पौ अतुम
हवापौ खेन्माछा का मोचिओ सामयोमिकवक
1
मन्कि खोनिन्आ आन्ओ हवापौपाङ खेन्माछाचिञा बुत्ताकि असेङअत साकोङचि लातवो का उकताउक माइओ सारिमा का तुक्लाचि नुयोक मेत्वो कोपरु मोकोचिञा पुवानिन।
2
हान हवापौङ बुसिवा खेन्माछाचिओ नुङ ओकोचि मए, बुसि पत्रुस लोवो शिमोन, का मोसाओ बुबु अन्द्रियास। जब्दीओ सावाछा याकुब, का मोसाओ निछाक युहन्ना।
3
फिलिप का बारथोलोमाइ। थोमा का छोन्ला तातमि मत्ति। अल्फयसओ सावाछा याकुब, का थेदियस।
4
शिमोन कनानी का इस्करयोतओ यहुदा, खोकोआ खोनिन्ञा लुलेनवारि छाङ मुवा।
5
ओचि हवापौङेञा देकमिआ उसओ लोनि इङइवा पुवाकि छुत्नतनिन, "निरङचिओ लामलिपा मान्खातदानुम, का सामरिचिओ तालावाङडा मान्वाङदानुम ।
6
मेन इस्राएलओ इवाखिम्वाडा मासुवाओ सामुवाचिओया खारानुम।
7
'सारूङगाओ हाङहोन चुकडा ताबानाओ याआङ,' लोयाङसा रूमरङ मुवानुम।
8
तुक्काबाचिञा नुसङ मेत्तानुम, सुवाओचिआ खोङतानुम, खुखेनमिचिञा सेङवा मेत्तानुम, खालाञा लात्तानुम। उलुङनित अतोकतु, उलुङनित पुवानुमा,
9
खानाचिओ बुकरिम्माडा सोना, रूपा, का ङायुरेन मान्लोक्ते
10
मान्ना कोन्याओ निकि बेखा, मान हवाटेट लोक्छुम, मान लाङसुप, मान तोम्फुक। देनालो मुकाबाचि आनओ चामासेसिओ निकि मुरू नुयाक।
11
नङ खाक्को तालावाङ हे टेनडा खानाचि अवाङउने, 'साङ मुरू याआङ?' लोनि सेन्खासेन मुवानुम। का मुनटोङ तारि खानाचि मोदाङका अलोननिन मोसाओया युङानुम।
12
नङ खिमडा वाङहिडा मोसाञा सायालोङ मुवानुम
13
नङ मो खिम मुरू याछा लो, खानाचिओ नुसान मोकोदु युङने। मेन मोको मुरु मानयाछा लो, खानाचिओ नुसान खानाचिडाङे लासाकि बानने।
14
खोक्कोआ खानाचिञा देङहुतलेन मान्मुदाउने, का खानाचिओ दुम मानएनदाउने, मोखिम हे तालावाङदाङका लोनहिडा खानाचिओ लाङओ थुलि रूङनिपुवानुम।
15
अङका खानाचिञा नुच्चुङङे लोलुकङा, सान्नोसान्ओ लेनडा मोतालावाङओ यामामु चोङलो ना सोदोम का गमोराओ यामायु आङमा रूवो लिवोङ'।
16
खाङानुम, अङका खानाचिञा भेन्पाओ खपडा सामुवा इसामुनि छुत्ङा, ओसुन्दुम खानाचि पछापइसा चान्चुप का पेइवाइसा नातेप मए।
17
मेन मनाचिङका चान्चुप अए। देनालो मोकोचिआ खानाचिञा दुमसेङखिमडा मपाङपाकवोङ का मोकोचिओ यायोक खिमचिडा रमफक मलुवोङ।
18
मोकोचिञा का निरङचिञा सिनलेखाओ निकि अङकाओ निकि खारुखाहाङचि का हेनकोपहाङचिओ बुसित खानाचिञा ठानठुक ममेत्वोङ।
19
मेन मुनटोङ मोकोचिआ खानाचिञा मपाङपाक, मोबेन खाइसकिया का दि चेउमने लोनि मिनराक मान्मुदानुम। देनालो खानाचिआ दि चेप्मायाक ए, मोवाइदा खानाचिञा लोवोन याआङ।
20
देनालो चेपवो खानाचि हाङपाङे अलिवोनिन, मेन खानाचिओ पापाओ साकोङ खानाचिडा लिनि चेपमा लिवोङ।
21
नङ निछाकआ बुबुञा सुवालोङओ निकि पाङपाकवोङ, का पापाआ सावाछा मेछाछाञा, का सावाछा मेछाछाचि मामा-पापाचिओ यङछित्डा मथिन्वोङ, का मोकोचिञा सेतसि पाकवोङ।
22
नङ अङकाओ नुङओ निकि झारादाङका खानाचि चिमासाङ अलिवोङ। मेन थेन्युतारि आङवोआ ओलाक सेममाला तोकवोङ।
23
मेन मुन्टोङ मोकोचिआ खानाचिञा ओको तालावाङडा मठिन मोबेन हाउसोडा फुङसानुम। देनादि अङका खानाचिञा नुच्चुङङे लोलुकङा, मनाओ सावाछा मान्ताइन्लोकतारि खानाचि खाउङे माइआ इस्राएलओ तालावाङचि छाङ कोननि चियाओ अलिवोनिन।
24
खेनमाछा रूमु चोङलो मुलुमरङ नुनिन, मान्ना याङसुमि नामसोङमि चोङलो।
25
खेन्माछा आनओ रूमु, नङ याङसुमि आनओ नामसोङमि हाक्माहाक लिमा सायाथाकला याआङ। मोकोचिआ खिमओ नामसोङमिञा सुलावाहाङ लोवाओ मयाआङ लो, खोसाओ इवाखिमवाओचिञा फान्नु देम बदधे मुनि मलोवोङ?
