ए अतुम
निचिधानिओ सान्नोसान
1
निचिओ सान्नोसान मान्मुदानुम, का खानाचिओ सान्नोसान मुविमिनने।
2
देनालो खाक्को सान्नोसानआ खानाचि सान्नोसान अमुलुक, मुइसाकिया खानाचिओ छाङ सान्नोसान मुवोन, का खाक्को हाकमुआ खानाचि अहाक्लुक, मोसाआ ङे खानाचिञा हाकनिपुवोङ।
3
देना खाना आनओ निछाओ अमुकडा लिसाओ गोन्द्रा तखाङलुक, मेन आमआनओङे अमुकडा लिसाओ सुङदाङला ओलाक सिन्ला अतोकनिन? हे: ना खाङानुम,
4
मुनटोङ आमआन्ओङे अमुकडा सुङदाङला याआङलो, खाइसाकिया खाना आमनिछाञा लोमा तरू, 'हुङसानुम, आमनो अमुक्दाङका गोन्द्रा लातमा पुवाङनङ।'
5
एइ एङलामि, बुसि आन्ओङे अमुकदाङका सुङदाङला लात्तानुम, मोबेन आमनिछाओ अमुकदाङका गोन्द्रा लात्सिञा ताक्छेकने टोक्मा तरुवोङ।
6
वाचोङ याम्तोक कुतिवाचिञा मान्पुदानुम, आनओ रुवाङकुङचि बाकचिओ बुसित मानकेदासानुम, माआङलो मोसाआ अलाङआ ओकोञा नेप्ताकि लानि खानाञा ठिलुखातलेन मुउने।
सोम्फोङलाओ निकि यालोहोन
7
दोत्तानुम, खानाचिञा पुवोन, लामानुम, खानाचिआ अधित्वोङ, ठेकतानुम, खानाचिओ निकि होङवोन।
8
देनादि खोक्कोआ दोत्लुक, मोसाआ तोक, खोक्कोआ लामलुक, मोसाआ धित। खोक्कोआ ठेकलुक, मोसाओ निकि होङवोन।
9
नङ खानाचिखपडा खाउ मना लिसुने, खोक्कोओ सावाछाआ पेम्पाक दोतहिडा मोसाञा लुङ्टाक पुउने?
10
हेना ङा दोतहिडा मोसाञा पछाप पुउने।
11
ओसुन्दुम खानाचि बोन्छोलोक लिसाकि आनओ छायाङछाचिञा खान्नो याम्तोक पुसि अलेलुक लो, सारूङगाडा लिमानुवो खानाचिओ पापाआ खोनिन सुत्डा दोतकामिचिञा देम उनभेप्लो मुवाकि खान्नो याम्तोक पुमा लिवोङ।
बुसिवा नुनुतनुङ
12
ओसुन्दुम मनाचिआ खानाचिञा खाक्कोनुछे मचुने लोवो खानाचि अचाखालि, खानाचिआ छाङ मोकोचिञा मुइसाङे मुवानुम, देनालो ओकोङे खाप्ला का यामाङओ सानयङ मए।
हवाटेट लाम
13
चुक्लोखा लापतिखोम डाङका हुडडा वाङानुम, देनालो फेनलावाडा छोङवो लापतिखोम फावाङफाङ नङ लाम धाप्पको नुयाक, का मोदाङका हुडडा कावाङमिचि बद्धे मलि।
14
देनालो मोलापतिखोम चुक्लोखा नुयाक, नङ मोलाम राकरु नुयाक, खोक्कोआ ओलाक अयामडा छोङयाक, का मोको धित्वो ओन्तोम मलि।
नुच्चुङ का रफोम
15
सोज्जे यामाङचि डाङका चानचुप युङानुम, खोक्को खानाचिओया सामुवाओ लोङसानडा मबान, मेन हुडडलिपा ओलाक फेम्काबा भेन्पाचि ओटनि मलि।
16
मोकोचिओ सिवादाङका खानाचिआ मोकोचिञा असिन्वोङ। दि तुङखोपओ सुङताङचिङका यालोकसि हे वातुङमाचिङका वासिखुकमाक दुविन कि?
17
मुइसाकिया उकताउक नुलोक सुङताङआ खान्नो सिवा सिलुक। मेन रोङाओ सुङताङआ उवाकसिवा सिमेतलुक।
18
नुलोक सुङताङआ उवाकसिवा सिमा रूनिन, मानना रोङाओ सुङताङआ खान्नो सिवा सिमेतसि रूलुक।
19
खान्नो सिवा मान्सिवो उक्ताउक सुङताङ हेकनि तेइसिन, का मिडा केसिन।
20
ओसुन्दुम मोकोचिओ सिवादाङङा ङे खानाचिआ मोकोचिञा असिन्वोङ।
दुम का वोक
21
हाएसि, हाएसि, लोवाङवो झारा सारूङगाओ हाङहोनडा वाङमा तोकवोनिन। मेन मोको, खोक्कोआ सारुङगाडा लिमानुवो अङपापाओ मिन्मासा काङलेन मुलुक।
22
मोलेन बद्धेकापाङआ मलोवाङवोङ, 'हेइ! हाएसि, हेइ! हाएसि, दि आनकानआ आमनो नुङडा मायुङछाम्सु चेइमिन्, का खानानिनओ नुङडा साएराङओ ओक मुइमिन कि?
23
मन्कि अङका मोकोचिञा सासापसा लोवोङा, 'अङकाआ खानाचिञा देमखा छाङ सिन्ताओ याकनुङा। हेइ! उवाक वक मुकाबाच्यो, अङकाङका माङखा लिसानुम।'
हवामाइओ योकलाङ
24
"ओसुन्दुम खोक्कोआ अङकाओ मोचि इदुम एन का चुयाक, अङका अकपाङ तायामु मनासुत्दा मोसाओ हाकङला मुङा, खोकोआ चिखिम धिलुङखादु मेत्तु।
25
मन्कि वाताकि रूत्तावा बाना, सामसुहुक पेत्ता, का मोको खिमदु धेपतानचिन, का छाङ मोको मानधाम। देनादि मोको धिलुङखाधानि युङमेत्तानचिनओ याआङा।
26
नङ खोकोआ अङकाओ मोचि दुम एनाकि छाङ मोओन्सामि मुनिन, मोसाओ हाकङहा अकपाङ निसिनवा मनासुत्डा चुविन, खोक्कोआ चिखिम वाचेतलुङ धानि मेत्तु।
27
वाताकि रूततावा बाना, सामसुहुक पेत्ता का मोखिमदु ढुङचाला लुवा, का मोको धाम्सा, मन्कि मोसाओ धालेन टोप्पो लिसा।"
28
देकमिआ ओचि दुम मुनिचियानिन नेत्लोक मुक्ला खोनिनओ सानयङआ स्वमराक्क मडोरा।
29
देनादि खोनिनआ मोकोचिओ यङवानमिचिआ इसा माआङ, मेन कोपरूयङ लिसाओआ देतनि मुनि चिनलुमानुवाङा।