¹ मोयोक्दा देकमि सावाएमओ लेन चासुमओ बेङसिखाचि डाङका लिसाकि खातमा लिमानुवाङा, का आनओ खेनमाछाचि साकारङाओ लिहिडा चासुम्‌ओ वाचुङखुङ कुपसि का चासि मपुङसा। ² मेन फरिसिचिआ ओको टोक्ताकि खोनिनञा मयिङा, "खाङानुम, आमखेनमाछाचि सावाएमओ लेन खाक्को चुमा उवाक याआङ मोकोङे मचुलुक।"

³ मेन खोनिनचिञा लोवानिन, "दाउदआ, मोचि का खोको सुत्दा लिवोचि साकारङहिडा दि मुवाओ याआङा, दि खानाचिआ खिप्तुओ अमान्नुङ? ⁴ खाइसाकिया मोचि निनाममुओ खिम्डा वाङाकि बुबफेनओ पेम्पाकचि मचो? खाक्को चासि मान्ना मोचिञा, मान मोचि सुत्डा लिवोचिञा, मेन ओन बुबमिचिञा नुलोक याआङा। ⁵ तामिन्तुप दि खाप्लाडा खिपतुओ तमाननुङ, खाइसाकिया सावाएमलेनडा बुबमिचिआ माङखिमडा सावाएमओ लेनञा असेङअत ममेत, का छाङ खायोकनिन मदोकतिन? ⁶ मेन अङका खानाचिञा लोलुकङा, 'माङखिम चोङलो टोप्पो ओडा अकपाङ याआङ।' ⁷ मेन 'अङका पुनोत चाखालिङा हेन्खुवा माआङ' लोवाओ तुपयङ दि ए मोको खानाचिआ सिन्ताओनिन खानाचिआ खायोकमातञा खायोक-पाकवो अमान्नुङा। ⁸ देनादि मनाओ सावाछा सावाएम्लेनओ हाएसि ए।"

⁹ मोडाङका लोन्टाकि खोनिन मोकोचिओ यायोकखिमडा खारानिन। ¹⁰ नङ मोडा छुक सिप्तुओ अकपाङ मना याआङा। नङ मोकोचिआ खोनिनञा खायोक पाकमाञा खोनिन्सुत्दा उसो लोवाकि मसेना, "दि सावाएमओ लेनडा साङञा नुयुक मुलुत्मा नुलोक याआङ?”

¹¹ मेन खोनिनआ मोकोचिआ लोवानिन, "खानाचिखपडा साङ लिसुने, खोक्कोओ अ‌कपोक ओन सामुवा याआङ, का मोको सावाएमओ लेनडा लुम्डा धासा लो खोसाआ लाप्तुकि मोसाञा लातनिन का? ¹² सामुवा चाङलो मोको देम धिएइमा ए? ओसुन्दम ङे सावाएम्‌ओ लेनडा नुवक मुमा नुलोक याआङ।" ¹³ मोबेन खोनिनआ मोको मनाञा यिङानिन, "आमनो छुक फाआन्तानुम।" मन्कि मोसाआ छुक फाआन्तु का मोछुक हाउसो खोवातनि ठाक लिनिखारा।

देकमिञा सेत्‌वो रूङचाला

¹⁴ मेन फरिसिचिआ हुइया खाराकि 'खोनिनञा खाइसाकिया युन्ला मुइन्ने' यिङाकि खोनिन्‌ओ उसादाकडा यायोक मचुवा।

¹⁵ मोबेन ओको सिनला तोक्तुकि देकमि मोडाङका यासोरानिन का बद्धेका पाङ खोनिन्‌ओ देङसु मलुवा, का खोनिन्आ मोचि झाराञा नुयोक मेत्तानिन, ¹⁶ नङ खोनिनञा यापुक्तु मान्‌मुदामा लोवो चाउक इङइवा मोकोचिञा पुवानिन। ¹⁷ यशैया यामाङदाङका चेवानचिनओ उसओ लोवो इदुम लात्‌ला लिने, ¹⁸ "खाङानुम, अङयाङसुमि खोकोञा अङकाआ छेन्तुङ, अङकाओ नुङनामि, खोक्कोसुत्डा अङसाकोङ धिवाया याआङ। अङका आनओ साकोङ खोसाडा युङनिपुवोङा, का खोसाआ निरङचिञा सान्नोसान्‌ओ दुम्खुङ एनमेतनि मपुवोङ। ²² मोबेन खोनिनओया एकपाङ खाथेप नातेप का खाला वाङाओञा बाट्‌टानचिन, का खोनिनआ मोसाञा नुयोक मुलुत्तानिन उनतारि हे, मो नातेप मना चेवा नङ टोकवो लिसा। ²³ मन्कि झारा मुक्लाचिआ स्वमराक काङाकि मलोवा, "दि खोनिन दाउदओ सावाछा मए?”

