सुम हकि अतुम
सामयोक- रूमुचिओ हुमुक्वा
1
मोबेन देकमिआ मुकलाचि का आनओ खेनमाछाचि सुत्डा उसओ यिङाकि दुममुवानिन।
2
कायङवानचि का फरिसिचि वाछाप्पाओ युङखाडा मयुङ।
3
मोसुन्दुम खाक्को मोकोचिआ मयिङलुक मोचि मुवानुम का काङानुम, मेन मोकोचिओङे वक ओटनि ओलाक मान्मुदे, देनादि मोकोचिआ मयिङलुक, मेन मचुनिन।
4
ज्यो, मोकोचि कुक्चु का खुनमा मानरूवो खुनयु छुम्साकि मनाचिओ भाकताङडा मखुन्मेत। मेन मोकोचिआ हाङपाङआलो आनओ छुककुसिआ छाङ मोचि सोतनिपुवो मिनमा सुङनिन।
5
मेन मोकोचि झारा आनओ वक मनाचिञा खाङमेतसिओ निकि मचुलुक। देनालो मोकोचि आनखाप्लाछाप टोप्पो ममेत, का आनओ सङनानओ सुछुलुङ उखाम ममेत,
6
नङ चाचायुचिडा धियानखारोङ का यायोकखिमचिडा धिधियान युङखाचि, मचाखालि
7
का इनखावाङचिडा सायालोङ मलाम, का मनाचिङका रूमु दारामा ममुक।
8
मेन खानाचिञा साङआ रूमु मानलोने देनादि खानाचिओ रूमु अकपाङे मयाआङ, का खानाचि ओलाक झारा बुबु-निछा अए।
9
खानाचि हेन्खामाडा साङछेञा आनओ पापा मानलोदानुम, देनादि खानाचिओ पापा अकपाङे सारूङगाडा लिमानु।
10
खानाचिञा नामसोङमि साङआ मानलोने, देनादि खानाचिओ अकपाङ ओन नामसोङमि निमामछेनङे ए ।
11
मेन खानाचिडा खोक्को झारा चोङलो टोप्पो याआङ, मोको ओलाक खानाचिओ रोपधाममि लिवोङ,
12
मन्कि खोक्कोआ उहाङपाङञा टोप्पो मुलुक, मोको नेपचुमेत्वोङ, का खोक्कोआ उहाङपाङञा नेपचुमेत, मोको ओलाक टोप्पाङ लिवोङ।
13
नङफिसा, खानाचिञा, यङवानमि का फरिसिच्यो, एङलामेचि! देनादि खानाचि मनाचिओ उसादाक सारूङगाओ हाङहोन मछेक्लुक। देनालो खानाचि मान्ना हाङपाङे अवाङलुक, मान वाङकामिचिञा छाङ वाङसि पुलुक।
14
नङफिसा खानाचिञा, हेइ यङवानमि का फरिसिच्यो, एङलामिचि! देनादि खानाचि साएसाममिचिओ खिम अखुङनिलेवोङ, का हाङहोवासानओ निकि बानको सोमफोङला अचुलुक, ओसुन्दुम खानाचि निचिआ चोङलो बदधे बानछुप अतोकवोङ।
15
नङफिसा खानाचिञा, यङवानमि का फरिसि च्यो, एङलामिचि! देनादि खानाचि अकपाकङेञा चिमिनतोङडा बाटसिओ निकि साजुमा का हेमसुवा अखाकोन्लुक, नङ मोको खानाचिओ लिपाडा तानेत्लोक मोसाञा हाङपाङ चोङलो हवाखोम खामारेन्ओ भेवा अमेत्।
16
नङफिसा खानाचिञा, हेइ! खाथेप बुलामबु च्यो, खोकोआ लोलुक, 'साङआ माङखिम नोप्ताकि सिस्वदुम चोलो, मोको दिच छाङ माआङ, मेन साङआ माङखिमओ स्वना नोप्ताकि सिस्वदुम लोक्तालो, मोको नाक्मि दोकलुक।'
17
हेइ निसिनवा का खाथेपचि, खाउ ओलाक टोप्पो ए? स्वना हे स्वानाञा सेङवो माङखिम?
18
'नङ साङआ बुब्दुलुङखा नोप्ताकि सिस्वद्रुम चोलो, मोको दिच्छाङ माआङ, मेन साङआ मो धानिओ रिपेन्छेम नोपताकि सिस्वदुम चोलो मोको नाकमि ए।'
19
हेइ खाथेपच्यो, खाउ ओलाक टोप्पो ए? रिपेन्छेम हे रिपेन्छेमञा सेङवो बुबदुलुङखा?
