अक हकि अतुम
यरूशलेमडा देकमिओ कावाङमु
1
मुनटोङ खोनिनचि यरूशलेमओ चुकडा जैतुन भुरूओ वेतफागेडा ताबाना, मोबेन देकमिआ हवापाङ खेन्माछाचिञा उसओ लोवाकि छुत्तानिन,
2
“खानाचि बुसितओ टेनडा खारानुम, का चकनि ङे खानाचिआ अकपोक खुइवा का मोसाओ खुइछा छुम्ताओ अधित्वोङ, मोसाञा हुलुङताकि अङकाओया टारानुम।
3
नङ साङआ खानाचिञा दिच लोवालो, हाएसिञा ओसाओ चाखाम डोराओ याआङ लोनि खानाचिआ लोवानुम का मोसाआ हालेङे मोचि छुतनि मपुवोङ।“
4
हान यामाङआ लोवाओ ओको दुम लात्ने यिङाकि ओको लिसाओ ए, तामिनतुप,
5
“सियोनओ मेछाछाञा लोवानुम,
खाङानुम, आमनो हेन्कोपहाङ नोअमि लिसाकि,
खुइवा का खुन्युखुन्वो खुइमाओ छा,
अकपोक खुइवाछा धानि वाङलाम लिसाकि
खानाचिओया बानमानुयाङ।"
6
मोबेन खेनमाछाचि खाराकि देकमिआ मोकोचिञा इङइवा मचुवा खुवात्लि मचुवा ।
7
नङ खुइवा का खोसाओ छा टाराकि मोचिदु आनओ टिट्खान मयुङसा, का खोनिन मोधानि युङानिन।
8
नङ मुकलाडा बदधे इसाआ आनओ टिट्खान लामडा मथुङसा, का निचिआ सुङताङओ खेक हेक्तुकि लामडा मथुङसा ।
9
खोनिनओ बुसि बुसि खाराओ का देङसि देङसि वाङाओ मुकलाचि उसओ यिङयाङसा मपारा, "दाउदओ सावाछाञा इनुमसङने धिवाङ हाएसिओ नुङडा तामि सायोकसाङ मए, धिवाङसाम्योखाडा इनुमसङने।"
10
नङ मुनटोङ खोनिन यरूशलेमडा वाङानिन मोबेन ओचि साङ मए? लोनि झारा तालावाङडा डोमोसाङला लिसा।
11
नङ मुकलाचिआ मलोवा, 'मोचि गालिलओ नासरत डाङका बानाओ यामाङ, देकमि मए।'
12
देकमि निनाममुओ माङखिम हुड्डा वाङानिन का खोनिनआ माङखिम्डा खिपइनला मुवो झाराञा ठिन्तानिन, का बाट्कावाचिओ छापबुङ का कुङइवा इन्काबाचिओ युङखा लिमनि पुवानिन।
13
मन्कि खोनिन्आ मोकोचिञा लोवानिन, “ओको छाप्तानचिनओ याआङ, अङखिम सोम्फोङलाओ खिम दारावोङ। मेन खानाचिआ ओलाक ओकोञा ङापकाबाचिओ बुकताङ मेत्ताओ अयाआङ।”
14
नङ खाथेप का लाङफेङतुवा माङखिमडा खोनिनओया मता का खोनिनआ मोकोचिञा नुसङ मेत्तानिन।
15
मेन यामुबुबमिचि का यङवानमिचि ओलाक खोनिनआ मुवानिनओ नाकाकताओ ओक का छायाङछाचि माङखिमडा इनुमसङने दाउदओ सावाछाञा लोयाङसा पाराओ टोक्तुकि माइसुङसाङ मलिसा,
16
का मोकोचिआ खोनिनञा मयिङा, “दि तएन ओकोचिआ दि लोनियुङसाओ मयाआङ?” मोबेन देकमिआ मोकोचिञा लोवानिन, 'ज्यो, अङका एन्याङा । दि खानाचिआ खिप्तुओ तमान्नुङ? एलोकछा का छाकेन्दाओ छाचिओ डोडाङका खानानिनआ यासङलान लाट्ला मुवानिन।'
17
नङ खोनिनआ मोकोचिञा छिराकि तालावाङ डाङका लोन्ताकि बेथानिडा खाराकि मोडा याकतानिन।
18
पोकनाम तालावाङ लिप्पा लामानुहिडा खोनिन साकारङानिन।
19
नङ लामओ चुक्डा वासिखुकमाकओ अकटेट सुङताङ टोक्ताकि मोडा बानानिन। मेन मोसाडा सुम्बाक लेट्का निचि दिच छाङ तोक्मा मान्लि । मन्कि खोनिन्आ मोसाञा लोवानिन, “हानङक्यातनि खानाङका देमखा छाङ सिवा मान्सिने” नङ मोको वासिखुकमाकओ सुङताङ मोवाइदा ङे छोप्ता।
20
मन्कि खेनमाछिचिआ ओको टोक्तुकि स्वमराक लिनि मलोवा, “ओको वासिखुकमाकओ सुङताङ खाइसाकिया हालेङे छोपनिलेवा?"
