¹ Nolu abaFarise na bakalemba balishile kuli Yesu ukufuma ku Yerusalemu. Balilandile ati, ² "Nindo abasambi bobe batobela mu fishilano fya bakalamba? Pantu tabasamba ku minwe ulo bakolya umukate." ³ Alyaswike no kulanda kuli bena ati, "Nindo kanshi mutobela ifunde lyakwa Lesa pamulandu wa fya cishilano fyenu? ⁴ Pantu Lesa alilandile ati, 'Cindika wiso na noko,' kabili 'Uyo uwalanda ifya bubi pali wishi nangu nyina mucinefye akafwa.' ⁵ Lelo mwebo mulanda ati, 'Onse uweba wishi nangu nyina ati, ''Conse ica bwafwilisho ico mwapokelele ukufuma kuli nebo nomba cabupe icipelwe kuli Lesa,'' ⁶ ulya muntu tafwile ukucindika wishi.' Muli iyi nshila mwalilenga icebo cakwa Lesa icafye pamulandu wa fishilano fyenu. ⁷ Mwe babubi munda mwe! Bushe Esaya aseseme pali mwebo ulo alandile ati, ⁸ 'Aba bantu bancindika ne milomo yabo, lelo imitima yabo yaba ukutali na nebo. ⁹ Banshinshimwina apafye pantu basambilisha kubati masambilisho yabo ukuba mafunde ya bantu.''' ¹⁰ Nolu alikutile ibumba uko ali kabili alilandile kuli bena ati, "Kutikeni no kwiluka - ¹¹ Takwaba icingila mukanwa ka muntu icimukowesha. Lelo, icifuma mukanwa, ecikowesha umuntu." ¹² Nolu abasambi balishile no kulanda kuli Yesu ati, "Bushe mulishibile ati abaFarise balikalipe ulo baumfwile aya mashiwi?'' ¹³ Yesu alyaswike no kulanda ati, "Icilimwa conse ico Tata wandi uwa mu mulu talimba cikanukulwa. ¹⁴ Balekeni beka, ni ntungulushi impofu. Umfwa impofu yatungulula impofu inankwe, bonse bakawila mu cilindi." ¹⁵ Petero alyaswike no kulanda kuli Yesu ati, "Tulondolweleni uyu mulumbe." ¹⁶ Yesu alilandile ati, "Bushe na mwebo mucili ukwabula ukwiluka? ¹⁷ Tamwaishiba ukwebati conse icingila mukanwa cilaya munda no kufumina kunse ukuya mu cimbusu? ¹⁸ Lelo ifintu ififuma mukanwa fifuma ku mutima. Efintu ifikowesha umuntu. ¹⁹ Pantu mu mutima emufuma amatontonkanya ya bubi, ukwipaya, ubucende, ubulalelale, ukwiba, bukamboni bwa bufi, ne miponto. ²⁰ Ifi efintu fikowesha umuntu. Lelo ukulya ne minwe yakutasambako tacikowesha muntu iyo.'' ²¹ Nolu Yesu alifumineko kulya no kuya ukulola ku fitungu fya misumba ya Turi na Sidone. ²² Moneni, umwanakashi umwina Kenani alifumine mu citungu cilya. Alikubilikisha no kulanda ati, "Mbeleleni uluse, mwe Shikulu, Mwana Dabidi! Umwana wandi umwanakashi aliketwe ne ngulu bubi bubi.'' ²³ Lelo Yesu tamwaswikepo ishiwi nangu limo. Abasambi bakwe balishile no kumupapatila, ukwebati, ''Mutamfyeni, pantu akotupundilila." ²⁴ Lelo Yesu alyaswike no kulanda ati, ''Nshatuminwepo kuuli onse kanofye ku mpanga shaluba isha mu nga'nda yakwa Israeli.'' ²⁵ Lelo alishile no kufukama panshi kuli ena, ukulanda ati, "Mwe Shikulu, ngafweni." ²⁶ Alyaswike no kulanda ati, "Tacilingile ukubula umukate wa bana no kuposela utubwa utunono." ²⁷ Alilandile ati, "Ee, mwe Shikulu, lelo no tubwa twine tulalyako utubufungau utupona ku matebulo ya bashikulu batuko." ²⁸ Nolu Yesu alimwaswike no kulanda kuli ena ati, "We mwanakashi, icicetekelo cobe cikalamba; na cicitwe kuli webo ifyo fine ifyo ukofwaya." Umwana wakwe umwanakashi alyundepwe pa kashita kalya kene. ²⁹ Yesu alifumine kuli ilya ncende kabili alile mupepi na bemba wa Galili. Nolu alininine ulupili no kwikala palya. ³⁰ Amabumba ayakalamba yalishile kuli ena. Baliletele abakulemana, impofu, bacibulu, na bantu babulebe, na bambi abengi abalwele. Balibaletele pa makasa yakwa Yesu, na ena alibondepe. ³¹ Eco ibumba lyalipapile sana ulo lya mwene abantu bacibulu bakolanda, ababulebe bapola, abakulemana bakoenda, ne mpofu shikomona. Balilumbenye Lesa wakwa Israeli.

³² Yesu alikutile abasambi bakwe no kulanda ati, ''Naumfwila ibumba inkumbu pantu twaikala nabo inshiku shitatu ukwabula ifyakulya. Ntakofwaya ukubaleka baye ne nsala, kuti bafwa ulushile mu nshila." ³³ Abasambi balilandile kuli ena ati, "Nikwisa tukofumya umukate uwakuti amabumba ya bantu aya yekute muno mu matololo?" ³⁴ Yesu alilandile kuli bena ati, "Mukate unga mukwete?" Balilandile ati, "Uli cinelubali, no tusabi utunono." ³⁵ Nolu Yesu alyebele ibumba ukwikala panshi. ³⁶ Alibulile imikate cinelubali ne sabi, na panuma ya kutotela, alimokawile imikate kabili alipele ku basambi. Na basambi balipele kwi bumba. ³⁷ Abantu bonse balilile no kwikuta. Nolu balilonganike imiseke cinelubali iya isulamo ubufungau ubwashelepo. ³⁸ Nabo abalile bali abaume amakana yane, ukufumyako abanakashi na bana. ³⁹ Nolu Yesu alekele amabumba yalekuya kabili alipateme mubwato no kuya ku citungu ca Magadani.