¹ "Mwilakupingula, namwe tamwakapingulwe. ² Pantu umo mwine mupingwila emo namwe mukapingwilwa, ne cipimo ico mwebo mupima, cikapiminwa kuli mwebo. ³ Cindo ulolekesesha pa kapampaliba ako akali mulinso lyakwa wenu, lelo webo taukocibona icimulando icili mulinso lyobe? ⁴ Kuti walanda shani kuli wenu ati, 'Leka mfunye akapampaliba ka akali mulinso lyobe; ulo icimulando cili mulinso lyobe? ⁵ Mwe ba mumbi munda mwe! Pakutampa funya umulando mulinso lyobe, eluntu ninshi walabona bwino nganshi ukufunya akapampaliba ako akali mu linso lya kwa wenu. ⁶ Wilakupela icili icamushilo kumbwa, kabili wilakuposa mapapa kuntanshi yakuba kapoli. Pantu limbi kuti banyantaula ifi kumakasa, kabili no kwaluka no kukusantaula mutumpifya.

⁷ "Lombeni, elo cikapelwa kuli mwebo. Fwayeni, elyo mukasangana. Konkosheni, elo cikeswilwa kuli mwebo. ⁸ Pantu onse uulomba, alapokelela; Onse uufwaya alasangana; Elo na ku muntu uukonkonsha, cileswilwako. ⁹ Nangu ninani pali mwebo, nga cakwebati umwana mwaume wakwe alomba umukate, uwinga mupeela iilibwe? ¹⁰ Nangu nga cakwebati alomba inswi, kuti amupeela insoka? ¹¹ Eico kanshi, nga cakwebati ifi mwebo mwe ba bifi mulishibile ifyo muli no kupela ifya bupe fyabune ku bana benu, nifinga ifyakucilapo akalundapo Shinwe wa mu mulu uupela ifintu ifyabune kuli bo aba mulomba? ¹² Eico, fyonse ifyo mufwaya abantu ukucita kuli mwebo, namwe efyo mufwile ukucita kuli bo, pantu ili lifunde no busesemo.

¹³ "Ingileni ukupitila pa mpongolo iya kumfyemfyenkana. Pantu impongolo yakusalala ne nshila ya kupabuka iitwala kuboni, kabili kwaba abantu abengi aba ipitamo. ¹⁴ Lelo Impongolo ya kumfyemfyenkana kabili ne nshila yakwafya iyo iitwala ku mweo, kabili baba abanono abaisangana.

¹⁵ "Muleku cengela naba kasesema wa bufi, abesa kuli mwebo mu mpapa sha mpanga lelo mucine mimbulu yakukalipisha. ¹⁶ Kufisabo fyabo mwebo eko mukabeshibila. Bushe abantu balonganya imyangashi ukutula ku fiti fya myunga nangu imikunyu ukutula ku nkololo? ¹⁷ Mu nshila imo ine, conse iciti cabune citwala ifisabo ifyabune, lelo iciti cabubi citwala ifisabo fya bubi. ¹⁸ Iciti cabune tekuti citwale ifisabo fya bubi nelyo iciti cabubi tekuti citwale ifisabo fyabune. ¹⁹ Conse iciti ici tatwala ifisabo fyabune balacitema elo no kuposwa mu mulilo. ²⁰ Eico kanshi, muli nokubeshibila kufitwalo fyabo. ²¹ Tali onse uulanda kuli nebo ati, 'Shikulu, Shikulu,' eukengila mubufumu bwa mumulu, lelo kano fye abo beka abacita ubufwayo bwa kwa Tata uwaba mu mulu. ²² Abengi abantu bakalanda kuli nebo muli bulya bushiku ati, 'we Shikulu, we Shikulu, bushe fwebo tatwasesemene mwishina lyobe, na mwishina lyobe tatwatamfishe ingulu, kabili mwishina lyobe twacitile ifingi ifipapusho?' ²³ Eluntu nebo umufuma cumi nkabebelapo ati, 'Fumeni fumeni pali nebo ntamishibile, mwebo mwe batakonka mafunde!'

²⁴ Eico Kanshi, onse uukutika amashiwi yandi noku yakonka akaba ukubati muntu uwa mano uwa kuulile ing'anda yakwe pe bwe. ²⁵ Imfula yalilokele, mulamba alishile na mapunga yalimine no kupuma muli iyo ing'anda, lelo tayawile, pantu yakulilwe pebwe. ²⁶ Lelo uyo onse uukutika amashiwi yandi elo nokukana yakonka akaba ukubati muntu icipuka ico icakulile ing'anda yaciko mu mucanga. ²⁷ Imfula yalilokele, mulamba alishile namapunga yalimine no kupuma kuli ilya ng'anda, kabili yaliwile, elo noboni bwaiko bwalipwililikile."

²⁸ Ifyacitikile fyakuti, uluntu Yesu apwilishe ukulanda aya mashiwi, amabumba yali papukile pamifundile yakwe, ²⁹ pantu alikubasambilisha ukubati ni uyo uwa kwete insambu, lelo tashali ukubati sha kuba kalemba babo.