¹ ''Wipingula, nobe tawakapingulwe. ² Pantu ubupingushi ubo upingwilako, ebo ukapingwilwako, ne cipimo ico ulingilako, eco nobe wine bakakulingilako. ³ Ninshi mulolesesha akapapa akanono akali mu linso lyakwa wenu, lelo wafilwa ukumona icipampa icili mu linso lyobe? ⁴ Kuti walanda shani kuli wenu ati,' leka mfumye akali mu linso lyobe,' elo ninshi icipande icili mu linso lyobe? ⁵ We bubi munda we! Ubale ufumye icipande icili mu linso lyobe, Nolu elo winga mwenekesha no kufumya akapapa mu linso lyakwa wenu ⁶ Wipela ica mushilo ku mbwa, kabili mwila kuposa fintu fya bukumu pantanshi ya nkumba. Epali bafinyataula ku makasa, nolu kabili kuti shaaluka nokwisa ku kuputaulamo mu tupimfya. ⁷ "Lomba, kabili cikopelwa kuli webo. Fwaya, kabili wala sanga. Konkosha, kabili cikeswilwa kuli webo. ⁸ Pantu onse uulomba, alapokelela; onse uufwaya, alasanga; na ku muntu uukonkosha, cikeswilwa. ⁹ Nangu ninani pali mwebo, umfwa umwana wakwe amulomba umukate, enga mupela ilibwe? ¹⁰ Nangu umfwa alomba isabi, enga mupela insoka? ¹¹ Eco kanshi, nga mwebo mwe babi mwalishiba ukupela ifya bupe fyabune ku bana benu, bushe Shinwe wa mu mulu takacishepo ukupela ifintu fyabune kuli abo aba mulomba? ¹² Eco kanshi, ifintu fyonse ifyo mufwaya abantu bamicitile, efyo na mwebo bene mubacitile, pantu aya emalango na bakasesema. ¹³ "Ingileni pa mpongolo ya kamfyemfye. Pantu impongolo ya kusalala kabili inshila ya kupabuka iitwala ku bonaushi, kabili kwaba abantu abengi abaipitamo. ¹⁴ Lelo impongolo ya kamfyemfye ne nshila iitwala ku mweo ya kwafya, kabili banono abaisanga. ¹⁵ ''Cengeleni na bakasesema ba bufi, abo abesa kuli mwebo mu fyakufwala fya mpanga lelo mucinefye mi mbulu iitakanya. ¹⁶ Niku fisabo fyabo eko mukabeshila. Bushe abantu balasaba imyangashi ku myunga nangu amakunyu kuli fi cilasa? ¹⁷ Mu musango umo wine, icimuti conse icabune citwala ifisabo fyabune, lelo icimuti cabubi citwala ifisabo fyabubi. ¹⁸ Icimuti icabune tekuti citwale icisabo icabubi, nangu icimuti icabubi tekuti citwale icisabo icabune. ¹⁹ Icimuti conse icishitwala icisabo cabune cilaputulwa no kuposwa mu mulilo. ²⁰ Eco kanshi, mukabeshibila ku fisabo fyabo. ²¹ Tebonse abalanda kuli nebo ati, 'Shikulu, Shikulu,' abakengila mu bufumu bwa mumulu, lelo kanofye abo abacita ubufwayo bwa kwa Tata uwa mu mulu. ²² Abantu abengi bakalanda kuli nebo muli bulya bushiku ati, 'Shikulu, Shikulu, bushe tatwasesemene mwi shina lyenu, na mwishina lyenu twafumishe ingulu, na mwi shina lyenu bushe temo twacitile ifisungusho ifingi?' ²³ Nolu nkalandafye pa bwelu kuli bena ukwebati, 'Nshamishibile! Kabiyeni uko fumeni kuli nebo, mwe bakacita wa fibi!' ²⁴ Eco kanshi, uyo onse uumfwa icebo candi no kucibela akaba kubati muntu uwa mano uwa kulile ing'anda yakwe pe libwe. ²⁵ Imfula yalishile kuloka, ne lyeshi lyalishile, no mwela walipupile no kuma muli ilya ng'anda, lelo tayaponene, pantu yakuliwe pe libwe. ²⁶ Lelo uyo onse uumfwa icebo candi no kukana bela akaba kubati muntu umuwelewele uwakulile ing'anda yakwe pa musensenga. ²⁷ ''Imfula yalilokele, ilyeshi lyalishile, no mwela walipupile no kupuma muli ilya ng'anda, nayo yaliwile, kabili yalyonaike umupwilapo.'' ²⁸ Calishile kuba ukwebati ulo Yesu apwile ukulanda aya mashiwi, amabumba yalipapile pa ma sambilisho yakwe, ²⁹ pantu alikusambilisha ngo muntu uwakwete insambu, kabili talikusambilisha nga bakalemba babo.