¹ Nolu Yesu alilandile ku mabumba na ku basambi bakwe. ² Alilandile ati, ''bakalemba na baFarise bekala pa cipuna cakwa Mose. ³ Eco fyonse ifyo bamikonkomesha ukucita, citeni ifi fintu no kufibaka, Lelo mwikonkelesha ificitwa fyabo, pantu balalanda ifintu lelo tabaficita. ⁴ Eee, balakaka ifisendo ifyafina ifyo ifyashupa ukusenda, no kufibika pa mabeya ya bantu. Lelo abene teti bekateko umunwe ukwebati basendeko. ⁵ Balacita ificitwa fyabo fyonse pakwebati ba bamone ku bantu. Pantu balapanga utupampa twa malembo, no kukusha ulutwe lwa mingila yabo. ⁶ Balitemwa ififulo fyabucindami pa matebeto ne fipuna fyabucindami muma synagoge, ⁷ no kubaposha ukwa mucinshi mufisankano, no kwitwa 'Rabbi' ku bantu. ⁸ Lelo tamufwile ukwitwa 'Rabbi,' pantu mwakwata fye kasambilisha umo, kabili bonse muli ba bwananyina. ⁹ Kabili mwikuta nangu umo pa calo ati shinwe, pantu mwakwatafye Shinwe umo, kabili aba mu mulu. ¹⁰ Namwebo tamufwile ukwitwa 'kasambilisha,' pantu mwakwatafye kasambilisha umo, uuli ni Kristu. ¹¹ Lelo uyo uuli umukalamba pakati kenu akaba umubomfi wenu. ¹² Onse uuisansabika bakamucefya, na onse uuicefya umwine akasansabikwa. ¹³ Lelo akalanda kuli webo, bakalemba na baFarise, ba bubi-munda! Mulesalila abantu ubufumu bwa mu mulu. Pantu mwebo mwebene tamwingilamo, kabili tamusuminisha abakofwaya ukwingila ukucita ico. ¹⁴ Cabulanda kuli imwe, bakalemba na baFarise, ba bubi-munda! Pantu mulalya mu mayanda ya bamukamfwilwa nokupepa amapepo ayatali. ¹⁵ Akalanda kuli mwebo, bakalemba na baFarise, ba bubi-munda! Pantu mulabuka ba bemba ne fyalo ku kulenga umo aisansheko, kabili ulo aisanshako, mulamulenga aba umwana wa kumbo uwakucila pali mwebo imiku ibili. ¹⁶ "Akalanda kuli mwebo, mwe ntungulushi mpofu, mwe balanda ati, 'Onse uwalapa ukupitila mwi tempele, ninshi cafye. Lelo uwalapa pali golide we tempele, abo uwakukakwa kuli uyu mulapo.' ¹⁷ Mwe mpofu ishiwelewele! Nindo cakulapo, golide nangu itempele ililenga golide ukuba iya mushilo? ¹⁸ Kabili, 'Uyo onse uwalapa pa cipailo, cafye. Lelo uyo onse uwalapa pa cabupe icilipo, alikakwa ku mulapo wakwe.' ¹⁹ Mwe bantu impofu! Nindo yakulapo, pa cabupe nangula icipailo ico icipanga icabupe ukuba ica mushilo? ²⁰ Eco, uyo onse uwalapa pa cipailo ninshi alapa pali cena na pali fyonse ifilipo. ²¹ Uyo onse uwalapa pe tempele alapa pali lyena na pali uyo uwaikalamo. ²² Kabili uyo uwalapa pa mulu alapa pa cipuna ca bufumu icakwa Lesa no waikalapo. ²³ Akalanda kuli mwebo, bakalemba na baFarise, ba bubi-munda! Pantu mulapela ice kumi ca minti na dilu na kumini, Lelo mwalisha imilandu ya malango iyakufina iyo tamwacita - umulinganya no uluse ne cishinka. Lelo ifi efyo mwalingile ukucita no kukanasha fimbi ukwabula ukuficita. ²⁴ Mwe ntungulushi mpofu, mwebafwisa akashishi no kumina ingamila. ²⁵ ''Akalanda kuli mwebo, bakalemba na baFarise, babubi-munda! Pantu musamfya ulukombo ne mbale kunse, lelo mukati mwaisula ubupupu no bukaka. ²⁶ Mwe baFarise impofu! Samfyeni pakubala mukati ka lukombo ne mbale, pakwebati icakunse ciwamishiwe naco. ²⁷ Akalanda kuli mwebo, mwe bakalemba na baFarise, babubi-munda! Pantu mwaba kubati ni nshishi ishashingulukwako impemba, isho kunse kwena shimoneka ishabusaka, lelo mukati shaisulamo amafupa ya bafwa ne fintu fyonse ifishawama. ²⁸ Munshila imo ine, mu moneka abalungami ku bantu, lelo mukati kenu mwaisula bu bubi-munda no bupulumushi. ²⁹ Akalanda kuli mwebo, bakalemba na baFarise, babubi-munda! Pantu mulakula Inshishi sha bakasesema no kuwaminisha inshishi sha balungami. ³⁰ Mulanda amuti, 'Nga ekotwali mu nshiku sha bashifwe, nga tatwabombele pamo nabo mu kusumya umulopa wa bakasesema.' ³¹ Eco mulaishinina mwebene ukwebati muli bana baume ba abo abaipeye bakasesema. ³² Namwebo isusheni umulingo wa bashinwe. ³³ Mwe nsoka mwe, mwe bana ba mafwafwa mwe, mukapusuka shani ku bupingushi bwa kumbo? ³⁴ Eco, moneni, nkomutumina bakasesema na ba mano na bakalemba. Bamo muli abo mukabepaya no ku batanika, kabili bamo mukabalopaila mu ma synagoge yenu no ku batamfya ukufuma mu musumba ukufika mu musumba. ³⁵ Icikatumbukamo cakwebati pali mwebo epakesa umulopa onse uwa balungami uwa sumine pe sonde, ukufuma ku mulopa wakwa Abele umulungami, ukufika ku mulopa wakwa Sekaria umwana wakwa Berekia, uyo mwaipaile pakati ka mwashila ne cipailo. ³⁶ Mucinefye nkomweba ati, fyonse ifi fintu fikesa pa nkulo iyi. ³⁷ We Yerusalemu, We Yerusalemu, webo wewipaya bakasesema no kupola amabwe abo abatumwa kuli webo! Miku shinga nafwaile ukulonganya abana bobe capamo, ngefyo nankoko afukatila abana bakwe mu mapingo, lelo tawalikufwaya! ³⁸ Mona, ing'anda yobe yashala iya pomonwa. ³⁹ Pantu nkolanda kuli webo nati, tawakambonepo ukufuma pali nomba ukufika ne nshita ukalanda ati, ''Alipalwa uyo uwishila mwishina lya kwa Shikulu.''