पाठ 25
1
तब अब्राहम एक औरत ब्याह लेहलन जेकर नाम कतूरा रहल।
2
ओनसे जिम्रान, योक्षान, मदना, मिद्यान, यिशबाक अऊर शूह पैदा भईलन।
3
योक्षान से शेबा अऊर ददान पैदा भईलन; अऊर ददान क वंश में अश्शूरी, लतूशी अऊर लुम्मी लोग भईलन।
4
मिद्यान क लड़का एपा, एपेर, हनोक, अबीदा अऊर एल्दा भईलन, ई सब कतूरा क संतान भईलन।
5
इसहाक के त अब्राहम सब कुछ देहलन।
6
लेकिन अपने रखेलियन के लड़कन के, कुछ-कुछ दे के अपने जीते जी अपने लड़का इसहाक के लग्गे से पूरब देश में भेज देहलन।
7
अब्राहम क पूरा उमर एक सौ पचहत्तर साल भयल।
8
अब्राहम क दीर्घ आयु होवअ के कारण अर्थात् पूरा बुढ़ापा के अवस्था में प्राण छूट गयल; अऊर ऊ अपने लोगन में जाके मिल गईलन।
9
ओनकर लड़का इसहाक अऊर इश्माएल, हित्ती सोहर के लड़का एप्रोन क मम्रे के लग्गे वाले भूमि में, जवन मकपेला क गुफा रहल, ओमे ओनके मट्टी देहलन;
10
अर्थात् जवन भूमि अब्राहम हित्तियन से खरीदले रहलन; ओही में अब्राहम अऊर ओनकरे औरत सारा, दुनों के मट्टी दिहल गईल।
11
अब्राहम के मरअ के बाद परमेश्वर ओनके लड़का के जे लहैरोई नाम के कुआँ के लग्गे रहत रहलन, आशीष देहलन।
12
अब्राहम क लड़का इश्माएल जवन सारा के मिस्री दासी हाजिरा से पैदा भयल रहलन, ओनकर इ वंशावली हव।
13
इश्माएल के लड़कन क नाम अऊर वंशावली ई हव: अर्थात् इश्माएल क बड़का लड़का नबायोत, फिर केदार, अदबएल, मिबसाम,
14
मिश्मा, दूमा, मस्सा,
15
हदद, तेमा, यतूर, नापीश, अऊर केदमा।
16
इश्माएल क लड़का ईहअ भईलन, अऊर ई नाम के अनुसार एनकर गाँव, अऊर छावनियन क नाम भी पड़ल; अऊर ईहअ बारह अपने-अपने कुल क प्रधान भईलन।
17
इश्माएल क पूरा उमर एक सौ सैंतीस साल क भयल, तब ओनकर प्राण छूट गयल, अऊर ऊ अपने लोगन में जा मिललन।
18
अऊर ओनकर वंश हवीला से शूर तक, जवन मिस्र के लग्गे अश्शूर के रस्ते में हव, बस गईलन; अऊर ओनकर भाग ओनके सब भाई-बन्धुवन के लग्गे पड़ल।
19
अब्राहम क लड़का इसहाक क वंशावली ई हव: अब्राहम से इसहाक पैदा भईलन;
20
अऊर इसहाक चालीस साल क होके रिबका, जे पद्दनराम क वासी, अरामी बतूएल क बिटिया, अऊर अरामी लाबान क बहिन रहलिन, ब्याह लिहलन।
21
इसहाक क औरत बांझ रहलिन, एहि से ऊ ओनके बदे यहोवा से बिनती कईलन; अऊर यहोवा ओनकर विनती सुनलन, ई प्रकार ओनकर औरत रिबका गर्भवती भईलिन।
22
लड़का ओनके गर्भ में आपस में लिपट के एक-दूसरे के मारअ लगलन। तब ऊ कहलिन, "हमार जवन अईसही दशा रही त हम कईसे जिन्दा रहब?" अऊर ऊ यहोवा क इच्छा पूछअ के गईलिन।
23
तब यहोवा ओनसे कहलन, "तोहरे गर्भ मे दू जाति हयन, अऊर तोहरे कोख से निकलत ही दू राज्य क लोग अलग-अलग होईहन, अऊर एक राज्य क लोग दूसरे से ज्यादा सामर्थी होईहन अऊर बड़का लड़का छोटका लड़का के अधीन होईहन।"
24
जब ओनकर लड़का पैदा करअ क समय आयल, तब का प्रगट भयल, की ओनकरे गर्भ में जुड़वा लड़का हयन।
25
पहिले जवन पैदा भईलन ऊ लाल निकललन, अऊर ओनकर पूरा शरीर कम्बल के जईसन रोममय रहल; एहि से ओनकर नाम एसाव रखल गयल।
26
पीछे ओनकर भाई अपने हाथे से एसाव क एड़ी पकड़ल पैदा भईलन; अऊर ओनकर नाम याकूब रखल गयल। जब रिबका ओनके जनम देहलिन, तब इसहाक साठ साल क रहलन।
27
फेर ऊ लड़कन बढ़अ लगलन अऊर एसाव त वनवासी होके चतुर शिकार खेलअ वाला हो गईलन, लेकिन याकूब सीधा लड़का रहलन, अऊर तम्बूवन में रहत रहलन।
28
इसहाक एसाव के अहेर क मांस खायल करत रहलन, एही से ऊ एसाव से प्रीति रखत रहलन; लेकिन रिबका याकूब से प्रीति रखत रहलिन।
29
एक दिन याकूब भोजन बदे दाल पकावत रहलन; अऊर एसाव जंगल से थकल अईलन।
30
तब एसाव याकूब से कहलन, "ऊ जवन लाल वस्तु हव, ओहि लाल वस्तु में से हमके कुछ खियावा, काहेकि हम थकल हई।" एहि कारण ओनकर नाम एदोम भी पड़ल।
31
याकूब कहलन, "अपने पहिलऊठा क अधिकार आज हमरे हाथे बेच दा।"
32
एसाव कहलन, "देखा, हम त अबहीं मरअ पे हई, एहि से पहिलऊठा के अधिकार से हमार का लाभ होई?"
33
याकूब कहलन, "हमसे अबईहं शपथ खा," अतः एसाव ओनसे शपथ खईलन, अऊर अपने पहिलऊठा क अधिकार याकूब के हाथे बेच देहलन।"
34
एप्पर याकूब एसाव के रोटी अऊर पकावल मसूर क दाल देहलन, अऊर ऊ खईलन पियलन, तब उठ के चल गईलन। ई प्रकार एसाव अपने पहिलऊठा के हक के तुच्छ जनलन।