हकि अतुम
यमसिखाओ मुकाचाचिओ डोयङला
1
देनालो सारूङगाओ हाङहोन अकपाङ खिमओ नमसोङमि इसा ए, खोक्को ओङसाङे चियमसिखाडा मुकाचाचिञा काचिलुङडा पाकमा हुइया लोनता ।
2
मुकाचाचि सुत्डा लेनओ अक दिनार तोङलासि मुनि खोसाआ मोकोचिञा आनओ यमसिखाडा छुत्ता।
3
मुनटोङ खोको सुमसि वाइदा हुइया लोन्टा, खोसाआ निचिञा इनखावाङडा सितनाम एपनियुङसाओ टोक्तु
4
नङ खोसाआ मोकोचिञा यिङा, 'खानाचि छाङ यमसिखाडा खारानुम, का खाक्को मिननुलोक नुयाक अङका खानाचिञा पुउमने।' नङ मोकोचि मखारा।
5
लादेङ खोसाआ तुकसि वाइदा का भौसि वाइदा लिप्पा हुइया लोन्टाकि मुइसा ङे मुवा ।
6
खोसाआ अकपौसि वाइदा लिप्पा हुइया लोन्टाकि निचिञा एपनियुङसाओ मधिरा, का मोकोचिञा यिङा, 'खानाचि देना ओडा लेनभेप्लो सितनामडा एपनियुङसाओ तयाआङ?'
7
मोकोचिआ खोसाञा मयिङा, “देनादि साङआ छाङ आन्काञा वकडा खप्तुओ माननुङ। खोसाआ मोकोचिञा यिङा, “खानाचि छाङ यमसिखाडा खारानुम।"
8
“ मुनटोङ वावाङ लिसा, मोबेन यमसिखाओ नामसोङमिआ आनओ याङसुमिञा यिङा, "मुकाचाचिञा बुत्ताकि देङसुदाङका ताराकि बुसितारि मोकोचिओ काचिलुङ पुवानुम।"
9
नङ मुनटोङ अकपौसि वाइदा वकडा खपतुओचि मता, मोबेन मोकोचिआ अक अक दिनार तोक्तु।
10
नङ मुनटोङ बुयाक्कोचि मता, मोबेन मोकोचिआ बदधे ङे तोकतुमने लोवो मिनला मचुवाङसाङ मेन मोकोचि उकताउकआ छाङ मुइसाङे अक अक दिनार ओन मतोक्ता।
11
मोकोचिआ मोको मतोक्ता नेतलोक खिमओ नामसोङमिओ यङछित्लाडा उसो लोवाकि डोचोनसि मलुवा,
12
"ओचि देङयाक्कोओचिआ अक वाइदाङे ओन ओक मचुवा, का खानानिनआ मोकोचिञा आन्कान लेन भेप्लोओ खुनमु का धिहाकनुवा पाङचावो इसा मेत्तानिन,"
13
मेन खोसाआ मोकोचिहुपडा अकपाङञा लायङ पुवाकि लोवा, “हेइ यावा, अङकाआ खानाञा दिच्छाङ सान्नुत ना मुवाओ माननुङ, दि खानाआ अङकाकनिन अकङे दिनारडा चङमु मुवाओ तमाआङ?
14
आमनो आनओ लोक्तानुम का लाम वाङानुम मेन ओको बुसिपाञा छाङ खानाञा मपुवा मेत्लो अङका पुमा चाखालिङा ।
15
अङकाओ खोनङ कोपरुआ अङछेमा मुमा दि नुलोक मानयाकदोङ कि? दि अङका नुलो लिसुङ यिङाकि आमनो अमुक लेत?
