साएङ ङा अतुम
1
मोवाइदा यरूशलेम डाङका फरिसिचि का यङवानमिचि देकमिओया मबाना, का मलोवा,
2
“खानानिन्ओ खेनमाछाचिआ देना साकुदिपाचिओ रिदुम फेङकेत मचुलुक? देनादि मोकोचि, चामा बुसि आन्ओ छुक वालेकनिन।"
3
खोनिनआ मोकोचिञा लोवानिन, “खानाचि छाङ देना खानाचिओ निनाममुओ इङइवा फेङकेत अचुलुक?
4
देनालो निनाममुआ लोवानिनओ याआङ, 'आनओ पापा नङ मामाओ सानुवा मुवानुम, का पापा नङ मामाञा उत्नुङ मुवो अछुङङे सेरिनने।'
5
मेन खानाचि ओलाक अयिङलुक, 'खोक्कोआ आन्ओ पापा का मामाञा लोउने, 'अङकाङका मेत्लो छाङ खानानिनञा दुकनुवा लिसाओ याआङ, मोको निनाममुञा पुवानचिनओ ए, '
6
मोसाआ आनओ पापा हे मामाञा सानुवा मुवो चाखाम मात्दङ' का खानाचिआ आन्ओ रिदुमआ मुहिडा निनाममुओ इदुम असाहोक मेत्ताओ अयाआङ ।
7
हेइ! एङलामिच्यो, यसैयाआ खानाचिओ छापछोङडा उसओ यिङाकि ठाक ठाक मायुङछाम्सु मचेवा,
8
‘ओको रावाआ चिडोसिवाआ
अङसानुवा मुलुक।
मेन मोकोचिओ कोङरिङ अङकाङका
माङखा याआङ ।
9
नङ मनाओ इङइवाचि मोचिओ नुमितलाम
ओटनि मुनि मोकोचि सितनामडा
अङकाओ रेपमाला मचुलुक।”
10
मन्कि मुकलाञा बुत्ताकि खोनिन्आ मोचिञा लोवानिन, "एनाकि तुप्तानुम।
11
खाक्को डोडा वाङलुक, मोसाआ मनाञा असेङअत मुमेतनिन। मेन खाक्को डोडाङका हुइया लोन, मोसाआङे मनाञा असेङअत मुलुत।"
12
मोनेतलोक खोनिनओ खेन्माछाचि ताकि खोनिनञा मलोवा, “ओको लोयङला एनाकि फरिसिचि रहुकता लोनि दि खानानिनआ सिनला तोकतानिन?”
13
मेन खोनिनआ लोवानिन, “अङपापाआ मानलित्ताओ उकताउक सुङताङ धेन्वोङ।
14
मोचिञा खातसि पुवानुम, मोचि खाथेप बुलाम्बुचि मए । खाथेप्आ खाथेपञा बित्लो हवापाङङे लुमहुड्डा मडोट्वोङ।"
15
पत्रुसआ खोनिनञा मयिङा, “आन्कानञा ओको डोयङलाओ तुपयङ लोनि पुवाने।“
16
मन्कि खोनिन्आ लोवानिन, "दि खानाचि छाङ फान्नु खारूमातओ अयाआङ?
17
दि खानाचिञा सिन्ला मात्दङ, खाक्को डोडा वाङ, मोको बुकडा खात्लुक का खुडा खात्?
