लुहकि अतुम
थेनयुओ लेन
1
ओनेत्लोक देकमि लोन्ताकि माङखिमदाङका खारानिन, का खातसि लुमा लिहिडा खोनिनओ खेन्माछाचि खोनिनञा माङखिमओ मुसानचि खाङमेतसि लोनि खोनिनओया मता।
2
मेन खोनिनआ मोकोचिञा लोवानिन, “खानाचिआ ओको झारा अटोक? मेन अङका खानाचिञा नुच्चुङङे लोङा, ओको ओराकि अकटेट लुङटाक धानि हाउसो लुङटाकतारि छाङ युङवोनिन।"
3
नङ खोनिन जैतुन भुरूडा युङहिडा खेनमाछाचि सेन्याङनिडा खोनिनओया बानाकि मयिङा, "आनकानञा लोवाने, ओको दुम देमखा मलिवोङ, का खानानिनओ ताइलेन का बुलुहुतओ थेनयुओ सिनछोङ दि नुयाक?"
4
मोबोन देकमिआ मोकोचिञा लोवानिन, “चानचुप युङानुम, साङछेआ खानाचिञा फोमरेमडा मानमुलुतदाने
5
देनालो बदधेकापाङ अङनुङडा 'अङका निनामछेन एव' यिङयाङसा मबानवोङ, बदधेञा फोमरेमडा मुलुतवोङ।
6
नङ खानाचिआ म्हु, का म्हुओ साकेक अएन्वोङ। खाङानुम, मानकुहेत्दानुम, देनादि ओचि लिमा नियिकङे मयाआङ, मेन थेन्यु ना मोबेनङे नुनिन।
7
देनालो रावाओ उसादाकडा रावा, का लुङवाङओ उसादाकडा लुङवाङ पोक्वोङ, का खाम खामडा साङसाङवा नङ लुटलि लिवोङ।
8
मेन ओको झारा ना छुयुकोपओ तापुङ मए।
9
मोबेन मोकोचिआ खानाचिञा धिबानछुपओ निकि मपाङपाकवोङ, का खानाचिञा सेत्वोङ, नङ अङनुङओ निकि झारा रावाखपडा खानाचि चिमासाङ अलिवोङ।
10
मोबेन बदधेकापाङआ ढुङला मचावोङ, का अकपाङआ हाउसोञा लुलेनला मुवोङ, का चिमा कातवोङ।
11
नङ बदधेका सोज्जे यामाङचि ठानठुक मलिवोङ, का बदधेकाञा फोमरेमलाडा मुलुतवोङ
12
नङ अतसाम्यो पोन्वो लिहिडा बदधेकाओ सोम एम्तुकि खात्वोङ।
13
मेन थेन्युतारि लोमान्टका युङवो ओलाकआ सेममाला तोकवोङ।
14
नङ लुङवाङओ ओको नुयङखान झारा बुलुहुतडा झारा सामचिञा सिनलेखाओ निकि रूमरङ मुविन्वोङ, मोनेत्लोक थेन्यु लिवोङ ।
15
ओसुन्दुम मुनटोङ खानाचिआ दानियल यामाङडाङका चेवानचिनओ नामबुकलो मुवो चिमासाङ दुम वाचोङखारोङडा ठानठुक लिसाओ अटोक्तुउने (खिपकाबाआ तुप्ने)
16
मोबेन यहुदियाडा लिकाबाचि हेमसुवालिप्पा मफुङने,
17
छानबाकखाडा लिकाबाचि आनओ खिमडा लिसाओ दिच लातसिञा ह्युनि मान्धाने
18
कायाखाडा लिवो आन्ओ बोप्छुम तातसिञा लानि मानताने।
19
मेन तामिनराक, मोचि लेनडा बुखुन्डिमाचि का एलोकछामाचिञा ।
20
खानाचिओ फुङसु नाङदोङडा, हे सावाएमओ लेनडा, मानडोटने लोनि सोमफोङला मुवानुम।
21
देनादि मोबेन उसओ हेनाम छुयुकोप लिवोङ, खाक्को बुलुहुतओ पुङलाङका हान्देतारि लिसाओ माननुङ, मानना लादेङ देमखाछे लिवोङ।
22
नङ मोलेन मानदुनदाताओनिन साङ पोकलङमि हङनुमारूवो मान्नुङा मेन छेन्तानचिनओ निकि मोचि लेन मदुनवोन।
23
मोवाइदा खानाचिञा साङआ खाङानुम, निनामछेन ओडा मयाआङ, हे मोडा मयाआङ लोवा लो, मक्तुम मानमुदानुम।
24
देनादि मुपसाङ निनामछेनचि, का मुपसाङ यामाङचि ठानठुक मलिवोङ, नङ लिमा मरूवा लो छेन्तानचिनओञा छाङ होइसेङलाडा खामसिञा, टोप्पो टोप्पो सिनछोङचि नङ खुमासि तापमासि ओकचि मखाङमेत्वोङ।
25
खाङानुम, अङकाआ खानाचिञा बुसिङकाङे लोनि पुवाओ याक्ङा।
26
मोकोचिआ खानाचिञा 'खाङानुम, खोचि खोक्लिडा मयाआङ,' लोनि मयिङ लो लोन्टाकि मानखातदानुम, 'खाङानुम, खोचि खाहुड्डा मयाआङ लो छाङ मानयाआतानुम।
27
देनादि देतनि यानचुरि बुसुहोनडाङका छोकहिडा देङसुहोन्तारि दात, मुइसाकियाङे मनाओ सावाछाओ ताइलेन छाङ लिवोङ।
