ङाहकि अतुम
पौ दिलिसाओ डोयङला
1
हान सारूङगाको हाङहोन पौ दिलिसा ओटनि ए, खोक्को आनओ आनओ ओपकि तारूकि साङकोमञा धितसि मलोन्ता ।
2
मोचि खपडा ङाकापाङ खारुमात का ङाकापाङ ओलाक खारुमि मयाआङा ।
3
देनादि खारुमातचिआ ओपकि तारूकि हाङपाङसुत्डा आःवा ओलाक मान्खाट।
4
मेन खारुमिचिआ ओलाक आन्ओ ओपकि सुत्डा खुङचिडा आःवा मखाट्टा ।
5
मेन साङकोमआ युमाला मुहिडा मोचि झारा इमासुकसिआ अमानरू मलिसा, का मइमसा ।
6
खाखुतखपडा 'खाङानुम साङकोम! खोचिञा धितसि बानानुम' लोवो डोसाङला बाना ।
7
मोबेन मोचि झारा दिलिसाचिआ पुलोन्ताकि आनआनओ ओपकि मछेन्ता ।
8
नङ खारुमातचिआ खरुमिचिञा मयिङा, “खानाचिओ आःवा आनकानचिञा छाङ दिच पुवानुम देनालो आनकानओ ओपकि ना सेकसिलुवा।”
9
मेन खारुमिचिआ उसओ लोवाकि लायङ मपुवा, “आनकान नङ खानाचिञा ओको सायाथाक मान्नुङ माआङलो इन्लाओया खाराकि आनओ निकि खिरानुम।“
10
मोकोचि खितसि खातहिडा साङकोम ताबाननिलेवा का छुमचुम लिवोचि मोचिसुत्डा सायाकाम्मुओ चाचायुडा हुड्डा मवाङा, नङ लापतिखोम छेक्का लिसा।
11
नेतलोक डाङका मोचि दिलिसाचि छाङ उसओ लोयाङसा मताबाना “हेइ हाएसि, हेइ हाएसि, आनकानञा होङनिपुवाने।”
12
मेन खोनिनआ लायङ पुवाकि मयिङा, “अङका खानाचिञा नुच्चुङ ङे लोलुकङा, अङका खानाचिञा सिननुङा।"
13
मोसुन्दुम पोकरूङ युङानुम, देनादि खानाचि मोको लेन का मोको वाइदा सिन्ला अतोकनिन।"
फेकसुपेतओ डोयङला
14
देनादि ओको ना मोमना उससो ए, खोक्कोआ नियुङखा खातहिडा आनओ याङसुमिचिञा बुत्ताकि आनओ खाबालुङ मोकोचिञा पाङखुन मपुवा।
15
नङ खोसाआ उकताउकञा मोकोचिओ आनआनओ मिनमुरूङ खुवातनि, अकपाङञा ङाफेकसुपेत, हाउसोञा वाफेकसुपेत, का निपाङआ अकफेकसुपेत पुवाकि नियुङखालिप्पा मवाङा।
16
मोबेन ङाफेकसुपेत तोककाबाआ हालेङे खाराकि मोको इन्लामडा पाकदोनि फाननु ङा फेकसुपेत् तोक्लोक्ता ।
17
मुसाकिया ङे हवा फेकसुपेत तोकवोआ छाङ हाउसको हवा फेक्सुपेत तोकलोक्ता।
18
मेन अक फेकसुपेत तोकवोआ ओलाक खाराकि लुमडा धोकताकि आनओ नामसोङमिओ लुङ कुमनियुङसा।
19
बदधेका लेन नेतलोक मोचि याङसुमिचिओ नामसोङमि मता, का मोचिआ मोकोचिसुत्डा खिपमाला मलोक्ता।
20
मोवाइदा ङा फेकसुपेत तोकवोआ हाउसो ङाफेक्सुपेत बाटनि बुसि बानाकि उसओ यिङा, "साएममु खानानिन्आ ङाफेकसुपेत पाङपाकला पुवाङनिनओ याआङा। खाङाने, अङकाआ हाउसो ङाफेकसुपेत तोकलोक्ताओ याक्ङा।"