20
ओसुन्दुम बुबदुलुङखा नोम्तुकि सिस्वदुम चाकामिआ, मोसाङेओ का मोधानिओ झारा यामतोकओ सिस्वदुम लोक।
21
नङ माङखिम नोप्ताकि सिस्वदुम चाकामिआ, मोसाओ का मोहुड्डा याक्खामिओ सिस्वदुम लोक्लुक।
22
मन्कि सारूङगा नोप्ताकि सिस्वदुम चाकामिआ, निनाममुओ धिनारोमखाओ का मोधानि नुथातसाङ लिवोञा नोप्ताकि सिस्वदुम लोक।
23
नङफिसा खानाचिञा, हेइ यङवानमि का फरिसिच्यो, एङलामिचि! देनादि खानाचि सुङना फोङ का मेचोङओ पौसि हाकला अपु, नङ खापलाओ मोचिचोङलो कुक्चुवा दुमचि, तामिन्तुप सान्नोसान, नुनुत का मकतुम अछितलुक। मेन खानाचिआ ओको छाङ मुवाकि मो छाङ मान्छितदामा डोराङा।
24
हेइ खाथेप बुलाम्बुच्यो, खानाचि साम्बु अछेन्लुक, मेन देङकोङवाञा ओलाक अखुङनिलेवोङ।
25
नङफिसा खानाचिञा, यङवानमि का फरिसिच्यो, एङलामिचि! देनालो खानाचि कानचुरो का चाखुङओ हुइया लिपा लो अपुन्लुक, मेन हुड्डालिप्पा लो मोचि फेमलावा का साएअमानरलाआ भेप्तानचिनओ मलि।
26
हेइ खाथेप फरिसि, बुसित कानचुरो का चाखुङओ हुड्डालिप्पा पुन्तानुम, का मोचिओ हुड्डालिप्पा छाङ पुन्तानचिन्ओ लिने।
27
नङफिसा खानाचिञा, हेइ यङवानमि का फरिसिच्यो, एङलामिचि! देनादि खानाचि ओमचुक सोपनियुङसाओ एप्मा इसा अयाआङ, खोक्को हुइयालिप्पा खान्नोमाखा लोन, मेन हुड्डालिप्पा लो सुपोकवाचिओ इवाचि का झारा असेङअत यामतोकआ भेप्तानचिनओ मलि।
28
मुइसाकियाङे खानाचि छाङ हुइया लो मनाचिओ बुसित सामयोकमि अदातलुक, मेन् हुड्डा लो एङला का धितिमतालुनआ भेपतानचिनओ अयाआङ।
29
नङफिसा खानाचिञा हेइ यङवानमि का फरिसिच्यो, एङलामिचि! देनादि खानाचि यामाङचिओ सुचिनखुमचि अमेत, का सामयोकमिओ रुपाखिमचि अचोङ,
30
नङ अयिङलुक, आनकान आनओ साकुदिपाचिओ वाइदा लिसाओनिन आनकान यामाङचिओ सेत्सुडा खोकोचि सुत्डा यायोकहाकतुि लिवो याइमिन।
31
उइसाकिया यामाङचि सेतवो आङखेप आनकान ऐनका लोवो सिन्मेत खानाचि हाङपाङ अपु।
32
खानाचि आनओ साकुदिपाओ हुमुकवाओ हाकला लाटला मुवानुम।
33
हेइ! पुछापचि, नङयि पुछापओ छाच्यो, खानाचि खामारेनओ बानछुपडाङका खाइसाकिया फुकुतवोङ?
34
ओसुन्दुम अङका खानाचिओया यामाङचि का तायामुलेन मनाचि, का यङवानमिचि छुतङा। मोकोचि खपडा खाउङेञा खानाचिआ असेत्वोङ, का इलाकडा अकुङवोङ, नङ खाउङेञा आनओ यायोकखिमचिडा रम्फक अचात्वोङ, का तालावाङ तालावाङ रुङदा ठिन्सुवारि अमुवोङ
35
तामिन्तुप, हेन्खामाडा पेत्ताओ झारा सामयोकमि मनाओ हुवा, खाक्को सामयोकमि हाबिलओ हुवाङका तारूकि, बरखियाओ सावाछा जकरियाओ हुवातारि, खोक्कोञा खानाचिआ वाचोङयाक, का बुबदुलुङखाओ हुपडा सेतसु अमुवा, मो खानाचिदु मडोट्ने।
36
अङका खानाचिञा नुच्चुङङे लोलुकङा, ओचि झारा दुम ओकोङे तालाखुक धानि तानिडोट्वोङ।
37
हेइ यरूशलेम, हेइ यरूशलेम! खाना खोक्को यामाङचिञा सेतमि का खानाओया छुत्तानचिनओञा लुङटाकआ आप्वो! देतनि वामाआ आनओ वाइछेकचिञा लापिताङह्युनि कोप, ओटनिङे देमकादु अङकाआ आमछाचिञा कोप्वो राका मुउङ, मेन खानाआ तमानकाङ।
38
खाङानुम खानाचिओ खिम खानाचिओ निकि नामबुकलो लेटवोङ।
39
देनालो अङका खानाचिञा लोलुकङा, हानङक्यातनि खानाचिआ लादेङ अटोकताङनुवोङ, मुन्टोङतारि 'सायोकसाङ मए, मोचि धिवाङ हाएसिओ नुङडा तामि,' लोनि खानाचि अलोनिन।