ला, पी ला," अऊर ऊ फूर्ती से गगरी क पानी उतार के हाथे मे लिहले-लिहले ओनके पिया देहलिन।
19
जब ऊ ओनके पानी पिया चुकलिन, तब कहलिन, "हम तोहरे ऊँटन बदे भी तब तक पानी भर-भर के लिआईब, जब तक ऊ पी न लेईहन।"
20
तब ऊ फूर्ती से अपने गगरी क पानी हौद में डाल के फिर कुआँ पे भरअ बदे दऊड़ गईलिन; अऊर ओनकरे सब ऊँटन बदे पानी भर देहलिन।
21
अऊर ऊ अदमी ओनकरे ओर चुपचाप अचम्भा होके ताकत रहलन, अऊर ई सोचत रहलन कि यहोवा हमार यात्रा सफल कईले हयन की नाही।
22
जब ऊँट पानी पी चुकलन, तब ऊ अदमी आधा तोला सोने क नत्थ ओनके निकाल के देहलन, अऊर दस तोला क कंगन ओनके हाथे में पहिना देहलन;
23
अऊर पूछलन, "तू के कर बिटिया हऊ? ई हम के बतावा। का तोहरे पिता के घरे मे हमके रुकअ बदे जगह हव?"
24
ऊ उत्तर देहलीन, "हम त नाहोर क जन्मावल मिल्का के बेटवा बतूएल क बिटिया हई।"
25
फिर ओन ओनसे कहलिन, "हमरे ईहाँ पुआल अऊर चारा बहुत हव, अऊर रहअ बदे जगह भी हव।"
26
तब ऊ अदमी सिर झुका के यहोवा के दण्डवत कईके कहलन,
27
"धन्य हया हमरे मालिक अब्राहम क परमेश्वर यहोवा, जवन आपन करुणा अऊर सच्चाई हमरे मालिक के ऊपर से हटा ना लेहलन: यहोवा हमके ठीक रस्ते पे चला के हमके हमरे मालिक के भाई-बन्धुवन के घरे पहुँचा देहले हयन।"
28
तब ऊ लड़की दऊड़ के अपने माता से ई घटना क सब हाल बता देहलिन।
29
तब लाबान जे रिबका क भाई रहलन, बहरे कुआँ के पास ऊ अदमी के लग्गे दउड़ गईलन।
30
अऊर अईसन भयल की जब ऊ नत्थ अऊर अपने बहिन रिबका के हाथे मे कंगन भी देखलन, अऊर ऊ ई बात भी सुनलन कि ऊ अदमी हम से अईसन बात कहलन; तब लाबान ऊ पुरुष के लग्गे गईलन; अऊर का देखलन, कि ऊ सोता के पास ऊंटन के लग्गे खड़ा हयन।
31
ऊ कहलन, "हे यहोवा के ओर से धन्य अदमी अन्दर आवा तू बहरे काहे खड़ा हया? हम तोहरे बदे घरे के, अऊर ऊँटन बदे भी जगह तईयार कईले हई।"
32
एहि पे ऊ अदमी घरे में गईलन; अऊर लाबान ऊटन क काठी खोल के पुआल अऊर चारा देहलन; अऊर ओनके अऊर ओनकरे साथियन के पांव धोव बदे पानी देहलन।
33
तब अब्राहम के दास के जलपान बदे ओनके आगे कुछ रखल गयल; लेकिन ऊ कहलन, "हम जब तक आपन प्रयोजन न कह देब, तब तक कुछो न खाईब।" लाबान कहलन, "कह दा।" ।
34
तब ओन कहलन, "हम त अब्राहम क दास हई।
35
यहोवा हमरे मालिक के बड़ा आशीष देहले हयन; एही से ऊ महान पुरुष हो गयल हयन; अऊर यहोवा ओनके भेड़-बकरी, गाय-बैल, सोना-रूपा, दास-दासी, ऊँट अऊर गदहन के देहले हयन।
36
अऊर हमरे मालिक के औरत के बुढ़ापा में ओनसे एक लड़का पैदा भयल हव; अऊर ऊ लड़का के अब्राहम आपन सब कुछ दे देहले हयन।
37
हमार मालिक हमसे ई शपथ खियईले हयन, की 'हम ओनकरे लड़का बदे कनानी लड़कियन में से जेकरे देश में ऊ रहअ लन, कऊनों लड़की के न ले आईब।
38
हम ओनकरे पिता के घरे, अऊर कुल के लोगन के लग्गे जाके ओनके लड़का बदे एक लड़की ले आईब।"
39
तब हम अपने मालिक से कहली, 'कदाचित ऊ लड़की हमरे पीछे न आवअ।'
40
तब ओन हमसे कहलन, 'यहोवा जेकरे सामने हम चलत आयल हई, ऊ तोहरे संगे अपने दूत के भेज के तोहार यात्रा सफल करिहन; अऊर तू हमरे कुल, अऊर हमरे पिता के घराने मे से हमरे लड़का बदे एक लड़की के लिआ सकबा।"
41
तू तब हमरे शपथ से छूटबा, जब तू हमरे कुल के लोगन के लग्गे पहुंचबा; अऊर अगर ऊ तोहके कऊनो लड़की न दे, त तू हमरे शपथ से छूट जईबा।'
42
एही से हम आज ऊ कुआँ के लग्गे आके कहअ लगली, 'हे हमरे मालिक अब्राहम क परमेश्वर यहोवा, अगर तू हमरे ई यात्रा के सफल करत हया;
43
त देखा हम पानी के ई कुआँ के लग्गे खड़ा हई; अऊर अईसन हो, की जवन कुमारी पानी भर बदे अईहन, अऊर हम ओनसे कही, "अपने गगरी में से हमके थोड़ा से पानी पियावा,"
