पाठ 22
1
ई बाती के बाद अईसन भयल की परमेश्वर, अब्राहम से ई कह के ओनकर परीक्षा कईलन, "हे अब्राहम!" ऊ कहलन, "देखा, हम ईहाँ हई।"
2
ऊ कहलन, "अपने लड़का मतलब अपने एकलऊता लड़का इसहाक के, जेसे तू प्रेम रखअ ला, संगे लेके मोरिय्याह देश मे चल जा, अऊर ऊहाँ ओके एक पहाड़ पे जवन हम तोहके बताईब होमबलि करके चढ़ावा।"
3
अतः अब्राहम सबेरे तड़के उठलन अऊर अपने गदहा पे काठी कस के अपने दु सेवक, अऊर अपने लड़का इसहाक के संगे लेहलन, अऊर होमबलि बदे लकड़ी चीर लेहलन; तब निकल के ऊ जगह के तरफ चललन, जेकर चर्चा परमेश्वर ओनसे कईले रहलन।
4
तीसरे दिन अब्राहम आँख उठा के दूर से ऊ जगह के देखलन।
5
अऊर ऊ अपने सेवकन से कहलन, "गदहा के लग्गे एही जगह रुकल रहा; ई लड़का अऊर हम ऊहाँ तक जाके अऊर दण्डवत् कईके, फेर तोहरे लग्गे लऊट आईब।"
6
तब अब्राहम होमबलि क लकड़ी लेके अपने लड़का इसहाक पे लदलन, अऊर आग अऊर छूरी के अपने हाथे मे लेहलन; अऊर ऊ दोनो एक संगे चल पड़लन।
7
इसहाक अपने पिता अब्राहम से कहलन, "हे हमार पिता," ऊ कहलन, "हे हमार लड़का, का बात हव?" ऊ कहलन, "देखा, आग अऊर लकड़ी त हव; पर होमबलि बदे भेड़ कहाँ हव?"
8
अब्राहम कहलन, "हे हमार लड़का, परमेश्वर होमबलि बदे भेड़ क उपाय खुद करिहन।" अऊर ऊ दुनों संगे-संगे आगे चलत गईलन।
9
जब ऊ लोग ऊ जगह पे जवन परमेश्वर ओनेक बतईले रहलन पहुंचलन; तब अब्राहम ऊहाँ वेदी बना के लकड़ी चुन-चुन के रखलन, अऊर अपने लड़का इसहाक के बांध के वेदी के ऊपर रखल लकड़ियन के ऊपर रख देहलन।
10
फिर अब्राहम हाथ बढ़ाके छूरी के ले लेहलन की अपने लड़का के बलि करअ।
11
तब यहोवा क दूत स्वर्ग से ओनके पुकार के कहलन, "हे अब्राहम, हे अब्राहम!" ऊ कहलन, "देखा, हम ईहाँ हई।"
12
ऊ कहलन, "ऊ लड़का पे हाथ मत बढ़ावा, अऊर न ओके कुछो करा; काहे कि तू जवन हमसे अपने लड़का वरन् अपने एकलऊता लड़का के भी ना रख छोड़ला; एहिसे अब हम जान गईली की तू परमेश्वर क भय मानला।"
13
तब अब्राहम आँख उठईलन, अऊर का देखलन, कि ओनके पीछे एक मेढ़ा अपने सींग से झाड़ी में फंसल हव ला; अतः अब्राहम जाके ऊ मेढ़ा के लेहलन, अऊर अपने लड़का के जगह पे होमबलि कईके चढ़ईलन।
14
अब्राहम ऊ जगह क नाम यहोवा यिरे रखलन, एही के अनुसार आज तक भी कहल जाला, "यहोवा के पहाड़ पे प्रदान करल जाला।"
15
फेर यहोवा क दूत दूसरे बार स्वर्ग से पुकार के अब्राहम से कहलन।
16
यहोवा क ई वाणी हव, कि हम आपन ही शपथ खात हई, कि तू जवन ई काम कईले हया कि अपने लड़का, वरन् अपने एकलउता लड़का के भी ना रख छोड़ला;
17
एहि कारण हम जरूर तोहके आशीष देब; अऊर जरूर तोहरे वंश के आकाश के तारागण, अऊर समुन्दर के तट के बालू के तरे अनगिनत करब, अऊर तोहार वंश अपने शत्रुवन के नगरन क अधिकारी होईहन;
18
अऊर धरती क सब जातियन अपने के तोहरे वंश के कारण धन्य मनिहन: काहेकि तू हमार बात मनले हया।"
19
तब अब्राहम अपन सेवकन के लग्गे लऊट अईलन, अऊर ऊ सब बेर्शेबा संगे-संगे गईलन; अऊर अब्राहम बेर्शेबा में रहअ लगलन।
20
ई बतियन के बाद अईसन भयल की अब्राहम के ई संदेश मिलल, "मिल्का के तोहरे भाई नाहोर से सन्तान पैदा भयल हव।"
21
मिल्का क लड़का त ई भईलन, अर्थात् ओनकर जेठा ऊस, अऊर ऊस क भाई बूज, अऊर कमूएल, जवन अराम क पिता भईलन।
22
फेर केसेद, हज़ो, पिल्दाश, यिद्लाप, अऊर बतूएल।
23
ई आठों के मिल्का अब्राहम के भाई नाहोर के जरिए जनम देहलिन। अऊर बतुएल से रिबका पैदा भईलिन।
24
फेर नाहोर के रुमा नाम क एक रखैल भी रहलिन; जेसे तेबह, गहम, तहश, अऊर माका पैदा भईलन।