21
मेन देकमिआ लायङ पुवाकि मोकोचिञा लोवानिन, "अङका खानाचिञा नुच्चुङ ङे लोलुकडा, खानाचिडा मकतुम याआङ, का मिनछेन माननुङ लो वासिखुकमाकओ सुङताङञा मुवा इसा ओन माआङ मेन ओको भुरूञा छाङ 'धेन्तानकि साजुमाडा केनिखारे' तयिङालो छाङ मोको लिवोङ।
22
नङ मकतुम मुवाकि खाक्को छाङ सोमफोङलाडा तदोत्वोङ मोको खानाचि ततोकवोङ।”
23
हान खोनिन माङखिमडा ताबानाकि चिनलुनियुङसानिनओ वाइदा, यामुबुबमिचि का मुनाधिछामि धियान खोकपासङचिआ खोनिनओया ताकि मयिङा, “दि कोपरूयुङआ खाना उससो दुमचि तमु? नङ साङआ खानाञा ओको कोपरूयुङ पुवा?”
24
मेन देकमिआ लायङ पुवाकि लोवानिन, “अङका छाङ खानाचिञा अकटेट खासेन सेनङा, मोको अलोवाङ लो, अङका छाङ दि कोपरूयङआ ओचि वक मुलुकङा, मो खानाचिञा लोवोङा।
25
युहन्नाओ हङसानवा खाडाङका लिसा? सारूङगाङका हे मनाचिङका?” मोकोचि हाङपोहाङडा उससो यिङयाङसा यायोक मुमा पुङसा, सारूङगा डाङका लोइन्लो, मोचिआ आन्कान्काञा मुइसा एलो खानाचिआ खोसाञा देना मकतुम अमान्मु? मयिङवोङ।
26
मेन मनाचिङका लोइन्लो, आनकानञा मुकला डाङका कुमाकात देनालो झाराआ युहन्नाञा यामाङङे लोनि मचामलुक।"
27
नङ मोकोचिआ देक्मिञा मयिङा, “आन्कानञा सिन्ला मात्दङ” खोनिन्आ छाङ मोकोचिञा लोवानिन, “अङका छाङ दि कोपरूयङआ ओचि वक मुलुकङा खानाचिञा लोनुङा।"
28
मेन खानाचि दि मिनला अचुलुक? अकपाङ मनाओ हवासावाछाचि मयाआङा। खोसाआ बुसुछाञा यिङा, “हेइ सावाछा, खाराकि आइ यालोकसिखाडा ओक मुनिपुए।”
29
मन्कि मोसाआ यिङा, “अङका खातनुङा।" मेन नेत्लोक डाङका अछुङ मुवाकि खारा।
30
नङ सिप्पाओया ताकि खोसाआ मुइसाकिया ङे यिङा। मोसाआ यिङा, “अङका खातङा।" मेन मान्खात।
31
हान ओचि हवापाङडा खाउ ओलाकआ पापाओ इङइवा काङलेन मुवा?" मोकोचिआ मलोवा, “बुसुछा ओलाकआ।" देकमिआ मोकोचिञा लोवानिन, 'अङका खानाचिञा अछङ लोलुकङा, छोन्याङ कोपमिचि का राकयाङमिचि खानाचि चोङलो बुसि निनाममुओ हाङहोनडा कावाङमु मचुयाक।
32
देनादि खानाचिओया युहन्ना नुलाम खाङमेतसि मता, का खानाचिआ खोचिडा मकतुम अमानमु। मेन छोनयाङ कोपमिचि का राक्याङमिचिआ खोनिनडा मकतुम मचुवा। खानाचिआ ओको मटोक्ता नेत्लोक छाङ खोनिनडा मक्तुम मुसिञा लाछङमिन अमानचु।
