तुकहकि अतुम
देकमिञा सेतवो रूङचाला
1
मुनटोङ देकमिआ ओचि झारा दुम मुनिचियानिन मोबेन खोनिनआ आनओ खेनमाछाचिञा यिङानिन,
2
“खानाचिञा सिनलाङे याआङ, हानओ हवालेन नेतलोक सेमलायोक साके बान्, नङ मनाओ सावाछा इलाकडा कुङसिञा पाङपाकवोङ।
3
मोवाइदा बुलाम्बु बुबकाबाचि, का हाङछामिओ खोकपासङ धियान कैयाफा लोवो यामुबुबमिओ बुक्लुङडा झाराझुम मलिसा।
4
नङ मोकोचिआ देकमिञा लुलेनदाङका लाप्ताकि सेरोम्ने लोनि यायोक मचुवा।
5
मेन मोकोचिआ मयिङा, "साकेओ वाइदा ना माआङ, माआङलो मनाचिडा डोरूङला लिवोङ।"
6
देकमि बेथानिडा शिमोन खुखेनमिओ खिमडा लिहिडा,
7
अकपाङ मारिछा सोवाङलुङओ अकटेट खुङडा छुओ नामनुवा बाट्टुकि खोनिनओया बाना, का खोनिन चासिञा युङहिडा खोसाआ मोको खोनिन्ओ साया डाङका लेन्ता।
8
ओको टोकतुकि खेनमाचाचिञा माइसुङकारा, का मोकोचिआ मयिङा, “दिओ निकि उसओ मायाक्सावारि?"
9
देनादि ओको नामनुवा धिओलुङडा इन्सु मुवाकि छुयुकुप्पाचिञा पुमा रूवाङान।”
10
मेन देकमिआ ओको सिन्ताकि मोकोचिञा यिङानिन, “खानाचि ओको मेतनाछाञा देना छुयु अपु? देनादि मोचिआ ना अङकालिपा अकटेट नुलोक वक मुवाओ याआङ।
11
देनादि छुयुकुप्पाचि ना खानाचि सुत्दा निम्माङे मलि। मेन अङका ना खानाचिसुत्डा निम्मा लिनुङा।
12
देनादि मोचिआ ओको नामनुवा अङकाओ साएमपोकडा लेन्ताकि अङकाओ सुवालोङ रिदुमओ निकि छुम्चुम मुवाओ याआङ।
13
अङका खानाचिञा अछङङे लोलुकङा, झारा बुलुहुतडा खाडा ओको नुसावानाम रूमरङ मुविन ओको मेतनाछाआ खाक्को मुवा, मोसाओ रूङमाला छाङ मोचिओ मुकसिन्ओ निकि मुवोन।"
14
मोवाइदा हवापौखपडा अकपाङ यहुदा इस्करयोति लोवो ओलाक बुलाम्बु बुबचिओया खारा,
15
का खोसाआ लोवा, 'खानानचि दि पुवाङनु? अङका खोनिनञा खानानिनचिओ छुकडा पाकनिपुवोङा। नङ मोकोचिआ मोसाञा रूपाओ सुकि दाङसा पुवो तोङलासि मचुवा ।
16
नङ मोङे वाइदाङका मोसाआ खोनिनञा लाप्मेतनि पुवो सुकधिइ लामा।
थेन्युवारि चाचायु
17
हान बोपखामात पेम्पाकओ बुसिलेनडा खेनमाछाचिआ देकमिओया ताकि लोवा, “खानानिनओ राका दि याआङ, सेमलायोक साकेओ चाचायु चासिञा खानानिनओ निकि आनकान खाडा छुम्चुम मुइनने?"
18
खोनिन्आ यिङानिन, 'तालावाङडा क्योवा मनाओया खारानुम, का मोसाञा लोवानुम, 'रूमुवा यिङमानु, अङकाओ मुयाक्ला चुकडा ताओ याआङ। अङका आन्ओ खेनमाछाचि सुत्दा खानाओया सेम्लायोक साके नुवानुतवोङा।'
19
मोबेन देकमिआ मोकोचिञा खप्मेत्मा लिसाओ ओटनि खेनमाछाचिआ मचुवा, का मोकोचिआ सेमलायोक साकेओ चाचायु छुम्चुम मचुवा।
20
वावाङ लिहिडा खोनिन हवापौ खेनमाछाचि सुत्डा चाचायुडा युङानिनओ याआङा।
21
नङ खोनिनआ चानियुङसाओ वाइदा खोनिनआ लोवानिन, 'अङका खानाचिञा अछङङे लोलुकङा, खानाचिखपडा अकपाङआ लुलेन अछाकछेनताङवोङ।'
22
मोबेन मोकोचि धिमिनराक लिसाकि उकताउकआ खोनिनञा मयिङा, 'हेइ हाएसि, दि मोको अङका एव?'
