¹ Yesu alingile mu bwato, alyabukile kwi shilya, no kwisa mu musumba wa ku mwabo. ² Moneni, baliletele kuli ena umwaume wa bulebe alilambalele pa butanda. napakumona icicetekelo cabo, Yesu alilandile ku mwaume wa bulebe ati, ''We mwana mwaume, ba uwa ku koseleshiwa. Imembu shobe na shelelwa.'' ³ Moneni, bamo aba muli bakalemba balikulanshanya umo ba belele abati, ''Uyu Muntu akoponta.'' ⁴ Yesu alishibile amatotonkanyo yabo no kulanda ati, ''Nindo mukotontokanishisha ifibi mu mitima yenu?'' ⁵ Bushe cindo cayangukapo, ukwebati, 'Imembu shenu na shelelwa,' Nangu ukwebati, ima no kwenda'? ⁶ Lelo mufwile ukwishiba ukwebati Umwana wa Muntu alikwata insambu sha kwelela imembu pe sonde,...'' alilandile ku wabulebe ati, ''Ima, senda ubutanda bobe, nokuya ku ng'anda yobe.'' ⁷ Nolu umwaume alimine no kuya ku ng'anda yakwe. ⁸ Ulo amabumba yamwene fi, yalitinine no kulumbanya Lesa, uwapela insambu sha musango uyu ku bantu. ⁹ Ulo Yesu ali kupita ukufuma kulya, alimwene umuntu uweshina lya Mateo alikele mwi tenti lya bakasonkesha. Alilandile kuli ena ati, ''Nkonka.'' Alimine no kumukonka. ¹⁰ Ulo Yesu aikeleko ku kulya mu ng'anda, moneni, bakasonkesha wa misonko na ba bembu abengi balishile no kwisa kulila pamo na Yesu na basambi bakwe. ¹¹ Ulo abaFarise ba mwene fi, balilandile ku basambi bakwe ati, ''Nindo kasambilisha wenu alila na bakasonkesha wa misonko na ba bembu?'' ¹² Ulo Yesu aumfwile ifi, alilandile kuli bena ati, abantu abali bwino mu mubili tabakabila shing'aga, kanofye abalwele. ¹³ Mufwile ukuya no kusambilila umo ifi fikopilibula: 'Nkokabila uluse telambo iyo.' Pantu ntaishile ku kwita abalungami ku kulapila, lelo ababembu.'' ¹⁴ Nolu abasambi ba kwa Yohane balishile kuli ena no kulanda kuli ena ati, ''Nindo fwebo na baFarise tufungila ilingi, lelo abasambi benu tabafunga ukulya?'' ¹⁵ Yesu alilandile kuli bena ati, ''bushe abana baume abali mu cikulwa ca bwinga bengalosha ulo shibwinga ali nabo? Lelo inshiku shikoisa ulo shibwinga akasendwa ukufuma kuli bena, kabili nolu bakafunga ukulya. ¹⁶ Takuli umuntu wingabika icikamba icipya pa mwingila uwakale, pantu icikamba kuti casusukapo pa mwingila, kabili kuti calepuka kucilapo. ¹⁷ Eico abantu teti babike umwangashi uupya mu nsupa iyakale. Umfwa bacite ifi, impapa ikalepuka, umwangashi uketika, kabili insupa shikonaulwa. Lelo, babika umwangashi upya mu nsupa shipya, na fyonse fikasungwa.'' ¹⁸ Ulo Yesu alikulanda ifi fintu kuli bena, moneni, mushika alishile no kufukama kuli ena. Alilandile ati, ''Umwana wandi umwanakashi afwa nombalinefye, lelo iseni mubikepo ukuboko kwenu pali ena, kabili akoba no mweo.'' ¹⁹ Nolu Yesu alimine no kumukonka, na basambi bakwe efyo bacitile. ²⁰ Moneni, umwanakashi uwacushiwe ku kusuma kwa mulopa pa ikumi na ibili aliishile kunuma yakwa Yesu no kwikata kumpela yamwingila wakwe. ²¹ Pantu alitontonkenye ati, '' Umfwa njikatefye ku fyakufwala fyakwe, nkopola.'' ²² Lelo Yesu alipilibwike no kumumona, no kulanda ati, ''we Mwana mwanakashi shipa; icicetekelo cobe cilikuposeshe.'' Kabili umwanakashi aliipolele ukufuma pa nshita ilya ine. ²³ Ulo Yesu aishile mu ng'anda yakwa mushika, alimwene bakalisha wa mutolilo ne bumba lyalikupanga icimfulumganya. ²⁴ Alilandile ati, kabiyeni, pantu umukashana tafwile, lelo alelefye utulo.'' Lelo balimusekele mu kumupumya. ²⁵ Ulo ibumba lyafumishiwe panse, alingile mu muputule no kumwikata pa kuboko, no mukashana alimine. ²⁶ Ilyashi palwa ifi lyalisalangene muli cilya icitungu conse. ²⁷ Ulo Yesu alikupita ukufuma kulya impofu shibili shalimukonkele. bali kubilikisha no kwebati, ''tubeleleni uluse, mwana Dabidi.'' ²⁸ Ulo Yesu aishile mu ng'anda, impofu shalishile kuli ena. Yesu alilandile kuli bena ati, ''Bushe mulisumine ukwebati kuti nacitefi?'' Balilandile kuli ena ati, ''Ee, Mwe Shikulu.'' ²⁹ Nolu Yesu alikete mu menso yabo no kulanda ati,''Nacicitwe kuli mwebo ukulingana ne cicetekelo cenu, '' ³⁰ na menso yabo yaliswike. NoluYesu alibakonkomeshe no kulanda ati, ''Mumone ukwebati umuntu nangu umo eishiba palwa ifi. '' ³¹ Lelo abaume babili balifumine no kuya kusabankanya ilyashi palwa ifi mu citungu conse. ³² Ulo abaume babili bali bakoya, moneni, cibulu uwali ne ngulu aliletelwe kuli Yesu. ³³ Ulo ingulu yafumine, cibulu alilandile. Amabumba yalisungwike na kulanda ati, ''Ifi tfyata afimonekapo mu Israele!'' ³⁴ Lelo aba Fariseyo balilandile ati, '' Ukupitila muli kateka wa ngulu, emo afumisha ingulu.'' ³⁵ Yesu alyendawike mu misumba yonse na mumishi. Alikonkenyepo ukusambilisha mu ma synagoge, akoshimikila imbila nsuma ya bufumu Nokuposha amalwele ya mitundu yonse ne fyakukalipwa fyakulekana-lekana. ³⁶ Ulo amwene amabumba, alibomfwilile inkumbu, pantu balicushiwe no kunenuka. Balikubati ni mpanga shakubula kacema. ³⁷ Alilandile ku basambi bakwe ati, ''ubusomboshi bulifulile, lelo ababomfi balicepele. ³⁸ Eco kanshi mukwangufyanya pepeni kuli Shikulu wa busomboshi, pakwebati engatuma ababomfi mu busomboshi bwakwe.''