21
मोसाञा उनामसोङमिआ मयिङा, "साएमुङ 'खान्नो का खाङखतमि खाङसुमि! खानाआ उनछुपलो दुमडा खाङखत तखाङमेतु, हान अङका खानाञा उनभेप्लो दुमडा कावाङसाङ मुवोङा। खाना आनओ नामसोङमि सुत्डाङे वाया तए।'
22
हवा फेकसुपेत तोककाबाआ छाङ ताकि यिङा, "साएममु, खानानिनआ हवा फेक सुपेत पुवाङनिनओ याआडा, खाङाने, अङकाआ हाउसो हवा फेकसुपेत तोकलोक्ताओ याक्ङा।"
23
मोसाओ नामसोङमिआ मोसाञा मयिङा, 'साएमुङ, खाननु का खाङखतमि खाङसुमि, खानाआ ओन्तोम दुमडा खाङखत तखाडमेत्तु, हान अङका उनभेपलो दुमडा खानाञा कावाङसाङ मुवोङा। खाना छाङ आनओ नामसोङमि सुत्डा ङे वाया तए।'
24
मेन खोक्कोआ अक फेकसुपेत तोक्ताओ याआङा मोसाआ छाङ ताकि यिङा, “साएममु खानानिन छाकछोवा, का हाङपाङआ मानलित्ताओ दुमओ हेकतावारि मुवो, नङ मानठाप्तुओ दुम कोपलाम मुवो लिमानु लोवो सिनला याकताङ।
25
कुमाकाराङ, का खाराकि खानानिनओ फेकसुपेत बाखाहुड्डा कुमनियुङसुङ। खानानिनओ आनओ फेकसुपेत लोक्ताने।'
26
मोसाओ नामसोङमिआ मोसाञा लायङ पुवाकि लोवा, "हेइ बोन्छोलोक का सोकोते याङसुमि, अङकाआ खाडडा मानतेमदोङ मोडा हेकसु मुङा, नङ खाडा मानथापदोङ मोडा कोपङा यिङाकि खानाआ सिन्ताओ तयाआङा लो,
27
खानाआ अङलुङ बाटकाबाचिओया युङमा याक्याङा, का ताकि अङकाआ याफेक सुत्डा लाइला तोकवो याआङाङ।
28
ओसुन्दुम मोसुत्डाङका मोको फेकसुपेत ङाकक्तुकि खोक्कोसुत्डा पौफेकसुपेत याआङ, मोसाञा पुवानुम।
29
देनालो खोक्कोसुत्डा याआङ मोसाञा मोचि पुवोन, का मोसासुत्डा सायाथाक्ला लिवोङ, मेन खोक्कोसुत्डा मान्नुङ, मोसासुत्डा लिसाओ छाङ मोडाङका ङाकवोङ।
30
नङ मोको असाओ याङसुमिञा हुइयाओ मुक्छुलुम्डा केनिपुवानुम, मोडा धिखापयु का कुङजोङ साङसु लिवोङ।'
सान्नोसानओ लेन
31
'मेन मुनटोङ मनाओ सावाछा सारूङकेन्छाचि अकनिया आनओ धिनुमसङडा बानुने मोबेन, आनओ धिनुमसङ धिनारोम्खाडा युङवोङ।
32
नङ खोसाओ बुसित झारा लुङवाङओ मनाचि झाराझुम मलिवोङ, का खाइसाकिया चानकाबाआ सामुवाञा छेङग्रा डाङका छेन्याक, मुइसाकिया ङे खोसाआ मोकोचि अकञा हाउसो डाङका छेन्वोङ।
33
नङ खोसाआ सामुवाचिञा आनओ चुपचुलिप्पा, मेन छेङग्राचिञा बेङसुलिप्पा युङवोङ।
34
