¹ Pali ilya nshita Yesu alikupita mwibala lya ngano pe Sabata. Abasambi balyumfwile nsala kabili balitendeke ukutempula imitwe ya ngano no kulya. ² Lelo abaFarise ulo bamwene ici, balilandile kuli Yesu ati, "Mona, abasambi bobe bakocita icitasumishiwa ukucita pe Sabata." ³ Lelo Yesu alilandile kuli bena ati, "Bushe tamwabelenga ifyo Dabidi acitile ulo ali ne nsala, pamo na bantu ali nabo? ⁴ Alile mu ng'anda yakwa Lesa no kulya umukate wa ceni, icitasuminishiwe kuli ena ukulya kabili icitasuminishiwa na kubo ali nabo, kanofye kuli bashimapepo beka. ⁵ Bushe tamwabelenga mu malango ukwebati pe Sabata bashimapepo mwi tempele balabifye Sabata lelo tababa na mulandu? ⁶ Lelo nkomweba ukwebati uwacila itempele ali pano. ⁷ Nga mwalishibe ifyo ici cikopilibula icakwebati, 'Mfwaya uluse kabili telambo iyo,' nga tamusekele abatali na mulandu. ⁸ Pantu Umwana wa Muntu e Shikulu we Sabata.'' ⁹ Yesu alifumine kulya no kuya kwingila mu synagoge. ¹⁰ Moneni, kwali umwaume uwalemana ukuboko. AbaFarise balipwishe Yesu, ukwebati, "Bushe calisuminishiwa ukundapa pe Sabata?" Pakwebati benga mutunganya ukubembuka. ¹¹ Yesu alilandile kuli bena ati, "Muntu nshi pali mwebo, uwakwebati, umfwa alikwete fye impanga imo, kabili umfwa impanga iyo ine yaponena mu cilindi pe Sabata, bushe tekuti ayabule? ¹² palibufi ifyo acindamisha, kanshi, umuntu ukucila impanga! Eco kanshi calisuminishiwa ukucita icabune pe Sabata." ¹³ Nolu Yesu alilandile ku mwaume ati, "Tambulula ukuboko kobe." Ali kutambulwile, kabili kwalibwelele ukutuntulu nge fyali ukunankwe. ¹⁴ Lelo abaFarise balifumine no kuya kumupangila. Balikufwaya ifyo benga monaula. ¹⁵ Lelo Yesu, pakwishiba ici, alifumineko kulya. Abantu abengi balimukonkele, kabili alibondepe bonse. ¹⁶ Ali bakonkomeshe ukukana mulenga eshibikwe kuli bambi, ¹⁷ ukwebati finga fikilishiwa, ifya landilwe ukupitila muli kasesema Esaya, ukwebati, ¹⁸ "Moneni, umubomfi wandi uo nasala; uo natemwa, uo umweo wandi ubekelwamo. Nkabika Umupashi wandi pali ena, kabili akabilisha umulinganya ku benaFyalo. ¹⁹ Takalwishe nangu ukulila umusowa; nangufye umuntu uuli onse ukumfwa ishiwi lyakwa mu misebo. ²⁰ Takafunepo itete ilili lyonse ilyafyantwa; takashimye cishiki icikofuka icushi, mpakafye akalenge umulinganya ukucimfya, ²¹ na mwi shina lyakwe abena Fyalo baka kwatilamo isubilo." ²² Nolu umo uwali impofu kabili cibulu, uwaiketwe ne ngulu, aliletelwe kuli Yesu. Ali mundepe, ulya muntu alilandile no kumona. ²³ Ibumba lyonse lyalipapile sana no kulanda ati, "Bushe uyo muntu kuti aba mwana wakwa Dabidi?" ²⁴ Lelo ulo abaFarise baumfwile pali ici cisungusho, balilandile ati, ''Uyu muntu tafumyafye ingulu kano ukupitila muli Beelesebuli, kateka wa ngulu." ²⁵ Lelo Yesu alishibe ifyo bali kutontonkanya kabili alilandile kuli bena ati, Ubufumu bonse ubwapatukana ubwine bulashala icibolya, no musumba nangu ing'anda iya patukana iine tayakeminine. ²⁶ Umfwa Shetani atamfya Shetani, ninshi ako yakanyamo umwine. Kanshi ubufumu bwakwe kuti bwaimina shani? ²⁷ Kabili nga ntamfisha ingulu muli Beelesebuli, bushe nga abana benu bashitamfisha muli nani? Pamulandu wa ici bakaba bakapingula benu. ²⁸ Lelo nga ntamfisha ingulu mu Mupashi wakwa Lesa, ninshi