¹ Caishile kuba ukwebati uluntu Yesu apwile aya yonse amashiwi, alandile ku basambi bakwe ati, ² "Mulishibile ukwebati pa numa ya nshiku shibili inshiku nkulu ye Pasaka ikoisa, elo no Mwana wa Muntu baka mupela pakwbati baka mutanike."

³ Eluntu abakulu bakuba shimapepo elo na bakulu ba bantu balongene pamo mu cipango ca mukulu wakuba shi mapepo, uo balikukuta ati Kaifa. ⁴ Baumfwene pamo pakwikata Yesu mu bucenjeshi elo no kumwipaya. ⁵ Pantu balikulanda ati, "Tali pa nshita ya nshiku nkulu, epakwebati tapemine ifyongo mu bantu."

⁶ Nomba ulo Yesu ali mu Betani mu ng'anda yakwa Simoni uwali ne fibashi, ⁷ ulo alikulya pa tebulo, umwanakashi alishile kuli ye alikwete no musukupala uwa iwilemo amafuta aya mutengo nganshi, elo nokwisa kupongolwela pa mutwe wakwa Yesu. ⁸ Lelo uluntu abasambi babwene, balifulilwe elo no kulanda ati, "Mulandu ndo uwa kukwata ubonaushi ubwa musango uyu." ⁹ Aya mafuta nga baliyashitishe pa mutengo uukulu elo nokupela ku balanda."

¹⁰ LeloYesu, ico alishibile ifyo, alandile kuli bo ati, "Nindo ico mukucushisha uyu umwanakashi? Pantu acita icintu icabune kuli nebo. ¹¹ Mulaba lyonse na balanda, lelo nebo tabmwakabe nandi. ¹² Pantu uluntu acipongolwela aya amafuta pa mubili wandi, acitila ifi pa kushikwa kwandi. ¹³ Mucine Nkolanda kuli mwebo nati, ulo lonse ulo iyi imbila ya bune ikalekubilwa ku calo conse, ico uyu umwanakashi acita naco bakalekucilandapo pa kunjibusha."

¹⁴ Eluntu umo pali balya ikumi nababili, uwalikukutwa Yuda Esikalioti, aile ku bakulu bakuba shimapepo ¹⁵ elo nokulanda ati, "Bushe nindo mwinga kabila ukumpa pakwebati ninga muleta kuli mwebo?" Baishile ku mupimina indalama shama silifa amakumi yatatu. ¹⁶ Ukutula fye pali ilya nshita alikufwailisha inshila yaku mutwalilamo kuli bo.

¹⁷ Nomba pa bushiku bwkutampilapo ubwa mikate iyakubula ukututumuka abasambi balishile kuli Yesu elo nokulanda ati, "Bushe nikwisa uko mwingatemwa ukulila Ipasaka?"

¹⁸ Alandile ati, "Kabuyeni mu musumba ku muntu umo elo mulande kuli ye ati, 'Kasambilisha alanda ati, "Inshita yandi ili apepi. Nalasungila Icakucilila ku ng'anda kobe pamo na basambi bandi.'" ¹⁹ Abasambi balicitile ifyo ngomo Yesu abebele, elo baliteyenye ne cakulya ce Pasaka.

²⁰ Uluntu icungulo cafikile, alikele panshi nokulya na basambi ikumi na babili. ²¹ Ulo bali bakoya, alandile ati, "Mu cine Nko myeba nati umo pali mwebo ako nsenuka."

²² Baliketwe no bulanda, elo cila umo alitampile ukumwipusha, "Icine fye ntali Nebo, Shikulu?"

²³ Alyasukile ati, Uo uwalatubikila ukuboko pamo nandi mwi beseni eeuyo uko nsenuka. ²⁴ Umwana wa Muntu alinokuya, pamo nge fyo calembwa pali ye. Lelo alale we bulanda kuli ye uukoshitisha Umwana wa Muntu! Kuti cawamisha nga cakwebati uyu muntu tafyelwe."

²⁵ Yuda, uyo uwali noku musenuka alandile ati, "Bushe ninebo, Rabbi?" Alandile kuli ye ati, "Ulilandile we mwine."

