पाठ 20
1
फिर अब्राहम ऊहाँ से निकल के दक्षिण देश मे आके कादेश अऊर शूर के बीच मे ठहरलन, अऊर गरार मे रहअ लगलन।
2
अऊर अब्राहम अपन पत्नी सारा के विषय मे कहअ लगलन, "ऊ हमार बहिन हईन," एहि से गरार क राजा अबीमेलेक दूत भेज के सारा के बुलवा लेहलन।
3
राती के परमेश्वर सपने मे अबीमेलेक के लग्गे आके कहलन, "सुना, जउने औरत के तू रख लेहले हया, ओकरे कारण तू मर जईबा, काहेकी ऊ सुहागिन हईन।"
4
लेकिन अबीमेलेक ओनकरे लगे ना गयल रहलन; एहि से ऊ कहलन, "हे प्रभु का तू निर्दोष जाति क भी घात करबा?
5
का ऊ खुद हमसे ना कहलन, 'कि ई हमार बहिन हईन?' अऊर ऊ औरत भी खुद कहलिन, 'कि ऊ हमार भाई हयन,' हम त अपने मन के खराई अऊर अपने व्यवहार के सच्चाई से ई काम कईली।"
6
परमेश्वर ओनसे सपना मे कहलन, "हाँ, हम भी जानीला कि तू अपने मन के खराई से ई काम कईले हया अऊर हम तोहके रोक भी ले ले हई की तू हमरे विरुद्ध मे पाप न करा; एहि कारण हम तोहके ओनके छूवअ नाही देहली।
7
एहि से अब तू ऊ अदमी के औरत के ओनके लऊटा दा; काहेकि ऊ नबी हयन, अऊर ऊ तोहरे बदे प्रार्थना करिहन, अऊर तू जियत रहबा। लेकिन अगर तू ओनके न लऊटईबा त जान रखिया, कि तू अऊर तोहार जेतना लोग हयन, सब जरूर मर जईहन।"
8
सबेरे अबीमेलेक तड़के उठ के अपने सब कर्मचारियन के बुलवा के ई सब बात सुनईलन; अऊर ऊ लोग बहुत डेरा गईलन।
9
तब अबीमेलेक अब्राहम के बुलवा के कहलन, "तू हमसे ई का कइले हया? अऊर हम तोहार का बिगड़ले रहली कि तू हमरे अऊर हमरे राज्य के ऊपर अईसन बड़का पाप डाल देहले हया? तू हमरे साथे ऊ काम कईले हया जवन उचित ना रहल।"
10
फिर अबीमेलेक अब्राहम से पूछलन, "तू का समझ के अईसन काम कईला?"
11
अब्राहम कहलन, "हम ई सोचली कि ई जगह मे परमेश्वर क कुछो भी भय न होई; एहि से ई लोग हमरे औरत के कारण हमके घात करिहन।
12
एकरे अलावा ऊ सच्चों मे हमार बहिन हईन, ऊ हमरे पिता क लड़की त हईन लेकिन हमरे माता क बिटिया ना हईन; फेर ऊ हमार औरत बन गईलिन।
13
अऊर अईसन भयल कि जब परमेश्वर हमके हमरे माता पिता क घर छोड़ के निकलअ क आज्ञा देहलन, तब हम ओनसे कहली की, 'एतना कृपा तोके हमरे पे करअ के होई कि हम दुनो जने जहाँ- जहाँ जाई ऊहाँ- ऊहाँ तू हमरे विषय मे कईहा की ई हमार भाई हयन'।"
14
तब अबीमेलेक भेड़-बकरी, गाय-बैल अऊर दास-दासियन के लेके अब्राहम के देहलन, अऊर ओनकरे औरत सारा के भी ओनके लउटा देहलन।
15
अऊर अबीमेलेक कहलन, "देखा, हमार देश तोहरे सामने हव; जहाँ तोहके अच्छा लगअ ऊहाँ रहा।"
16
अऊर सारा से ओन कहलन, "देखा, हम तोहरे भाई के रुपे क एक हजार टुकड़ा देहले हई। देखा, तोहरे सब संगियन के सामने ऊहअ तोहरे आँख क परदा बनिहन, अऊर सब के सामने तू ठिक होबू।"
17
तब अब्राहम यहोवा से प्रार्थना कईलन, अऊर यहोवा अबीमेलेक अऊर ओनके औरत के अऊर दासियन के चंगा कईलन, अऊर ऊ लोग बच्चा जनअ लगलिन।
18
काहेकि यहोवा अब्राहम के औरत सारा के कारण अबीमेलेक के घरे के सब औरतन क कोख पूरी रीति से बन्द कर देहले रहलन।