साएङ रे अतुम
नुऔलाओ सालामयाङ
1
मोवाइदा खेनमाछाचि देकमिओया उइसा लोयाङ्सा मबाना, 'सारुङगाओ हाङहोन्डा झारा चोङलो टोप्पो साङ ए?'
2
खोनिनआ अकपाङ चुप्पोछाञा चुक्डा बुत्ताकि मोसाञा मोकोचिओ हुपडा युङसानिन,
3
का लोवानिन, “अङका खानाचिञा नुच्चुङ लोलुकङा, खानाचि फान्ताकि चुपपाङ एलोकछा ओटनि अमानलि लो खाउ ङे रिदुमआ सारूङगाओ हाङहोनडा अवाङवोनिन।
4
ओसुन्दुम खोक्कोआ ओको चुप्पो एलोकछा ओटनि हाङपाङञा नो: अ मेत, मोकोङे सारूङगाओ हाङहोनडा झारा चोङलो टोप्पाङ नुयाक ।
5
नङ खोक्कोआ अङकाओ नुङडा अकपाङ उसओ चुपछाञा देङहुतलेन चुउने मोसाआ देङहुत्लेन चुवाङलुक ।
6
मेन खोक्कोआ अङकाडा मक्तुम मुवो मोचि चुप्पाङ खपडा अकपाङञा साक्बाय पुउने, मोसाओ निकि ना अकटेट चाचेमलुङओ लुङटाक मोसाओ पोट्डा कुङताकि अतोक साजुमाडा वालुमनि-पुमा खाननो लिवो याआङा ।
7
तामिनराक, बुलुहुत्डा साकबाय डोट्वो वक तालुवाओडा, देनादि साकबाय ना बान्वो दुमङे ए, मेन तामिनराक, मोको मनाञा खोक्कोङका साकबाय डोटमा बान।
8
आम्छुक हे लाङआ खानाञा साकबाय डोट्लो, मोसाञा हेक्ताकि केनिपुए। हवाछुक हे हवालाङ युङसाकि सान्लेप मिडा केमान चोङलो ना हेनाक छुक मायाक अयामहुड्डा वाङमा खानाओ निकि खान्नो नुयाक ।
9
नङ खोनालो आम्मुकआ खानाञा साकबाय डोट्लो, मोसाञा लात्ताकि केनिपुए। हवाटेट मुक युङसाकि मिओ खामारेनडा केमान चोङलो ना उकखाथेपमि लिनि अयामहुड्डा वाङमा खानाओ निकि खान्नो नुयाक ।
10
खाङानुम, खानाचिआ मोचि चुपपाङखपडा अकपाङञा छाङ अत्ला मान्मुदानुम । देनालो अङका खानाचिञा लोलुकङा, सारूङगाडा मोकोचिओ याकेन्छाचिआ अङकाओ सारूङगाओ पापाओ ङालुङ हाक्माहाक मखाङलुक ।
11
देनालो मनाओ सावाछा मासुवाओञा डेकमा बानाओ ए ।
मासुवाओ सामुवा
12
खाउङे मनाओ अभुङकि सामुवाडा अकपोक मासुवा लो, मोसाआ भौकिभौपोकञा छितदोनि हेमसुवाडा खाराकि मोको मासुवाओञा लामसुवारि मुनिन कि?
13
नङ खोनालो खोसाआ मोकोञा धितनिलेवा लो, अङका खानाचिआ नुच्चुङ लोलुकङा, मोचि मानमासुवाओ भौकिभौपोक चोङलो मोको अकपोकओ निकि धिछेमाकातवोङ।
14
मुइसाकिया ङे ओचि चुपपाङचिखपडा अकपाङ छाङ युनला मानलिने लोवो खानाचिओ सारूङगाडा लिवो पापाओ मिनमासा याआङ।
15
आमनो निछाआ आमनो उसादाकडा हुमुक्वा मुवालो, खाराकि खानाचि हवापाङ ओन लिहिडा मोसाओ हआदोङ खाङनिपुवानुम । मोसाआ आमनो दुम एनालो, खानाआ आमनो निछाञा आनओ तमुमेत्ता।
16
मेन मोसाआ मान्एन लो हाङपाङ अकनिनडा हवापाङञा खाटटानुम, का हवा-सुम सिनलेमुओ डोडाङको अकअक दुम अछङक्क मुवानुम।
17
खोनालो मोचिआ मोकोचिओ दुम छाङ एन्सि बुङछुनला मुलो, कोपसामञा लोवानुम, का मोसाआ कोपसामओ दुम छाङ एनसि बुङछुनला मुलो, आमनो निकि मोको निरङ का छोन्दुकामि ओटनि लिने।
18
अङका खानाचिञा नुच्चुङ लोलुकङा, खाक्को खानाचिआ हेन्खामाडा तछुम्वोङ, मोको सारूङगाडा छुम्सानचिनओ लिवोङ। नङ खाक्को खानाचिआ हेन्खामाडा महोङ मोको सारूङगाडा होङसानचिनओ लिवोङ ।
झाराकोपसाङ सोम्फोङला
19
लादेन अङका खानाचिञा लोलुकङा हेन्खमाडा खानाचिहुपडा हवापाङआ इकमिन्तोङ मुनि दिच दुमओ छाप्छोङडा दिच तदोरा लो, मोको अङकाओ सारूङगाओ पापाओ लिपाङका खानाचिओ निकि लिनिलेवोङ ।
20
देनादि खाडडा हवा हे सुम्पाङ अङनुङडा झाराझुम मलि, मोडा अङका मोकोचिओ हुपडा लिङा।"
अत्तालाङमि याङसुमिओ डोयङला
21
मोबेन पत्रुसआ खोनिनओया ताकि मयिङा, “हेइ! हाएसि, अङनिछाआ अङकाओ उसादाकडा देम्कादु तारि हमुकवा मचुवा अङका मोसाञा नुनाम्लानुत मुम? दि एकादु तारि?”
