¹ मन्कि देकमिआ लायङ पुनि लादेङ उसओ यिङाकि मोकोचिञा डोयङलाडा लोवानिन, ² 'सारूङगाओ हाङहोन अकपाङ हेनकोपहाङ इसा ए, खोक्कोआ आनओ सावाछाओ सायाकाम्मु छुमचुम मचुवा, ³ नङ चाचायुडा दाकसाङ पोकपाङचि बुतमा लोनि आनओ खाङसुमिचि मछुत्ता, मेन मोकोचि बानसि राका मानमु। ⁴ लादेन मोसाआ निचि खाङसुमिचिञा उसओ लोवाकि मछुत्ता, 'बुतलेन तोकवोचिञा लोवानुम, खाङानुम, अङकाआ चाचायु छुमचुम मुवाओ याकङा, अङकाओ हाद्दिचि का खोङतु खोङतु सायारूचि सेरानचिनओ मयाआङ, का झारा यामतोकचि छुमचुम मयाआङ। सायाकाम्मुओ चाचायुडा बानानुम।' ⁵ मेन मोकोचिआ हुकताकि अकपाङ आनओ कायाखालिप्पा, हाउसो आनओ इन्लामलिपा मखारा। ⁶ नङ निचि ओलाकआ मोसाओ खाङसुमिचिञा लापतुकि मोकोआ उतनुङ मुवाकि मसेरा। ⁷ मेन हेनकोपहाङ ह्रुकसाङ मलिसा, का आनओ खारात्मि छुत्ताकि मोचि सेत्‌काबाचिञा युन्ला मचुवा, का मोकोचिओ तालावाङ हुतनिपुवा। ⁸ मोबेन मोचिआ आनओ खाङसुमिचिञा मयिङा, "सायाकाम्मुओ चाचायु छुमचुम याआङ, मेन बुत्मिहाङचि मुरू मानदोक। ⁹ ओसुन्दुम खानाचि धिलामओ चुपलामचिडा खारानुम, का खोको छाङ तधित्वोङ बुतानुम। ¹⁰ मोबाइदा मोचि खाङसुमिचिआ यामुलाम्डा खाराकि उवाक का नुलोक हवाङे सामओ, खोक्कोञा मधिरा, झाराञा कोप्ताकि मबाट्टु, का सायाकाम्मुओ खिम तावाङचिआ भेप्तानचिन। ¹¹ मेन मुनटोङ तावाङचिञा खाङसि लोनि हेनकोपहाङ हुड्डा मता मोबेन, मोचिआ याकाम्मुओ चाचायुओ सङनान मानहुमवो अकपाङ मनाञा मटोक्तु। ¹² नङ मोचिआ मोसाञा मयिङा, 'हेइ यावा, खाना खाइसाकिया याकाम्मुओ चाचायुओ सङनान मानहुमनि ओडा हुड्डा तता?' नङ मोको लायङनिन लिसा। ¹³ मोवाइदा हेनकोपहाङआ खाङसुमिचिञा मयिङा, 'उछुक-लाङ हेत्तुकि मोसाञा हुइया मुक्छुलुम्डा केनिपुए, मोडा धिखाप्यु का कुङसाङसु लिवोङ। ¹⁴ देनालो बुत्तानचिनओ बदधे मयाआङ, मेन छेनतानचिनओ ओन्तोम ओन मलि।'

¹⁵ मोबेन फरिसिचि खाराकि खोनिनञा खाइसाकिया दुमडा खेखुप्तोमने लोनि हाङपोहाङडा यायोक मचुवा। ¹⁶ मोकोचिआ आनओ खेन्‌माछाचिञा हेरोदिचिसुत्डा खोनिनओया उसओ यिङाकि मछुत्ता, “हेइ रूमु, आनकान लेसइन्का खानानिन नुच्चुङ लिमानु, का निनाममुओ लाम नुच्चुङमुनि चिन्लुमानु, का खानानिन् साङओ स्वमनुछप मुमा लिनिन्, देनादि खानानिन मनाओ ङालुङखाङमा नुनिन। ¹⁷ ओसुन्दुम आनकानञा लोवाने, 'सिजरञा छोनला छोन्‌मा मिननुलोक ए हे माआङ?'

¹⁸ मेन देकमिआ मोकोचिओ उवाकमिन लेसाकि लोवानिन, “हेइ एङलामिच्यो, खानाचि देना सुको तचवाङलुक? ¹⁹ छोनला छोन्‌वो फेकवा खाङमेत्ताङनङ।" मन्कि मोकोचिआ खोनिनओया अकटेट फेकवा मबाट्टु। ²⁰ खोनिनआ मोकोचिञा लोवानिन, “ओको सेमफोक का थेपसुवा साङओ ए?”