23
मन्कि खोनिनआ यिङानिन, 'खोक्कोआ अङका सुत्डा कानचुरोडा छुक लुप्ता, मोसाआङे लुलेन मुवाङवोङ।
24
मनाओ सावाछा ना अछङङे खोनिनओ छाप्छोङडा छापतुइसा खात। मेन नङफिसा मो मनाञा, खोकको डाङका मनाओ सावाछा लाप्माछेक डोटवोङ। मोको मना ना मान्पुक्तानचिनओनिन मोसाओ निकि नुलोक लिसाङा।'
25
मेन खोनिनञा लाप्मेत्नि पुवो यहुदाआ सेना, 'रूमुवा दि अङका एव?' खोनिनआ मोसाञा यिङानिन, 'खाना आमहाङपाङेआ तयिङा'
26
मोबेन मोकोचिआ चानियुङसाओ वाइदा देकमिआ पेम्पाक बाट्टुकि सायोकदुम मुनि ओरानिन, का खेन्माछाचिञा पुवाकि लोवानिन, 'तारानुम, चासानुम, ओको अङकाओ साएम्पोक ए।'
27
मोबेन कानचुरो बाट्टुाकि आलाङने मुनि खोनिनआ मोकोचिञा उसओ यिङाकि पुवानिन, “खानाचि झाराआ ओडाङका दुङानुम।
28
देनालो ओको नुङवा सिस्वदुमओ अङकाओ हुवा ए, खाक्को बदधेकाओ निकि हआदोङओ हाङहुयुकमुओ निकि पेत्तिन ।
29
मेन अङका खानाचिञा लोलुकङा, हे यालोकसिओ ओको सिवाडाङका अङका मोबेनतारि दुङवोनुडा, मुन्टोङतारि आनओ पापाओ हाङहोनडा खानाचिसुत्डा नुङवा मुनि दुङनुङा।"
30
मोबेन अकटेट सुङमुसान मछाममुवा नेतलोक खोनिनचि जैतुन भुरूलिप्पा पुलोन्टाकि खारानिन।
31
मोबेन देकमिआ मोकोचिञा लोवानिन, 'ओकोङे खाखुत खानाचि अङकालिपा ह्रुकसाङ अलिवोङ, देनालो उसओ छापतानचिनओ याआङ, अङका चानकाबाञा याआपला चुवोङ का रुहुपओ सामुवाचि खाडानुछे टुङटेम मलिवोङ।
32
मेन अङकाओ लाहङलेन लिसा नेत्लोक, अङका खानाचि चोङलो बुसि गालिलडा खात्वोङा।'
33
मोबेन पत्रुसआ खोनिनञा मयिङा, 'झारापाङ खानानिन सुत्डा ह्रुकसाङ लिसाछे अङका देम्खाछाङ ह्रुकसाङ लिवोनुङा।'
34
देकमिआ मोचिञा लोवानिन, अङका खानाञा नुच्चुङ लोलुकङा, ओकोङे खाखुत वापा ओक्मा बुसि खानाआ सुमसिदु बुङछुनला तमुवाङवोङ।'
35
पत्रुसआ खोनिनञा मयिङा, 'अङकाआ खानानिन सुतडाङे सुमा डोटटालो मेन्छाङ अङका खानानिनञा बुङछुन्ला मुवोनुङा।' निचि खेन्माछाचिआ छाङ मुइसाङे मयिङा।
देकमि गेतसमनिडा
36
मोबेन देकमि गेतसमनि लोवो खामडा मोकोचि सुत्डा खारानिन, का खेनमाछाचिञा यिङानिन, 'खानाचि ओडाङे युङानुम, अङका ओलाक दिच ह्यानि खाराकि सोमफोङला मुङा।'
37
नङ हाङपाङ सुत्डा पत्रुस का जब्दिओ हवा सावाछाचिञा लोक्तुकि कोङराकसाङ का धिनुङचिमु लिसि लुवानिन,
38
मोबेन खोनिनआ मोकोचिञा लोवानिन, 'अङहाङमाङ सुवालोङथेन हेननाम कोङराकसाङ लिसाओ याआङ। खानाचि ओडा युङाकि अङकासुत्डा माइमसक युङानुम।'
39
मोबेन खोनिन् दिच ह्यानि खाराकि बोमका डोरानिन, का उसओ यिङाकि सोम्फोङला मुवानिन्, 'हेइ! अङपापा, लिमारूलो, ओको कानचुरो अङकाङका यासोतनि खातने। मेनछाङ अङकाओ मिन्मासा ओटनि माआङ, मेन खानानिन्ओ राका खुवातनि लिने।'
40
मन्कि खोनिन खेन्माछाचिओया ताकि मोकोचिञा इम्नियुङसाओ धिरानिन का पत्रुसञा यिङानिन, 'दि खानाचि अङका सुतडा अक वाइदा छाङ पोकरुङ युङमा अमानरू?
