साएङ भौ अतुम
1
मोचि दुम चेपनिचियानिन नेत्लोक देकमि गालिल छिराकि इताङकु हयाधेत यहुदाओ चोमसिनखा लिप्पा खारानिन।
2
नङ टोप्पो टोप्पो मुकलाचि खोनिनओ देङसि मबाना का खोनिनआ मोडा मोकोचिञा नुसङ मुलुत्तानिन।
3
मन्कि फरिसिचि खोनिनओ सुको मुसिञा खोनिन्ओया बानाकि मयिङा, “दि साङआ खाउङे छाङ सुन्दुमआ दापयामा लेट्मारु?"
4
मेन खोनिन्आ लोवानिन, ‘दि खानाआ खिपताओ तमान्नुङ, हे खोक्कोआ मेत्तानिन, खोनिन्आ मोसाञा पुङलाङका ङे सोरोछा मारिछा मुनि मेत्तानिन,
5
का लोवानिन, 'ओसुन्दुम मनाआ आन्ओ मामापापञा छिरूकि आन्ओ दापयामा सुत्डा तोङनि युङयाक, का मोचि हवापाङ अकपोक मलिवोङ।
6
का मोचि हान हवा माआङ, मेन अक्पोक ङे मलि। ओसुन्दुम खोक्कोञा निनाममाआ ढायुकडाङे कामतानिनओ याआङ, मोसाञा मनाआ नियाक मान्मुने।'
7
मोकोचिआ खोनिनञा मयिङा, “वाछाप्पाआ देना लेट्माछाप पुवाकि लेटमा रूवो इङइवा मपुवा?”
8
खोनिनआ मोकोचिञा लोवानिन, "खानाचिओ कोङरिङओ छाक्कोमिनआ मुहिडा ङे वाछाप्पाआ मासुङ लेट्वो देङहुतवारि खानाचिञा पुवाओ मए, मेन पुङलाङका ना उसओ लिसाओ माननुङा।
9
अङका खानाचिञा लोलुकङा, खोक्कोआ राक्याङलामओ सुन्दुम लेटका दापयामा लेत्ताकि निपाङसुत्डा याकाम्मु चुलुक, मोसाआ राकयाङला चुलुक नङ खोक्कोआ लेट्साङ मुवाओञा याकाममु चुलुक, मोसाआ छाङ राकयाङला चुलुक।"
10
खेनमाछाचिआ खोनिनञा मयिङा, "सायापाओ तायामा सुत्डा मुइसाङे वेत्नात् एलो ना, याकाम्मु मुमा दिच दुकनुवा मान्युङयाछा।"
11
मेन खोनिनआ मोकोचिञा लोवानिन, "झारा मनाआ ओको इदुम देङहुतलेन चुमा मरूनिन्, ओन मोकोचिआ खोक्कोञा पुवानचिनओ याआङ।
12
वारावाराङ सुन्दुमआ मनाचि याकाममु मचुनिन, साङ पुकछावन डाङका ङे अमानर मलि- देम्पाङञा मनाआ मुइसाङे मुमेत्ता- देम ओलाक सारूङहाङहोन्ओ निकि माकाम्मुसाङ मयुङ। देङहुतलेन चुमा रूवोआ मोको देङहुतमुने।"
13
मोबेने खोनिनआ मोकोचिधानि छुक युङने का सोम्फोङला चुनिमपुने लोनि चुप्पाङ छाचिञा खोनिनओया मटारा, मेन खेन्माछाचिआ ओलाक मोकोचिञा महेन्ता।
14
मेन देकमिआ लोवानिन, “एलोक्छाचिञा अङकाओया बानसिञा माननानदे देनालो सारूङगाओ हाङहोन उसओचिओ ए।"
15
नङ खोनिनआ मोकोचि धानि छुक मयुङसा नेत्लोक खोनिन मोडाङका खारानिन।
सान्लेप अयामओ लामसुवारि
16
नङ अकपाङआ बानाकि खोनिनञा मलोवा, “हेइ! रूमु, सान्लेप अयाम तोकसिञा अङकाआ दि नुवक मुमा डोट?”
