भौ अतुम
धासारिवाञा नुयोक मुलुत्तानिनओ
1
मन्कि खोनिन चाःवासिडा वाङाकि ओह्यातनि एङत्तानिन, का चितालावाङडा बानानिन।
2
नङ, मनाचिआ इमखाडा फेनियुङसाओ अकपाङ धासारिमा लिसाओ तुक्काबाञा खोनिन्ओया मटारा। देकमिआ मोकोचिओ मकतुम टोकतुकि धासारिवाञा लोवानिन, "हेइ! सावाछा, सापसा मुवानुम। आमनो हुमुकवा खानाञा नुनामलानुत लिसा।"
3
नङ, यङवानचिखपडा खाउ खाउङेआ हाङपोहाङडा मयिङा, "ओसाआ ना निनाम्मुओ उत्नुङ मुहिडा याछा"
4
देकमिआ मोकोचिओ मिनला तुपताकि लोवानिन, "खानाचि देना आन्ओ कोङडा उवाक मिनला अमुलुक?
5
देनादि खाउ ओलाक नेक्ता याआङ, 'आमनो हुमुकवा नुनामलानुत लिसा' यिङमा, हे 'लोन्टानुम, का बियानुम' यिङमा?
6
मेन मनाओछाञा हेन्खामाडा हुमुकवा नुनामलानुत मुवो कोपरू याछा लोनि खानाचिआ सिन्मा रुवानुम" लोवाकि (खोनिन् मोको धामारिवाञा लोवानिन), 'लोन्टानुम आम्इमखा खुयानुम, का खिम खारानुम।'
7
मन्कि मोको लोनटु, का आनओ खिमलिपा वाङा।
8
मुन्टोङ मुकलाचिआ मोको मटोक्टा, मोबेन मोकोचि मकुमाकारा, का मनाचिञा उसओ साएराङ पुमि निनाममुओ यानुमसङ मचुवा। मत्तिञा बुतसान लिसाओ
9
देकमि मोदाङका खातमानुहिडा मत्ति नुङओ अकपाङ मनाञा छोन्ला तात्वो छोन्खिमडा युङनियुङसाओ टोकतानिन, का मोसाञा यिङानिन, 'अङकाओ देङसु वाङानुम।' मन्कि मोचि खोनिन्ओ देङसु मवाङा।
10
मन्कि खिम्डा खोनिन चासि युङानिनओ मुयाकलाडा बद्धेका छोन्ला कोपमिचि का हुमुकवामिचि ताकि देकमि नङ खोनिन्ओ खेनमाछाचिओ अकनिन्डा चासि मयुङा ।
11
मुनटोङ फरिसिचिआ मोको मटोक्ता, मोबेन खोनिन्ओ खेन्माछाचिञा मयिङा, 'देना खानाचिओ रूमु छोनला तात्काबाचि का हुमुकमिचि सुत्डा मचा?'
12
मेन खोनिनआ ओको एनाकि लोवानिन, 'नुसङचिञा नुखामिओ चाखाम नुनिन, मेन तुककाबाचिया ओन।
13
मेन खानाचि खाराकि चिन्तानुम, ओकोओ तुप्युङ दि ए? 'अङका नुनुत चाखालिङा, मेन हेनखुवा माआङ।' देनादि अङका सामयोकमिञा माआङ, मेन हुमुकमिचिञा बुतसि बानुङ।"
मान्चायाकला
14
हाले युहन्नाओ खेन्माछाचिआ खोनिनओया बानाकि उसओ मयिङा, "देना आन्कानका नङ फरिसिचि मान्चायाकला युङइन्का, मेन खानानिनओ खेनमाछाचि मान्चायाकला मयुङनिन?"