मोबेन हेनकोपहाङआ आनओ चुपचु छुकलिप्पाओचिञा मलोवोङ, 'बानानुम, हेइ अङपापाओ सायोकसाङओ च्यो, खाक्को हाङहोन बुलुहुतओ मुलुमपुक डाङका खानाचिओ निकि छुमचुम मुवानचिनओ याआङ, मोको कोपरू मुवानुम।
35
देनालो अङका साकारङाओ याआङाङ, खानाचिआ चासि अपुवाङ। अङका वात्तिमताओ याआङाङ, खानाचिआ दुङसि अपुवाङ। अङका नियुङखामि याआङाङ, खानाचिआ खानाचिओया अखाट्टाङ।
36
असकल याआङाङ, खानाचिआ अहुममेत्ताङ। तुककाबा याआङाङ, खानाचिआ अङकाओ खाङओछुङ अमुवा। छेकखिम्डा याआङाङ, खानाचि अङकाओया अबाना।'
37
मोबेन सामयोकमिचिआ खोनिनञा उसओ लोयाङसा लायङ मपुवोङ, “हेइ हाएसि देम्खा आनकानकाआ खानानिनञा साकारङाओ खाङोम, का खानानिनञा चासि पुइन हेना वात्तिम लुवानिनओ, का खानानिनञा दुङसि पुइन?
38
नङ देम्खा आनकानआ खानानिनञा नियुङखामि टोकतोम, का खानानिनञा आनकानचिओया टारोम? हे: ना असकलक का हुममेत्तोम?
39
का देमखा आन्कान् खानानिनञा तुककावा लिसानिनओ, हेना छेक्खिमडा टोक्तोम, का खानानिनओया बान्इन?”
40
मोबेन हेनकोपहाङआ मोकोचिञा लायङ पुवाकि मलोवोङ, “अङका खानाचिञा अछङङे लोलुकङा, खानाचिआ मोचि अङकाओ निछाक्चिखपडा झारा चोङलो चुप्पो अक्पाङञा खाक्को मेत्लो अमुवा, मोको खानाचिआ अमुवाङ।"
41
मोको नेतलोक खोचिआ बेङसुछुकलिप्पाओचिञा छाङ मयिङवोङ, “हेइ! यासानसाङच्यो, सुलावा का मोसाओ याकेन्छाचिओ निकि छुम्चुम मुवानचिनओ सान्लेप मिडा अङकाङका माङखा लिनिखारानुम।
42
देनालो अङका साकारङाओ याआङाङ, खानाचिआ चासि अमानपुदाङ। अङका वात्तिमताओ याआङाङ खानाचिआ दुङसि अमानपुदाङ।
43
अङका नियुङखामि याआङाङ, खानाचिआ हाङपाङओया अमानखाटदाङ । असकलक, याआङाङ का खानाचिआ अमानहुममेतदाङ, तुककाबा का छेकखिमडा याआङाङ, का खानाचि खाङसि अमानतादाङ।
44
मेन्छाङ मोकोचिआ उसओ लोवाकि लायङ मपुवोङ, 'हेइ हाएसि देम्खा आनकानआ खानानिनञा साकारङाओ हेना वात्तिमताओ, नियुङखामि, हेना असकलक हेना तुककाबा, हेना छेकखिम्डा टोक्तोम, का खानानिनओ रोपधाम मुइमिन?
45
मोबेन खोचिआ मोकोचिञा उसओ यिङाकि लायङ मपुवोङ, “अङका खानाचिञा नुच्चुङ ङे लोलुकङा, ओचि झारा चोङलो चुप्पोचिखपडा अक्पाङञा खाक्को मेत्लो अमानमु, मोको खानोचिआ अमानमुदाङ।
46
मोबेन ओकोचि ओलाक सान्लेप बान्छुपडा, मेन सामयोकमिचि ओलाक सान्लेप अयामडा मखात्वोङ।“