¹ Pali bulya bushiku Yesu alifumine mu ng'anda no kuya kwikala kululamba lwa bemba. ² Ibumba ilikalamba lyali mukolongene, eco alininine mu bwato no kwikalamo lelo ibumba lyonse lyaliminine mululamba. ³ Nolu Yesu alilandile ifintu ifingi kuli bena mu milumbe. Alilandile ati, ''Moneni, umulimi alile akotanda imbuto. ⁴ Ulo ali akotanda, imbuto shimbi shaliponene mu mbali ya musebo, ne fyuni fyalishile no shilya. ⁵ Shimbi mbuto shaponene mu mushili wa mabwe, opa tashakwete mushili uwingi. Apopenefye shalipukile pantu umushili tawafulille. ⁶ Lelo ulo akasuba kabalike, shalibonsele pantu tashakwete mishila, kabili shalyumine. ⁷ Imbuto shimbi nasho shaponene mu fimuti fya myunga, ne myunga shalikulile no kushitabilila. ⁸ Na shimbi mbuto shaponene mu mushili wabune no kutwala ifisabo, shimo umwanda, shimbi amakumi mutanda, na shimbi amakumi yatatu. ⁹ Uuli na matwi, na omfwe.'' ¹⁰ Abasambi balishile no kulanda kuli Yesu ati, ''Nindo mulandila kwi bumba mu milumbe?'' ¹¹ Yesu alibaswike no kulanda kuli bena ati, ''Mwalipelwa ishuko lya kwishiba ifyankama fya bufumu bwa mu mulu, lelo kuli bena tacapelwa. ¹² Pantu uyo onse uwakwata akapelelwapo na fimbi, kabili akakwata ifingi. Lelo uyo onse uushakwata, neco akwatwa cine cikapokwa ukufuma kuli ena. ¹³ Ecalenga ndekulanda kuli bena mu milumbe: Nangu bakololesha, tabakomona iyo; kabili nangu bakoumfwa, tabakotesha iyo, nangu ukwiluka. ¹⁴ Kuli bena ubusesemo bwakwa Esaya bwafikilishiwa, ubo ubulanda ati, 'Ukumfwa, mwalekumfwa, lelo tamwalekwiluka iyo; ukumona, mwalekumona, lelo tamwalekwishiba iyo. ¹⁵ Pantu imitima ya aba bantu yalitalama, kabili na matwi yabo cakwafya ukumfwa, kabili balisala amenso yabo. Nga teifyo kuti bamona na menso yabo, no kumfwa na matwi yabo, no kwiluka ne mitima yabo no kubwela nakabili, nanebo nkabondapa.''' ¹⁶ Lelo yakupalwa amenso yenu, pantu yakomona; na matwi yenu, pantu yakoumfwa. ¹⁷ Mucinefye nkomyeba ukwebati bakasesema abengi na bantu abalungami balikukabila ukumona ifintu ifyo mukomona lelo tabafimwene. Balikukabila ukumfwa ifyo mukoumfwa lelo tabafyumfwile ¹⁸ Kanshi kutikeni ku mulumbe wa mulimi uwali kutanda imbuto. ¹⁹ Ulo uuli onse aumfwa icebo ca bufumu lelo teshibile umo cilolele, umubifi alesa no kusompola icatandilwe mu mutima wakwe. Ishi e mbuto ishatandilwe mu mbali ya musebo. ²⁰ Ishatandilwe mu mushili wa mabwe muntu uumfwa icebo napopenefye acipokelela ne nsansa, ²¹ lelo tacikwata mishila muli ena kabili cishipikishafye pa kashita kanono. Ulo amacushi nangu ukupakaswa fyaima pa mulandu wa cebo, alawa mukwangufyanya. ²² Ishatandilwe mu myunga, muntu uumfwa icebo, lelo pamulandu wa masakamika ya calo cino no longolo lwa fyuma filatosha icebo, kabili tatwala fisabo. ²³ Imbuto shaponene mu mushili wabune, muntu uumfwa icebo no kwiluka. Alatwala ifisabo ne filimwa, kuli cimo umwanda, cimbi amakumi mutanda, na cimbi amakumi yatatu ukulingana no bwingi bwafyo fyabyelwe.'' ²⁴ Yesu alilandilepo na umbi umulumbe kuli bena. Alilandile ati, ''Ubufumu bwa mu mulu bwaba kubati muntu uwatandile imbuto shabune mwibala lyakwe. ²⁵ Lelo ulo abantu balele, umulwani wakwe alishile kabili nao alitandilemo amankumba no kuya. ²⁶ Ulo insonga shamena no kutwala ifitwalo, na mankumba nayo yalimoneke. ²⁷ Ababomfi ba mwine we bala balishile no kulanda kuli ena ati, 'Shikulu, bushe tamwatandilemofye imbuto sha bune mwibala lyenu? Nindo mwabela amankumba? ²⁸ Alilandile kuli bena ati, 'Umulwani eucitile ifi.' ''Ababomfi balilandile kuli ena ati, 'Bushe mukofwaya tuye kuyanukulamo?'' ²⁹ Umwine we bala alilandile ati, 'Iyo. Pantu ulo mukonukulamo amankumba, kuti mwanukwila kumo ne ngano, ³⁰ Lekeni fikulile pamo ukufika