साएङ सुम अतुम
चालिम तेम्मिओ डोयङला
1
मोङे लेन देकमि खिमडाङका लोन्ताकि साजुमाओ केम्युखाडा युङानिन,
2
नङ धिक अतोक मुक्ला खोनिनओ चुकडा झाराझुम्मा मलिसा हे खोनिन चाःवासिडा वाङाकि युङानिन। का मोचि झारा मुक्ला केम्युखाडा ठानठुक मलिसा।
3
मन्कि खोनिनआ मोकोचिञा मुसओ लोवाकि बदधेका दुम डोयङलाचिडा लोवानिन, “खाङानुम, अकपाङ चालिम् तेम्मिवा चालिम तेमसिञा लोन्ता।
4
नङ तेम्हिडा दिच चालिम लामदा मडोट्टा, का सेचियाआ ताकि मोचि चानि पुवा।
5
नङ दिच लुङइखाडा मडोट्टा, मोडा बदधेका बाखा मान्नुङा। का गङवा बाखा मानलिसाओआ मोचि चकनिङे मथुवा
6
नङ मुन्टोङ नामलोन्ता मोचि मछोप्ता, का सुङभेन मानलिसाओआ मोचि सिप्निलेवा।
7
नङ निचि ओलाक सेनमिचिडा डोट्टा, मेन सेनमिआ पोयाकि मोचिञा साकनाननि मपुवा।
8
निचि खाउङे ओलाक नुलोकखामडा डोट्टा, का खाउङेआ भुङकि, खाउङेआ तुककि खाउङेआ सुकि फसमि सिवा मपुवा।
9
खोक्कोओ नाबाक याआङ मोसाआ एनने।”
डोयङलाओ याङमालाम
10
मन्कि खेन्माछाचि बानाकि खोनिनञा मयिङा, “खानानिन मोकोचि सुत्डा देना डोयङलाडा चेप्मा नुयाक?”
11
नङ खोनिनआ मोकोचिञा लायङ पुवाकि लोवानिन, ‘खानाचिञा ना सारूङगाओ हाङहोन्ओ रिपचियाओ ताया पुवानचिनओ याआङ, मेन मोकोचिञा पुवानचिनओ मान्नुङ।
12
देनादि खाक्कोसुत्डा याआङ, मोसाआ पुवोन, का मोकोसुत्डा सायाथाक्ला लिवोङ; मेन खोक्को सुत्डा माननुङ लिसाओ छाङ मोको सुतडाङका ङाकवोङ।
13
ओसुन्दुम अङका खोकोचि सुत्डा डोयङलाडा चेपङा, देनालो खाङाकि छाङ मोकोचि मटोकनिन, एनाकि छाङ मोकोचि मएननिन, मानना मोकोचि मतुपलुक।
14
नङ मोकोचिडा यशैयाओ मायुङछामसु लाटला नु, खोक्कोआ यिङलुक,
"खानाचिआ एनमा ना तएन, मेन खाउङे
माइआ ततुपनिन,
'खाङमा ना तखाङ, मेन खाउङे
माइआ टोकनिन।
15
देनादि ओचि मनाचिओ कोङ
छाक्को लिसाओ याआङ,
नङ मोकोचिओ नाबाक एनमाञा चोमपि
लिसाओ मयाआङ,
का मोकोचिआ चिमक डिप्ताओ
मयाआङ, माआङलो
मोकोचिओ अमुकआ टोकवो मयाआङा,
नाबाकआ एन्वो मयाआङा,
कोङरिङआ, तुप्वो मयाआङा,
अङकालिप्पा लावो मयाआङा।
का अङका मोचोचिञा नुसङ
मेत्वो याआङाङ।’
16
मेन मोकोचिओ मक सायोकसाङ मए, देनादि मोचिआ मटोकलुक। नङ मोकोचिओ नाबाक, देनादि मोचिआ मएन।
17
अङका खानाचिञा नुच्चुङङे लोलुकङा, 'बदधेका यामाङचिआ का सामयोनोतमिचिआ खानाचिआ टोक्ताओ याम्तोक खाङमा धिङे राका मुवाओ याआङा, मेन ममान्टोक। का खानाचिआ एनाओ दुम एनमाञा हेनामङे मिनमासा मुवाओ याआङा, मेन ममानएन'।
डोयङलाओ तुपयङ
18
"खानाचि चालिम तेम्मिओ डोयङला एनानुम।
19
मुनटोङ साङआ हाङहोन्ओ इदुम एन, का तुपनिन, मोबेन बोन्छोलोक बान का मोसाओ कोङरिङडा खाक्को तेमताओ याआङा मोको ङाक्तुकि खाट। लामलिप्पा तेम्ताओ ओलाक मोकोङे ए।
20
लुङइखाडा तेम्ताओ ओलाक मोको ए, खोक्कोआ इदुम एनमुसा वायाआ हालेङे मोको देङहुत्लुक।
21
