एहकि अतुम
पिलातसओ बुसित देकमि
1
वायाङ लिसा, झारा बुलाम्बु बुबमिचि का हाङछामिओ पासुङ बुलाम्बुचिआ देकमिओ उसादाकडा खोनिनञा सेतसि हाङपोहाङडा यायोक मचुवा।
2
मन्कि मोकोचिआ खोनिनञा छुम्साकि मखाट्टा, का पिलातस् धिखारूखाहाङछाओया पाङपाकनि मपुवा।
3
हाले खोनिनञा लापमेत्काबा यहुदाआ खोनिनदु बानछुपइङवा लिसाओ टोकताकि लाछुङमिन मुवाकि बुलाम्बु बुबमिचि का पासङ बुलाम्बुचिञा मोको रूपाओ सुकि दाङसा लाइला चुमा बाटटा,
4
का यिङा, 'अङकाआ खायोकमात मनाञा लुलेन् पुवाकि सुवालोङडा छोङवो हुमुक्वा मुवाओ याक्ङा।' मेन मोकोचिआ मलोवा, 'आनकानञा दि? खाना आम्हाङपाङे लेसानुम।'
5
मोबेन मोचि रूपाओ दाङसाचि माङखिमडा केसाकि मोको खारालेवा का खाराकि लाकनि सुवा ।
6
मन्कि बुलाम्बु बुबमिचिआ मोचि रूपाओ दाङसाचि लोक्ताकि मयिङा, 'वाचोङ खाबाखाडा ओचि मोममा नुलोक मान्नुङ, देनादि ओको हुवाओ सोङखित ए।'
7
ओकोचिआ हाङपोहाङडा यायोक मुवाकि मोचि फेक्आ नियुङखामिचि खुमसिञा एप्माखाओ निकि खामडुब्काओ थाम्पुक मखित्ता।
8
ओसुन्दुम मोको थाम्पुक हान्देओ लेन्तारि छाङ हुवाओ थाम्पुक लोविन।
9
मोबेन यर्मियाह यामाङ दाङका उसओ लोनि चेवानचिनओ दुम लाटला लिसा, मोको ओलुङ खाक्को खोनिनदु इस्राएलओ आङखेप्आ याङलुङ पाकताओ मयाआङा, मोको ङे ओलुङ रूपाओ सुकि दाङसा मोकोचिआ मलोकता,
10
का खाम्डोब्काओ थाम्पुकओ निकि हाएसिआ मखुपमेत्ताङनिन ओन्सामि मोकोचिआ मपुवा।
पिलातसओ बुदा देकमि
11
हान देकमि धिखारूखाहाङछाओ बुसि एवानिन का धिखारूखाहाङछामिआ खोनिनञा उसओ यिङाकि मसेना, 'दि खाना यहुदिचिओ हाङ तए?' देकमिआ लोवानिन, 'खानानिन ङे लोमा नु।'
12
मन्कि मुनटोङ बुलाम्बु बुबमिचि का पासङ बुलाम्लुचिआ खोनिनञा खायोकपाक्ता, मोबेन खोनिनआ दिचछाङ लायङ पुमा मानलि।
13
मोबेन पिलातसआ खोनिनञा मयिङा, 'आमनो यङछितलाडा मोकोचिआ देम बदधे दुमचिओ सिन्लेखा मपुयाङ, दि खाना तएननिन?'
14
मेन खोनिनआ मोचिञा अकदुमओ छाङ लायङ पुमा मानलि, उन्तिनका तारि हे धिखारूखाहाङछामि नाकाक् मडोट्टा।
15
मोबेन साकेओ वाइदा मुकलाओ निकि मोकोचिआ मिनमासा मुवाओ अकपाङ छेकमि धिखारूखाहाङछाआ छित्वो चुवाओ याआङा ।
16
नङ मोवाइदा बरब्बा नुङ लिसाओ मोकोचिओ अकपाङ उतरूङामि छेकमि याआङा।
17
ओसुन्दुम मोकोचि झाराझुम लिहिडा पिलातसआ मोकोचिञा मयिङा, 'खानाचि दि अचाखालि, अङका खानाचिओ निकि साङञा छितनि पुम? बरब्बा हे निनामछेन लोवो देकमिञा?'
