साएङ लु अतुम
हङसानवा पुमि युहन्नाओ सुवालोङ
1
मोवाइदा सिङवाङओ लुकअसिओ हेनकोपहाङ हेरोदआ देकमिओ धिनुम मएना।
2
नङ आनओ याङसुमिचिञा मयिङा, “मोचि हङसानवा पुमि युहन्ना मए, खोचि सुपोकवा डाङका मखोङवोङ, ओसुन्दुमङे मोचि साएराङआ खोसाडा वक मुलुक।”
3
देनालो हेरोदआ आनओ निछा, फिलिपओ तायामा हेरोदियासओ निमपिडा युहन्नाञा लापनि छुम्ताकि छेकखिमडा वाक्तुओ मयाआङा।
4
देनादि युहन्नाआ खोसाञा लोवाओ याआङा, "खानानिन्आ मोसाञा सायाकाम्मा नुलोक माआङ।”
5
नङ मोसाआ खोसाञा सेत्वो राका मुवाओ याआङा, मेन हाङछामिडाङका कुमाकारा, देनालो मोकोचिआ खोसाञा यामाङ चामलोकताङा।
6
मेन् मनटोङ हेरोदओ पुक्लेन ता, मोबेन हेरोदियासओ मेछाछाआ मोकोचिओ बुदा लाक्लुवाकि हेरोदञा वाया मेत्ता।
7
मुइसालिहिडा मोचिआ “खानाआ खाक्कोनुछे याक्क मदोरा छाङ पुवोङा” लोनि सिस्वदुम मचुवा।
8
मेन आनओ मामाआ चिन्लुनि युङसाओ लिहिडा मोसाआ यिङा, “हङसानवा पुमि युहनाओ टाङ ओकोङे चाखुङडा पुवाङनङने।”
9
मोबेन हेनकोपहाङ धितुक्खामि मलिसा, मेन चिसिस्वदुम, का चाचायुडा अकनिन्ङे युङकाबाचिओ सुन्दुम मोचिआ मोको पुवो इङइवा मचुवा।
10
नङ मोसाआ छुत्ताकि छेक्खिम्डा युहन्नाओ टाङ हेकसि मपाक्तु।
11
नङ खोसाओ टाङ चाखुङडा लोकताकि मोछेकुछाञा पुवानचिन । नङ मोसाआ मोको उमामाओया टारू।
12
मन्कि खोचिओ खेनमाछाचि बानाकि सुपोकवा खाटाकि मखुम्ता, का खाराकि देकमिञा यङखान मपुवा।
देकमिआ ङा हिभुङकिञा सुकतानिनओ
13
मन्कि ओको एनाकि देकमि वाएङबिडा वाङनि मोडाङका नियाकङे अक्टेट् सेन्याङनिखाडा खारानिन, का मुन्टोङ मुकलाआ ओको मएना मोबेन तालावाङडाङका लाङलामङे खोनिन्ओ देङसि देङसि मलुवा ।
14
नङ लोन्ताकि अक्टेट् टोप्पो मुक्लाञा टोकनि खोनिनआ मोकोचिञा सोमनुवानिन का मोकोचिओ तुक्काबाचिञा नुसङ मेतनि पुवानिन।
15
हान वावाङ लिसा नेतलोक खेनमाछाचि उसओ यिङयाङसा खोनिनओया मबाना, 'ओको सेनयाङनिखाम याआङ, का मुयाकला छित्दानिचिया, मुकलाचिञा खायोङ पुवाने, का मोकोचिआ टेनडा खाराकि हाङपाङओ निकि चामासेसि मखित्ने।'
16
मेन देकमिआ मोकोचिञा लोवानिन, “मोकोचिञा खात्मा चाखाम मान्नुङ। खानाचिआङे मोकोचिञा चासि पुवानुम।”
17
मेन मोकोचिआ खोनिनञा मयिङा, “ओडा आनकान सुत्डा ङाका पेम्पाक का हवाटेट ङाचि लेटका निचि दिच मात्दङ।“
18
मोबेन खोनिन्आ लोवानिन, “मोचि ओया अङकाओया बाटटानुम।“
19