²¹ मोकोचिआ खोनिनञा मयिङा, “सिजरओ।" मोबेन खोनिनआ मोकोचिञा लोवानिन, “ओसुन्दुम खाक्को खाक्को सिजरओ मए सिजरञा, का खाकको खाक्को निनाममुओ मए निनाममुञा पुवानुम।" ²² ओको एनाकि मोकोचि होकोडोडो मडोटटा, का खोनिनञा छिरूकि आन्‌ओ लाम वाङा।

लाहङलेन छापछोङओ खासेन

²³ लाहङलेन नुनिन लोवो सदुकिचि मोङे लेन खोनिनओया मता, का खोनिनञा उसओ यिङाकि मसेना, ²⁴ “हेइ रूमु, वाछाप्पाआ यिङाओ मयाआङ, साङछे मना छालुकपा ङे सुवालो निछाक ओलाकआ आनओ बुसुनिमाञा याकाम्मु चुवाकि बुबुओ आइखेप पुक्तु मुने। ²⁵ हान आन्‌कान सुत्डा एकापाङ बुबु-निछा मयाआङा, तोङपाआ याकाम्मु मचुवा नेत्लोक सुवा, का आङखेप मानलिहिडा खोसाओ निछाकओ निकि दापयामा छिराकि खारा। ²⁶ मुइसाकिया ङे जुम्दोआ छाङ, पिपदोआ छाङ, एकासि तारिआ मुइसाङे मचुवा। ²⁷ नेत्‌लोक मोको मारिछा छाङ सुवा । ²⁸ हान लाहङलेनडा मोचि एकापाङ खपडा मोको साङओ तायामा लिवोङ? देनालो मोको झाराओ लिनिचियाओ याआङ।"

²⁹ देकमिआ मोकोचिञा लोवानिन, 'खानाचि सामयोसामकालिन का निनाममुओ साएराङ मानतुपताकि फोमलाडा युङसाओ अयाआङ। ³⁰ देनादि लाहङलेनडा मानना याकाम्मु मचुलुक, मान याकाम्मु चुनि मपु, मेन सारूङगाडा सारूङयाककेन्छाचि ओटनि मलि। ³¹ मेन सुपोकओ लाहङलेनओ छापछोङदा उसओ लोवो निनाममुओ इदुम, दि खानाचिआ खिप्तुओ अमान्नुङ? ³² अङका सुनतुमदिवाओ निनाममु, यङचावाछाओ निनाममु का सोझामुओ निनाममु एव। निनाममु सुपोकवाओ ना लिमा नुनिन, मेन अहङसकओ निनाममु लिमानु।"

³³ नङ मुकलाचि ओको एनाकि खोनिनओ सान्यङडा स्वमराक्क मडोट्टा ।

झारा चोङलो टोप्पो इङइवा

³⁴ खोनिनआ सदुकिचिञा वाइःया मुलुत्तानिन लोनि एनाकि फरिसिचि खोनिनओया झाराझुम मलिसा। ³⁵ नङ मोकोचिहुपडा अकपाङ खाप्लाओ चिनकाबाआ खोनिनओ सुको मुवाकि खोनिनञा मसेना, ³⁶ “हेइ रूमु, खाप्लाडा धियान इङइवा खाउ ओलाक ए?”

³⁷ खोनिनआ मोचिञा लोवानिन, “खानाआ धिवाङ हाएसि आनओ निनाममुञा आनओ झारा कोङरिङआ, का आनओ झारा हाङमाङआ, का आनओ झारा नुतनुआ सोम मुमा । ³⁸ धियान का बुसि इङइवा ओको ङे ए ³⁹ हवासि लो मोको ओटनिङे ए, खानाआ आनओ डाकनिञा हाङपाङञा ङे इसा सोम मुमा। ⁴⁰ झारा खाप्ला का यामाङचिओ सानयङ ओकोङे हवाटेट इङइवाडा बुकखुङ मयाआङ।"

निनामछेन छापछोङओ खासेन

⁴¹ मुनटोङ फरिसिचि झाराझुम्मा लिसाओ याआङा, हाले देकमिआ मोकोचिञा उसओ यिङाकि सेनानिन, ⁴² “निनामछेनओ छापछोङडा खानाचि दि अचामलोक? खोको साङओ सावाछा ए?" मोकोचिआ खोनिनञा मलोवा, “दाउदओ सावाछा।"

⁴³ खोनिनआ मोकोचिञा लोवानिन, “मुइसा लो खाइसाकिया दाउदआ साकोङडा खोसाञा उसओ लोनि हाएसि मयिङलुक ना? ⁴⁴ "हाएसिआ अङकाओ हाएसिञा लोवानिन, खाना अङकाओ चुप्चुछुक लिप्पा युङानुम, मुन्टोङतारि अङका आमनुकसाचिञा आमलाङ फेमलो ह्युनि युङनुङा।" ⁴⁵ खोनालो दाउदआ खोसाञा हाएसि मयिङलुक लोङका, खोको खाइसाकिया मोचिओ सावाछा नु कि?' ⁴⁶ मन्कि साङआ छाङ लायङडा अक इदुम चेप्मा मानरू, नङ् मानना मोलेनदाङका साङञा खोनिन सुत्डा सेनवो सापसा लिसा।