18
देनालो मोकोचिआ खोनिनञा नुङछिनआ ङे पाङपाकनि पुवाओ मए लोनि सिन्ला तोक्तुओ मयाआङा।
19
मोवाइदा सान्नोसान युङखाडा युङनि युङसाओ वाइदा मोचिओ तायामाआ उसओ लोनि मछुत्ता, 'मोको सामयोकमि मनाञा दिच छाङ मान्मुवाने, देनादि आइ सेन्मिडा मोचिओ सुन्दुमआ अङकाआ बदधेका छुयु तोक्तुओ याकङा।'
20
मोबेन बुलामबु बुबमिचि का पासङ बुलाम्बुचिआ मनाचिञा बरब्बाओ निकि ताछुकफेङ मुमा, का देकमिञा युन्ला चुमा लोनि चोङमेत्ता।
21
मेन धिखारूखाहाङछामिआ मोकोचिञा मयिङा, 'ओचि हवापाङखपडा खाउ ओलाकञा अङका खानाचिओ निकि छितनिपुम लोवो खानाचि मिनमासा अचाखालि?' मोकोचिआ मयिङा, 'बरब्बाञा।'
22
पिलातसआ मोकोचिञा मयिङा, 'मुइसालो निनामछेन लोवो देकमिञा ओलाक अङका दि मुम?' मोकोचि झाराआ मयिङा, 'मोको ना इलाकडा लाकतिन्ने।'
23
मेन मोचिआ मयिङा, 'देना? मोचिआ दि उवाक मुवाओ मयाआङ?' मेन मोकोचि सोताकारि उसओ यिङयाङसा मपारा, "मोको इलाकडा लाकतिन्ने।"
24
मेन दिच सुमतुम मान्लुनि डोरुङला पोनमा लुवाओ टोक्तुकि पिलातसआ चाःवा बाटटाकि मुकलाओ बुसित आनओ छुक वासुवाकि लोवा, 'खानाचिआङे लेसानुम, अङका ओको सामयोकमि मनाओ हुवाडाङका खायोकमात याकङा।'
25
नङ झारा मनाचिआ लायङ पुवाकि मयिङा, 'खोसाओ हुवा, आनकानका नङ आनकानओ आङखेपचिधानि डोटने।'
26
मोबेन खोचिआ मोकोचिओ निकि बरब्बाञा छितनि मपुवा। मेन देकमिञा रमफकआ धात्ताकि इलाकडा लाकमाञा पाङपाकनि मपुवा।
देकमि इलाकडा लाकतानचिनओ
27
मोबेन धिखारुखाहाङछामिओ टाङकारूकचिआ देकमिञा हाङखिम्डा खाटटुकि झाराङे मुक्तला कोप्लाम मचुवा।
28
नङ् मोकोचिआ खोनिनओ टिट्खान होङताकि खोनिनञा हालचुकवा सङनान हुम्मेत्नि मपुवा।
29
नङ मोकोचिआ सेन्मिओ डोलोकुम मेत्ताकि खोनिनओ सायाडा हुम्मेतनि मपुवा, का खोनिन्ओ चुप्चुछुकडा दङ युङनि मपुवा, का खोनिन्ओ बुसित लाङतुमफु नेपताकि खोनिनञा उसओ यिङयाङसा मखेङता, “हेइ यहुदिचिओ हेनकोपहाङ, सायालोङ।"
30
मोबेन मोकोचिआ खोनिनञा मथेत्ता नेत्लोक मोको दङ तारूकि खोनिन्ओ टाङडा मधात्ता।
31
नङ मुनटोङ मोकोचिआ चुतनिचिया, मोबेन मोको टिटखान् होङनि मपुवा, का खोनिनओ चिटिटखान हुममेत्ताकि खोनिनञा इलाकडा लाकसि मखाट्टा।
32
मन्कि खातदाखात्याङसा मोकोचिआ शिमोन नुङ लिसाओ साइरेनिओ अकपाङ मनाञा मधिरू, का मोकोचिआ मोसाञा इलाक खुन्ताकि खाटसिञा राकामालला मचुवा।
