¹ Nomba uluntu ulucelo lwaishile, bonse abakulu baku ba shimapepo elo naba kulu ba bantu balipingushenye nokwebati bepaye Yesu. ² Balimukakile, noku mutwala kumbi, elo nokumupela kuli Pilato chilolo.

³ Eluntu uluntu Yuda, uwamusenukile, abona ukwebati Yesu ba mupingwila ukufwa, alilapile elo nokubwelesha amakumi yatatu aya ndalama sha silifa ku bakulu baku ba shimapepo elo na bakulu, ⁴ elo no kulanda ati, "Napanga isambi pakusenuka umulopa uwakaele." Lelo bamwebele ati, "Bushe ico cindo kuli fwebo? Ibwene we mwine." ⁵ Eluntu aposele indalama sha silifa mwi tempele, elo nokuya, elo nokuya panse nokuya kuikulika umwine eka. ⁶ Abakulu baku ba shimapepo baishile kubula indalama sha silifa elo no kulanda abati, "Tefunde ukubika ishi mu cipao pantu ni ndalama sha mulopa." ⁷ Balanshenye uyu mulandu bonse, elo mulisho ndalama bashitilemo impanga yakwa nakabumba umwakushika abeni. ⁸ Napali uyu mulandu ilya mpanga baikuta ati, "Impanga ya mulopa" ukushinta na lelo. ⁹ Eluntu ico icalandilwe na kasesema Yeremia califikilishiwe, icakwebati, "Balipitile amakumi yatatu aya silifa, umutengo uwabikilwe pali ye ku bana ba Israeli, ¹⁰ elo bashipele naku mpanga yakwa nakabumba, ukubati ni filya fine Shikulu ankonkomeshe."

¹¹ NombaYesu atalamene ku ntanshi yakwa cilolo, elo na cilolo amwipwishe ati, "Bushe niwe Mfumu yaba Yuda?" Yesu amwasukile ati, "Ulilandile we mwine."

¹² Lelo uluntu balikumulu- bulwisha abakulu baku bashi- mapepo elo na bakulu, talik- wasukapo nangu kamo. ¹³ Eluntu Pilato alandile kuli ye ati, "Bushe taukokutika ifyo bakokushinina?" ¹⁴ Lelo ta asukilepo ishiwi nangu fye limo, eico cilolo alipapile. ¹⁵ Nomba pa mutebeto lwali lutambi lwakwa cilolo ukulekako umufungwa umo uwasalwa ku cintu bwingi. ¹⁶ Pali ilya nshita balikwete umufungwa uwaishibikilwe nganshi kuli buntala misoka uwe shina lya Balaba. ¹⁷ Eico uluntu balongene pamo, Pilato alandile kuli bo ati, "Bushe ninani uo mukofwaya ukwebati mikakwile? Balaba, nangu Yesu uyo uukutwa ati Kristu?" ¹⁸ Alishibile ukwebati baliletele Yesu kuli ye pa mulandu fye uwalupato.

¹⁹ Ulo ali alikele pa cipuna cabupingishi, umukashi wakwe amutumine ulusebo elo no kumweba ati, "Wi esha ukucita icintu nangu cimo kuli uyo muntu wakaele. Pantu Ndiculile nganshi lelo pa mulandu ne ciloto ico nacikwata pali ye."

²⁰ Lelo abakulu baku bashimapepo elo nabakulu ba belelekele ibumba no kwebati ba bapele Balaba, elo nokuleka Yesu epaiwe. ²¹ Cilolo alibepwishe ati, "Bushe pali aba babili ni nani uo nebo mukofwaya ukwebati mikakwile?" Balandile ati, "Balaba."

²² Pilato alandile kuli bo ati, "Nindo ifyo mukofwaya ukwebati nebo ncite na Yesu uukutwa Kristu?" Bonse balyasukile ati, "Mutanike."

²³ Eluntu alandile ati, "Findo, bushe mulandu ndo acitile?" Lelo balicililemo ukubilikisha ati, "Mutanike."

²⁴ Eico uluntu Pilato abwene ukwebati tapali icintu nangu cimo ico engacita, lelo icimfulunganya ecatampa, abulile amenshi, nokusamba amaboko pe bumba lya bantu, elo nokulanda ati, "Ndi wakaele pali uyu mulopa uwa uyu muntu. Ibweneni mwe bene."

²⁵ Abantu bonse baishile kulanda ati, "Lekeni umulopa wakwe ube pali fwebo elo nabana besu." ²⁶ Eluntu abakakwililile Balaba, lelo alopwele Yesu elo no kubapela ukwebati ba mutanike.

²⁷ Eluntu abashilika bakwa cilolo bapitiile Yesu noku mutwala mukati kalubansa ka mwisano elo balongenye ne mpuka ya bashilika bonse. ²⁸ Balimufulile ififwalo elo no kumufwika umwingila uwakukashika. ²⁹ Balukile ing'ana ya myunga elo noku mufwika ku mutwe, elo babikile inkonto mu minwe yakwe. Balikufukama kuli ye elo nokumupunika, ninshi bakolanda ati, "Kuku, Imfumu yaba Yuda!" ³⁰ Balimusakile amate, elo bali mupokele inkonto elo noku mupuma pa mutwe imiku ne miku. ³¹ Uluntu balekele ukumupunika, balimufulile umwingila elo no kumufwika ififwalo fyakwe, elo nokumutwala muku mu tanika.