15
देकमिआ मोकोचिञा लोवानिन, "दि सायाहाङमिचिआ, साङकोम मोकोचिसुत्डा, लिहिडा मिनराक मचुलुक का? मेन मोचि लेन बान मुनटोङ साङकोम मोचिडाङका नियाक मचुवोङ, मोबेन खोकोचि मान्चायाकला मयुङयोङ।
16
साङआ छाङ आसुङ टिट्खानडा नुङवा टिटओ टेन्तुमा योपनिन। देनादि मोको नुङवा टेन्तुमाआ टिट्खान्ञा पेत, का मोको पेत्सु ओलाक बद्धे उवाक लिमाखात।
17
नङ आसुङ होःवाओ खुङडा नुङवा यममारावा पाक्तिमिन, माआङलो होःवाओ खुङ केत्, का हेङमावा थोक, का हो: वा युनला नुयाक। मेन नुङवा हङमावा नुङवाङे होःवाओ खुङडा मपाक, का हवाटेट ङे रात्तिन।"
याइरसओ मेछाछा
18
मुनटोङ खोनिनआ मोकोचिञा मोचि दुम लोमानुयाङसा याआङा, खाङानुम, अकपाङ खारूखाहाङआ ताकि उससो यिङयाङसा खोनिनञा सायालोङ मचुवा, "अङमेछाछा हान्दे सुवा, मेन ताकि खानानिनओ छुक मोधानि युङनि पुवाने, का मोको लेवोङ।"
19
देकमि पोक्तुकि मोसाओ देङसु खारानिन, का खोनिनओ खेनमाछाचि छाङ।
20
नङ खाङानुम, हवापौ दोङ डाङका हुपेत्वो सारिमा लिसाओ अकपाङ मारिछाआ देङसुङका ताकि खोनिन्ओ टिटखान्को चुकडा नोप्ता।
21
देनादि मोसाआ कोङ-कोङरिङडा यिङाओ याआङा, 'अङकाआ खोनिन्ओ टिटखान नोपतुङ लो ओन छाङ अङका नुयोक लिनिखात्वोङा।”
22
मेन देकमिआ, हुराक्क लासाकि मोसाञा टोक्तुकि लोवानिन, "हेइ! मेछाछा, सापसा मुवानुम, आमनो मकतुमआ खानाञा नुसङ मेत्ताओ याआङ।" नङ मोको मारिछा मोङे वाइदा डाङका नुयोक लिसा।
23
मन्कि मुनटोङ देकमि खारूखाहाङओ खिमडा ताबानानिन, मोबेन मुदाङसङ साङकामिचि का मुक्लामा डोमोसाङला मुवाओ टोक्तानिन,
24
का खोनिन्आ मोकोचिञा लोवानिन, 'याखारानुम, याखारानुम। देनादि मेछाछा सुवाओ माननुङ, मेन इम्साओ याआङ।" नङ मोकोचिआ ओलाक खोनिन्ओ स्यावारि मचुवा।
25
मेन मुक्लाञा हुइया मलात्ता नेत्लोक खोनिन हुड्डा वाङानिन, का छुक लाप्तानिन, मन्कि मोको मेछाछा छुटुक्का एवा।
26
मोबेन मोदुमओ नुम मोको लुङवाङ भेप्लो फेसु।
हवापाङ खाथेप मना
27
हान देकमि मोडाङका खातमानुहिडा हवापाङ खाथेपवाचि पात्याङसा, “हे दाउदओ सावाछा आनकाधानि नुनुत चुवाने" यिङयाङसा खोनिनओ देङसु देङसु मवाङा।
28
नङ खोनिन खिम्डा बानानिन नेतलोक मोचि खाथेप मनाचि खोनिनओया मता। देकमिआ मोकोचिञा लोवानिन, 'अङका ओको चुमा रूङा लोनि दि खानाचि मक्तुम अचुलुक?' मोकोचिआ खोनिनञा मयिङा, "ज्यो, हाएसि।"
29
मोबेन खोनिनआ मोकोचिओ अमुक नोपताकि लोवानिन, "खानाचिओ मक्तुम ओटनि खानाचिञा मलिने।"
30
मन्कि मोकोचिओ अमुक महोङता। देकमिआ उसओ लोवाकि मोकोचिञा छाक्को इङइवा पुवानिन, "खाङानुम, ओको दुम साङआ छाङ सिनला मान्तोकने वै।"
31
मेन मोकोचिआ लोन्टाकि मोको लुङवाङभेप्लो खोनिनओ नुम मफेम्ता ।
खाला वाङाओ मना
32
नङ मुन्टोङ खोनिनचि लोन्टाकि खात्मालियाङसा याआङा, मोबेन खाउङे, खाला वाङाओ अकपाङ नातेपमना खोनिनओया बाट्टानचिन।
33
खाला लात्तानचिन नेतलोक मोको नातेप चेवा, नङ 'इस्राएलडा देम छाङ उसओ मान्दात,' लोनि मुकलाचि स्वमराक मडोरा।
34
मेन फरिसिचिआ यिङा, 'खालाओ नामसोङमि दाङका मोसाआ मामाङसुखा लात्लुक।’
35
मन्कि देकमिआ झारा तालावाङ का सापटेनचिलिप् मोकोचिओ यायोकखिमडा सालाम्यङ पुयाङसा, का हाङहोन्ओ सावानाम रूमरङ मुयाङसा, का उकताउक माइओ सारिमा का तुक्ला नुयोक मेत्याङसा बियानिन।
36
मेन मुकलाचिञा टोक्तुकि खोनिन्ओ कोङ मोकोचिओ निकि नुनुतआ भेप्तानचिन। देनालो मोकोचि चानकाबा मानलिसाओ सामुवाचि इसा होत्ला लिनि तुङटेम् लिसाओ मयाआङा।
37
मोबेन खोनिन्आ आन्ओ खेन्माछाचिञा लोवानिन, "चासुमसिवा ना नुच्चुङङे सायाथाकला याआङ मेन् मुकाबाचि लो उनुछुप्लो मयाआङ।
38
ओसुन्दुम खानाचिआ चासुम सिवाओ हाएसिञा खोनिन्ओ आनओ चासुम सिवाडा मुकाबाचि छुत्नि मपुने लोनि सोम्फोङला मुवानुम।"