33
नङ मुनटोङ मोकोचि गलगथा लोवो खामडा मताबाना, खाक्कोञा खारूखोकवा खाम मलोलुक,
34
मोबेन मोकोचिञा खोनिनञा नाङलेवा होन्ताओ हेङमावा दुङसि मपुवा मेन खोनिन्आ छेम्साकि मोको दुङसि राका मुमा मान्लि ।
35
नङ मोकोचिआ खोनिनञा इलाकडा मलाक्ता नेतलोक, छाप्लाद पाकताकि खोनिनओ सङनानचि हाङपोहाङडा महासा ।
36
नङ मोडा युङाकि मोकोचिआ खोनिनञा खाचोपला मपुवा ।
37
नङ, "ओचि यहुदिचिओ हेनकोपहाङ मए" लोवो छापताचिन्ओ खोनिनओ खायोकछापला मोकोचिआ खोनिन्ओ सायाडाङका धानि खेपनि मपुवा ।
38
खोनिन सुत्डाङे हवापाङ ङापकाबाचि इलाकडा लाकतानचिन्ओ मयाआङा, अक्पाङ खोनिनओ चुपचुछुकलिप्पा का हाउसो बेङसुछुकलिप्पा ।
39
नङ मोडाङका तामि का खातकामिआ आनओ टाङ ङाङताकि खोनिनञा मिनअत मचुवा,
40
का मयिङा, 'हेइ! माङखिम ओतमि का सुमकालेनडा मेतकामि, हाङपाङञा डेक्ते, नङ खाना निनाममुओ सावाछा तए लो, इलाक डाङका धासाकि बाने।'
41
मुइसाकिया बुलाम्बु बुबमिचिआ छाङ, यङवानमि का पासङ बुलाम्बुचिओ अकनिन्ङे, स्यावारि चुवाकि मयिङा,
42
'ओसाआ निचिञा ना डेक्ता मेन उहाङपाङञा ओलाक डेकमारूनिन। ओको इस्राएलओ हेनकोपहाङ ए लो हान इलाक डाङका धासाकि बाने, का आन्कान ओकोञा मक्तुम् मुउमने ।
43
मोसाआ निनाममुधानि मक्तुम युङलुक, खोनालो खोनिन्आ ओकोञा राकामुमा नु लो, खोनिनआ ओसाञा हान्दे सेम्माला पुने, देनादि ओसाआ 'अङका निनाममुओ सावाछा एव' लोनि लोवाङा।'
44
मन्कि खोनिनसुत्डा इलाकडा अकनिनङे लाकवोन मोचि ङापकाबाचिआ छाङ खोनिनञा ओकोङे माइओ इदुम मलुवा।
देकमिओ सुवालोङ
45
मोबेन खोलेन्खप डाङका सुमसि सुसाङमुतुमतारि सिङवाङडा खाडानुछे मुकछुलुम लिसा ।
46
नङ् सुमसि सुसाङमुतुमलिपा देकमि उसओ यिङाकि धिडोसाङलाआ पारानिन, "एलि, एलि, लामा सबखथनि?" तामिन्तुप, हेइ अङकाओ निनाममु, हेइ अङकाओ निनाम्मु, खानानिनआ देना छिराङनिन?
47
मोडा एवाओखपडा खाउङेआ ओको एनाकि मयिङा, 'ओको मनाआ एलियाञा बुत्याङसा याआङ।'
48
नङ मोकोचिखपडा अकपाङआ चकनि ल्होतनि खाराकि अक्टेट् वाफपसा लोकनि सुनहेङवाआ मोको ‘भेपताकि दङडा युङनि खोनिनञा दुङसि मपुवा।
49
मेन दक्याकआ मयिङा, 'खाङोमने ना, एलिया ओचिञा डेकसि मबानहिडा याछा हे?'