²⁴ मेन फरिसिचिआ ओको एनाकि मलोवा, "ओको मनाआ मायाक मामाङसुकाओ नामसोङमि, बालजिबुलदाङका मामाङसुकाआ ठिननिन।"

²⁵ मेन खोनिनआ मोकोचिओ मिनला सिनला तोकतुकि मोकोञा लोवानिन, "उकताउक हाङहोन आनओङे उसादाकडा नियाक नियाक लिसाओ याआङ लो नाम्बुकलो मेत्तिन, का उकताउक तालावाङ हे खिम हाङपाङडा मान्‌तोङखा डोटलो पाङचङवो मान्नुङ। ²⁶ नङ खोनालो सुलावाआ सुलावाञा लातलुक लो, मोसाओ हाङपोहाङडा मान्‌तोङखा डोट। मोबेन मोसाओ हेन्कोप् खाइसाकिया पाङचङमारू? ²⁷ नङ अङकाआ बालजिबुलदाङका खाला टेन्याङा लो, खानाचिओ सावाछाचिआ ओलाक साङदाङका मलात? ओसुन्दुम मोकोचि ङे खानाचिओ दुमसेङमि मलिवोङ। ²⁸ मेन अङका निनाममुओ साकोङदाङका खाला ठेनङा लो, ना निनाम्‌मुओ हाङहोन खानाचिओया तानिचियाओ याआङ।

²⁹ हेना बुसि साप्सामि मनाञा मान्छुमसाकि, साङआ सापसामि मनाओ खिम् हुड्डा वाङाकि खोसाओ यामतोक खाइसाकिया खासेकमारू का? का मोदाङका मोसाआ खोसाओ खिम खासेकयोङ।

³⁰ खोक्को अङकाकनिन मान्नुङ, मोको अङकाओ उसादाकदा याआङ, का खोकोआ अङकासुत्डा कोपनिन खोसाआ तेम्लुक।

³¹ मोसुन्दुम अङका खानाचिञा लोलुकङा, 'उकताउक हुमुकवा का निनाममुओ उतनुङ मनाचिञा नुनाम्‌लानुत लिवोङ। मेन वाचोङ साकोङओ उसादाकओ उतनुङ नुनामलानुत लिवोनिन।’ ³² नङ साङआ मनाओ सावाछाओ उसादाकडा चेवालो मोसाञा नुनामलानुत लिवोङ, मेन साङआ वाचोङ साकोङओ उसादाक चेवा लो मोको मोसाञा ओको बुलुहुत्‌दा, हेना तावो बुतुहुतडा नुनामलानुत लिवोनिन।

³³ हेना सुङताङ नुलोक का मोसाओ सिया नुलोक मुलुत्तानुम, हे सुङताङ फियाओ का मोसाओ सिवा फियाओ मुलुत्तानुम। देनालो सिवादाङका के सुङताङ सिन्तिन। ³⁴ हेइ! पुछापओ छा च्यो, खानाचि बोन्छोलोक लिनि खान्नोदुम खाइसाकिया चेप्मा अरु? देनालो कोङरिङडा भेप्ताओ दुमङे डोआ चेप्लुक। ³⁵ खान्नो मनाआ खानो खाबाखादाङका खान्नो याम्‌तोकचि लाट्‌वोङ। मेन बोन्छोलाक मनाआ उवाकखाबाखादाङका उवाकङे याम्‌तोक लाट्‌लुक। ³⁶ नङ अङका खानाचिञा लोलुकङा, 'उकताउक सोज्जे दुम खाक्को मनाचि मचेप्लुक, सान्नोसानओ लेन्डा मोकोचिआ झाराओ खिप्माला पुमा डोटवोङ।' ³⁷ देनादि आमनो आनओ चिइदुमआ खाना साम्योकमि तदोकवोङ नङ आमनो आनओङे दुमआ खाना खायोकमि तदोकवोङ।”

