अक पौ अतुम
1
मन्कि उसओ लिसा, आनओ हवापौ खेनमाछाचिञा इङइवा मुनिचिया नेतलोक देकमि मोडाङका मोकोचिओ तालावाङ तालावाङडा चिन्लुमा का रुमरङ मुसिञा खारानिन।
हङसानवा पुमि युहन्ना
2
हान युहन्नाआ छेक्खाडा निनामछेनओ वकचिओ छाप्छोङडा एनाकि आनओ खेन्माछाचिङका खोनिनओया उसओ यिङाकि मछुत्ता-
3
"दि ताबान्मि ओलाक खानानिन ङे लिमानु, दि आन्कान्का हाउसोओ लाम खाङइनने?”
4
देकमिआ ओकोचिञा लोवानिन, "खाराकि युहन्नाञा खानाचिआ एनाओ का खाङाओ दुमचि एनमेतनिपुवानुम।
5
खाथेपवाचि खाङलुक, का पेसोलाचि मबिलुक। खुखेनमिचि साङसेसान मेत्ताओ मयाआङ। मेःवाचि मएन। सुवाओचि मखोङतिन, का छुयुकुपवाचिञा नुयङखान एनमेतिन।
6
खोक्कोआ अङकाकनिन स्मवतुकनिन, मोको सायोकसाङ ए।"
7
मन्कि मोकोचि मखारा नेत्लोक युहन्नाओ सानुङडा देकमिआ मुक्लाचिञा लोमा-लुवानिन, 'खानाचि कुत्लेखाडा दि खाङमा अलोन्ता? दि कुहुकआ ङाङनियुङसाओ दङञा?
8
मेन खानाचि दि खाङमा अलोन्टा? दि नुतनुवा सङनान हुमसाओ मनाञा? खाङानुम नुतनुवा सङनान हुमवोचि ना हाङचिओ हाङखिमडा मलि ।
9
मेन खानाचि देना अलोन्टा? दि यामाङ खाङसिञा? मोलो, अङका खानाचिञा लोलुकङा, यामाङ चोङलो छाङ मुलुमरङञा।
10
ओको मोङे मए, खोक्कोओ सानुङडा उसओ छापतानचिनओ याआङ, 'खाङानुम, अङका आन्ओ याककेन्छाञा आमनो
बुसि बुसि छुतङा,
खोकोआ आमनो बुसित आम्लाम
छुम्चुम मुवोङ'।
11
अङका खानाञा नुच्चुङ ङे लोलुकङा, मनाखपडा हङसानवा पुमि युहन्ना चोङलो टोप्पाङ साङछाङ पुक्तुओ मातदङ। मेन्छाङ सारूङगाओ हाङहोन्डा खोक्को झाराचोङलो चुप्पाङ याआङ, मोको ओचि चोङलो टोप्पो ए।
12
नङ हङसानवा पुमि युहन्नाओ लेनदाङका ओया हान्दे तारि सारूङगाओ हाङहोन्डा राकामाल्ला लियाङ, का राकामालला मुवो मनाचिआ राङलकनिन ङाक्लुक।
13
देनादि झारा यामाङचि का खाप्लाआ युहन्नातारि ङे मायुङछाम्सु मुवाओ मयाआङ।
14
नङ खानाचि देङहुतलेन मुसि नुवानुवारि अलि लो, तामायाक एलिया ओको ङे मए।
15
खोक्कोओ एनवो नाबाक याआङ, मोसाआ एन्ने,
16
हान ओको तालाखुकओ हाकङहा अङका दिसुत्डा मुम? ओको इनखावाङडा सेलामुवो चुप्पाङ छाचिइसा ए, खोक्कोआ मोकोचिओ यावाचिञा मबुत,
17
का अयिङलुक, 'आन्कानआ खानाचिओ निकि मुदाङसङ साङोम, का खानाचि अमानलाकलु। आन्कानआ तुक्हुयु मुइन, का खानाचिआ मिनराक अमान्मु।’
18
देनालो युहन्ना चासादुङयाङसा मान्ता, का खानाचि खोसाञा मामाङसुखा वाङाओ याआङ लोनि अयिङलुक।
19
मनाओ सावाछा चासा दुङयाङसा ता, का मोकोचि मयिङ, 'खाङानुम, अकपाङ चाकरेन का सेत्काबा, का छोन्ला तातमि का हुमुकमिचिओ यावा! नङ खारू ओलाक खोसाओ वकचिङका मुरू दोकतिन।”
मकतुम मानचुमिचिञा नङफिसा
20
मोबेन खाक्को खाक्को तालावाङडा खोनिनओ बद्धेइसा साएराङलक वकचि लिसाओ मयाआङा, खोनिनआ मोचिञा हेन्मा लुवानिन, देनालो मोचिआ लाछङमिन ममानचु।
21
"नङफिसा खानाञा, हेइ! कोराजिन! नङफिसा खानाञा, हेइ! बेतसेदा! देनादि खानाचिडा लिसाओ साएराङलक वकचि टायर का सायडनडा लिसाओनिन मोकोचिआ बुसुमुलेन ङे साम्पुयिटिट का थाबुक सोम्तुकि लाछङमिन मुनिचिवो मयाआङा।
22
मेन्छाङ अङका खानाचिञा लोलुकङा, सान्नोसानओ लेनडा खानाचिओ चोङलो ना टायर का सायडनओ यामामु धिआङमा रूवो लिवोङ।
23
नङ हेइ! कर्फनहुम, दि खाना सारूङगातारि तथेन्वोन कि? खाना खामारेनतारि तधानवोन। देनादि खानाओया लिसाओ साएराङलक वकचि सदोमडा लिसाओनिन ना मोको आइओ लेन्तारि युङनियुङवो याआङा।
24
मेन्छाङ अङका खानाचिञा लोलुकङा, सान्नोसान्ओ लेन्डा खानाओ चोङलो ना सदोम लुङवाङओ यामामु धिआङमा रूवो लिवोङ।”
25
मोयोक्दा देकमिआ लोवानिन, "हेइ! पापा सारूङगा का हेन्खामाओ धिवाङ हाएसि, अङका खानाडा निनामनुत रिपेनङा, देनादि खानाआ मोचि दुम तायामुलु नङ सिन्काबाङका कुम्तानिन, मेन छाचिञा मोचि मुलुमपुक मुवानिन।
26
हेइ! पापा, देनादि खानानिनओ मुक्खाङडा ओकोङे नुलोक लुवा।
27
सिरिसाएताममा अङपापाङका पाङपाकताङओ मयाआङ, का पापालेटका निचि साङआ सावाछाञा सिननिन, नङ मान्ना सावाछा हेना सावाछाआ यापुकतु मुमा राका मुवाओआ लेटका निचि साङआ पापाञा सिन।
28
हेइ झारा मुयुला मुवो, का खुन्युआ तिम्तानचिनओ ए! अङका ओया बानानुम, अङका खानाचिञा सावाएम पुवोङा ।
29
अङकाओ कोम खाना हाङपाङआ खुयानुम, का अङकासुत्डा चिन्तानुम। देनादि अङका सालेन नङ नोअ कोङरिङओ याकङा। मन्कि खानाचिआ आन-आनओ साकोङडा सावाएम्ला अतोकवोङ।
30
देनादि अङकाओ कोम नेक्ता का अङखुन्यु याइ याआङ।"