50
मोबेन देकमि लादेङ धिसाङलावाआ पारानिन का हाङमाङ छिरानिन।
51
खाङानुम, माङखिमओ टिछेकवा चोमडाङका थेन्तारि पेरा, का लुटलि खारा, का धिलुङखाचि मपेरा।
52
नङ एपमाचि महोक्तानचिन का इमनिचियाओ वाचोङ सेङहाङछाचिओ बदधेका सुपोकवाचिओ लाहङलेन लिसा।
53
का खोनिनचिओ लाहङलेन मलिसा नेत्लोक मोकोचि सेचिनखुमचिङका लोन्ताकि वाचोङ तालावाङडा मवाङा, का बदधेकाओया दातलुवा ।
54
मेन् मुन्टोङ खारातटाङमि का मोचिसुत्डा देकमिञा हुङकावाचिआ लुटलि का मोडा लिसाओ मुवाइमु मटोक्ता मन्कि धिकुमाकाराकि उसओ मयिङा, 'अछङङे ओचि निनाममुओ सावाछा मयाछा।'
55
हान मोडा गालिलडाङका देकमिओ रोपधामनुखाङ मुयाङसा खोनिनओ देङसि देङसि खातकामि बदधेका मारिछाचि मयाआङा । खोक्कोआ माङखा डाङका खाङनियुङसाओ मयाआङा।
56
ओकोचिखपडा मरियम मग्दालिनि, नङ याकुब का योसेओ मामा मरियम, का जब्दिओ सावाछाचिओ आमा मयाआङा ।
57
हान नामपुक ता नेतलोक अरिमथियाओ युसुफ नुङ लिसाओ अकपाङ लुङलि मना मता, खोक्को उहाङपाङ छाङ देकमिओ खेनमाछा मयाआङा।
58
मोचिआ पिलातसओया खाराकि देकमिओ सुपोकवाओ निकि ताछुकफेङला मचुवा। मोबेन पिलातसआ मोको पुवो इङइवा मचुवा ।
59
मन्कि युसुफआ सुपोकवा बाटटाकि ओसाञा सेङवा बाङगासि टिटआ मबोम्सा।
60
नङ आन्ओ सुचिनखुमडा मयुङसा, खाक्को मोचिआ धिलुङखा पोन्तुकि मेत्ताओ मयाआडा, का एपमाओ लापतिखोमडा अकटेट टोप्पो लुङटाक सोराकि मोचि मखारा।
61
नङ मोडा एपमाओ बुसित मरियम मग्दालिनि का मोको हाउसो मरियम छाङ युङनियुङसाओ मयाआङा।
62
हान माङकोलेनदु, मो छुम्चुम्ओ लेन्ओ हवासि लेन ए, बुलाम्बु बुक्काबाचि का फरिसिचि पिलातसओया झाराझुम मलिसा,
63
का मयिङा, 'साएममु आन्कानञा मुकसिन याआङ हे मोको मुप्काबाआ मोको अहङसक युङहिडा 'सुमकालेन् नेत्लोक अङका लादेङ खोङवोङा' यिङाओ याआङा।
64
ओसुन्दुम मोको सुचिनखुम सुमकालेन तारि रातकोपनि युङसिञा इङइवा मुवाने, माआङलो मोसाओ खेन्माछाचिआ ताकि मोसाञा खुसाकि मखाट्वोङ, का 'मोको ना सुवाओ डाङका खोङता' यिङाकि मनाचिञा मलोवोङ, का मोको देङसिओ अतमु बुसिओ चोङलो धिउवाक लिवोङ।'
65
पिलातसआ मोकोचिञा मयिङा, 'खानाचिओ खाचोप्ला मयाआङ, खारानुम खानाचिआ मरुवा तारि रातकोपसाङ युङसानुम।'
66
मन्कि मोकोचिआ खाराकि लुङटाकडा सिन्छुङ छापताकि खाचोपवा युङसाकि सुचिनखुम रातकोपसाङ मयुङसा ।