¹ Calishile kuba ukwebati ulo Yesu apwishishe ukulangilila abasambi bakwe abe kumi na babili, alifumineko kulya kukusambilisha no kushimikila mu misumba yabo. ² Nomba ulo Yohane aumfwile mu cifungo palwa milimo yakwa Kristu, alitumine amashiwi ukupitila basambi bakwe ³ kabili alilandile kuli ena ati, ''Bushe niwe ukoisa, nangula tufwaye umbi?" ⁴ Yesu alibaswike no kulanda kuli bena ati, "Kabiyeni no kulanda kuli Yohane ifyo mukomona no kumfwa. ⁵ Impofu shikomona, ifilema ifikoenda, abafibashi bakosangululwa, bankoma matwi bakoumfwa, abafwa bakobukila ku mweo, ne mbila nsuma ikobilwa ku babusu. ⁶ Uwapalwa ni uyo uushipununa pamulandu wa wandi." ⁷ Ulo aba bantu babwekelemo, Yesu alitampile ukulanda ku mabumba palwa kwa Yohane ati, "Nindo mwaile mukomona muciswebebe - litete lyalikutenkanishiwa ne cimwela? ⁸ Lelo nindo mwaile mukomona - bushe muntu uwafwala ifyakufwala ifyaluma umutengo? Mucine, abafwala ifyakufwala fyaluma umutengo bekala mu mayanda ya mfumu. ⁹ Lelo nindo mwaile mukumona - ni kasesema? Ee, nkolanda kuli mwebo ati, no kucilapo pali kasesema. ¹⁰ Uyu eo calembelwepo ati, 'Mona, Nkotuma inkombe yandi ku ntanshi yobe, uukukateyanishisha inshila.' ¹¹ Mucinefye Nkomweba ati pali bonse abafyalwa ku banakashi, takwaimapo uli onse uwacila pali Yohane kabatisha. Lelo uwacepesha mu bufumu bwa mu mulu alikulilepo ukucila pali ena. ¹² Ukufuma mu nshiku shakwa Yohane kabatisha ukufika pali nomba, ubufumu bwa mu mulu bwacushiwa no lukakala, kabili abantu balukakala ebakabupoka mu maka. ¹³ Pantu bakasesema bonse na malango yasesema ukufika kuli Yohane; ¹⁴ kabili umfwa muliipeleshe ukufipokelela, ni Eliya uwali no kwisa. ¹⁵ Uuli namatwi yakumfwa, naomfwe. ¹⁶ Ni kundo ningapalanya ino inkulo? Yaba kubati bana bekele mu ncende sha mishika bakoita bambi, ¹⁷ kabili mulande ati, 'twalimilishishe imitolilo, kabili tamwacindile. Twaliloseshe, na mwebo tamwalilile.' ¹⁸ Pantu Yohane taishile akolya umukate nangul ukunwa umwangashi, kabili balilandile ati, 'Alikwete ingulu.' ¹⁹ Umwana wa Muntu aishile akolya no kunwa kabili balanda ati, 'Lolesheni, muntu umulili kabili ni cakolwa, cibusa wa bakasonkesha wa minsoko na babembu!' Lelo mano alungamikwa ne ficitwa fyakwe.'' ²⁰ Nolu Yesu alitendeke ukukalipila imisumba umo ifisungusho ifingi fyacitilwe, pantu tabalapile. ²¹ ''Akalanda kuli webo, Korasini! Akalanda kuli webo, Betsaida! Umfwa ifisungusho fyacitikile mu Turi na Sidoni ifyo ifyacitilwe muli mwebo, nga balilapile kale mu fisamu ne mito. ²² Lelo, nkomyeba ati cikaba icakwangukapo kuli Turi na Sidoni pa bushiku bwa bupingushi ukucila pali mwebo. ²³ Webo, Kapernamu, bushe ukotontonkanya ati ukasumbwilwa ku mulu? Iyo, ukatentemwinwa kumbo. Pantu mu Sodoma nga mwalicitilwe ifisungusho ifya citilwe muli webo, nga yalibelelela ukufika na lelo. ²⁴ Lelo nkolanda kuli webo ukwebati cikangukapo ku calo ca Sodoma pa bushiku bwa bupingishi ukucila pali webo." ²⁵ Pali ilya nshita Yesu alilandile ati, "Namilumbanya, mwe Tata, Shikulu wa mulu ne sonde, pantu mwalifishile ifi fintu ku bamano na bamucetekanya, no kufisokolola kubana banono. ²⁶ Ee, Tata, pantu fyalisekeshe ku cinso cenu. ²⁷ Ifintu fyonse fyalipelwa kuli nebo ukufuma kuli Tata; kabili takwaba uwaishiba Umwana kanofye wishi, kabili takwaba uwaishiba Wishi kanofye Umwana na onse uo Umwana asala ukumusokololako. ²⁸ Iseni kuli nebo, bonse mwebakocucutika kabili abafininwa ne fisendo, kabili nkomipela ukutusha. ²⁹ Sendeni ikoli lyandi no kusambilila kuli nebo, pantu ndi uwakufuka kabili uwakupetama mu mutima, kabili mukosanga ukutusha ku myeo yenu. ³⁰ Pantu ikoli lyandi lya kwanguka ne cisendo candi cakupepuka.''