¹ Ulo Yesu atentemukile ukufuma ku lupili, amabumba aya kalamba yali mukonkele. ² Moneni, uwa fibashi alishile kuli ena no kufukama kuli ena, "Shikulu, umfwa ukofwaya, kuti wansangulula." ³ Yesu alitambalike ukuboko kwakwe no kumwikata, ukwebati, "Nkofwaya. Ba uwa sangululwa." Apopenefye alisangulwilwe ku fibashi fyakwe. ⁴ Yesu alilandile kuli ana ati, ''Umone ukwebati taulandile icili conse ku muntu uuli onse. Kabiye, uye kuilangisha kuli shimapepo, no kupela icabupe cilya Mose akokomeshe, ngo bunte kuli bena." ⁵ Ulo ali akoisa mu Kapenamu, umukalamba wa bashilika alishile kuli ena, akomupapatila ⁶ no kwebati, ''Mwe Shikulu, umubomfi wandi alilele ku ng'anda ali no bulebe kabili akocushiwa no bukali nganshi." ⁷ Nolu Yesu alilandile kuli ena ati, "Nkoisa no kwisa ku mundapa.'' ⁸ Umukalamba wa bashilika alyaswike no kulanda ati, "Mwe Shikulu, Nshilingile ukwebati mwingesa ku ng'anda yandi. Landenifye ishiwi no mubomfi wandi akopola. ⁹ Pantu nanebo wine ndi muntu uwa sontwa mu nsambu, kabili nalikwata abashilika abo ntungulula. Ndalanda kuli umo ati, 'Kabiye,' nao alaya, nakuli umbi ati, 'Isa,' nao alesa, na ku mubomfi wandi ati, 'Cita ifi,' nao alacita." ¹⁰ Ulo Yesu aumfwile ifi, alipapwuke no kulanda kuli abo abali kumunkonka ati, "Mucinefye nkolanda kuli mwebo nati, Nshatala nsangapo nangu umo uwa kwata icicetekelo ca musango uyu mu Israeli. ¹¹ Nkomweba nati, abengi bakesa ukufuma ku kabanga na ku masamba, kabili bakakuwama kwi tebulo na Abrahamu, Isaki, na Yakobo, mu bufumu bwa mu mulu. ¹² Lelo abana ba bufumu bakaposwa kunse mu mfimfi ya kunse uko ukukaba ukulila no kusumanya ameno." ¹³ Yesu alilandile ku mukalamba wa bashilika ati, "Kabiye! Ngefyo ucetekele, eco na cicitwe kuli webo." No mubomfi alipolele pa nshita ilya ine. ¹⁴ Ulo Yesu aishile mu ng'anda yakwa Petero, ali mwene nafyala wakwa Petero alilambale aliketwe ne mpepo. ¹⁵ Yesu alikete ukuboko kwakwe, nempepo yalifumine. Nolu alimine no ku tampa uku mupyungila. ¹⁶ Ulo icungulo cafikile, abantu baliletele kuli Yesu abengi abaiketwe ne ngulu. Alitafishemo imipashi kwi shiwi no kundapa bonse abalwele. ¹⁷ Ifi fyali ku fikilisha ifyalandilwe na Esaya kasesema, ukwebati, "Alibulile ifyakukalipwa fyesu no kusenda amalwele yesu." ¹⁸ Nomba ulo Yesu amwene ibumba ilya mushingulwike, alipele ifipope ifyakufuma no kuya kwishilya lya bemba wa Galili. ¹⁹ Nolu kalemba alishile kuli ena no kulanda ati, "Kasambilisha, nkomikonka konse uko mukoya." ²⁰ Yesu alilandile kuli ena ati, "Bamumbwe balikwata amendo, no tuni twa mulwelele twalikwata ifinsa, lelo Umwana wa Muntu takwata na pakusamika umutwe wakwe." ²¹ Na umbi pa basambi alilandile kuli ena ati, "Shikulu, nsuminisheni mbale ndeya kushika tata." ²² Lelo Yesu alilandile kuli ena ati, "Nkonka, kabili leka abafwa bashikane na bafwa babo." ²³ Ulo Yesu Aninine ubwato, abasambi bakwe balimukonkele mulya mwine. ²⁴ Moneni, kwalimine amambi ayakalamba pali bemba, Icakwebati ubwato bwalifimbilwe na matamba. Lelo Yesu ali alilele. ²⁵ Abasambi balishile kuli ena no ku mubusha, ukwebati, "Tupususheni, Mwe Shikulu; Twalafwa!" ²⁶ Yesu alilandile kuli bena ati, "Nindo mukotinina, mwebo mweba cicetekelo cinono?" Nolu alimine no kukalipila umwela na bemba. Nolu kwalishile kuba umutende uukalamba. ²⁷ Abantu bonse balisungwike no kulanda abati, ''Muntu wa musango inshi uyu, uwa kwebati no mwela na bemba fikomubela?" ²⁸ Ulo Yesu aishile ku lubali lumbi kabili mu calo ca Gadara, abaume babili abaiketwe ne ngulu balimukumenye. Bakufuma mu manda kabili balikalipishe, icakwebati takwali kuba umulendo uwalikupita kuli ilya nshila. ²⁹ Moneni, balipundile no kulanda abati, "Findo tufwile ukucita na webo, we Mwana wakwa Lesa? Bushe waisa kuno ku kutucusha ulo inshinta yabikwa tailafika?" ³⁰ Nomba umukuni wa kumba wali palya ukolya, tapali patali napo bali. ³¹ Ingulu shakonkanyepo ukupapata Yesu no kulanda ati, ''Nga ukotutamfyamo, ututume mu mukuni wa kumba ulya." ³² Yesu alilandile kuli shena ati, Kabiyeni!" Ingulu shalifumine no kuya munkumba; Kabili moneni, umukuni onse walitentemwike ulupili no kuya muli bemba kabili shalifwilile mu menshi. ³³ Balya abali kucema inkumba balibutwike kabili balile mu musumba no kuya kushimika fyonse, maka - maka ifyacitike ku baume abakwete ingulu. ³⁴ Moneni, umusumba onse walifumine ukwisa ku kumanya Yesu. Ulo bamumwene, balimupapatile ukufuma ku citungu cabo.