18
मेन खाक्को दुमचि डोडाङका हुझ्या मलोन, मोचि कोङरिङ डाङका लोन्टाकि मबान्, का मोचिआ मनाञा असेङअत ममेत।
19
देनादि कोङरिङ डाङका ङे उवाक मिन्ला, पोकसेतसु, कामुकि, खुसावारि, मुपसाङ, रफोम सिनलेमु, उत्नुङ हुइया मलोन।
20
मनाञा असेङअत मुलुत दुमचि ओको ङे मए । मेन छुक मान्वालेकनि चासिआ मनाञा असेङअत मेतनिन।“
21
हाले देकमि मोडाङका लोन्तानिन, का टायर नङ सायडन्ओ थुम लिप्पा खारानिन।
22
मन्कि खाङानुम, मोडाओ हायुङखाडाडका अकपाङ कनानिमा ताकि उइसा लोयाङसा पात्तु, “हेइ! हाएसि, दाउदओछा, अङका धानि पुनोत मुवाने। अङमेछाछाञा मामाङसुखाआ दाखासाङ मुलुत्ताओ याआङ।“
23
खोनिनआ खोसाञा दिच लायङला मानपुवानिन का खोनिन्ओ खेन्माछाचिआ ताकि खोनिनञा उसओ यिङाकि ताछुकफेङला मचुवा, "ओकोञा खायोङ मुवाने, देनालो मोको आन्कानओ देङसि देङसि पातयाङ।“
24
खोनिनआ लोवानिन, “अङका सोझामुओ इवाखिमओ माखाराओ सामुवाचि लेटका निचिओया छुत्तानचिनओ मानएदोङ।"
25
मेन मोको ताकि उइसा यिङाकि सायालोङ मुवा, "हेइ! हाएसि, फामासाङने।"
26
मेन खोनिनआ लोवानिन, “छायाङछाचिओ पेम्पाक खाटटाकि कुतिवाचिञा केनिपुमा मिननुलोक नुनिन।"
27
मन्कि मोसाआ लोवा, “ज्यो हाएसि, मेन कुतिवाआ छाङ ना आन्ओ नामसोङमिओ चाठाकडाङका धासाओ दाङला चा।"
28
हाले देकमिआ मोसाञा लोवानिन, “हेइ! मारिछा, आमनो मक्तुम टोप्पो याछा। खाक्को खाना राका तचुलुक, खानाञा मोको लात्ने।" नङ मोसाओ मेछाछा मोकोङे वाइदाङका नुसङ लिनिलेवा।
29
नङ देकमि मोडाङका लोन्ताकि गालिल वात्तामरुङडा खारानिन, का भुरूडा वाङाकि मोडा युङानिन।
30
हाले मोडा पेसोला, खाथेप नातेप, लाङभाङजा का बदधेका निचिसुत्डा लिसाओ धिमुक्ला खोनिनओया मता, का मोकोचिञा खोनिनओ लाङथेपडा युङनि मपुवा, का खोनिनआ मोकोचिञा नुसङ मुलुत्तानिन ।
31
ओयातारि हे नातेप्चि चेवाओ, लाङभाङजाचि नुसङ लिसाओ, पेसोलाचि बियाओ, खाथेपओ मुक होङतुओ खाङाकि मुक्लाचि स्वमराक्क मडोरा, का मोकोचिआ इस्राएलओ निनाममुओ धिनुमसङ मचुवा।
देकमिआ लु हिभुङकिञा चासुकमा लिसाओ
32
मोबेन देकमिआ आन्ओ खेन्माछाचिञा हाङपाङओया बुत्ताकि लोवानिन, “मुकलाचिञा अङका सोमनुङा, देनालो सुम्का लेन लिनिचिया, मोकोचि अङका सुत्डा ङे मयाआङ, का मोकोचिसुत्डा चामासेसि दिच्छाङ मात्दङ। नङ मोकोचिञा साकावाङे छुत्मा अङका राकामुनुङा माआङलो मोकोचि लाम्डा आक्तु मडोटवोङ।"
33
नङ खेन्माछाचिआ खोनिनञा मलोवा, “उन्टोप्पो मुक्लाञा बुकतोमसाङ मेत्मा ओको सेनयाङनिखाडा आन्काञा उन बद्धे पेम्पाक खाडाङका बान कि?”
34
देकमिआ मोकोचिञा लोवानिन, “खानाचि सुत्डा देम्काटेट पेम्पाकचि मयाआङ?” मोकोचिआ मयिङा, “एकाटेट, का अचिचि चुचुपाङ ङाचि।"
35
मन्कि खोनिन्आ मुक्लाञा लुमडा युङवो इङइवा मुवानिन्।
36
का खोनिनआ मोचि एकाटेट पेम्पाक नङ ङाचि तारूकि निनाम्नुत मपुवा नेत्लोक ओराकि खेन्माछाचिञा पुवानिन, का खेन्माछाचिआ मुक्लाञा मपुवा।
37
मन्कि मोकोचि झाराआ चासाकि बुकतोमसाङ मलिसा, का हेन्दुवाओ दाङलाचि मोकोचिआ एकाटेट खेङ भेपनि मकोप्ता।
38
नङ चाकामिचि, मारिछा का छायाङछाचि छिराकि लु हिभुङकि मनाचि मयाआङा।
39
मोबेन मुक्लाञा खायोङ मुनिचिया नेत्लोक खोनिन चाःवासिडा वाङानिन, का मग्दानओ थुमलिप्पा खारानिन।