साएङ ए अतुम
देकमिओ यायुपा याफानलेन
1
तुक्कालेन नेत्लोक देकमिआ पत्रुस, याकुब नङ मोचिओ निछाक युहन्नाञा हाङपाङसुत्डा लोकतानिन का अक्टेट चोमलो भुरूडा सेन्याङनिखाडा खाटटानिन।
2
मन्कि मोकोचिओ बुसित खोनिनओ युपा याफान लिसा। खोनिनओ डालुङ नामइसा छोक्तु, नङ खोनिनओ टिट्खान ओपमिसा ओमचुक लिया।
3
नङ वाछाप्पा का एलिया खोनिन सुत्दा चेप्याङसा मुवाओ मदातलुवा।
4
मन्कि पत्रुसआ देकमिञा मयिङा, “हेइ! हाएसि आनकानञा ओडा युङमा नुलोक याआङ। खानानिन्ओ राका मलिसा लो अङका ओया सुम्काटेट याक्साचि मेत्वोङा, अक्टेट खानानिन्ओ निकि, अकटेट वाछाप्पाओ निकि, नङ अक्टेट एलियाओ निकि।"
5
मोचि चेप्याङसा ङे याआङा, छोक्ओ युवारिआ मोकोचिञा डिपनिलेवा, का मोको युवारिडाङका अक्टेट उस्ओ लोवो डोसाङला बाना, "ओचि अङकाओ स्वमपोवा सावाछा ए, खोकोकनिन अङका वाया याक्ङा, खानाचिआ खोचिओ दुम एनानुम।"
6
मुन्टोङ खेन्माछाचिआ ओको मएना, मोबेन मोकोचि मबोम्ता, का धिकुमाकारा।
7
मन्कि देकमिआ बानाकि मोकोचिञा नोप्ताकि लोवानिन, “पोक्तानुम, मानकुमाकातदानुम।"
8
मुन्टोङ मोकोचिआ चिमुक थिन्ता मोबेन देकमि लेटका निचि साङञा ममानतोक ।
9
मुन्टोङ खोकोचि भुरूडाङका धायाङसा मयाआङा, मोबेन देकमिआ मोकोचिञा उसओ लोवो इङइवा पुवानिन, “मुनटोङ तारि मनाओ सावाछाओ लाहङलेन नुनिन मोबेन तारि खानाचिआ ओको मागदालेनओ दुम साङछेञा मान्लोदामा।“
10
मन्कि खेन्माछाचिआ खोनिनञा उससो यिङाकि मसेना, “मोबेन देना यङवानमिचिआ बुसि एलिया बान्मा डोट लोनि मलोलुक्?"
11
खोनिनआ मोकोचिञा लोवानिन, “एलिया नुच्चुङ ङे मबान का मोचिआ झारायाक्क लादेङ मसाङसेनवोङ।"
12
मेन अङका खानाचिञा लोलुकङा, "एलिया बुसि ङे तानिचियाओ मयाआङ, नङ मोकोचिआ खोचिञा ममानसिन, मेन खाक्को मिन्मासा लुवा मोचिञा मोकोचिआ मुइसाङे सुङसेन मचुवा। मुइसाकिया ङे मनाओ सावाछाआ छाङ मोकोचिङका छुयुकोप तोकमा डोट्वोङ।"
13
मोबेन खोनिनआ हङसानवा पुमि युहन्नाओ छाप्छोङडा मोकोचिञा लोवानिनओ याछा लोनि खेन्माछाचिआ ममित्ता।
मामाङसुखा वाङाओ एलोकछा
14
हान खोनिनचि मुक्ला लिसाओ खाम्डा बानानिन नेत्लोक अकपाङ मनाआ उसओ लोयाङसा खोनिनओ बुसित बानाकि लाङतुम्फु नेप्तु
15
“हेइ हाएसि, अङसावाछा धानि नुनुत मुवाने, देनादि मोसाञा तेपमामाङ वाङाओ याआङ, का धिबान्छुप थाआङलुक। देनादि मोको सान्लेप मिडा का चाःवाडा धाम।
16
नङ अङकाआ आमखेनमाछाचिओया टारूङ, मेन मोकोचिआ मोसाआ नुसङ मेत्मा ममानर।"
17
मोबेन देकमिआ लोवानिन, "हेइ मुन्दामक्तुमि नङ लोमान्टेट मना च्यो, अङका देम्खा तारि खानाचिओ ढायुकडा युङुमने? देमतारि अङका खानाचिञा आङमा? मोसाञा ओडा अङकाओया बाट्टानुम।"
18
मन्कि देकमिआ हेन्तानिन, का मामाङसुखा मोडाङका लोन्टाकि फुङसा । नङ मोको एलोकछा मोवाइदा ङे नुसङ लिसा ।
19
मोबेन खेनमाछाचि सेन्याङनिखाडा देकमिओया ताकि मलोवा, “आन्कानआ मोसाञा देना लातमा रूइमिन?"
20
खोनिनआ मोकोचिञा लोवानिन, “खानाचिओ मुन्दामकतुमओ सुन्दुमआ ए । देनादि अङका खानाचिञा अछङङे लोलुकङा, हे खानाचिडा अक्टेट आःवासिओ लुङवा मेतलो मक्तुम मलिसा, ओको भुरूञा 'ओडाङका यासोरे' अलोवा लो मोको खाछिताकि खात्वोङ, का खानाचिञा दिच्छाङ अतकारूयाक लिवोनिन।
21
मेन्छाङ ओको माइओ वक ओलाक सोम्फोङला का मान्चायाकला मायाक लोननिन।"
22
नङ खोनिनचि गालिलडा युङानिनओ वाइदाडा देकमिआ मोकोचिञा लोवानिन, “मनाओ सावाछा मनाचिओ छुक्डा पाङपाकवोङ।
23
मन्कि मोकोचिआ खोसाञा मसेत्वोङ, मेन सुमसि लेनडा खोसाओ लाहङलेन लिवोङ।" मन्कि मोकोचि धितुक्खामि मलिसा।
24
मुन्टोङ खोनिनचि कफर्नहुमडा बानानिन, मोबेन माङखिमओ छोन्ला कोप्कामिचिआ पत्रुसओया ताकि मलोवा, “दि खानाचिओ रूमुआ छोन्ला मछोन्निन?”
25
मोचिआ मयिङा, "ज्यो, छोन्मा नुयाक।" नङ् खोनिनचि खिमडा मवाङा नेत्लोक देकमिआ मोकोचिञा बुसिङका ङे लोवानिन, "हेइ शिमोन, खाना दि मिन्ला तचु? हेन्खानमाओ हाङचिआ छोन्माला हेना छोनला साङओ डाङका मकोप? आनओ सावाछाचिङका हे निपाङडाङका?"
26
नङ् मुनटोङ मोचिआ निपाङ डाङका मयिङा, मोबेन देकमिआ मोचिञा लोवानिन, “मुइसा लो दुक्पाछा मेत्माछाचिआ ना नुनाम्लानुत तोक्ताओ मयाछा ।
27
मेन आनकान डाङका मोकोचि मानह्रुकसिओ निपि खाना साजुमाडा खाराकि खोकचुङखेक पाक्तानुम, का बुसि बानाओ ङा लोक्तानुम, का मोसाओ डो होकता नेत्लोक खानाआ अकटेट शेकेल ततोकवोङ। मोको लोक्तुकि आमनो नङ अङकाओ यिङाकि मोकोचिञा छोननिपुए।"