मोबेन खोनिनआ मुक्लाचिञा चान्खाडा युङवो इङइवा पुवानिन, का मोचि ङाकाटेट् पेम्पाक नङ हवाटेट ङा टारूकि सारुङगाडा खाङाकि सायोक्दुम मुवानिन, का ओराकि पेम्पाकचि खेनमाछाचिञा पुवानिन, का खेन्माछाचिआ मुकलाचिञा मपुवा।
20
नङ मोचि झाराआ बुकखाइन्लोक मचो, का हेन्दुवाओ दाङसाचि मोकोचिआ हवापौटेट खेङडा मभेपता ।
21
नङ चाकाबाचि माचुप का छायाङछाचि छिराकि, ङाहिभुङकि मेत्लो मनाचि मयाआङा ।
22
मन्कि खोनिनआ मुक्लाचिञा खायोङ मुइनलोक खेनमाछाचिञा ओलाक हाले वायाङविडा वाङाकि खोनिन चोङलो बुसि बुसि ह्याउलिप्पा खात्वो छाक्को इङइवा पुवानिन।
23
नङ मुकलाचिञा खायोङ मुनिचिया नेतलोक खोनिन भुरुडा नियाक ङे सोम्फोङला चुमाञा वाङानिन। हान वावाङहिडा खोनिन अकपाङे मोडा लिमानुवाङा।
24
मेन हान वायाङवि ओलाक साजुमाओ हुपडा याआङा, का कुहुकओ उसादाकडा लिहिडा वारेपचिआ मोको फेन्याङसा याआङा।
25
मोबेन खाखुतओ लुसि सुसाङमुतुमडा खोनिन साजुमा धानि बियाङसा मोकोचिओया बानानिन।
26
नङ मुन्टोङ खेन्माछाचिआ खोनिन्ञा साजुमा धानि बिनियुङसाओ मटोक्ता, मोबेन मोकोचि उसओ लोयाङसा मकुमाकारा । 'ओको ना खाला ए!' का मोकोचि कुमाआ मपारा।
27
मेन देकमि मोबेन मोकोचि सुत्डा उसओ यिङाकि चेवानिन, “सापसा मुवानुम, अङका ङे एव, मानकुमाकातदानुम।”
28
नङ पत्रुसआ मलोवा, “हेइ! हाएसि खानानिन ङे लिमानु लो खानानिन्ओया चाःवा धानि धानि बान्वो इङइवा पुवाङने।”
29
मन्कि खोनिनआ लोवानिन, ‘बानानुम।’ नङ पत्रुस वायाङवि डाङका धासाकि देकमिओया खातसिञा चाःवा धानि धानि मबिया।
30
मेन कुहुक टोक्तुकि मोचि मकुमाकारा, का मुन्टोङ वालुम्मा लुवा हाले मोचि पाराकि मयिङा, "हेइ! हाएसि डेक्ताङनङने।”
31
मोबेन देकमिआ हालेङे छुक फेम्तुकि मोचिञा लापनिलेवानिन, का मोचिञा लोवानिन, ‘हेइ! मुन्दामक्तुमि, 'देना मिनछेन तमुवा?’
32
नङ मुन्टोङ खोकोचि वायाङविडा मवाङा मोबेन कुहुक नान्ता।
33
मन्कि चाःवासिडा लिवोचिआ खोनिनञा सानुवासाराकि मयिङा, “नुच्चुङङे खानानिन् निनाम्मुओ सावाछा लिमानुहिडा याछा।“
34
मन्कि हयाधेत फाकोपलेनता नेत्लोक खोनिनचि गनेसरेतओ थामपुकडा बानानिन।
35
नङ मुनटोङ मोको थाम्पुकओ मनाचिआ खोनिनञा मसिन्ता, मोबेन मोकोचिआ मोको यापाकओ चुवाङयोवा मनाचि मछुत्ताकि सारिमा लिसाओ झाराञा खोनिन्ओया मबाटटा,
36
का मोकोचिआ खोनिन्ओ सङनान्ओ चुकखा ओन छाङ नोप्सिञा ताछुकफेङला मचुवा, का मेतलोआ मनोप्ता, मोकोचि नुसङ लिसा ।