16
उइसाकिया ङे देङसिपा बुसि नङ बुसिप्पा देङसि मलिवोङ।"
17
हान यरूशलेमलिपा खात्सिलुहिडा देकमिआ हवापौ खेन्माछाचिञा वाराङ सेनयाङनिडा तारूकि लामडा मोकोचिञा लोवानिन,
18
“खाङानुम आनकान यरूशलेमलिप्पा थाङयाइनका, का मनाओ सावाछा अधुवा बुबमि का यङवानमिचिओ छुक्डा पाङपाकवोङ का मोकोचिआ खोसाञा सुवालोङ बानछुप मपुवोङ,
19
का मोकोचिआ खोसाञा स्यावारि मुसि, रमफुक धातमा का इलाकडा कुङसिञा निसामचिओ छुकडा मपाङपाकवोङ, का सुमसिलेनडा खोको खोङवोङ।"
हेन्खामिक सानुवाओ निकि सोम्फोङला
20
मोवाइदा जब्दिओ सावाछाओ मामाआ आनओ सावाछाचिञा अकनिनडा लोक्तुकि खोनिनओया ताकि सायालोङ मुदोनि खोनिनसुत्दा दिच यामतोक दोरू।
21
खोनिनआ मोचिआ लोवानिन, “खाना दि तचाखालि?” मोचिआ खोनिनञा यिङा, “खानानिनओ हाङहोनडा, ओचि अङसावाछाचि हुपडा, अकपाङ खानाओ चुप्चु छुक लिप्पा का अकपाङ खोनिनओ बेङसु छुकलिप्पा युङसि तोकसिञा इङइवा मुवाने।"
22
मेन् देकमिआ लोवानिन, “खानाचि दि अदोत मोको अलेनिन। खाक्को खोरे अङकाआ दुङसिलुवाओ याक्ङा, खानाचि दुङसि अरू?" मोकोचिआ मलोवा, 'रूइन्का।'
23
खोनिनआ लोवानिन, 'अङकाओ खोरे खानाचिआ दुङउमने, मेन अङकाओ चुप्चु का बेङसुलिप्पा युङसि पुवो अङकोपरूडा माननुङ, मेन खासखासओ निकि ए, मोको अङपापा डाङका छुमचुम लिनिचियाओ याआङ।'
24
ओको एनाकि पौपाङ ङे मोचि हवा निछाक् सुतडा छेमात मलिसा।
25
मेन देकमिआ मोकोचिञा हाङपाङओया चुकडा बुत्ताकि लोवानिन, 'खानाचिञा सिनला ङे याआङ, हे निरङओ हाङमुयाङछाचिआ मोकोचि धानि हाएसिमिन मचुलुक, का मोकोचिओ टोप्पाङ टोप्पाङचिआ मोकोचिधानि कोपरूयुङ मयाङ।
26
खानाचिडा ओलाक ना उसओ लिवोनिन मेन खोक्को खानाचिडा टोप्पाङ लिवो राका चुलुक, मोको खानाचिओ खाङसुमि लिवोङ।
27
खोक्को खानाचिडा बुसि लिवो राका चुलुक, मोको खानाचिओ खाङसुमि लिवोङ, उसओ हे,
28
मनाओ सावाछा छाङ रोपधामला तोकसिञा माआङ, मेन रोपधामसि का बदधेकाओ फाखालामओ निकि आनओ हाङमाङ पुसिञा बाना।'
हवा खाथेप मना
29
मुन्टोङ खोकोचि जोरिको दाङका मलोनता, अकटेट मुक्ला खोनिनओ देङसि मलुवा,
30
नङ लामडा युङनियुङसाओ हवापाङ खाथेपचिआ देकमि मोको लाम खातनियुङसानिनओ याआङ लोवो एनाकि उसओ लोनि मपारा, “हेइ! हाएसि, दाउद्ओ सावाछा, आन्कान्धानि नुनुत युङने।”
31
मेन मुकलाआ माकोचिञा वाइःया लुने लोनि महेन्ता मेन मोकोचि उसओ लोयाङसा फाननु मपारा, “हेइ हाएसि, दाउदओ सावाछा, आनकानधानि नुनुत युङने।“
32
मोबेन नान्तुकि देकमिआ मोकोचिञा बुत्तानिन, का लोवानिन, “अङकाआ खानाचिओ निकि दि चुनिपुम लोवो खानाओ राका याआङ?”
33
मोकोचिआ खोनिनञा मयिङा, “हेइ! हाएसि, आन्कानओ अमुकचि महोङने।”
34
देकमिआ सोमनुवाकि मोकोचिओ अमुकचि नोपनि पुवानिन का मोबेन ङे मोकोचिआ टोक्मा मपुङसा, का खोनिन्ओ देङसि मलुवा।