रे अतुम
अकपाङ खुखेनमि नुसङ लिसाओ
1
खोनिन भुरूदाङका इतानिन नेत्लोक बधेका मुक्ला खोनिनओ देङसि मवाङा।
2
नङ अकपाङ खुखेनमिआ खोनिनओया बानाकि उसओ लोनि सायालोङ मचुवा, “हेइ! हाएसि, खानानिनओ राका मलिसा लो सेङवा चुसि रूवाङनु।”
3
खोनिनआ उसओ लोयाङसा छुक फाआन्तुकि मोसाञा नोपतानिन, “अङका राका मुङा, खाना सेङवा लिनिखारानुम।” नङ हालेङे मोसाओ खुखेन सेङवा लिनिखारा।
4
मोबेन देकमिआ मोसाञा यिङानिन, “खाङानुम, साङञा छाङ मानलोदामा। मेन हाङपाङे खाराकि बुबमिञा खाङमेत्तानुम, का सिन्लेखाओ निकि वाछाप्पाओ इङइवा ओन्सामि मोकोचिओ बुदा पुनोत्याक्क रिपेन्तानुम।“
रोमि मुकतलाटाङओ मक्तुम
5
खोनिन कर्फनहुमडा वाङहिडा, अकपाङ मुकतलाटाङ खोनिनञा ताछुकफेङला मुयाङसा मोडा ता,
6
का यिङा, “हेइ! हाएसि, अङकाओ याङसुमि घासारिमाआ धिछुयु तोक्ताकि खिमडा धामनियुङसाओ याआङ।”
7
खोनिनआ मोसाञा यिङानिन, “अङका ताकि मोसाञा नुयोक मेत्वोङा।”
8
मेन मुकतलाटाङआ लायङ पुवाकि लोवा, ‘हेइ! हाएसि, खानानिन अङखाप्पु ह्युनि बानमा लिवो मुरुपोक अङका याकनुङा, मेन इदुम ओन चेपनि पुवाने, का अङयाङसुमि नुसङ लिवोङ।
9
देनादि अङका छाङ हाङपाङ ह्नियुनि टाङकारूङ लिसाओ निछुक्कोङ मना एव, नङ अङका खोसाञा 'खारे' लोङा, का मो खात, मन्कि हाउसोञा, 'बाने', का मो बान। अङयाङसुमिञा, 'उइसा मुए', लोङा, का मोसाआ मुलुक।‘
10
देकमिआ ओको एनाकि नाकाक काङाकि देङसि देङसि बानवोचिञा लोवानिन, 'अङका खानाचिञा नुच्चुङ ङे लोलुकङा, इस्राएलडा छाङ उन टोप्पो मक्तुम अङकाआ तोक्तुओ याकनुङा ।
11
मेन अङका खानाचिञा लोलुकङा, बुसुहोन का देङसुहोन्दाङका बद्धेकापाङ मबान्वोङ, नङ सुनतुमदिवा, यङचावाछा, सोझामुसुत्डा सारूङहोन्डा मयुङवोङ।
12
मेन हाङहोनओ आङखेप हुइयाओ खाचङडा मकेवोङ, मोडा धिखापयु का कुङजोङ साङसु लिवोङ।'
13
मोबेन देकमिआ मुकतालाटाङञा लोवानिन, "आम्मकतुम ओन्सामि लिने, खारानुम।" मन्कि मोयाङसुमि मोङे वाइदा नुयोक लिसा।
योम्मुवाचि नुयोक लिसाओ
14
पत्रुसओ खिमडा मताने त्लोक देकमिआ वाछाप्पाओ छादिमाञा माआ तुक्तुकि इम्साओ टोक्तानिन।
15
नङ खोनिन्आ मोसाओ छुक नोप्तानिन, का माआ मोसाञा छिरू। मनकि मोचि मपोकता, का खोनिनओ नुखाङसु मुवा।
16
मुनटोङ वावाङ लिसा, मोबेन मोकोचिआ खोनिनओया मामाङसुखा वाङाओ बद्धेकापाङञा मटारा। का खोनिनआ इदुमआ मामाङसुखाचिञा ठिन्तानिन, का मेत्लो योम्मुवाचि मयाआङा, झाराञा नुयोक मेत्तानिन।
17
नङ यसैया यामाङआ चेवाओ इदुम लाटला लिसा, “खोनिन हाङपाङेआ आनरूपरूवारि लोक्तानिन, का सारिमाचि खुन्तानिन।“
नेकलो खेन्माछाचिओ सुको
18
