¹ ''Cenjeleni ukwebati mwicita milimo yenu iya bulungami ukuti abantu bamimone, nga teifyo tamwakakwate icilambu ukufuma kuli Shinwe uwaba mu mulu. ² Eco ulo wapela ifya nkumbu, wiilishisha ipenga we mwine ngefyo babubi munda bacita muma synagoge na mu misebo, pakwebati ba balumbanye ku bantu. Mucinefye nkolanda kuli mwebo nati, balipokelelele icilambu cabo conse. ³ Lelo ulo wapela ifya nkubu, wileka ukuboko kwa kukuso kobe kwishibe ifyo ukuboko kwa kulyo kobe kukocita ⁴ pakwebati ifya nkubu fyobe fingapelelwa mu nkama. Nolu Shinwe uumona mu nkama aka milambula. ⁵ Ulo ukopepa, mwiba kubati ni babubi munda, pantu bena balitemwa ukwiminina no kupepa mu ma Synagoge na mu fifutu fya misebo pakwebati ba bamone ku bantu. Mucinefye nkolanda kuli mwebo nati, balipokelelele icilambu cabo. ⁶ Lelo webo, ulo ukopepa, wingile mukati ku muputule obe. Isalako icibi no kupepa kuli Shinwe, uwaba mu nkama. Elo Shinwe uumona mu nkama akamilambula. ⁷ Ulo ukopepa, tekwesha ku bwekeshapo ifya kubula ubuyo fimo fine nga filya ficita abena fyalo, pantu bena batontonkanya ukwebati bakobomfwa pamulandu wa fyebo fyabo ifingi. ⁸ Eco kanshi, mwiba kubati ni bena, pantu Shinwe alishibila libela ifintu ifyo mu kabila libe tamula mwipusha. ⁹ Eco kanshi mulekupepa ngefi: 'We Shifwe waba mu mulu, Leka ishina lyobe licindikwe nge lya mushilo. ¹⁰ Leka ubufumu bobe bwise. Leka ubufwayo bobe bucitwe pe sonde ngefyo caba mu mulu. ¹¹ Utupele lelo icakulya ca cila bushiku. ¹² Utweleleko imisha shesu, nga filya nefwe twelela aba misha besu. ¹³ Wituleta mu matunko, lelo utupusushe ku mubifi.' ¹⁴ Pantu umfwa mwaelela abantu ku fibi fyabo, na Shinwe wa mu mulu nao aka myelela. ¹⁵ Lelo umfwa ta mukobelela kufibi fyabo, na Shinwe nao takamyelele kufibi fyenu. ¹⁶ "Ulo ukofunga ukulya, wiba ne cinso ca bulanda nga filya babubi munda bacita, pantu bena balalula ifinso fyabo pa kwebati bamoneke ku bantu nga bakofunga. Mucinefye nkomweba nati, bali pokelele icilambu cabo conse. ¹⁷ Lelo webo, ulo ukofunga, isube amafuta ku mutwe obe no kusamba ku menso yobe ¹⁸ pakwebati taumoneke ku bantu ati ukofunga, lelo kanofye kuli Shinwe uwaba mu nkama; kabili Shinwe uumona mu nkama akakulambula. ¹⁹ " Mwitutila ifyuma fyenu pe sonde, apo ububenshi ne ndalawa fyonaula, kabili apo abapupu batoba no kwiba. ²⁰ Lelo, tutileni ifyuma fyenu mu mulu, umo ububenshi nangu indalawa fishingonaula, na bapupu mwena tabatoba no kwiba. ²¹ Pantu ukuli icuma cobe, eko no mutima obe wine nao ukaba. ²² Ilinso enyali ya mubili. Eco, ilinso lyobe nga lili bwino, umubili onse ninshi uliswilimo ulubuto. ²³ Lelo ilinso lyobe nga libi, no mubili obe onse ninshi ukoisulamo imfimfi. Eco, umfwa ulubuto ululi muli webo ni mfimfi, ninshi iyo mfimfi yakula shani! ²⁴ Takwaba uwinga pyungila bashikulu babili, pantu kuti apatapo umo no kutemwapo umbi, pantu kuti aba uwaipeleshapo kuli umo no kusulapo umbi. Tekuti upyungile Lesa kabili ne cuma. ²⁵ Eco kanshi nkolanda kuli mwebo nati, mwilekusakamana palwa bwikashi bwenu, ifyo mukolya nangu ifyo mukonwa; nangu palwa mibili yenu, ifyo mukofwala. Bushe umweo tawacila pa fya kulya, kabili umubili tabwacila ifya kufwala? ²⁶ Lolesheni pa fyuni fya mulwelele. Tafi byala nangula ukusombola nangufye ukututila mu matala, lelo Shinwe wa mu mulu alafilisha. Bushe tamwacindamishapo ukuficila? ²⁷ Bushe ni nani umo pali mwebo mu kusakamana engailundilako umukono umo ku nshiku sha mweo wakwe? ²⁸ Ninshi musakamanina pa kufwala? Tontonkanyeni pa maluba mwibala, ifyo yakula. Tayabomba, kabili tayapikula nsalu. ²⁹ Lelo nkolanda kuli mwebo nati, nangufye ni Solomoni mu bukata bwakwe bonse tatalile afwikwapo nga limo muli aya. ³⁰ Nga Lesa alafwika icani mu mpanga, icakwebati ciliko lelo kabili mailo caposwa mu mulilo, bushe takacishepo ukumifwika, mwebo mweba cicetekelo cinono? ³¹ Eco kanshi mwisakamikwa no kulanda ati, 'Bushe nindo tukolya?' nangu 'Bushe nindo tukonwa?' nangu 'Bushe nindo tukofwala?' ³² Pantu abena Fyalo ifi fintu efyo bafwaya, na Shinwe wa mu mulu alishiba ukwebati mukofikabila. ³³ Lelo balilenipo ukufwaya ubufumu bwakwe no bulungami bwakwe, nefi fintu fyonse fikapelwa kuli mwebo. ³⁴ Eco, mwisakamana palwa mailo, pantu ubushiku bwa mailo bukaisakamana ubwine. Pantu cila bushiku buliikwatile ubwine ifibi fyabuko ifibulingile.