मेन ओचिओ आनओङे भेन मानलिसाओआ मोको दिच वाइदा तारि युङ। का इदुम ओ सुन्दुमआ छुयु हे ठिनसुरि तालुमुसा ढुङला चा।
22
सेनमिचिडा तेम्ताओ ओलाक मोको ए, खोक्कोआ इदुम एन, का मोको हेन्खामाओ मिनराक, का खाबालुङओ सोम्आ इदुमञा साक्नाननि पुयाक, का मोको सिवा मान्पुवो नुयाक।
23
मेन् नुबाखाडा तेम्ताओ ओलाक मोको ए, खोक्कोआ इदुम एन, का तुप्लुक, का नुच्चङ ङे सिवा सिमेत्याक, का खाउङेआ भुङकि, खाउङेआ तुककि नङ खाउङेआ सुकि फसमि सिवा सिमेत।”
कायासाओ डोयुङला
24
खोनिनआ उसओ लोयाङसा मोकोचिओ बुसि हाउसो डोयङला युङनि पुवानिन, “सारूङ्गाओ हाङहोन अकपाङ मना इसा ए।खोक्कोआ आनओ कायाखाडा नुयामाचा तेमतु।
25
मेन मनाचि इम्साओ वाइडा खोसाओ नुकसा बाना, का कायाचाओ हुपहुपडा कायासा तेम्ताकि खारा।
26
मेन मुनटोङ ताङ लोन्टाकि सिवा सिया, मोवाइदा कायासा छाङ दातलुवा।
27
नङ खिमओ नामसोङमिओ याङसुमिचिआ ताकि खोसाञा मलोवा, 'साएममु, दि खानानिन्आ आन्ओ कायाखाडा नुयामाचा तेमतानिनओ माआङ? ना मोडा कायासा खाडाङका ता?’
28
मन्कि खोकोआ मोकोचिञा यिङा, “खाउङे नुक्साआ उसओ मुवाओ ए।“ नङ याङसुमिचिआ खोसाञा मयिङा, 'ना दि आनकान खाराकि मोचि विइन्ने लोवो खानानिन्ओ राका याआङ?’
29
मेन खोसाआ यिङा, “डोटनिन। माआङलो खानाचिआ कायासा विइहिडा कायाचाकनिया अधेन।
30
चासुमसिवाओ वाइदा तारि हवाङेञा अकनिनडाङे पोन्मा पुवानुम। का चासुमसिवाओ वाइदाडा अङका मुकाचाचिञा लोवोङा, बुसि कायासा दुवाकि हुत्मा खुनचि खुनचि छुम्तानुम, मेन कायाचा लो अङकाओ चालुपडा पाक्तानुम।”
होमसिओ यामाचा का बोप्खाओ डोयुङलाचि
31
खोनिन्आ उसओ लोयाङसा हाउसो डोयङला युङनि पुवानिन, ‘सारूङगाओ हाङहोन होम्सिओ अक्टेट लुङवा इसा ए, खाक्को अकपाङ मनाआ टारूकि आन्ओ थाम्पुकडा लित्ता,
32
खाक्को झारा यामाचाडा चुप्पो नुयाक, मेन् मुन्टोङ पोन, मोबेन मोको लिमखान चोङलो टोप्पो नुयाक, का सुङताङङे लिनि खात। का नामकुदुओ सेचियाचि ताकि मोसाओ खेकसुङडा मयाकलुक।”
33
खोनिन्आ मोकोचिञा हाउसो डोयङला लोवानिन, "सारूङगाओ हाङहोन बोपखाइसा ए, खाक्को अकपाङ मारिछाआ सुम पादुक छुमाचाओ खाकभबुनडा मोको झारा बोपखायि मानलिसइन्लोकतारि कुमनि युङसा।”
34
देकमिआ ओचि झारा दुम डोयङलाचिडा मुक्लाचिञा लोवानिन। नङ मायाक डोयङला खोनिनआ मोकोचिञा दिचछाङ लोमा मानलि ।
35
"अङका डोयङलाचिडा चिडो होङवोङा, हेन्खामाओ मुलुमपुक डाङका कुमनि युङसाओ दुम अङका दुम्खाङमु चुवोङा” लोनि यामाङदाङका चेवानचिनओ दुम लाटला लिने।
कायासाओ डोयङलाओ तुप्यङ
36
मोबेन खोनिन मुक्लाचिञा छिराकि खिमडा खारानिन, का खोनिन्ओ खेन्माछाचिआ खोनिन्ओया ताकि मयिङा, “आन्कानचिञा बेङसिखाओ कायासाओ डोयङलाओ तुप्यङ लोनि पुवाने।“
37
खोनिन्आ मोकोचिञा लायङला पुवाकि लोवानिन, 'नुयामाचा तेमवो मनाओ सावाछा ए।
38
