साएङ तुक अतुम
1
हान फरिसिचि का सदुकिचिआ, खोनिनओया बानाकि खोनिनञा सुको चुसिञा उसओ मलोवा, “आनकानञा सारूङगाङका अक्टेट सिनछुङ खाङमेत्ताने।“
2
मेन खोनिन्आ मोकोचिञा लायङ पुवाकि लोवानिन, “वावाङ लिहिडा खानाचि तयिङ, लेन् खान्नो नुयाक । देनादि नाककुदु हलचुकवा नुयाक।
3
नङ पोकनाम नामकुदु हलचुकवा याआङलो, कुहुक बान लोनि अयिङ। खानाचि नामकुदुओ यामामुदाङका लेन छेन्मा असिन, मेन वाइदाओ सिन्छुङ ओलाक छेनमा अरूनिन ।
4
उवाक नङ राकयाङमि तालाखुकआ सिन्छुङ लामलुक, का मोसाञा योनाओ सिनछुङ लेटका हाउसो सिन्छङ पुवोननिन।" नङ मोकोचिञा छिराकि खोनिन् खातनिलेवानिन।
5
नङ हयाउलिप्पा ताबान्हिडा खेन्माछाचिआ पेम्पाक बाट्मा ममान्माकेयाछा।
6
मोबेन देकमिआ मोकोचिञा लोवानिन, “चान्चुप युङानुम, का फरिसि नङ सदुकिचिओ बोपखाडाङका लेयानुम।"
7
मन्कि मोकोचि हाङपोहाङडा मिनफाकमिन मुसि मलुवा, 'आन्कानआ पेम्पाक लोकतिमिन लोवाकि लिसुने।'
8
देकमिआ ओको सिन्ला तोक्तुकि लोवानिन, "हेइ! ओन्तोमक्तुमि च्यो, खानाचिसुत्डा पेम्पाक मात्दङ यिङाकि देना हाङपोहाङडा मिनफाकमिन अचु?
9
दि फाननु सिन्ला मात्दङ का, अमितनिन ङाहिभुङकिओ निकि ङाटेट पेम्पाक, का देम खेङ खानाचिआ कोप्ताओ अयाआङा?
10
नङ मोचि लुका हिभुङकिओ निकि एकाटेट पेम्पाक, का देम खेङ कोपतुओ अयाआङा?
11
अङकाआ पेम्पाकओ सानुङडा यिङाओ माआङ, मेन फरिसि का सदुकिओ बोपखाङका चानचुप युङानुम लोनि लोवाओ, खानाचि खाइसाकिया अतुपनिन?"
12
मोवाइदा मोकोचि पेम्पाकओ बोप्खाङका माआङ, मेन सदुकि नङ फरिसिचिओ सानयङ डाङका चानचुप युङमा लोवानिनओ याछा लोनि मतुपता।
13
हान देकमिआ सिजरिया फिलिप्पओ लुङवाङडा ताकि आन्ओ खेन्माछाचिञा उसओ यिङाकि सेनानिन, “मनाचिआ मनाओ सावाछाञा साङ ए लोनि मयिङलुक?”
14
मोकोचिआ मलोवा, “साङआ हङसानवा पुमि युहन्ना, साङआ एलिया, का निचिआ यर्मिया हे यामाङखपडा खाउ ङे अक्पाङ लोनि मयिङलुक।”
15
खोनिन्आ मोकोचिञा लोवानिन, “मेन खानाचि ओलाक अङका साङ एव लोनि अयिङलुक?”
16
शिमोन पत्रुसआ लायङ पुवाकि मलोवा, “खानानिन अहङसक निनाम्मुओ दुवाछा निनामछेन लिमानु।"
17
देकमिआ मोचिञा लोवानिन, “सायोकसाङ तए, हेइ! योनाओ सावाछा, शिमोन देनालो मनाङका खानाञा ओको यापुकतु मुवाओ माआङ, मेन अङकाओ सारूङगाडा लिवो पापाआ मुवानिनओ ए।
18
मन्कि अङका छाङ खानाञा लोलुकङा, हे खाना पत्रुस तए। अङका ओको वाछेपलुङधानि आनओ इरिमि ठानमुसाङ मुवोङा, का सुवालोङ मोकोधानि चुङताम लिवोनिन।
19
अङका खानाञा सारूङगाओ हाङहोनओ होक्छेकचि पुवोङा, खाक्को खानाआ हेन्खामाडा तछुमवोङ, मोको सारूङगाडा छुमवोन, नङ खाक्को छाङ खानाआ हेन्खामाडा तहोङउने, मोको सारूङगाडा तहोङवोङ।"
20
मोबेन खोनिन्आ निनामछेन ओको ङे ए यिङाकि खाउडे मनाञा मान्लोदामा लोनि खेन्माछाचिञा छाक्को इङइवा पुवानिन।
21
मोको वाइडाङका देकमिआ आनओ खेनमाछाचिञा खाङमेतमा लुवानिन, हे खोनिनञा खाइसाकिया यरूशलेमडा खात्मा, का बुलाम्बु, यामुबुबमिचि नङ यङवानमिचि डाङका धिबान्छुप थाआङमा, का सेतमान, का सुम्कालेनडा खोङमा चाखाम याआङ ।
22
मेन पत्रुसआ खोनिनञा अकलिपा खाटटाकि हियुकसि का खोनिन्ञा हेन्मा मलुवा, ‘निनाममुओ पुनोत युङने, हाएसि, उसओ दुम खानानिन धानि देम्खाछाङ तालुवोनिन।'
23
मेन खोनिनआ पत्रुसलिप्पा लासाकि लोवानिन, “हेइ! सुलावा अङकाओ बुदङका यासोतनि खारे, खाना अङकाओ निकि ढुङला चात्वो सुन्दुम तयाछा। देनालो खाना निनाम्मुओ माआङ, मेन मनाचिओ दुमचिडा स्वमलेन तपुलुक।"
हाङनोत लेत्ला
24
हाले देकमिआ आनओ खेनमाछाचिञा लोवानिन, “साङ अङकाओ देङसि बानवो राका चुलुक लो, खोसाआ हाङपाङञा बुङछुन्ला मुने का आन्ओ इलाक थेन्ताकि अङकाओ देङसि वाङने।
25
देनादि खोक्कोआ आनओ हाङमाङ रातवो राका चुउने, खोसाआ मोको मासुवोङ, मेन खोक्कोआ आनओ हाङमाङ अङकाओ निकि मासुउने, खोकोआ मोको तोकवोङ।
26
देनादि झाराङे हेन्खामा छुकलापसाङ मुवाकि चिहाङमाङ ओलाक मासुलो मनाञा दि दुक्नुवा लिवोङ कि? हे: ना चिहाङमाङओ बारालाडा मनाआ दि पुउने कि?
27
देनादि मनाओ सावाछा आनओ पापाओ धिनुसङडा आन्ओ याकेन्छाचिसुत्डा बान्वोङ, का मोवाइदा खोसाआ उक्ताउक मनाञा मोसाओ ओक ओन्सामि यादुमखुङ पुवोङ।
28
अङका खानाचिञा नुच्चुङ ङे लोलुकङा, ओडा एपकाबाचिखपडा साङ मयाआङ, खोक्कोआ मनाओ सावाछाञा आनओ हाङहोनडा बानयाङसा मुवाओ मानटोकइनलोक खाउ ङे रिदुमआ सुवालोङ छेम्वो ममान्नुङ।"