¹ Pa nshita ilya, Imfumu Herodi yalyumfwile ilyashi palwa kwa Yesu. ² Alilandile ku babomfi bakwe ati, ''Uyu ni Yohane Kabatisha; alibukile kubafwa. Eco kanshi aya maka ya kobombela muli ena.'' ³ Pantu Herodi alikete Yohane, ali mukakile no kumubika mu cifungu pamulandu wakwa Herodia, umukashi wakwa Filipi wabo. ⁴ Pantu Yohane alilandile kuli ena ati, ''Tacilingile webo ukumubula abe umuakashi obe.'' ⁵ Herodi nga ali mwipeye, lelo alikutina abantu, pantu bamwishibe nga kasesema. ⁶ Lelo ulo ubushiku bwakufyalwa kwakwa Herodi bwafikile, umwana mwanakashi wakwa Herodia alicindile pakati ka bantu no kusekesha Herodi. ⁷ Mukwasuka, alilaile no mulapo ukumupela conse ico akomulomba. ⁸ Panuma yakutungululwa na nyina, alilandile ati, ''Mpeleni pano, pa lupe, umutwe wakwa Yohane Kabatisha.'' ⁹ Imfumu yalisakamikwe sana paco alombele, lelo pamulandu wa mulapo wakwe no mulandu wa balya bonse abali ku mutebeto nankwe, alikonkomeshe ati na cicitwe. ¹⁰ Alitumine abakuya kuputula Yohane umutwe mu cifungo. ¹¹ Nolu umutwe wakwe baliuletele pa lupe no kupela umukashana nao aliutwele kuli nyina. ¹² Nolu abasambi bakwe balishile, balisendele icitumbi, no kuyakushika. Panuma ya ifi, balile kweba Yesu. ¹³ Nomba ulo Yesu aumfwile ifi, alifumineko no kuya mu bwato ku ncende iya mu matololo. Ulo amabumba yaumfwile ici, balimukonkele pa makasa ukufuma mu misumba. ¹⁴ Nolu Yesu alishile kuli bena no kumona ibumba ilikalamba. Alibomfwilile inkumbu no kubondapila abalwele babo. ¹⁵ Ulo caishile kuba icungulo, abasambi balishile kuli ena no kwebati, ''Muno ni mu matololo, ne nshita ilipwile. Salanganyeni amabumba, pakwebati bengaya mu mishi no kuishitila ifyakulya abene.'' ¹⁶ Lelo Yesu alilandile kuli bena ati, "Tabakofwaikwa ukuya. Mwebo bapeleniko ifyakuti balye.'' ¹⁷ Balilandile kuli ena ati, ''Pano tukwetepo fye imikate isano ne sabi libili.'' ¹⁸ Yesu alilandile kuli bena ati, ''Fileteni kuli nebo''. ¹⁹ Nolu Yesu alikonkomeshe ibumba ukwikala pa fyani. Alibulile imikate isano ne sabi libili. Aliloleshe ku mulu, alifipalile no ku mokaula imikate no kufipela ku basambi, na basambi balifipele kwi bumba. ²⁰ Bonse balilile kabili balikwite. Nolu balilongenye ubufungau bwashele ku fyakulya - imiseke ikumi na ibili. ²¹ Abalile bali nalimo amakana yasano abaume, ukufumyako abanakashi na bana. ²² Apopenefye alilengele abasambi ukwingila mu bwato no kumutangilila ukuya kwishilya, ulo ali akosalanganya amabumba. ²³ Panuma ya kusalanganya amabumba, alile ku lupili eka mu kupepa. Ulo icungulo cafikile, ali eka kulya. ²⁴ Lelo ubwato pali iyi nshita bwali ukutali na ku mulundu, bukosunkanishiwa na mabimbi, pantu umwela walibemine. ²⁵ Na pa nsa yakulenga bune iya bushiku Yesu alipeleme kuli bena, akoenda pali bemba. ²⁶ Ulo abasambi bamumwene akoenda pali bemba, balicushiwe no kulanda ati, ''Mulungulwa,'' kabili balipundile ku mwenso. ²⁷ Lelo Yesu alilandile nabo apopene no kulanda ati, ''Shipeni! Ninebo! Mwitina.'' ²⁸ Petero alimwaswike no kulanda ati, ''Mwe Shikulu, nga nimwebo, nkuteni njise kuli mwebo pa menshi.'' ²⁹ Yesu alilandile ati, ''Isa.'' Eco kanshi Petero alifumine mu bwato no kwenda pa menshi ukuya kuli Yesu. ³⁰ Lelo ulo Petero amwene ukupupa kwa mwela, alitinine. Ulo atendeke ukwibila, alipundile no kulanda ati, ''Mwe Shikulu, mpususheni!'' ³¹ Apopenefye Yesu alitambike ukuboko kwakwe, ukwikata Petero, no kumweba ati, ''We wa cicetekelo cinono, nindo wacitwishikila?'' ³² Nolu ulo Yesu na Petero baingile mu bwato, icimwela calilekele ukupupa. ³³ Nolu abasambi mu bwato balishinshimwine Yesu no kulanda ati, ''Mucinefye uli Mwana wakwa Lesa.'' ³⁴ Ulo baabukile kwishilya, balishile ku calo ca Genesarate. ³⁵ Ulo abaume muli iya ncende baishibe Yesu, balitumine imbila mu ncende shonse isha shingulwike ilya ncende, kabili baliletele kuli ena bonse abalwele. ³⁶ Balimupapatile ukwebati benga kumyakofye kulutwe lwa cakufwala cakwe, na bengi abakumisheko balyundepwe.