26
ओसुन्दुम मोकोचि सुत्दा मान्कुमाकातदानुम। देनालो डिप्ताकि मुलुमपुक मान्लिवो दिच छाङ माननुङ, कुमताकि सिनला मानलिवो दिचछाङ माननुङ।
27
खाक्को अङका खानाचिञा खाचङडा लोलुकङा, मोको खानाचिआ छोङडा लोनि पुवानुम, का खाक्को खानाचिआ नाबाकडा अएन, मोको खिमओ खाप्पुचोम दाङका रूमरङ मुवानुम।
28
साएमपोक सेत्वो मेन साकोङञा ओलाक युनसाङ मुमा मानरुवो सुत्डा मान्कुमाकातदानुम । मेन साकोङ नङ साएमपोक हवाङेञा खामारेनडा युनला मुमा रूवोसुत्डा हेनाक कुमाकारानुम।
29
दि अक याङडा हवापोक खोकवा इननिन? मोकोखपडा अक्पोक छाङ खानाचिओ पापाओ राका मायाक लुम्डा धावो मान्नुङ।
30
मेन खानाचिओ टाङओ टाङमुआचितारि छाङ झारा इखिपतानचिनओ मयाआङ।
31
ओसुन्दुम खानाचि अमानकुमाकातदानुम, खानाचि बद्धेका खोकवाचि चोङलो बद्धे सोङखितओ अयाआङ।
32
ओसुन्दुम उक्ताउक खोकोआ मनाचिओ बुसित देङहुत्ताङयाक, अङका छाङ मोसाञा अङ सारुङगाडा लिवो पापाओ बुसित देङहुतला चुवोङा।
33
मेन उकताउक खोक्कोआ मनाओ बुसित बुङछुनताङयाक, अङका छाङ खोसाञा अङकाओ सारूङगाडा लिवो पापाओ बुसित बुङछुनला मुवोङा ।
34
अङका हेन्खामाडा तोङमासि चुमेत्मा तावो एव लोनि मान्मितदानुम। तोङमासि चुमेत्मा ना माआङ, मेन बानछोन याङसिञा अङका तावो एव।
35
देनादि अङका मनाञा उपापाओ उसादाकडा का मेछाछाञा उमामाओ उसादाकडा का नाममितञा उछादिमाओ उसादाकडा नियाक मुमेतसि बानुङ।
36
मनाओ नुकसा ना खोसाओ आन्ओ छामान हुडडाओचिङे मलिवोङ।
37
पापा हे मामाआ अङका चोङलो धिसोम मुवो अङकाओ मुरु नुनिन, का सावाछा हे मेछाछाञा धिसोम मुवो अङकाओ मुरु नुनिन।
38
नङ खोक्को आन्ओ इलाक थेन्ताकि अङकाओ देङसि वाङनिन, मोको अङकाओ मुरूओ नुनिन।
39
आन्ओ हाङमाङ डेकमा लामवोआ मोको मासुवोङ, नङ आनओ हाङमाङ अङकाओ निकि मासुवोआ मोको डेकवोङ।
40
खानाचिञा देङहुतलेन मुकाबाआ देङहुत्ताङयाक, का देङहुत्ताङमिआ छुतकाबाञा देङहुत्तायाक।
41
यामाङञा यामाङ ओङे नुङडा देङहुतलेन मुवोआ यामाङओ उनमाला तोक्योङ। नङ सामयोनोतमिओ नुङडा सामयोनोतमिञा देङहुतलेन मुवोआ सामयोनोतमिओ उन्माला तोकवोङ।
42
नङ खोकोआ ओचि चुप्पाङचिखपडा अकपाङञा खेन्माछाओ नुङडा अक खोरे कुहिप चाःवा ओन छाङ दुङमा पुउने, अङका खानाचिजा नुच्चुङ लोलुकङा, मोसाआ खाउङे सुन्तुमआ मोसाओ उन्माला मासुवो मात्दङ।"