³⁸ हाले इयङवानमिचि का फरिसिचि खपडा साङ साङआ लायङ पुवाकि खोनिनञा मयिङा, "रुमु, आनकान खानानिन दाङका अकटेट सिन्छुङ खा‌ङसि चाखालिसोमका।”

³⁹ मेन खोनिन्आ मोकोचिया लायङ पुवाकि लोवानिन, 'उवाक नङ राकयाङमि तालाखुकआ सिन्छुङ लाम्लुक। नङ मोसाञा योना यामाङओ सिन्छुङ लेटका निचि सिन्छुङ पुवोननिन। ⁴⁰ देनादि खाइसाकिया योना टोप्पो ङाओ बुक्हुड्डा सुमकालेन का सुम्‌का खाखुत याआङा, मुइसाकिया ङे मनाओ सावाछा छाङ हेन्खामाओ बुक्हुट्टा सुमकालेन का सुमका खाखुत युङवोङ। ⁴¹ निनवेओ मनाचि सानोसानडा ओको तालाखुकओ अकनिनडा ठानठुक लिवोङ, का मोसाआ खायोकमि मदोकवोङ, देनादि मोकोचिआ योनाओ रूमरङडा लाछङमिन मचुवाङसाङ, मेन खाङानुम योना चोङलो नुए ओडा याआङ। ⁴² युवाहोनओ हाङमा सान्नोसान्‌डा ओको तालाखुकओ अकनिनडा ठानठुक लिवोङ, का ओकोञा खायोकमि मदोकवोङ, देनादि ओचि हेन्खामाओ थेन्दाङका नुसानहाङओ ताया एनसिञा मबाना, नङ खाङानुम, नुसानहाङ चोङलो नुए ओया याआङ ।

मान्भेप्लो साङसेसान डाङका लिवो धङरङ

⁴³ मेन मुन्टोङ असेङअत साकोङ मनादाङका लोन्टाकि खात, मोको हाङफुकनि खामलिप्पा नान्खा लाम्‌याङसा बियाक, का छाङ तोकनिन। ⁴⁴ मोबेन मोसाआ यिङ, 'अङका आन्‌ओ खिमडा लासाकि खात्‌वोङा खादाङका अङका लोन्टाकि बानुङ।’ नङ मोको ताकि ओसाञा उहुप, का सेङवा मुनि युङसाओ, का सालुनताओ धित। मोबेन मोको खात, ⁴⁵ का मोको चोङलो बद्धे लेइछावा निचि एकाटेट खालामाङसुचि मो सुत्दा बाट, का हुडडा वाङाकि मोकोचि मोडा मयुङ, का मोको मनाओ देङयाक्को यामामु बुसि चोङलो धिउवाक नुयाक । ओको उवाक तालाखुकञा छाङ उसओ ङे लिवोङ।"

⁴⁶ मुन्टोङ खोनिन मुक्लाचि सुत्दा चेपनियुङसानिनओ याआङा, खोनिनओ मामा, का खोनिन्‌ओ निछाचि खोनिन सुत्डा चेपसिञा हुइडा ठानठुक मयाआङा। ⁴⁷ मुन्टोङ अकपाङआ खोनिन्ञा यिङा, "खाङाने, खानानिनओ मामा का खानानिनओ निछाचि हुइतडा मयाआङ, खानानिन सुत्दा दुम्‌मुमा मसुङलुक।”

⁴⁸ मेन खोनिन सुत्दा चेप्वोञा खोनिनआ लोवानिन, "अङमामा साङ मए? अङनिछाचि साङ मए?” ⁴⁹ नङ खोनिनआ आनओ छुक खेन्‌माछाचिलिप्पा फेयाकि लोवानिन, "खाङानुम, अङमामा का अङनिछाचि। ⁵⁰ देनालो खोक्कोआ सारूङगाडा लिमानुवो अङपापाओ मिन्मासा काङलेन चुलुक। मोकोङ अङनिछा का अङनिछामा का अङमामा ए।”