33
हाउसो डोयङला एनानुम, साङ अकपाङ खिमपाङ याआङा, खोक्कोआ अकटेट यालोकसिखा पाक्तु, का मोसाओ चुवाङयोवा ताम्से पाकतुकि मोहुड्डा यालोक्सि आ: वातिमसुङ मेत्ता, का अकटेट याकसा मुवाकि खारूमिचिञा मोसाओ सायाछाप पुवाकि हाङपाङ लो नियुङखा खारा।
34
मन्कि मुनटोङ सिवाओ वाइदा चुकडा ता खोसाआ खारूमिचिओया खोसाओ सिवाओ हाकला बाटसिञा आनओ खाङसुमिचि छुत्ता।
35
मेन खारूमिचिआ उखाङसुमिचिञा लापताकि अकपाङञा धात्तु, नङ हाउसोञा मसेरा, का हाउसोञा लुङटाकआ आप्ता ।
36
लादेन खोसाआ बुसिओ चोङलो धिखाङसुमिचि छुत्ता, नङ मोकोचिआ ओकोचिञा छाङ मुइसाङे मचुवा ।
37
मेन अङसावाछाञा ना मोकोचिआ सानुवा मचउने लोवाकि खोसाआ आनओ सावाछाञा देङसिङका मोकोचिओया छुत्ता।
38
मेन खारूमिचिआ सावाछाञा टोक्तुकि हाङपोहाङडा मयिङा, “ओको ना सायापाङमि ए। बानइनने, मोसाआ सेरूमने, का मोसाओ कोपरु आन्ओ मेत्तोम्ने।”
39
मोबेन मोकोचिआ मोसाञा लापतुकि यालोक्सि हुइया मलात्ता, का मसेरा ।
40
'ओसुन्दुम मुन्टोङ यालोकसिखाओ नामसोङमि बानवोङ मोवाइदा खोसाआ मोचि खारूमिचिञा दि मुउने?'
41
मोकोचिआ खोनिनञा मलोवा, 'खोसाआ मोचि बोन्छोलोक मनाचिञा युनला मुवोङ, का यालोकसिखा निचि खारुमिञा सायाछापडा पुवोङ, खोक्कोआ खोसाञा वाइ-वाइदा हाकला मछोनवोङ।'
42
देकमिआ मोकोचिञा लोवानिन, “दि खानाचिआ देम्खा छाङ सामकालिनडा अमानखिप? 'खाक्को लुङटाकञा दाककाबाचिआ असाहोक मचुवा,
मोङे ओलाक केङकुओ सायालुङ लिसा,
ओको धिवाङ हाएसिङका लिसाओ ए,
का ओको आन्कानओ मुक्खाङडा
नाकाक्ताओ याआङ'।
43
ओसुन्दुम ङे अङका खानाचिञा लोलुकङा, 'निनाम्मुओ हाङहोन खानाचिङका अङापवोङ, का अकटेट उसओ सामञा पुवोन, खोक्कोआ मोडाङका सिवा सिमेत
44
नङ ओको लुङटाकधानि धावो ओ्लाक दुनवात्वात लिवोङ, मेन खाक्को धानि मोको धायाक, ओकोआ मोसाञा खाक्बुन् मेत्वोङ।'
45
हान यामुबुबमिचि र फरिसिचिञा खोनिन्ओ डोयङला एनाकि मोकोचिओङे छाप्छोङडा खोनिनआ लोवानिनओ ए लोवो मसिनता।
46
नङ मोकोचिआ खोनिनञा लापसि मलामा, मेन मोकोचि मुकला सुत्डा कुमामकारा, देनालो मुकलाचिआ खोनिनञा यामाङ मए लोनि मचामलोकताङा।