हवा अतुम
माङबुङतायामिचिओ एलोकछा देकमिसुत्दा धितमाला
1
हान हेरोदहाङओ वाइदाडा यहुदियाओ बेतलेहेमडा देकमि पुकमानुहिडा, खाङानुम, नामलुखा डाङका माङबुङतायामिचि यरूशलेमडा मबाना, का मयिङा,
2
"यहुदिचिओ हेनकोपहाङ लिसाकि पुकतानचिनओ, खोनिन खाडा लिमानु? देनानो आनकानआ खोनिनओ साङगेनमा नामलोनलिपा टोकतोम, का काखाङलेन ताओ याइनका।"
3
मेन मुनटोङ हेरोदआ ओको एना, मोबेन मोचि अकनिया यरूशलेमओ झारापाङडा डोमोसाङ थासा।
4
मन्कि खोचिआ झारा बुसिवा बुबमिचि का हाङछामिओ यङवानमिचि दुवाकि “निनामछेनओ पुकछावन खाडा लिवो ए?" लोनि मखासेन्ता।
5
नङ मोकोचिआ खोचिञा मलोवा, "यहुदियाओ वेतलेहमडा, देनालो यामाङदाङका छाप्तानचिनओ याआङ,
6
"नङ हेइ! बेतलेहेम, यहुदाओ लुङवाङ,
खाना खाउङे माइआ यहुदाओ नामसोङमिचिओ
हुपडा खाउङे चोङलोछे चुप्पाङ तमान्नुङ,
देनादि खानाङका अकपाङ नामसोङमि लोननि बान्वोङ,
खोकोआ उङमनाचि, इस्राएलओ रात्कोप मचुवोङ "।"
7
मोबेन हेरोदआ मोचि माङबुङतायामिचिञा उकखामडा बुतताकि मोकोचिसुत्डा साङगेनमा दाराओ वाइदा नुलोकनिन खासेनताकि सिनला मुलुवा।
8
नङ खोकोआ मोकोचिञा बेतलेहेमडा उसओ लोवाकि मछुत्ता, "खाराने का चुप्पाङ एलोकछाओ छापछोङडा लामाकि नुलोकनिन सिनला मुवानुम। का मुनटोङ अतोकवोङ हाले यङखान मुवाङनङ, का अङका छाङ खाराकि काखाङलेन मुवोङा।"
9
मोबेन हेन्कोपहाङओ इङइवा एनाकि मोकोचि मखारा, का खाङानुम, खाक्को साङगेनमा मोकोचिआ बुसुहोनडा मटोक्ताङसाङ, मोचि चुप्पाङ एलोकछा लिसाओ खामडा मानताबानइन्लोक मोको मोकोचिओ बुसि बुसि मवाङा, का मोडाङे नान्ता।
10
मुनटोङ मोकोचिआ मोसाङगेनमा मटोक्ता, हाले मोकोचि धिछेमासाङ लिसाकि छेमा मकारा।
11
नङ खिमहुड्डा वाङाकि मोकोचिआ चुप्पाङ एलोकछाञा उमा मरियमओ अकनिनडा मटोक्ता, का डुङताकि खोनिनञा सायालोङ मचुवा मन्कि आनओ छेम्बिखोब होङाकि खोनिनञा सोना, खेओङ, नाम्मुवाओ छुकसिवा मरिपेनता।
12
नङ “हेरोदओया लासाकि मानखातदावानुम” लोवो सेन्मिडा निनामदुम तोक्ताकि मोकोचि निलाम लिसाकि आनओ चिसिङवाङडा मखारा।
मिश्र लुङवाङडा
13
हान मोकोचि मखारा नेतलोक, खाङानुम, धिवाङ हाएसिओ अकटेट याककेन्छाआ सेन्मिडा युसुफओया दातलुवाकि उसओ मलोवा, “पोक्तानुम, चुप्पाङ एलोकछा का उमामाञा अकनिनडा लोकनि मिश्र लुङवाङडा फुङनिलेवानुम, का खानाञा अङकाआ मानलोइन्लोकतारि मोडाङे युङानुम। सुन्दुम, हेरोदआ चुप्पाङ एलोकछाञा युनलामेत्मा लामवोङ।"
14
मन्कि मोचि पोकताकि चुप्पाङ एलोकछा का उमामाञा खाखुतडाङे अकनिनडा लोक्तुकि मिश्र सिङवाङडा खातनिलेवा,
15
का हेरोदओ सुवालोङ मानलिसइनलोक तारि मोडाङे मयुङा, हे यामाङडाङका धिवाङ हाएसिआ चेवानिनओ इदुम लातला लिने, तामिनतुप, "अङकाआ आनओ दुवाछाञा मिश्र लुङवाङडाङका बुत्तुङ।"
16
मोबेन माङबुङतायामिदाङका लुलेन छाकछेन्ताओ सिनला तोक्तुकि हेरोद धिमाइसुङकारा, का माङबुङतायामिचिदाङका खाक्को वाइदा नुलोक नुलोक सिनला लुवाको मयाआङा, मोखुवातनि बेतलेहेम का मोको चोमसिनखाडा लिसाओ हवादोङ का मोडाङका हयुनिओ झारा एलोकछाचिञा सेतसि ममुलुवा।
17
मोबेन यर्मिया यामाङदाङका उसओ लोनि चेवानचिनओ इदुम लातला लिसा,
18
"रामाडा अकटेट साङला एनानचिन,
धिखापयु का तुकहुयु।
राहेल आनछाचिओ निकि खावाओ,
मोकोचि ममाननुङ लोवाकि मोचि नुसानसाङ लिमा मकाङनिन।"
मिश्र लुङवाङडाङका लासाकि ताओ
19
मोबेन हेरोद मसुवा नेतलोक, खाङानुम, मिश्रडा धिवाङ हाएसिओ अक्टेट याककेनछा सेन्मिडा युसुफओया मदारा,
20
का उसओ मलोवा, “चुप्पाङ एलोकछा का उमामाञा अकनिनडा लोकनि पुलोन्टाकि इस्रायलओ सिङवाङडा खारानुम, देनालो खोक्कोआ चुप्पाङ एलोकछाओ हाङमाङ लोकसि लामलुकताङा, मोचि सुनिचियाओ मयाआङ।"
21
मन्कि पुलोन्ताकि चुप्पाङ एलोकछा का उमामाञा अकनिनडा टाटनि इस्राएलओ सिङवाङडा मबाना।
22
मेन यहुदियाडा उपापा हेरोदओ खामडा अर्खिलाउस हाङमुयाङनि युङसाओ मयाआङ लोवो एनुकि खोचि मोडा खातसि कुमाकारू, का सेनमिडा इछामसु तोकताकि गालिलओ खाउङे चुकटेनडा मखारा,
23
नङ बानाकि मोचि नासरत लोवो तालावाङडा मयुङा। मुइसाकिया यामाङदाङका चेवानचिनओ इदुम लातला लिसा “खोनिन नासरि मलोवोन।”