44
अऊर ऊ हमसे कहअ, "पी ला, अऊर तब से हम तोहरे ऊँटन के भी पानी पीए बदे भर देब," ऊ उहअ लड़की रहअ जेके तू हमरे मालिक के लड़का बदे ठहरईले हया।'
45
हम मन ही मन ई कहत रहे, की देखा रिबका कंधा पे गगरी लेहले निकल अईलिन; फिर ऊ सोता के लग्गे उतर के पानी भरअ लगलिन। हम ओनसे कहली, 'हमके पानी पिला दा।'
46
अऊर ऊ जल्दी से अपने गगरी के कंधा पे से उतार के कहलिन, 'ला, पी ला, बाद मे हम तोहरे ऊँटन के भी पिलाईब,' एहि प्रकार से हम पानी पी लेहली, अऊर ऊ ऊँटन के भी पानी पीया देहलिन।
47
तब हम ओनसे पूछली, 'तू के कर बिटिया हऊ?' अऊर ओन कहलिन, 'हम त नाहोर क जन्मावल मिल्का के लड़का बतूएल क बिटिया हई,' तब हम ओनकरे नाक में ऊ नत्थ अऊर ओनकरे हाथे में ऊ कंगन पहिना देहली।
48
फिर हम सिर झुका के यहोवा के दण्डवत् कईली, अऊर अपने मालिक अब्राहम के परमेश्वर यहोवा के धन्य कहली, काहे की ऊ हमके ठीक रस्ते से पहुंचईलन कि हम अपन मालिक के लड़का बदे ओनके कुटुम्बी के लड़की के ले जाई।
49
एहि से अब, अगर तू हमरे मालिक के संगे कृपा अऊर सच्चाई क व्यवहार करअ के चाहत हया, त हमसे कहा; अऊर अगर नाही चाहत हया; तब्बो हमसे कह दा; ताकि हम दहिने तरफ या बाई तरफ फिर जाई।"
50
तब लाबान अऊर बतुएल उत्तर देहलन, "ई बात यहोवा के तरफ से भयल हव; एहि से हमने तोहसे न त भला कह सकिला न त बुरा।
51
देखा, रिबका तोहरे सामने हईन, ओनके ले जा, अउर ऊ यहोवा के वचन के अनुसार, तोहरे मालिक के लड़का क पत्नी हो जाय।"
52
ओनकर ई बात सुन के, अब्राहम क दास भूमि पे गिर के यहोवा के दण्डवत कईलन।
53
फिर ऊ दास सोना अऊर रूपा क गहना, अऊर कपड़ा निकाल के रिबका के देहलन; अऊर ओनके भाई अऊर माता के भी अनमोल अनमोल वस्तु देहलन।
54
तब ऊ अपने संगी सहित भोजन कईलन, अऊर रात ओही बितईलन। ओन तड़के उठ के कहलन, "हमरे अपने मालिक के लग्गे जाए बदे बिदा करा।"
55
रिबका क भाई अऊर माता कहलीन, "लड़की के हमरे लग्गे कुछ दिन मतलब कम से कम दस दिन रहअ दा; फिर ओकरे बाद ऊ चल जईहन।"
56
ऊ ओनसे कहलन, "यहोवा हमार यात्रा सफल कईले हयन; एहि से तू हमके मत रोका अब हमके विदा कर दा, की हम अपने मालिक के लग्गे जाई।"
57
ऊ लोग कहलन, "हमने लड़की के बोला के पूछत हई, अऊर देखल जाई कि, ऊ का कहत हईन।"
58
अऊर ऊ लोग रिबका के बुला के ओनसे पूछलन, "का तू ई अदमी के साथे जईबू?" ऊ कहलिन, "हा हम जाईब।"
59
तब ऊ लोग अपने बहिन रिबका, अऊर ओनकरे दासी अऊर अब्राहम के दास, अऊर ओनकरे साथी सब के विदा कईलन।
60
अऊर ऊ लोग रिबका के आशीर्वाद देके कहलन, "हे हमार बहिन, तू हजारन लाखन क आदिमाता होवा, अऊर तोहार वंश अपने दुश्मन के नगर क अधिकारी होव।"
61
तब रिबका अपने सहेलियन समेत चललिन; अऊर ऊ ऊँट पे चढ के ऊ अदमी के पीछे हो लेहलीन। ए तरे ऊ दास रिबका के साथे ले के चल देहलन।
62
इसहाक जे दक्षिण देश मे रहत रहलन, लहैरोई नाम क कुआँ से होके चलल आवत रहलन।
63
संझा के समय मे ऊ मैदान मे धियान कर बदे निकलल रहलन; अऊर ऊ आँख उठा के का देखलन, कि ऊंट चलल आवत हयन।
64
रिबका भी आँख उठा के इसहाक के देखलिन, अऊर देखत ही ऊँट पे से उतर गईलीन।
65
तब ओन दास से पूछलीन, "जवन अदमी हमसे मिलअ बदे मैदान में चलल आवत हयन, ऊ के हव?" दास कहलन, "ऊ त हमार मालिक हयन।" तब रिबका घुंघट ले के अपने मुँह के ढाक लेहलीन।
66
दास इसहाक से अपने साथे भईल घटना क वर्णन कईलन।
67
तब इसहाक रिबका के अपने माता सारा के तम्बू मे ले अईलन, अऊर ओनसे शादी करके ओनसे प्रेम कईलन। ए प्रकार इसहाक के माता के मरले के बाद शान्ति प्राप्त भयल।