³² Ulo bafumine panse, baishile kusangana umuntu ukutula ku Cyrene uwe shina lya Simoni, uo bapatikishe ukuya nabo pakweba ati enga mupitilako umusalaba. ³³ Baishile kufika pa ncende iikutwa ati Gologota, icipilibula ukwebati, "Pa cipanga." ³⁴ Bali mupele ukunwa umwangashi uo basankenyemo ne fyakulula. Lelo uluntu aumfwilemo, alifililwe ukunwa. ³⁵ Uluntu ba mutanikile, balepwile ififwalo fyakwe no kupendula, ³⁶ elo balikeele elo noku mulonda. ³⁷ Pa mulu wa mutwe wakwe balibikilepo icipampa, icalembelwepo ukwebati, "Uyu ni Yesu, Imfumu yaba Yuda." ³⁸ Utupondo tubili eto batanikile pamo naye, kamo ku kulyo kwakwe elo na kambi ku kuso kwakwe. ³⁹ Abo abalikupita bali kumutuka, bakopukumya ne mitwe ⁴⁰ elo nokulanda ati, "Webo wewali no konaula itempele elo noku kuula mu nshiku shitatu, ipusushe we mwine! Nga cakwebati uli Mwana wakwa Lesa, iciluka ukufuma pa musalaba!"

⁴¹ Mu musango umo wine abakulu baku bashi mapepo balikumupunika, pamo pene naba kalemba elo nabakulu, elo nokulanda ati, ⁴² "Alikupususha bambi, lelo tekuti aipusushe umwine. E Mfumu ya bena Israeli. Lekeni aciluke ukufuma pa musalaba, elo eluntu twalamusumina. ⁴³ Alicetekela muli Lesa, lekeni Lesa amupusushe lelo, nga cakwebati Lesa akofwaya ukumupususha. Pantu alikulanda nokwebati, 'Ndi Mwana wakwa Lesa.'" ⁴⁴ Mu musango umo wine notupondo uto bamutanikile naye pamo twalikulanda insele kuli ye.

⁴⁵ Nomba ukutula pansa yakulenga mutanda imfinshi yaishile kukupa icalo conse ukushinta napansa yakulenga pabula. ⁴⁶ Ukulola ku nsa yakulenga pabula, Yesu alilile no musowa uukulu elo no kulanda ati, "Eloi, Eloi, lama sabakatani?" Icalikupilibula ukwebati, "Lesa wandi, Lesa wandi, bushe nindo wandekelesesha?"

⁴⁷ Uluntu bamo abatalemene palya bakutikile ifi, balandile ati, "Akokuta Eliya."

⁴⁸ Ulo lwine fye umo ali butukile elo nokuya kubula ifuso, nokulitubika mu mwangashi uwakusasa, nokubika kwitete, elo noku mutambika ukwebati anwe. ⁴⁹ Abashala bonse balandile ati, "Muleke fye. Lekeni tubone nga cakwebati Eliya akoisa ku mupususha." ⁵⁰ Eluntu na kabili Yesu alilile mwishiwi ilikulu elo nokuleka umweo.

⁵¹ Boneni, icisalu ca mwitempele caishile kulepuka ukwakanikamo pakati ukutula pa mulu ukushinta panshi, elo ne calo calisunkene, elo nama bwe yalilepaukilemo. ⁵² Inshishi shalisukile, elo ne mibili ya bantu aba mushilo abo abasendeme mutulo utwamfwa balya lamukile. ⁵³ Balifumine mu nshishi panuma yaku shikuka kwakwe, nokwingila mu musumba uwa mushilo, elo balibonekele na ku bantu abengi. ⁵⁴ Nomba uluntu malonda elo na balikutambako Yesu ba bwena icinkukuma elo ne fintu ifyacitikile, baliketwe umwenso elo no kulanda ati, "Mucine uyu ali Mwana wakwa Lesa." ⁵⁵ Abengi abanakashi abo abakonkele Yesu ukutula ku Galilee kuku musakamana bali kulya kwine balikulolesha aka talamukila. ⁵⁶ Pali bo pali Maria Mandalena, Maria nyina wakwa Yakobo elo na Yusufu, elo nyina wabana bakwa Sebeti.

⁵⁷ Uluntu cali icungulo, kwalishileko umuntu umukankala ukutula ku Arimate, uweshina lya Yusufu, uyo naye uwali umusambi wakwa Yesu. ⁵⁸ Ailekubona Pilato elo noku mwipusha ukwebati enga piita umubili wakwa Yesu. Eluntu Pilato abebele ukwebati benga mupela. ⁵⁹ Yusufu apitiile umubili, noku ufunganya mu nsalu iya busaka, ⁶⁰ elo no kulalika icitumbi mu nshishi iipya iyo afonkwele mulibwe. Elo akunkulushishepo ne libwe ilikulu pa mwenshi wa nshishi elo nokuya afumako. ⁶¹ Maria Mandalena elo na Maria umbi bali kulya, baikele ukulolenkana ne nshishi.

⁶² Ubushiku bwakonkelepo, ubwali ubushiku bwapanuma Yakuteyanya, abakulu baku bashi mapepo elo naba Falisi balikele pamo na Pilato. ⁶³ Balandile ati, "Mulopwe, twaibukisha ukwebati uluntu ulya kabepa ali umutuntulu, alandile ati, 'Panuma ya nshiku shitatu Nkatutubuka nakabili.' ⁶⁴ Eico kanshi konkomesheni ukwebati inshishi ilekulondwa ukushinta napa bushiku bwa kulenga shitatu, nalimo kuti abasambi bakwe baisa, elo noku mwiba elo nokulanda ku bantu ati, 'Alibukile kuba kufwa,' elo ubufi ubwakulekelesha kuti bwacilapo pabwa ku tampilapo."

⁶⁵ Pilato alandile kuli bo ati, "Piteni malonda. Kabuyeni elo mushininkishe nokwebati kwacingililwa ukubati ni filya fine mwaishiba." ⁶⁶ Eico balile elo nokuya kucingilila inshishi, ukukomenena ilibwe elo nokubikapo malonda.