17
खोनिनआ मोचिञा लोवानिन, “खानाआ नुलोक वकओ छाप्छोङदा देना तसेनाङयाक? नुलोक ना अकपाङ ओन लिमानु मेन खानाआ अयामडा कावाङमु मुमा राका तचुलुक लो, इङइवाचि काङलेन मुवानुम?'
18
मोचिआ खोनिनञा मयिङा, "खाउ खाउ ओलाक?” देकमिआ लोवानिन, “ओको ङे तामिन्तुप् खानाआ पोकसेत्सु मान्मुदामा, राकयाङला मानमुदामा, खुसावारि मान्मुदामा, मुपसाङ सिन्लेखा मानपुदामा।
19
आनओ मामापापाओ सानुवा सातमा, का आनओ डाकनिञा हाङपाङञा इसा सोम मुमा।"
20
मोचि फानटा मनाआ खोनिनञा मयिङा, “ओचि झारा ना अङकाआ काङलेन मुयाङसा ताओ याकङा, फाननु अङकाआ दि मुमा दकयाक याआङ कि?”
21
देकमिआ मोचिञा लोवानिन, “खाना सेनलेन लिवो राका तचुलो खाराकि खानासुत्डा खाक्को याआङ, झारा इनताकि छुयुकुप्पाचिञा पुवानुम, नङ खानाञा सारूङगाडा खाबालुङ तोङवोङ का ताकि अङकाओ देङसि वाङानुम।“
22
मेन मोचि छेकुछा ओको दुम एननि तुक्खामि लिनि खातनिलेवा देनादि मोचि बद्धेका खाबालुङ लिसाओ मना याआङा।
खाबालुङडाङका लिवो मायाक्सा
23
मन्कि देकमिआ आन्ओ खेन्माछाचिञा लोवानिन, “अङका खानाचिञा नुच्चुङ लोलुकङा, खाबालुङमि सारूङगाओ हाङहोनडा चरक्वा सुत्डा वाङवोङ
24
मन्कि लादेङ अङका खानाचिञा लोलुकङा, खाबालुङमि मनाञा निनाममुओ हाङहोन हुडडा वाङमा चोङलो हेनाक देङकोङवाञा लुप्मिओ लुप्मकडाङका लेन्मा नेकता लिवोङ।"
25
ओको एनाकि खेन्माछाचिआ धिनाकाकव काङनि मयिङा, ‘मुइसालो साङआ सेममाला तोक्मारू ना?’
26
देकमिआ मोकोचिधानि मुक्खाङ मुवाकि लोवानिन, “मनाचिङका ना ओको अत्कारूयाक याआङ, मेन निनाममुङका झारा याम्तोक कारूयाक याआङ।"
27
मोबेन पत्रुसआ खोनिनआ मयिङा, "खाङाने आनकानआ ना झारा यामतोक छिरूकि खानानिनओ देङसि लुइन आन्कानआ दि तोकवोम्का?”
28
देकमिआ मोकोचिञा लोवानिन, ‘अङका खानाचिञा अछङ ङे लोलुकङा, खानाचि, खोक्को अङकाओ देङसि लुवाओ अयाआङ, नुङवा मेट्लाडा मुन्टोङ मनाओ सावाछा आनओ धिनुमसङओ धिनारोम्खाडा युङवोङ, मोबेन खानाचि छाङ इस्राएलओ हवापौ साम्खा धानि सान्नोसान मुयाङसा हवापौङे धिनारोमखाडा अयुङवोङ।
29
नङ् खोक्को खोक्कोआ अङनुङओ निकि खिम, बुबुनिछाक हे नाना फेङमाया, नङ पापा, हे मामा, हे छाचि, हे थाम्पुकखाचि छित, मोसाआ हिभुङकि फसमि तोकवोङ, का सान्लेप अयामओ कोपरू मुवोङ।'
30
मेन् बदधेका खोक्को बुदा मयाआङ देङदा मलिवोङ का देङयाक्को ओलाक बुयाक्को मलिवोङ।