ubufumu bwakwa Lesa bulishile pali mwebo. ²⁹ Bushe umo kuti aingila shani mu ng'anda ya wa maka nokwiba ifipe fyakwe ukwabula ukubalilapo ukukaka uwa maka? Nolu kuti amwibila ifipe fyakwe fyonse mu ng'anda yakwe. ³⁰ Uyo uushili nanebo ninshi akopinkana nanebo, Kabili onse uutalonganya nanebo asalanganya. ³¹ Eco kanshi nkolanda kuli mwebo nati, ulubembu lonse ne miponto fikelelwa ku bantu, lelo ukupontela Mupashi wa Mushilo takwakelelwe. ³² Uyo onse uulanda amashiwi ya bubi pa Mwana wa Muntu, uyo akelelwa. Lelo uyo onse uulanda ifya bubi pa Mupashi wa Mushilo, uyo takelelwe, nangufye ni muli cino calo, nangu muli ico icikoisa. ³³ Lengeni icimuti cibe icabune ne fisabo fyaciko ifyabune, pantu icimuti conse bacishibila ku fisabo fyaciko. ³⁴ Mwe bana bamafwafwa mwe, apo muli babifi, kuti mwalanda shani ifintu fyabune? Pantu mubwingi bwa fya mu mutima akamwa kakwe efyo kalanda. ³⁵ Umuntu wabune amfumya ifyabune ukufuma mu cipao ca mutima wakwe uwabune, no muntu umubifi ukufuma mu cipao ca mutima wakwe uwabubi afumya ifyabubi. ³⁶ Nkolanda kuli mwebo nati muli bulya bushiku bwa bupingushi abantu bakalubulula pe shiwi lya cilande - lande lyonse ilyo balandile. ³⁷ Pantu ni pa fyebo fyenu apo mukalungamikilwa, kabili ni pa fyebo fyenu apo mukasekelwa.'' ³⁸ Nolu bakalemba bamo na baFarise balyaswike Yesu no kulanda ati, "Kasambilisha, tukofwaya ukumonako icishibilo kuli mwebo." ³⁹ Lelo Yesu alibaswike no kulanda kuli bena ati, ''Inkulo iibifi kabili iya bucende ikofwaya icishibilo. Lelo takuli cishibilo cipelwa kuli yena kanofye icishibilo cakwa Yona kasesema. ⁴⁰ Pantu nga filya Yona ali munda cisabi akasuba no bushiku pa nshiku shitatu, efyo no Mwana wa Muntu akaba inshiku shitatu akasuba no bushiku munda ye sonde. ⁴¹ Abantu ba ku Ninebe bakeminina pa bupingushi na iyi nkulo ya bantu no kubaseka. Pantu bena balilapile pa bushimikilo bwakwa Yona, kabili moneni, uwakucila pali Yona alipano. ⁴² Namfumu wa ku kapinda ka kulyo akabukila pa bupingushi pamo na bantu ino nkulo no kubaseka. Afumine ku mpela ye sonde ku kumfwa amano yakwa Solomone, kabili moneni, uwakucila pali Solomone ali pano. ⁴³ Ulo umupashi wa kowela wa fuma mu muntu, ulapita mu ciswebebe mukufwaya ukutusha no kusanga iyo. ⁴⁴ Elo waisa kwebati, 'Nkobwelela ku ng'anda yandi uko na fumine.' Lilya wa bwelela, wasanga ing'anda umwakubula nangu kamo - ilipyangilwe bwino kabili iya tantikwa bwino. ⁴⁵ Nolu ulaya no kuya kusendelapo imipashi na imbi cinelubali iya kubipisha ukucila pali wena, kabili shonse shikesa kwingila no kwikala mulya. Nolu imibele ya kulekelesha iya ulya muntu ikabipisha ukucila iya pakubala. Ifyo fine efyo cikaba na ku nkulo iyi iya kubipa." ⁴⁶ Ulo Yesu ali akolanda ku mabumba, moneni, banyina na bamunyina baliminine panse, bakofwayo ukulanda nankwe. ⁴⁷ Umo alimwebele ati, "Lolesheni, banyinenwe na bawenu baliminine panse bakofwaya ukulanda nenu." ⁴⁸ Lelo Yesu alibaswike no kulanda ku wa mwebele ati, "Bushe mayo na bawesu nibani?" ⁴⁹ Nolu alitambulwilile ukuboko kwakwe ukulola ku basambi bakwe no kulanda ati, "Moneni, aba e bamayo na bawesu! ⁵⁰ Pantu onse uucita ubufwayo bwa kwa Tata wa mu mulu, uyo muntu e ndime yandi, na nkanshi, kabili e mayo."