¹ Ulo Yesu amwene amabumba, alile palupili. Ulo aikeleko, abasambi bakwe balishile kuli ena. ² Aliswile akanwa no kubasambilisha, ukwebati, ³ "Balipalwa ababusu mu mupashi, pantu ubufumu bwa mu mulu bwabo. ⁴ "Balipalwa abaloosha, pantu bakatalalikwa. ⁵ Balipalwa abaicefya, pantu bakapyana isonde. ⁶ Balipalwa abali ne nsala ne cilaka ca bulungami, pantu bakekushiwa. ⁷ Balipalwa abaluse, pantu bakapokelela uluse. ⁸ Balipalwa abasangulwa imitima, pantu bakamona Lesa. ⁹ Balipalwa abaleta umutende, pantu baketwa abana bakwa Lesa. ¹⁰ Balipalwa abo abapakaswa pamulandu wa bulungami, pantu ubufumu bwa mu mulu bwabo. ¹¹ Mwalipalwa ulo abantu ba mituka no kumipakasa no kumilandila ifyabufi ifya misango yonse ifyabufi pa mulandu wandi. ¹² Sekeleleni no kwanga, pantu cikalamba icilambu cenu mu mulu. Pantu ni muli uyu umusango umo wine abantu bapakashile bakasesema abamitangilile. ¹³ Muli mucele we sonde. Lelo umfwa umucele wa sunduka, kuti waloweshiwa shani nakabili? Tawinga wamina cintu nakabili kanofye ukuposwa no kunyantaulwa ku makasa ya bantu. ¹⁴ Muli lubuto lwa calo. Umusumba uwabikwa pa lupili tawinga fiswa. ¹⁵ Nangu abantu tabasanika inyali no kuibika panshi ya museke, lelo pa cakutekapo inyali, kabili ilasanikila bonse mung'anda. ¹⁶ Lekeni ulubuto lwenu lusanike ku bantu pakwebati abantu bamone imilimo yenu iyabune no kulumbanya Shinwe uwa mu mulu. ¹⁷ Mwilekutontonkanya ukwebati naisa kukonaula amafunde nangula ba kasesema. Nshaisa kuku bonaula, lelo kukufikilisha. ¹⁸ Pantu mucinefye nkomweba nati, mpankafye umulu ne calo fikapite, takwakabe nangu kanonofye akalitoni nangula kamo akanonno aka mumafunde, mpakafye ifintu fyonse fikafikilishiwe. ¹⁹ Eco kanshi onse uukatobapo ilya cepesha pali aya mafunde no kusambilisha bambi ukucita ifi aketwa uwa cepesha mubufumu bwa mu mulu. Lelo onsefye uuyabaka no kuyasambilisha aketwa umukalamba mubufumu bwa mu mulu. ²⁰ Pantu nkolanda kuli mwebo nati kanofye ubulungami bwenu bwacila ubulungami bwa bakalemba na baFarise, mwebo tamwakengilemo mubufumu bwa mu mulu. ²¹ Mwalyumfwa ukwebati calilandilwe ku baliko mu nshita shakale ati, 'Wilakwipaya,' kabili, Oonse uwipaya akapingulwa.' ²² Lelo nkolanda kuli mwebo nati onse uufulilwe wabo akapingulwa; kabili onse uulanda kuli wabo ati, 'We mbulwa mano ya muntu!' akatwalwa ku cilye; na onse uulanda ati, 'We ciwelewele!' akaposwa mu mulilo wa ku mbo. ²³ Eco umfwa ukotula ica bupe pa cipailo kabili waibukisha ukwebati wenu napinkana nobe, ²⁴ sha icabupe cobe palya pa cipailo, kabili bwelelamo kwenu. Pakubala muwikishanye na wenu, elo wise kutula icabupe cobe. ²⁵ Suminishanya no mulwani obe bwangu ulo ucili nankwe mukoya ku cilye, epali umulwani obe akupela kuli kapingula, nao kapingula