मुन्टोङ देकमिआ आनओ चुवाङयोवा टोप्पो, टोप्पो मुक्लाचिञा टोक्तानिन, मोबेन खोनिनआ ह्याउलिप्पा खात्वो इङइवा पुवानिन।
19
मन्कि खोनिनओया बानाकि अकपाङ यङवानमिआ लोवा, 'रूमु, खानानिन खाडा खाडा खात्मानु, अङका खानानिन्ओ देङसु देङसु लुवोङा।’
20
देकमिआ मोचिआ यिङानिन, "तुम्पासाचिओ बुकताङ का नामकुदुओ सेचियाचिओ याङ मलि, मेन् मनाछाओ निकि ना टाङ खाम्बो खामछाङ माननुङ।"
21
खोनिनओ खेनमाछाचिहुडडा हाउसो अकपाङआ यिङा, “हेइ! हाएसि, खाराङकि बुसित अङपापाञा खुम्मा पुवाङनङने।”
22
मेन, देकमिआ मोसाञा लोवानिन, "अङकाओ देङसु वाङानुम। सुपोकवाञा मोचिओ आनओङे सुपोकवा खुममा पुवानुम।”
कुहुकञा नुसानसाङ मुलुत्तानिनओ
23
हान खोनिन चाःवासिडा वाङानिन नेतलोक खोनिन्ओ खेन्माछाचि देङसु मबाना।
24
मन्कि खाङानुम, वात्तामडा टोप्पो कुहुक ता, का चाःवासि वारेपचिआ वालुम्मा लुवा। मेन् खोनिन ओलाक इम्सानिनओ याआङा।
25
नङ मोकोचि ताकि उसओ लोयाङसा खोनिनञा पुवालोन्टा, “देक्ताने हाएसि, आन्कानका युन्ला लिसिलुइन।”
26
खोनिनआ मोकोचिञा लोवानिन, “हेइ! मुन्दामकतुम्मि च्यो, खानाचि देना अकुमाकात?” मोबेन पोकताकि खोनिनआ कुहुक नङ वात्ताञा हेन्तानिन, का कुहुक लाटला नुसानसाङ लिसा।
27
मन्कि 'खोचि ना खासओ मना मए, देनालो कुहुक का वात्ताम्आ छाङ खोनिनओ इङइवा काङहिडा मयाछा,' लोनि मोचि मनाचि स्वमराक्क मडोरा।
खाला वाङाओ मना
28
मुनटोङ खोनिन ह्याधेतलिप्पा गदरिनिचिओ लुङवाङडा ताबानानिन, मोबेन खालाचिआ दाखासाङ मेत्ताओ हवापाङआ एप्मादाङका लोन्टाकि खोनिन्ञा धित्माला मचुवा। खोक्को उन कुमाकाइत्लो मयाआङा, हे साङछाङ मोदाङका बान्खात् चुमा रूनिन् मयाआङा।
29
नङ, मोकोचि उसओ यिङयाङसा मपारा, “हेइ! निनाम्मुओ सावाछा, आन्कानओ खानानिन् सुत्दा दि चाखाम्? दि खानानिन् वाइदा मान्तायाङसा आन्कानञा दाखामा ओडा बानानिनओ ए?”
30
हान मोडाङका अचि माङखाडा बद्धेका बाकचिओ अक मुक्ला चाननियुङसाओ याआङा।
31
नङ खालाचिआ खोनिन्ञा उसओ यिङाकि ताछुकफेङ मचुवा, “खोनालो खानानिन्आ आन्कानञा लात्मानु लो, आन्कानञा बाकचिओ मुक्लाडा छुत्नि पुवाने।”
32
मन्कि खोनिन्आ मोकोचिञा यिङानिन, "खारानुम"। मोबेन मोकोचि लोनताकि बाकचिडा मवाङा। हान खाङानुम, बाकओ झारा मुक्ला थिकनिन हेमसोङलिपदाङका साजुमाडा मल्होरा, का चाःवाडा युनला मलिसा।
33
मेन बाक चान्काबाचि मफुङसा, का तालावाङडा खाराकि झारा दुम का मोचि खालाचिआ दाखासाङ लिसाओचिञा दि मलिसा मोको छाङ मएन्मेत्ता,
34
का खाङानुम, झारा तालावाङ ङे देकमिञा धितमाला मुमा ह्युमताकि मता। खोनिनञा टोक्तुकि उसओ लोनि सोमफोङला मुवा, "आनकानओ चोमसिन्खाङका लोन्टाकि खाराने।”