²⁶ Ulo balikulya, Yesu abulile umukate, noku upaala, elo noku usunaula. Alipele abasambi bakwe elo no kubeba ati, "Buleni, lyeni." Uyu mubili wandi." ²⁷ Abulile inkomaki elo nokutotela, elo nokubapela elo no kulanda ati, "Nweni, mwebo bonse. ²⁸ Pantu uyu mulopa wandi uwa cipangano uyo uukosuma pa bantu abengi pa kubelelwa amasambi. ²⁹ Lelo Nkolanda kuli mwebo nati, Ntakatale ukunwa nakabili ku cisabo ca mwangashi, ukushinta na bulya ubushiku uluntu Nkanwa nenu mu bufumu bwakwa Tata."

³⁰ Uluntu baimbile ulwimbo, baile panse ku lupili lwa mi Olifi. ³¹ Eluntu Yesu alandile kuli bo ati, "Mwebo bonse mukobutuka pa mulandu wandi, pantu calilembwa ukwebati, "Nkapuma kacema elo ne mpaanga shi kapalangana.' ³² Lelo panuma nga natutubuka, Ndi nokumitangilila ku Galile."

³³ Lelo Petelo alandile kuli ye ati, "Nangu bonse babutuke pa mulandu obe, nebo ntakushe."

³⁴ Yesu alandile kuli ye ati, "Mucine Nkolanda kuli webo ati, lelo line ubushiku, ulo mukolwe talati alile, ninshi ulinkene imiku itatu."

³⁵ Petelo alandile kuli ye ati, "Nangu kufwa nobe, Ntakukane." Nabonse abasambi balilandile fimo fine.

³⁶ Eluntu Yesu aile nabo ku ku ncende iyo bakuta ati Getisemani elo alandile ku basambi bakwe ati, "Ikaleni pano ulo nalaya kulya elo no kupepa." ³⁷ Apiitile Petelo elo naba mwana Sebeti babili elo atampile ukumfwa ubulanda elo no kwafiwa. ³⁸ Eluntu alandile kuli bo ati, "Umupashi wandi waikatwa no bulanda nganshi, ukushinta na mukufwa. "Shaleni pano elo mube abakulola pamo nandi. ³⁹ Alileko akatalamukila, awile ubunkupeme, elo nokupepa. Alandile ati, "Mwe Tata, tali kufwaya kwandi, lelo ukufwaya kwenu." ⁴⁰ Aishile ku basambi bakwe elo nokubasangana balilele, elo alandile kuli Petelo ati, "Nindo, tekuti mulinde nandi pa nsa fye imo? ⁴¹ Loleni elo nokupepa pakwebati mwiponena mu matunko. Umupashi icine ukokabila, lelo umubili ulinakile." ⁴² Alifuminepo nakabli umuku wa bubili elo nokupepa. Alandile ati, "Mwe Tata, nga cakwebati ici tekuti cipite kano fye Nweko, lekeni ubufwayo bwenu bucitike." ⁴³ Alishile nakabili elo no kubasangana balisendeme, pantu bali notulo mu menso. ⁴⁴ Eico abashile na kabili, alifuminepo elo no kupepa umuku wakulenga butatu, ukulanda amashiwi yamo yene. ⁴⁵ Eluntu Yesu aishile ku basambi bakwe elo no kulanda kuli bo ati, "Bushe mucili mulisendeme elo nokutuusha? Boneni inshita ilifikile, elo no Mwana wa Muntu ako alukilwa mu minwe yaba masambi. ⁴⁶ "Alamukeni, katulekuya. Boneni, ye uuko nsenuka ali mupepi."

⁴⁷ Umo ali akolanda, Yuda, umo pali balya ikumi limo nababili, alishile. Ibumba ilikulu lyalishile naye ukufuma ku bakulu bakuba shimapepo elo na bakulu ba bantu. Baishile namapanga elo ne nkoli. ⁴⁸ Lelo umuntu uwali no senuka Yesu alibalangilile, no kulanda ati, "Uyo uo Nkotomona e eka uyo. Mu mwikate." ⁴⁹ Peka apo alishile kuli Yesu elo no kulanda ati, "Mwapoleni, Rabbi!" Elo no kumutomona.