kuti aisakukupela kuli mushika, kabili kuti waposwa mucifungo. ²⁶ Mucinefye nkokweba nati, tawakafumemo mpakafye ukalipile akalikobili ka kulekelesha akandalama wakongwele. ²⁷ ''Mwalyumfwa ukwebati calilandilwe ati, 'Wilakucita bucende.' ²⁸ Lelo nkolanda kuli mwebo nati onse uwalolekesha umwanakashi no kumukumbwa ninshi alicitile nankwe ubucende kale mu mutima wakwe. ²⁹ Umfwa ilinso lyobe ilya kukulyo lya kulenga kuipununa, lilobolemo no kuliposa. Pantu Cawamapo webo ukulufyapo icilundwa cimo ukucila umubili onse ukuya kuposwa ku mbo. ³⁰ Umfwa ukuboko kobe ukwa kukulyo kwakulenga ukuipununa, kuputuleko no kukuposa. Pantu cawamapo webo ukulufyapo icilundwa cimo ukucila umubili onse ukuya ku mbo. ³¹ Kabili calilandilwe ati, 'Onse uwatamfya umukashi wakwe, lekeni amupele kalata wakulekaninapo. ³² Lelo nkolanda kuli mwebo nati onse uwaleka umukashi wakwe, ukufumyakofye pamulandu wa bucende, amulenga ukuba umucende. Onse uwamupa panuma yakulekwa ninshi acita ubucende. ³³ Nakabili, mwalyumfwa ukwebati calilandilwe kuli abo mu nshita shakale ati, 'Wilakulapa mulapo wa bufi, lelo ulape umulapo obe kuli Shikulu.' ³⁴ Lelo nkolanda kuli mwebo nati, tekwesha kulapa nakalya, cibe ni ku mulu takwesha, pantu ecipuna ca kwa Lesa; ³⁵ nangu pe sonde iyo, pantu ecakunyantapo amakasa yakwe; nangu ni pali Yerusalemu wine iyo, pantu emusumba wa Mfumu nkalamba. ³⁶ Cibe kulapa pa mutwe obe nakalya, pantu tawingalenga umushishi obe ukuba uwa kubuta nangu uwa kufita. ³⁷ Lelo leka ukulanda kobe kube 'Ee, ee' nangula 'Iyo, iyo.' conse icakucilapo pali ici ninshi cifumine ku mubifi. ³⁸ Mwalyumfwa ukwebati calilandilwe ati, 'Ilinso pali linso, ne lino pali lino.' ³⁹ Lelo nebo nkomyeba nati, mwikanya umubifi. Lelo, onse uwakutoba ulupi kwisaya lya kukulyo, mupele ne libiye line. ⁴⁰ Umfwa uuli onse akofwaya ukulubulula nobe no kukupoka umwingila, leka abule ne laya lyobe line. ⁴¹ Uyo onse uwa kupatikisha ukumushindika umushinso umo, kabiye nankwe imishinso ibili. ⁴² Pela kuukokulomba, kabili kuukofwaya ukwashima kuli webo wifutatilako. ⁴³ ''Mwalyumfwa ukwebati calilandilwe ati, 'Ulekutemwa umwina mupalamano obe no kupata umulwani obe.' ⁴⁴ Lelo nkolanda kuli mwebo nati, temweni abalwani benu kabili pepeleni abo abamipakasa, ⁴⁵ pakwebati mwingaba abana bakwa Shinwe uwa mu mulu. Pantu alalenga akasuba kakwe ukubalikila pa babubi na pa babune, kabili alalokesha imfula pa balungami na pa bashalungama. ⁴⁶ Pantu umfwa mukotemwafye abamitemwa, cilambu nshi mukapokelela? Bushe na bakasonkesha ba misonko tabacita cimo cine? ⁴⁷ Umfwa mukoposhafye na ba wenu, findo mwacita ukucila bambi? Bushe na bena Fyalo bene nabo tabacita cimo cine? ⁴⁸ Eco beni abapwililika, ifyo Shinwe wa mu mulu aba uwapwililika.