सुम अतुम
युहन्ना का मोचिओ सावानाम
1
हान मोङे मुयाकलाडा हङसानवा पुवो युहन्नाआ यहुदियाओ खोक्लिडा मुसओ यिङयाङसा रूमरङ मुयाङसा मता,
2
“लाछुङमिन मुवानुम, देनालो सारूङगाओ हाङहोन चुकडा ताओ याआङ।"
3
देनालो खोचि खोक्कोङे मए खोक्कोओ छापछोङडा यसैया यामाङदाङका उसओ लोवानचिनओ याआङ, "खोक्लिडा अकपाङ पातमिओ डोसाङला,
धिवाङ हाएसिओ लाम छुमचुम मुलुत्तानुम,
खोनिनओ लामचि बिकु मेत्तानुम।”
4
युहन्नाओ आनओ हुमवो टिटखान देङकोङपाओ मुआओ याआङा, का मोचिओ छुमायुडा होःवाओ बुकरिम याआङा, का मोचिओ चामासेसि युइ का खोकलि सुइवालेम याआङा।
5
हान यरूशलेम, का झारा यहुदिया, का इताङकुओ चुवाङयोवाओ लुङवाङओ झारा मनाचि मोचिओया मखारा,
6
का आनओ हुमुकवाओ सिनलेसाङ लियाङसा इताङकु होङकुडा मोचिदाङका हङसानवा मतारा।
7
मेन मोचिआ फरिसिचि का सदुकिखपडा बद्धेकापाङ मोचिओ हङसानवाडा बाननि युङसाओ टोक्तुकि मोकोचिञा मलोवा, "हेइ! पुछापओ आङखेपच्यो, बानसिलुवाओ माइसुङदाङका फुङसिञा साङआ खानाचिञा चानचुवारि पुवा?
8
ओसुन्दुम लाछङमिन ठाटलो सिवा सिमेत्तानुम।
9
नङ सन्तुमदिवाङे आनपापा लिमानु लोवो हाङपोहाङडा मिनला मानमुदावानुम। देनालो अङका खानाचिञा लोङा, निनाममुआ मोचि लुङटाक डाङका सुन्तुमदिवाओ निकि आङखेप ठानठुक मुमा रूमानु।
10
नङ हानदेङे सुङत्ताङओ भेनडा बानथुक डोराओ याआङ। ओसुन्दुम खान्नो सिवा मानपाकवो उकताउक सुङताङ हेकनि तेइसिन, का मिडा केसिन।
11
अङका लो ना खानाचिञा लाछुङमिनओ निकि हङसानवा पुङा, अङका नेतलोक तावो अङका चोङलो फाननु रूमरूहाङ लिमानु, खोक्कोओ लाङसुप खुनवो मुरुओ अङका मान्याकदोङ, खोनिनआ खानाचिञा वाचोङ साकोङ का मिआ हङसानवा पुमा लिवोङ।
12
खोनिनओ ठापमावा अछुकडाङे याआङ, का खोनिनआ आनओ खालङ लाटलकनिन वाचोङ मेत्मा लिवोङ, नङ आनओ छुमाचा चालुपडा दुमा लिवोङ, मेन याङखुञा लो सानलेपओ मिडा लेतमा लिवोङ।"
देकमिओ हङसानवा
13
मोबेन देकमि गालिलडाङका युहन्नाओया मोचिङका हङसानवा तातसिञा बानानिन।
14
मेन युहन्नाआ उसओ यिङाकि खोनिनञा मनान्तु, “हेनाक खानानिनडाङका हङसानवा ताराङसि चाखाम याआङ, का दि खानानिन अङकाओया बानमा लिवो?"
15
मेन देकमिआ मोचिञा लोवानिन, "हान्दे मुसओङे लिमा पुवानुम। देनालो मुइसाकियाङे आनकानकाआ झारा साम्योकमिला लाटला मुमाडोटलुक।" मोबेन मोचिआ खोनिनञा देङहुतला मचुवा।
16
मन्कि देकमि हङसानवा तारूकि हालेङे चाःवाङका धानि लोन्तानिन, का खाङानुम सारूङगा खोनिनओ निकि होङतु, का खोनिनआ निनाममुओ साकोङञा सोनावा इसा धायाङसा मुवानिनओ नङ हाङपाङ धानि बानयाङसा मुवानिनओ टोकतानिन।
17
नङ खाङानुम सारूङगाङका अक्टेट उसओ छामसु लिसा, “खोचि अङकाओ सोम्पोवा सावाछा मए, खोक्को सुत्दा अङका वाया याकङा।”