¹ Nolu Yesu alitungulwile no Mupashi mu matololo ku kutunkwa na kasebanya. ² Ulo afungile ukulya pa nshiku amakumi yane akasuba no bushiku alyumfwile insala. ³ Katunka alishile no kumweba ati, ''Umfwa uli Mwana wakwa Lesa eba aya mabwe yaluke umukate.'' ⁴ Lelo Yesu alimwaswike no kulanda kuli ena ati, ''Calilembwa aciti, tekucilyo ceka umuntu engekalila no mweo, lelo ku cebo conse icikofuma mu kanwa ka kwa Lesa.''' ⁵ Nolu kasebanya alimutwele mu musumba wa mushilo no kumwiminika pa nsoshi ya cikulwa ce tempele, ⁶ no kumweba ati, ''Umfwa uli Mwana wakwa Lesa, ipose panshi, pantu calilembwa aciti, 'Akakonkomesha ba malaika bakwe ukukubaka,' 'Nolu bakakwanka mu maboko yabo, pakwebati tauicenene lukasa lobe kwibwe.''' ⁷ Yesu alimwebele ati, ''Nakabili calilembwa aciti, 'Wilekwesha Wisokulu Lesa obe.''' ⁸ Nakabili, kasebanya alimutwele pa lupili ulutali no ku mulanga amabufumu ya mu calo no bukata bwa yako bonse. ⁹ Alimwebele ati, ''Fyonse ifi fintu nkakupela, Umfwa wawa panshi no kunshinshimuna.'' ¹⁰ Nolu Yesu alilandile kuli ena ati, ''Kabiye fuma pano, Shetani! Pantu calilembwa aciti, Wisokulu Lesa obe eo ulekushinshimuna, kabili ena ekafye eo ulepyungila.'' ¹¹ Nolu kasebanya alimushile, kabili moneni, bamalaika balishile no kumupyungila. ¹² Nomba ulo Yesu aumfwile ati Yohane balimwikete, alifumineko no kuya ku Galili. ¹³ Alifumine ku Nasareti kabili alilekwikala mu Kapernaumu, Iyaba kululamba lwa bemba wa Galili mu mipaka ya kwa Sebuluni na Naftali. ¹⁴ Ifi fyacitikile pa kufikilisha ifyo kasesema Esaya alandile ati, ¹⁵ ''Icalo cakwa Sebuluni ne calo cakwa Naftali, ukulola kuli bemba, kubushilya bwa Yordani, Galili wa bena Fyalo. ¹⁶ Abantu abaikele mu mfimfi balimwene ulubuto ulukalamba, nabo abaikele mu citungu na mucinshingwa camfwa, pali bena ulubuto lulisanike.'' ¹⁷ Ukutula pali ilya nshita Yesu alitendeke ukushimikila no kwebati, ''Lapileni, pantu ubufumu bwa mu mulu buli paleme.'' ¹⁸ Ulo ali akoenda mu lulamba lwa bemba wa Galili, alimwene ba wabo babili, Simone uukutwa Petero na Andrea wabo, bakoposa isumbu pali bemba, pantu bali abalondo besabi. ¹⁹ Yesu alilandile kuli bena ati, ''Iseni, nkonkeni, kabili nkomicita abalondo ba bantu.'' ²⁰ Apopenefye balishile amasumbu no ku mukonka. ²¹ Ulo Yesu alikuya ukufuma palya alimwene ba wabo babili nakabili, Yakobo umwana mwaume wakwa Sebede, na Yohane wabo bali na Sebede shibo bakolundanya amasumbu yabo. Alibakutile, ²² napopenefye balishiile ubwato na wishibo kabili balimukonkele. ²³ Yesu alikwendauka mu Galili monse, alikusambilisha mu synagoge, ukubila imbila nsuma ya bufumu no kundapa amalwele yonse ne misongo yonse mu bantu. ²⁴ Ululumbi lwakwe lwalile monse mu Siria, na bantu balimuletele bonse abali kucushiwa na malwele ayakulekana - lekana ne fya kukalipwa, abakwete ingulu, abacipumputu, na babulebe. Yesu alibondepe. ²⁵ Amabumba ayakalamba yalimukonkele ukufuma mu Galili, Dekapoli, Yerusalemu, na Yudea, no kufuma kwishilya lya Yordani.