¹ Yesu alikutile abasambi bakwe ikumi na babili kabili alibapele insambu pa mipashi yakukowela, iyakushitamfya, no kuposha amalwele aya mitundu yonse, ne fyakukalipwa ifyakulekana-lekana. ² Nomba amashina yabatumwa abe kumi na babili ni aya. Uwakubalipo, ni Simoni (uo nao alikwita Petero), umbi ni Andrea munyina, Yakobo mwana Sebede, na Yohane munyina; ³ Filipo, na Batolomeo; Tomas, na Mateo kasonkesha wa musonko; Yakobo mwana Alufeyo, na Tadeosi; ⁴ Simoni uwa mwibumba lyaba Sealot, na Yuda Escariot uwamufutwike. ⁵ Aba ebekumi na babili Yesu atumine. Alibakonkomeshe no kulanda ati, mwilekuya ku ncende iili yonse umo abena fyalo bekala, kabili mwiingila mu musumba uuli onse uwa bena Samaliya. ⁶ Lelo kabiyeni ku mpanga ishaluba isha mu ngánda yakwa Isreali; ⁷ kabili ulo mukoya, shimikileni no kwebati, 'Ubufumu bwa mu mulu bulipaleme.' ⁸ Mulekuposha abalwele, mulekubusha nabafwa, mulekusangulula abafibashi, no kutamfya ingulu. Mwapokelelafye ifwa lutu, nemwe mulekupelafye ifya lutu. ⁹ Mwisenda golide iili yonse, Silfere, nangu umukuba mu mishipi yenu. ¹⁰ Mwikasenda icola ca kwenda naco pa bulendo bwenu, nangu umwingila na umbi, nangu indyato, nangu inkonto, pantu umubomfi alilinga icakulya cakwe. ¹¹ Umusumba uuli onse nangu umushi uo mwaingilamo, fwayenimo umuntu wa cine, kabili mwikale palya mpaka no kufumako. ¹² Ulo mwaingila mu ng' anda, mulekubaposha. ¹³ Umfwa iyo ng'anda ililingile, lekeni umutende wenu ubepo. Lelo umfwa tailingile, umutende wenu ubwelele kuli mwebo. ¹⁴ Lelo kuli abo abatakamipokelele nangu uku kutika ku fyebo fyenu, ulo mwafuma muli iyo ngánda nangu mu musumba, kunteni ulukungu ku makasa yenu. ¹⁵ Mucinefye nkolanda kuli mwebo nati, cikabako bwino ku musumba wa Sodoma na Gomora mu bushiku bwa bupingushi ukucila pali ulya musumba. ¹⁶ ''Moneni, Namituma kubati ni mpanga pakati ka mimbulu, kanshi mube aba kucenjela kubati ni nsoka kabili abakufuka kubati ni nkunda. ¹⁷ Cenjeleni na bantu! Bakamitwala ku filye, kabili bakamilopola muma synagoge yabo. ¹⁸ Nolu bakamitwala kuli bacilolo na bashamfumu pa mulandu wandi, ngo bunte kuli bena na ku bena Fyalo. ¹⁹ Ulo bakalamitwala, mwikasakamana umo nangu ifyo mukalanda, pantu ifyakulanda fikapelwa kuli mwebo pali ilya nshita. ²⁰ Pantu temwebo mukalanda, Lelo Mupashi wakwa Shinwe eukalalanda muli mwebo. ²¹ Munyina akapela wabo kumfwa, na wishi umwana wakwe. Abana bakemina abafyashi babo kabili bakabalenga ukwipaiwa. ²² Mukapatwa ku bantu bonse pa mulandu we shina lyandi. Lelo uukashipikisha ukufika ku mpela, uyu muntu akapusuka. ²³ Ulo bamipakasa muli uyu musumba, fulumukileni kuwa kukonkapo, pantu mucinefye nkomyeba nati, tamwakaye mu misumba yonse iya mu Israeli ninshi Umwana wa Muntu alishile. ²⁴ Umusambi tacila kasambilisha wakwe, nangu umubomfi ukucila shikulu wakwe. ²⁵ Nacilinga umusambi ukwebati engaba kubati ni kasambilisha wakwe, no mubomfi kubati ni shikulu wakwe. Nga balikutile shikulu wa ngánda ati Beelsebuli, pali bufi aba mu ngánda yakwe bengabeta mashina nshi! ²⁶ Eco kanshi mwilekubatina, pantu takwaba nangu cimo icafimbwapo icitakasokoloke, kabili takuli icafisama icitakeshibikwe. ²⁷ Ifyo nkomweba mu mfimfi, mukafilande pa bwelu, nefyo mumfwa mu kutwi mukantepe-ntepe, mukafibilishe pa mitenge ya ng'anda. ²⁸ Mwilakutina abepaya umubili lelo tekuti bepaye umupashi. Tineni ena uwaba na maka yakonaula fyonse umweo no mubili kumbo. ²⁹ Bushe inseba shibili tashishitwa pandalama iinono? Lelo tapaba nangu kamo akaponena panshi ukwabula Shinwe ukwishiba. ³⁰ Lelo ne mishi yaku mutwe yenu ine yonse yalipendwa. ³¹ Mwitina. Mwalicindamisha ukucila inseba ishingi. ³² Umuntu onse uyebelela kuli ine pa bantu, ninshi muntu wandi, naine kamulumbula pali tata wa mumulu. ³³ Lelo uyo ukankaana pa bantu naine nkamukana pali tata wa mumulu. ³⁴ ''Mwilekutontonkanya ukwebati naishile mukuleta umutende pe sonde. Ntaishile mukuleta umutende, lelo ulupanga. ³⁵ Pantu naisa mukulwishikanya umwana mwaume na wishi, umwana mwanakashi na nyína elo nafyala na nyinafyala. ³⁶ Abalwani ba muntu bakaba ni abo aba mung'anda yakwe umwine. ³⁷ Uyo uwatemwa wishi nangu nyina ukucila nebo talingile ukuba uwandi; uyo uwatemwa umwana mwaume nangu umwanakashi ukucila nebo talingile ukuba uwandi. ³⁸ Uyo uutasenda icapindama cakwe no kunkonka talingile ukuba uwandi. ³⁹ Uyo uusungilila umweo wakwe akaulofya. Lelo uulofya umweo wakwe pamulandu wandi akausanga. ⁴⁰ ''Uyo uwamipokelela apokelela nebo, kabili no wa mpokelela ninshi apokelela uwantuma. ⁴¹ Uyo uwapokelela kasesema mwishina lya bukasesema akapokelela icilambu cakwa kasesema, uwapokelela umuntu umulungami mwishina lya muntu umulungami akapokelela icilambu ca muntu umulungami. ⁴² Onse uwapela kuli umo pali utu utwacepesha ulukombo lwa menshi yakutalala aya kunwa mwishina lya musambi, mucinefye nkolanda kuli mwebo, takalufye icilambu cakwe mu musango uuli onse.''