नङ कायाखा हेन्खामा ए। नुयामाचा खाक्को मए, मोचि हाङहोनओ छावारि मए, का कायासा सुलावाओ छावारि मए।
39
मोचिञा तेमवो नुक्सा सुलावा ए, चासुमसिवाओ वाइदा ओलाक धाधारङओ थेन्यु ए । नङ मुकाचाचि सारूङयाकेन्छाचि मए।
40
देतनि कायासा विइयाकि मिडा थााबुत मुविन, मुइसाकियाङे धारारङओ थेन्युडा छाङ लिवोङ।
41
मनाओ सावाछाआ चियाककेन्छाचि छुत्वोङ, का झारा साकबाय मेतवो दुमचि का हुआदोङ मुवोचिञा मोकोचिआ खोसाओ हाङहोन डाङका दुवोङ,
42
का मोकोचिञा मिओ लेतओप्खाडा वेत्नि मपुवोङ, मोडा चिखापयु का कुङजोङ साङसु लिवोङ।
43
मोबेन सामयोकमिचि चिपापाओ हाङहोनडा नामइसा छोक्वो मलिवोङ। खोक्कोओ नाबाक याआङ, मोसाआ एनने।
सारूङगाओ हाङहोन
44
"सारूङगाओ हाङहोन बेङसिखाडा खुमनि युङसाओ खाबालुङ इसा ए, खाक्को अकपाङ मनाआ तोक्ताकि कुमनि युङसा, का छेमासाङ लिसाकि खोसाआ हाङपाङसुत्डा लिसाओ झाराङे इनता, का मोको कायाखा खित्ता।
45
लादेङ सारूङगाओ हाङहोन खान्नो रुवाङलुङ लाममि अकपाङ इन्लामे इसा ए,
46
का मोसाआ अकटेट धिएइमा रूवाङलुङ तोक्ता नेत्लोक खाराकि हाङपाङसुत्डा लिसाओ झारा इनताकि मोको खित्ता ।
47
लादेङ सारूङगाओ हाङहोन साजुमाडा फेम्साओ अकटेट धिक चङखावेत् इसा ए, खाक्कोआ माइ-माइओ ङाचि कोपलाम मुवाकि बाटटा।
48
खाक्को मभेपता नेत्लोक मोकोचिआ केमयुडा सातनि मलात्ता, का युङाकि खान्नो मेत्लो खुङचिडा कोपला्म मचुवा, का उवाक मेत्लोञा हुइया मकेसा।
49
धाधारङओ थेन्युडा उसओ ङे लिवोङ, सारूङकेनछाचिआ ताकि बोन्छोलोकचिञा सामयोकमिओ हुपडाङका मछेन्वोङ।
50
का मोकोचिञा मिओ लेतओपखाडा वेत्नि मपुवोङ, मोडा चिखाप्यु का कुङजोङ साङसु लिवोङ।”
51
दि खानाचिआ मोचि झारा दुम अतुप्तु?" मोकोचिआ खोनिनञा मयिङा, “ज्यो हाएसि।”
52
मन्कि खोनिनआ मोकोचिञा लोवानिन, 'ओसुन्दुम सारूङगाओ हाङहोनओ निकि सान्यङ तोक्तुओ उकताउक यङवानमि अकपाङ खिमओ नामसोङमि इसा ए, खोक्कोआ आन्ओ खाबाखाडाङका नुङवा का आसुङ याम्तोकचि हुइया लाट्लुक।”
मनाचिआ नासरतडा देकमिञा बुङछुनला चुवाओ
53
मोचि डोयङलाचि लोनिचियानिन नेतलोक देकमि मोडाङका खारानिन।
54
नङ आन्ओ खोनङ सिङवाङडा ताकि खोनिनआ मोकोचिओ यायोकखिमडा मोकोचिञा उससो सालामयङ पुवानिन, हे मोकोचिआ नाकाकवा डोटटाकि मयिङा, “मोचिञा मोताया नङ सायराङओ वक खाडाङका छुकलापसाङ लिसा? दि मोचि रेक्कावाओ सावाछा माआङ?
55
दि मोचिओ मामाओ नङ मरियम, का मोचिओ निछाकचि याकुव, युसुफ, शिमोन का यहुदा माआङ?
56
नङ दि मोचिओ निछामाचि झारा आन्काकनिन मान्नुङ का? खोचिञा ओलाक मोचि झारा दुम खाडाङका छुकलापसाङ लिसा?”
57
मन्कि मोकोचि खोनिन सुत्दा माइसुङ मचुवा। मेन देकमिआ मोकोचिञा लोवानिन, “यामाङञा आन्ओ खोनङ सिङवाङ का आन्ओ खोनङ खिमडा लेटका निखाछे झारा खामडा सानुवा नुयाक।”
58
नङ मोकोचिओ योकोममिनआ मुहिदा खोनिनआ मोडा साएराङओ वक मुमा-मानलि ।