pakusombola. Pa nshita ya kusombola nkalanda ku bakusepa ati, ''Pakubala munukulemo amankumba kabili muyakake mu mipo pakuyoca, lelo mulonganye ingano mubutala bwandi.'''''' ³¹ Nolu Yesu alilandilepo umulumbe naumbi kuli bena. Alilandile ati, ''Ubufumu bwa mu mulu bwaba kubati luseke lwa lubanga ulo umuntu abulile no kulubyala mwibala lyakwe. ³² Ulu luseke elwacepeshapo pa nseke shonse. Lelo nga lwakula, lulakulishapo pa filimwa fya mwibala. Lulaluka icimuti, pakwebati ifyuni fya mulwelele filesa no kubika infinsa mu misambo yaciko.'' ³³ Nolu Yesu alibebele umulumbe na umbi. ''Ubufumu bwa mu mulu bwaba kubati citutumushi ico umwanakashi abulile no kusankanya mu milingo itatu iya bunga bwa ngano mpaka umufuba watutumuka.'' ³⁴ Ifi fintu fyonse Yesu alandile ku mabumba mu milumbe; kabili talandilepo nangu cimo kuli bena ukwabula umulumbe. ³⁵ Ici cali mukwebati ifya landilwe ukupitila muli bakasesema finga fikilishiwa, ulo alandile ati, ''Nkesula akanwa kandi mu milumbe. Nkalanda ifintu ifyafishilwe ukutula ku mufula wa calo.'' ³⁶ Nolu Yesu alishile amabumba no kuya mu ng'anda. Abasambi bakwe balishile kuli ena no kulanda ati, ''Tulondolweleni umulumbe wa mankumba ya mwibala.'' ³⁷ Yesu alibaswike no kulanda ati, ''Uyo uwatandile imbuto shabune Mwana wa Muntu. ³⁸ Ibala e calo; imbuto shabune, ebana ba bufumu. Amankumba ebana ba mubifi, ³⁹ kabili umulwani uwa yatandile ni kasebanya. Ukusombola ekupwa kwa nshita, abakusepa ni bamalaika. ⁴⁰ Eco kanshi, ifyo amankumba yakolonganikwa no kupya ku mulilo, ifyo fine efyo cikaba na pakupwa kwa nshita. ⁴¹ Umwana wa Muntu akatuma bamalaika bakwe, kabili bakalonganika ukufuma mu bufumu bwakwe fyonse ifya kuipununako nabo abacita ubupulumushi. ⁴² Bakabaposa mwi lungu lya mulilo, mulya umukaba ukulila no kusumanya ameno. ⁴³ Nolu abalungami bakalekusanika kubati kasuba mu bufumu bwa kwa Shibo. Uukwete amatwi, na omfwe. ⁴⁴ ''Ubufumu bwa mu mulu bwaba kubati cuma icafiswa mwibala. Umuntu alicisangile no kucifisa. Mu nsansa aya, ashitisha fyonse ifyo akwete, no kushita lilye bala. ⁴⁵ Nakabili, ubufumu bwa mu mulu bwaba kubati muntu uwa makwebo uukofwaya amabwe ya mutengo. ⁴⁶ Ulo asangilepo limo ilya mutengo, alile kushitisha fyonse ifyo akwete no kulishita. ⁴⁷ ''Nakabali, ubufumu bwa mu mulu bwaba kubati lisumbu ilya poselwe muli bemba, kabili lya ikete isabi lya misango yonse. ⁴⁸ Ulo lyaiswile, abalondo be sabi balilikulile ku lulamba. Nolu balikeleko no kusalamo ilya bune mufipe, lelo ilya bubi baliliposele. ⁴⁹ Cikaba umusango uyu wine ku mpela ya nshita. Bamalaika bakesa kupatula imbifi ukufuma pa balungami. ⁵⁰ Bakabaposa mwi lungu lya mulilo, mulya umukaba ukulila no kusumanya ameno. ⁵¹ ''Bushe mulilwike ifi fintu fyonse?'' Abasambi balilandile kuli ena ati, ''Ee.'' ⁵² Nolu Yesu alilandile kuli bena ati, ''Eco kanshi kalemba onse uwaaluka umusambi ku bufumu bwa mu mulu aba kubati muntu umwine wa ng'anda, uututulula ifintu fyakale ne fipya ukufuma mu cipao cakwe.'' ⁵³ Nolu calishile kuba ukwebati ulo Yesu apwile iyi milumbe, alifumineko kuli ilya ncende. ⁵⁴ Nolu Yesu alingile mu citungu cakwabo no kusambilisha bantu mu synagoge yabo. Icakwebati balipapile no kulanda ati, '' Bushe nikwisa uko uyu muntu afumya aya mano naya maka aya fisungusho? ⁵⁵ Bushe te mwana wakwa kabasa wa mbao? Bushe nyina te Maria? Bushe ba munyina te Yakobo, Yosefe, Simoni, na Yuda? ⁵⁶ Bushe bankashi yakwe bonse tatwaba nabo? Nikwisa afumya ifi fintu fyonse?'' ⁵⁷ Alibakalifye. Lelo Yesu alilandile kuli bena ati, ''Kasesema tabulwa bucindami kanofye mu mushi mu mwabo na ku lupwa lwakwe.'' ⁵⁸ Tacitilemo ifisungusho ifingi mulya pamulandu wakubulwa kwa cicetekela kwabo.