22
देकमिआ मोचिञा लोवानिन, “अङका खानाञा एकादु तारि लोनुङा, मेन ए फसमि एकिदु तारि।"
23
ओसुन्दुम सारूङगाओ हाङहोन अकपाङ हाङ इसा ए, खोक्कोआ आनओ याङसुमिचिसुत्डा खिपमाला तात्वो राका मचुवा ।
24
नङ मुनटोङ मोचिआ खिपमाला लोकसिलुवा, मोबेन पौहिभुङकि फेकवाओ नाकमि मोचिओया टारानचिन।
25
मेन मोसाकनिन मोको नाक छोन्माञा दिच छाङ मानलिहिडा नामसोङमिआ मोको, मोसाओ उतायामा का छाछिचि नङ मोसा सुत्दा लिसाओ झारा याम्तोक इनताकि नाक् छोन्सिञा इङइवा मपुवा।
26
मोवाइदा मोको याङसुमिआ बोम्तुकि मोचिञा सायालोङ मुनि यिङा, "हेइ! नामसोङमि, अङकादु छङनुस्वम खाङमेत्ताने, का अङका खानानिन्ओ झारा ङे छोन्नि पुवोङा।‘
27
नङ मोको याङसुमिओ नामसोङमिआ सोम्तुक्ताकि मोसाआ छितनि मपुवा, का मोसाओ नाक नुनामलानुत मुनि मपुवा ।
28
मेन मोको याङसुमिआ लोन्ताकि आनओ यावा याङसुमिखपडा अकपाङञा धिरू, खोक्को मोसाओ अकभुङकि दिनारओ नाकमि याआङा, मोसाञा पोटहयुडा लापतुकि यिङा, ‘खानाओ नाक छोननिलेउवे।'
29
मेन मोसाओ यावा याङसुमिआ बोम्ताकि मोसाञा उसओ लोयाङसा सोमफोङला मुवा, ‘अङकादु छङनुस्वम खाङमेत्ताने, अङका खानाञा छोननि पुवोङा।'
30
मेन मोसाआ देङहुतला मान्मु मेन खाराकि नाक मान्छोइलोकतारि छेक्खिमडा वाकनिपुवा ।
31
मुइसाङेआ मोडा खाकखाक्को लिसाओ मयाआङा, मोसाओ यावा याङसुमिचि मोको खाङाकि तुकखामि मलिसा, का खाराकि लिसाओ झारा मुवाइमु मोकोचिआ आनओ नामसोङमिञा एन्मेतनि मपुवा।
32
मोयोक्दा उनामसोङमिआ मोसाञा हाङपाङओया बुत्ताकि मलोवा, ‘हेइ! बोन्छोलोक याङसुमि खानाआ अङकानिन ताछुकफेङला मुवाओ लिहिडा अङकाआ खानाञा आमझारा मोको नाक नुनामलानुत मुनि पुउङ।
33
देतनि अङकाआ खानाधानि नुनुत मुउङ, खानाआ छाङ आम्यावाञा नुनुत मुमानुवो मान्नुङा?'
34
मन्कि मोसाओ नामसोङमिआ ह्रुकसाकि मोसाञा मोसाओ झारा नाक मानछोनइनलोकतारि छेकखिमओ खारूखाहाङछाओ छुकडा पाङपाक्ता।
35
अङकाओ सारूङगाओ पापाआ छाङ, खानाचि उकताउकआ आनओ निछाकआ आनओ कोङआ नुनाम्लानुत तपुनिन लो, खानाचिञा छाङ मुइसाङे चुमा-लिवोङ।'