¹ यहोवा जईसन कहले रहलन ओइसही सारा क सुधि लेके ओनकरे संगे अपने वचन के अनुसार कईलन। ² सारा अब्राहम से गर्भवती होके ओनके बुढ़ापा मे ऊहअ नियुक्त समय पे जवन परमेश्वर ओनसे ठहरईले रहलन, एक लड़का पैदा भयल। ³ अब्राहम अपने लड़का क नाम जवन सारा से पैदा भयल रहल इसहाक रखलन l ⁴ अऊर जब ओनकर लड़का इसहाक आठ दिन क भईलन, तब ओन परमेश्वर के आज्ञा के अनुसार ओनकर खतना कईलन। ⁵ जब अब्राहम क लड़का इसहाक पैदा भयल, तब ओन एक सौ साल क रहलन। ⁶ अऊर सारा कहलिन, "परमेश्वर हमके खुश कईले हयन; एहि से सब सुनअ वाला भी हमरे संगे खुश होईहन।" ⁷ फिर ओन ई भी कहलिन, "का केहू कब्भो अब्राहम से कह सकत रहल, कि सारा लड़कन के दूध पियईहन? लेकिन देखा, हमसे ओनके बुढ़ापा मे एक लड़का पैदा भयल।"

⁸ अऊर ऊ लड़का बढ़ल अऊर ओनकर दूध छुड़ावल गयल; अऊर इसहाक के दूध छुड़ावअ के दिन अब्राहम बड़ा भोज कईलन।

⁹ तब सारा के मिस्री हाजिरा क लड़का, जवन अब्राहम से पैदा भयल रहल, हँसी करत के देखाई पड़ल। ¹⁰ एहि कारण ऊ अब्राहम से कहलिन, "ई दासी के लड़का सहित निकाल दा: काहे कि ई दासी क लड़का हमरे लड़का इसहाक के साथे भागी न होई।" ¹¹ ई बात अब्राहम के अपने लड़का के कारण बुरा लगल। ¹² तब परमेश्वर अब्राहम से कहलन, "ऊ लड़का अऊर अपने दासी के कारण तोहके बुरा न लगअ, जवन बात सारा तोहसे कहलिन, ओके माना, काहेकि जवन तोहार वंश कहलईहन ऊ इसहाक से ही चली। ¹³ दासी के लड़का से भी हम एक जाति पैदा करब, ए बदे की ऊ तोहार वंश हयन।" ¹⁴ एहि से अब्राहम सबेरे तड़के उठ के रोटी अऊर पानी से भरल चमड़ा क थइला हाजिरा के देहलन, अऊर ओनकरे कंधा पे रखलन, अऊर ओनके लड़का के भी दे के ओनके विदा कईलन। ऊ चल गईलिन, अऊर बेर्शेबा के जंगल में भटकअ लगलिन। ¹⁵ जब थईला क पानी खत्म हो गयल, तब ऊ लड़का के एक झाड़ी के नीचे छोड़ देहलिन। ¹⁶ अऊर खुद ओनसे तीर भर के टप्पे पे दूरे जाके ओकरे सामने ई सोच के बईठ गईलिन, "कि हम के लड़का क मृत्यु देखअ के न पड़अ।" तब ऊ ओनके सामने बईठ के चिल्ला-चिल्ला के रोवअ लगलिन। ¹⁷ परमेश्वर ऊ लड़का क सुनलन; अऊर ओनकर दूत स्वर्ग से हाजिरा के पुकार के कहलन, "हे हाजिरा, तोहके का भयल? मत डेरा; काहेकि जहाँ तोहार लड़का हव, ऊहाँ से ओनकर आवाज परमेश्वर के सुनाई पड़ल हव। ¹⁸ उठा, अपने लड़का के उठावा अऊर अपने हाथ से सम्भाला; काहेकि हम ओनके जरिए एक बड़ा जाति बनाईब।" ¹⁹ तब परमेश्वर ओनकर आँख खोल देहलन, अऊर ओनके एक कुआँ दिखाई पड़ल; तब ओन जाके थईला के, पानी से भर के लड़का के पियइलिन। ²⁰ अऊर परमेश्वर ऊ लड़का के साथे रहलन; अऊर जब ऊ बड़ा भईलन, तब जंगल मे रहत-रहत धनुर्धारी बन गईलन। ²¹ ऊ पारान नामक जंगल मे रहत रहलन; अऊर ओनकर माता ओनकरे बदे मिस्र देश से एक लड़की मँगवईलिन।

²² ऊ दिन मे अईसन भयल की अबीमेलेक अपने सेनापति पीकोल के संगे लेके अब्राहम से कहअ लगलन, जवन कुछ तू करअ लअ ओम्मन परमेश्वर तोहरे संग रहअ लन; ²³ एहिसे अब हमसे ईहाँ ई विषय मे परमेश्वर क शपथ खा की तू न त हमसे छल करबा, अऊर न कभी हमरे वंश से करबा, परंतु जईसन करुणा हम तोहरे पे कईले हई, वईसहीं तू हमरे पे अऊर ई देश पे भी, जेम्मे तू रहअ ला, करबा।" ²⁴ अब्राहम कहलन, "हम शपथ खाईब ला।" ²⁵ अऊर अब्राहम अबीमेलेक के एक कुआँ के विषय मे जवन अबीमेलेक क दास लोग बलपूर्वक ले लेले रहलन, उलाहना देहलन। ²⁶ तब अबीमेलेक कहलन, "हम ना जानी ला कि ई काम के कईलेस; अऊर तू भी हमके नाही बतईला, अऊर न हम आज से पहिले एकरे बारे मे सुनली।" ²⁷ तब अब्राहम भेड़-बकरी, अऊर गाय-बैल अबीमेलेक के देहलन; अऊर ऊ दूनो लोग आपस मे वाचा बंधलन। ²⁸ अब्राहम सात मादा मेमनन के अलग कईके रखलन। ²⁹ तब अबीमेलेक अब्राहम से पूछलन, "ई सात बच्चियन के, जेके तू अलगे कईके रखले हया, का प्रयोजन हव? ³⁰ ऊ कहलन, "तू ई सात बच्चियन के ई बात क साक्षी जान के हमरे हाथ से ले ला कि हम ई कुआँ खोदले हई।" ³¹ ऊ दूनो लोग जवन ओ जगह मे शपथ खईलन, एहि कारण ऊ जगह क नाम बेर्शेबा पड़ल। ³² जब ऊ लोग बेर्शेबा मे परस्पर क वाचा बंधलन, तब अबीमेलेक अऊर ओनकर सेनापति पीकोल, उठ के पलिश्तियन के देश मे लऊट गईलन। ³³ फिर अब्राहम बेर्शेबा में झाऊ क एक पेड़ लगईलन, अऊर ऊहाँ यहोवा से जवन सनातन परमेश्वर हयन, प्रार्थना कईलन। ³⁴ अब्राहम पलिश्तियन के देश में बहुत दिन तक परदेशी होके रहलन।