41
पोकरुङ युङानुम, का सोमफोङला मुवानुम, का सुकोडा मान्डोटदे। साकोङ ना नुच्चुङङे छुम्चुम याआङ मेन साएम्पोक रूपरू याआङ।'
42
नङ लादेङ हवासिदु खाराकि खोनिनआ उसओ यिङाकि सोमफोङला मुवानिन, 'हेइ! अङपापा अङकाआ ओको मानदुङइनलोक खाछित्सि रूनिन लो, खानानिनओ राका ङे लाटला लिने।'
43
नङ खोनिन ताकि मोकोचिञा इमनि युङसाओ ङे धिरानिन, देनादि मोकोचिओ अमुक माइम्साओ मयाआङा।
44
मोबेन खोनिन्आ मोकोचिञा लादेङ छिरानिन, का खाराकि लादेङ ओकोङे दुमचि यिङाकि सुमसिदु सोमफोङला मुवानिन।
45
मोवाइदा खोनिन् खेन्माछाचिओया ताकि मोकोचिआ यिङानिन, 'हान इमसानुम, का नान्तानुम। खाङानुम, वाइदा चुकडा ताबाननिलेवा । मनाओ सावाछा हुमुकमिओ छुकडा लापमाछेक डोट्टाओ याआङ।
46
पुलोन्टानुम, खारइनने। खाङानुम, लापमाछेक मुवाङमि चुकडाङे याआङ।"
देकमिओ लाप्पाछेक
47
खोनिन चेप्याङसा लिमानुवाङा, खाङानुम, हवापौखप्ओ अकपाङ, तामिनतुप यहुदा, का मोसाओ अकनिनडा बुलाम्बु बुबमिचि का हाङछामिओ टोप्पाङ धियानचिओ अकटेट् टोप्पो मुक्ला बान्छोन का तोम्फुक् बाटुकि मबाना।
48
खोनिनञा लापमेत्काबाआ अकटेट् उसओ सिन्छुङ मोकोचिञा पुवाओ याआङा, हे खोक्कोञा अङका चुपवोङा मोचि ङे मए, मोचिञाङे लाप्तानुम।
49
मोसाआ चकनिङे देकमिओया ताकि यिङा, 'हेइ रूमु, सायालोङ।' का खोनिनञा चुप्ता।
50
देकमिआ मोसाञा यिङानिन, 'हेइ, यावा, खाना खाक्को चुसि बानाओ तयाआङ, मोको मुनि लेवानुम।' हाले मोकोचिआ चुकडा ताकि देकमिञा छुक पाक्ता, का खोनिनञा मलाप्ता।
51
देकमिओ अकनिनडा लिवोचिखपडा अकपाङआ छुकफेयाकि आनओ बान्छोन लात्तु का बुलाम्बु बुबमिओ सुङसेमुञा धेराकि मोसाओ नाबाक फुत्तुक्क हेकनिपुवा।
52
हाले देकमिआ मोचिञा यिङानिन, 'आमनो बान्छोन लादेङ बान्छोसिपडा सुक्तानुम, देनालो बान्छोन याङकामिचि झारापाङ बान्छोनआ ङे युन्ला मलिवोङ।
53
खानाचि दि अचामलुक, दि अङका अङपापाञा ताछुक्फेङला रूनुङा, का दि खोनिन्आ हवापौ मुक्ला चोङलो बद्धे याकेन्छाचि हान्दे छुतनि पुवाङसि नुनिन का?
54
लिमाडोट लोनि छापतानचियाओ इयङवानओ इदुम खाइसाकिया लाटला मानलिसाकि युङमा रू?'