⁵⁰ Yesu alandile kuli ye ati, "We munandi, cita ifyo ukonkele ukucita." Eluntu baishile, nokubika amaboko pali Yesu, elo noku mupiita. ⁵¹ Boneni, umo pali bo abali na Yesu alifungulwile ukuboko, nokusomona ulupanga, elo nokukoma umubomfi wa mukulu wakwa shimapepo, elo noku muputula ukutwi. ⁵² Eluntu Yesu alandile kuli ye ati, "Bwelesha ulupanga umo lwikala, pantu abo bonse ababomfya ulupanga ni kulupanga eko bakafwa. ⁵³ Bushe ukobona ukubati kuti nafilwa uku kuuta kuli Tata, elo naye nokuntumina ba malaika ukucila pa makana ikumi nababili? ⁵⁴ Lelo bushe amalembo kuti yafikilishiwa shani, aya kuti ifi filingile ukucitika?" ⁵⁵ Pali ilya inshita Yesu alandile kwi bumba ati, '"Bushe mwaisa na mapanga elo nenkoli ukwisa mukunjikata ukabati ndi cipondo? Cila bushiku Nalikwikala nkosambilisha mwi tempele, elo tamwanjikete. ⁵⁶ Lelo ifi fyonse fyacitika pakwebati ifyalembele bakasesema fifikilishe ifya kwebati." Eluntu abasambi bakwe balimushile elo elo no kufulumuka.

⁵⁷ Abo abaikete Yesu balimu- funishepo no kumutwala kuli Kaifa umukulu waku ba shimapepo, uko uko bakalemba elo na bakulu balongene pamo. ⁵⁸ Lelo Petelo alimukonkele lutonuma akatalamukila ukushinta na mulubansa lwakwa mukulu waku bashimapepo. Aingile mukati elo nokwikalako panshi pamo na bamalonda pa kubona ifikotumbukamo. ⁵⁹ Lelo abakulu bakuba shimapepo elo naba kapingula bonse balikufwailisha ubunte bwabufi ubwakubepesha Yesu pakwebati benga mwipaya. ⁶⁰ Tabasangene nangu bumo, nangu cali ukwebati bakambone wabumfi abengi balishile. Lelo mukulekelesha kwalishile babili ⁶¹ elo no kulanda ati, "Uyu muntu alikulanda ati, "Nebo kuti natobolola itempele lyakwa Lesa elo nokulikuula mu nshiku shitatu."'

⁶² Umukulu wakuba shimapepo alitalamene elo no kulanda kuli ye ati, "Bushe taukwetepo ifyakwasuka nangu fimo? Bushe findo ifi ifyo balekubela bukambone?" ⁶³ Lelo Yesu ali fye shilili. Umukulu wa kuba shimapepo alandile kuli ye ati, "Naku konkomesha mwishina ilyakwa Lesa uwa mweo, twebeko nga cakwebati niwe Kristu, Umwana uwakwa Lesa."

⁶⁴ Yesu amwasukile ati, "Ulilandile we mwine. Lelo Nkokweba nati, ukutula lelo ukuya na kuntanshi ukabona Umwana wa Muntu alikele ku kuboko ukwa maka, elo akoisa mu makumbi ya mu mulu."

⁶⁵ Eluntu umukulu wakuba shi mapepo alepwile ififwalo fyakwe elo no kulanda ati, "Alanda imiponto! Bushe cindo na nomba tukofwaila bakambone? Boneni, lelo mwakutika imiponto. ⁶⁶ Findo mukotontonkanyapo?" Balyasukile elo nokulanda ati, "Alilingile fye ukufwa." ⁶⁷ Eluntu bamusakiile amate pa menso elo noku mupuma, elo noku mulopola ne fisansa fya maboko yabo, ⁶⁸ elo nokulanda ati, "Tusesemene, we Kristu. Bushe ninani uwakupuma?"

⁶⁹ Nomba Petelo alikele mukati ka lubansa, elo umubomfi umwanakashi aishile kuli ye elo noku mweba ukuti, "Nobe wali na Yesu waku Galilee."

⁷⁰ Lelo alikene pa menso ya bantu bonse, no kulanda ati, "Nteshibile ifyo ukolandapo."

⁷¹ Uluntu afumine ukuya ku mwenshi, naumbi umubomfi umwanakshi alimubwene elo no kulanda kuli bo abali palya ati, "Noyu muntu naye alikusanganwa na Yesu waku Nasareti."

⁷² Nakabili alikene no kulapika ati, "Ntamwishibile uyu muntu!'

⁷³ Panuma ya nshita fye iinono abo abatalemene mupepi balishile elo no kulanda kuli Petelo ati, "Mucine fye nobe wine uli umo pali bo, pantu ifyo ukolanda efikolanga."

⁷⁴ Elo alitampile ukutipa elo no kulapika ati, "Ntamwishibile uyu muntu," elo ulo lwine na mukolwe alilile.

⁷⁵ Petelo aibwishe amashiwi ayo Yesu alandile aya kwebati, "Ulo mukolwe talalila ninshi webo uli nkene imiku itatu." Eluntu afumine panse elo nokulila nganshi.