28
खाडा सुवासा लियाक, मोडा रूपधाचि छाङ झाराझुम मलि।
29
मेन मोचि छुयुकोपओ लेन्ओ हालेङे नेतलोक नाम गगयोङमा लिवोङ, का लादिपमाआ आन्ओ छोकलासि पुवोनिन, का साङगेनचि नामकुदुडाङका मधावोङ, नङ सारुङगाओ साएराङचि रुखोकवोङ,
30
नङ मोबेन मनाओ सावाछाओ सिन्छुङ नामकुदुडा मदात्वोङ नङ हेन्खामाओ झारा रावाचि तुक्हुयु मचुवोङ, का मोकोचिआ मनाओ सावाछाञा नामकुदुओ यावारिचिडा साएराङ का टोप्पो धिनुमसङ सुत्डा बान्याङसा मुवाओ मटोकवोङ।
31
नङ खोनिनआ आनओ सारूकेन्छाचिञा साङतुकओ धिसाङलाओ अकनिन छुत्वोङ, का मोकोचिआ नामकुदुओ अक केङकुदाङका हाउसो केङकुतारि लुकाङे होन्डाङका खोसाओ छेनतानचिनओचिञा झाराझुम मचुवोङ।
पोकरूङ युङवो चानचुवारि
32
मेन वासिखुकमाकओ सुङताङडाङका अकटेट फस्या चिन्तानुम, मुनटोङ मोसाओ खेक नोअ लिसाकि सुम्बाकचि मलिमयाक मोबेन चोकफोवा याम्म बान्याछा लोनि सिनला ततोक्।
33
मुइसाङे खानाचिआ छाङ मुनटोङ मोचिदुम लिसाओ अटोकवोङ मोबेन खोको चुकडाङे लाप्तिखोमडाङे याआङ लोनि लेसानुम।
34
अङका खानाचिआ नुच्चुङङे लोलुकङा, हे ओको तालाखुक मानछितदायाङसाङे मोचि झारा दुमचि लाटला लिनिखात्वोङ।
35
सारूङगा का हेन्खामा मासुवाकि खात्वोङ, मेन अङकाओ इदुम ओलाक खाछिराकि खातवोनिन।
36
मेन मोलेन का वाइदाओ छाप्छोङडा साङआ छाङ लेनिन, मानना सारूङगाओ याकेन्छाचिआ, मानना सावाछाआ, मेन पापाआ ओन।
37
मेन उसओ बिसुओ लेनडा लिसाओ मयाआङा, मुइसाकियाङे मनाओ सावाछाओ ताइलेनडा लिवोङ।
38
देनादि खाइसाकिया वायामातओ बुसितओ लेनडा बिसु चाःवामाहुड्डा मानवाङदाताओ लेन्तारि, मनाचि चानियुङसाओ, का दुङनियुङसाओ, का काम्मुवारि चुनियुङसाओ मयाआङा,
39
नङ वायामात ताकि झाराञा पेत्ताकि मानखाटइनलोकतारि मोकोचिआ सिनलाङे तोक्ताओ मान्नुङा, मुइसाकियाङे मनाओ सावाछाओ ताइलेन छाङ लिवोङ।
40
मोवाइदा हवापाङ बेङसिखाडा मलिवोङ, अकपाङ खाटटिन हाउसो छिरिन।
41
हवापाङ मारिछाचि चाचेमलुङ चेम्मनियुङसाओ मलिवोङ, अकपाङ खाटटिन हाउसो छिरिन।
42
ओसुन्दुम पोकरूङ युङानुम, देनादि खाउलेन् खानाचिओ हाएसि मबान, मोको खानाचिआ अलेनिन ।
खान्नो का उवाक याङसुमिचिओ डोयङला
43
मेन ओको सिन्तानुम, हे खिमओ नामसोङमिआ खुसावा खाउ सुसाङमुतुमडा बान लोनि सिन्ताओनिन, खोको पोकरूङ युङवो याआङा, का आनओ खिम केत्मान पुवो मान्नुङा।
44
ओसुन्दुम खानाचि छाङ छुमचुम युङानुम, देनादि मनाओ सावाछा खानाचिआ मानमिन्तुओ वाइदाडा बान्।
45
मोबेन मकतुमि का तायामुलेन चोकरिछा साङ ए? खोकोङे ए, खोक्कोञा मोसाओ नामसोङमिआ ठाक ठाकलो वाइदा चासि पुने लोवाकि आनओ छामानधानि खप्मेत्ताओ लि?
46
सायोकसाङ ए मोको याङसुमि, खोक्कोञा उनामसुङमिआ ताकि मुइसाङे चुनियुङसाओ धित्वोङ।
47
अङका खानाचिञा नुच्चुङङे लोलुकङा, खोसाआ मोसाञा आनओ झारा खाबालुङडा कावाङसाङ मुवोङ।
48
मेन मो बोन्छोलोक याङसुमिआ अङनामसोङमि चोम्फि मचु लोनि कोङडा चामलोकताकि,
49
आनओ यावा याङसुमिचिञा धातमा, का सेतकाबाचि सुत्डा चासि नङ दुङसि लुवालो,
50
मोको याङसुमिओ नामसोङमि, मोसाआ यामित्या मानमुवाओ लेन का मानमित्ताओ वाइदा ताबानवोङ।
51
नङ खोसाआ मोसाञा दुनवात्वात मेत्नि हेकवोङ, का मोसाञा एङलामिओ हाकला पुवोङ। मोडा धिखापयु का कुङजोङ साङसु लिवोङ ।