55
मोवाइदाङे देकमिआ मुकलाचिया लोवानिन, 'दि खानाचि ङापकाबाओ उसादाकडा मता इसा मुनि लापसि बान्छोन् तोमफुकचि बाटटुकि लोननि अताङ? अङका लेन्ओलेन् माङखिम्डा चिन्लुवाकि युङाङाङ, का खानाचिआ अमानलापदाङ।
56
मेन यामाङचिओ इयङवानचि लाटला लिने लोनि ओचि झारा लिमा ताओ मए।' मोबेन झारा खेन्माछाचि खोनिनञा छिरूकि मफुङसा ।
धियान बुबमिओ बुसित देकमि
57
देकमिञा लापकामिचिआ खोनिनञा धियान बुबमि कैयाफाओया मखाट्टा। मोडा यङवानमिचि का पासङ बुलाम्बुचि झाराझुम लिसाओ मयाआङा।
58
मेन पत्रुस माङखाङका ङे धियान बुबमिओ बुकलुङ तारि खोनिनओ देङसि देङसि मखारा का हुड्डा वाङाकि दुमखुङ खाङसिञा हुङकाबाचि सुत्डा मयुङा ।
59
मोबेन धियान बुबमिचि का झारा धियायोकआ देकमिञा सेतसिओ निकि खोनिन्ओ उसादाकडा सोज्जे सिन्लेखा मलामा
60
का बदधेका सोज्ने सिनलेमुचि मता। मेन्छाङ मोकोचिआ सिन्लेखा ममान्तोक मेन थेनयुडा हवापाङ बुया खाराकि मता,
61
का मलोवा, 'ओको मनाआ अङका निनाममुओ माङखिम ओतसि का सुमका लेनडा मेत्मारूङा' लोवाङा।
62
मोबेन धियान बुबमिआ ठान्ठुक लिसाकि खोनिनञा मयिङा, 'दि खाना दिच्छाङ लायङ तमान्पु? ओचि सिन्लेमुचिआ आमनो उसादाकडा पुवाओ सिन्लेखा दि ए?'
63
मेन देकमि वाइःया युङानिन, नङ् धियान बुबमिआ खोनिनञा मयिङा, 'अङका अहङसाङ निनाममाओ नुङडा खानाञा लोलुकङा, आनकानञा लोए, खाना निनाम्मुओ सावाछा निनामछेन तए हे तमाआङ!'
64
देकमिआ मोचिञा लोवानिन, 'खानानिनआ ङे लोनि लेवानिन। मेनछाङ अङका खानानिनचिञा लोलुकङा, हानङक्यातनि खानानिनचिआ मनाओ सावाछाञा साएराङओ चुप्चुछुकलिप्पा युङाओ, का नामकुदुओ योवारिडा बाननियुङसाओ टोक्मा लिवोङ।'
65
मोबेन धियान बुबमिआ आनओ टिट उसओ यिङाकि मपेरा, 'ओकोआ ना निनामअतनुङ चुनियुङसाओ याआङ, आनकानञा हान हाउसो सिन्लेखाओ दि चाखाम डोट्टा कि? खाङानुम, हान खानाचिआ ङे निनामुतनुङ एननि अलेवा ।
66
खानाचिओ दि दुमखुङ याआङ?' मोकोचिआ लायङ पुवाकि मयिङा, 'ओको सुमेकसनओ मुरू याआङ।'
67
मोबेन मोकोचिआ खोनिनओ डोडा थेत्ताकि खोनिन्ञा मपुम्ता, नङ साङ साङआ उसओ यिङयाङसा छुकफेक्लाआ मधात्तु
68
'हेइ! निनामछेन हान मायङछाम्सुदाङका लोए, खानाञा धातवो साङ ए?'
पत्रुसओ बुङछुनमु
69
पत्रुस लओलाक हुइया बुकलुङडा युङनियुङसाओ मयाआङा। नङ् अकपाङ सुङसेममाआ मोचिओया बानाकि उसओ यिङा, 'खाना छाङ गालिलओ देकमि सुत्डाङे तयाआङा?'
70
मेन मोचिआ खोकोचि झाराओ बुसित बुङछुनला मुवाकि मयिङा, 'खाना दि यिङ, अङका लेनुङा।'
71
नङ मोचि हुइया छानबाकडा लोन्टा नेत्लोक हाउसोआ मोचिञा टोक्तु, का मोडा मलिसाओचिञा यिङा, 'मोचि मना छाङ देकमि नासरि सुत्डाङे मयाआङा।'
72
नङ लादेङ मोचिआ सिस्वदुम चोकि बुङछुनला मचुवा, 'अङका मोचि मनाञा सिन्नुङा।'
73
दिच वाइदा नेत्लोक, मोडा युङसाओचिआ छाङ चुकडा ताकि पत्रुसञा मयिङा, 'अछङङे खाना छाङ मोकोचिखपडाओ तए, देनादि आम्नो दुमआङे खानाञा दुम्खाङमुलुक।'
74
हाले मोचिआ नङफिसा मुयाङसा उसओ यिङाकि सिस्वदुम चासिलुवा, 'अङका मोचि मनाञा सिन्नुङा।' नङ मोबेन्डा ङे वापा ओक्ता।
75
हान, 'वापा ओक्माबुसि खानाआ सुमसिदु बुङछुन्ला तमुवाङवोङ', लोवो देकमिआ लोवानिनओ दुम पत्रुसआ मित्ता । नङ् मोचि हुइया खाराकि परू-परू मखावा ।