¹ Yesu alilandile kuli bena na kabili mu milumbe, ukwebati, ² "Ubufumu bwa mu mulu bwaba kubati ni mfumu imo iyateyenye umutebeto wa bwinga bwa mwana wakwe umwaume. ³ Alitumine abasha bakwe mukwita abo abalalikwe ukwisa ku mutebeto wa bwinga, lelo tabaishile. ⁴ Nakabili imfumu yalitumine abasha bambi, ukwebati, kebeni abalalikwe, "Moneni, ninteyanya umulalilo wandi. Ing'ombe shandi ishilume, ne ng'ombe ishaina shilipaiwe ne fintu fyonse filiteyanishiwe, Iseni ku mutebeto wa bwinga."' ⁵ Lelo tabayangilweko kabili balifuminepo no kuya, umo kwi bala lyakwe, naumbi ku makwebo yakwe. ⁶ Elo bambi balikete abasha ba mfumu, ukubasebanya, no kubepaya. ⁷ Imfumu yalikalipe, kabili yalitumine abashilika baiko no konaula balya bantalamisoka no koca umusumba wabo. ⁸ Nolu alilandile kubasha bakwe ati, Ubwinga buliteyanishiwe lelo abo abalalikwe tabayene iyo. ⁹ Eco kabiyeni pa mampatu ya nshila no kwita abantu abengi ku mutebeto wa bwinga abo mukosanga." ¹⁰ Abasha balile pa mampatu ya nshila no kukolonganya pamo bonse abantu abo basangile, bonse ababi nabasuma, kanshi ing'anda ya bwinga yaiswilemo na beni. ¹¹ Lelo ulo mfumu yaishilemo ku kumona abeni, yalimwenemo umo uushafwele insalu sha bwinga. ¹² Imfumu yalilandile kuli ena ati, 'Cibusa, bushe wingile shani muno ukwabula ilaya lya bwinga?' Lelo umwaume talandilepo. ¹³ Elyo imfumu yatile kubabomfi, kakileni uyu umuntu amaboko na makasa, no kumuposa kunse ku mfinshi, ukukaba ukulila no kusumanya ameno.' ¹⁴ Pantu abaitwa bengi, lelo abasalwa banono." ¹⁵ Nolu abaFarise balile no kupangana pafyo Yesu bengamuteya mukulanda kwakwe. ¹⁶ Nolu balitumine abasambi babo kuli ena, pamo na bena Herode. Balilandile kuli Yesu ati, "Kasambilisha, twalishiba ukwebati uli wa cishinka, kabili usambilisha inshila yakwa Lesa mu cine. Tausakamana itontonkanyo lya uli onse, kabili tawakwata akapatulula pakati ka bantu. ¹⁷ Eco twebe, ukotontonkanyapo shani? Bushe calisuminishiwa ukupelako umusonko kuli Kaisare nangula iyo?" ¹⁸ Lelo Yesu alilwike ububifi bwabo no kulanda ati, ''Nindo mukonjesesha, mwe babubi munda? ¹⁹ Ndangeni indalama ya musonko," Elo baletele ndalama kuli ena. ²⁰ Yesu alilandile kuli bena ati, "Cimpasho cakwa nani ici kabili lishina nshi ili?" ²¹ Balilandile kuli ena ati, "fyakwa Kaisare." Nolu Yesu alilandile kuli bena ati, ''Ninshi peleni ifya kwa Kaisare kuli Kaisare, na kuli Lesa ifintu fya kwa Lesa." ²² Ulo baumfwile ici, balipapwike. Nolu balimushile no kuya. ²³ Pali bulya bushiku bamo aba Saduki, abalanda ati takwaba kubuka, balishile kuli ena. Balimwipwishe, ²⁴ ukwebati, "Kasambilisha, Mose alilandile ati, umfwa umwaume afwa, ukwabula abana, wabo afwile aupa umukashi wakwe no kufyalila wabo abana.' ²⁵ Kwaliko bamunyina cine-lubali. Uwakubalilapo alyupile na panuma alifwile. Tashilepo abana, alishile umukashi wakwe kuli wabo. ²⁶ Elo wabo uwa bubili alicitile cimo cine, Elo no wa butatu, efyo cali ifyo fine ukufikafye na kuli wabo wakulenga cine-lubali. ²⁷ Panuma ya aba bonse, umwanakashi alifwile. ²⁸ Nomba mukubushiwa, akesa kuba umukashi wakwa nani pali abo bamunyina cine-lubali? Pantu bonse balimupile." ²⁹ Lelo Yesu alyaswike no kulanda kuli bena ati, "Mulilubile pantu tamwaishiba amalembo nangu amaka yakwa Lesa. ³⁰ Pantu mukubushiwa tabakalekupa nangu ukupwa. Lelo, bakaba kubati ni bamalaika mu mulu. ³¹ Lelo palwa kubushiwa kwa bafwa, bushe tamwabelenga ifyo Lesa alandile kuli mwebo, ukwebati, ³² "Nine Lesa wakwa Abrahamu, Lesa wakwa Isaki, Lesa wakwa Yakobo'? Lesa te Lesa wa bafwa, lelo wa bamweo." ³³ Ulo amabumba yaumfwile ifi, yalipapile pa kusambilisha kwakwe. ³⁴ Lelo ulo abaFarise baumfwile ukwebati Yesu alitalalike aba Saduki, balikolongenye bonse pamo. ³⁵ Umo muli bena, incenshi ya malango, yalimwipwishe ilipusho, ku kumwesha- ³⁶ ''Kasambilisha, lifunde nshi ilikalamba mu malango?" ³⁷ Yesu alilandile kuli ena, "Ulekutemwa Shikulu Lesa obe no mutima obe onse, no mweo obe onse, na mano yobe yonse.' ³⁸ Ili efunde ilikalamba kabili ilya ntanshi. ³⁹ Kabili ifunde ilya bubili lyaba ifi- 'Ulekutemwa umwina mupalamano nga we mwine.' ⁴⁰ Pali aya amafunde yabili emwashintilila amalango yonse na bakasesema." ⁴¹ Nomba ulo abaFarise balilongene pamo, Yesu alibepwishe ilipusho. ⁴² Alilandile ati, "Nindo mutontonkanya palwa kwa Kristu? Mwana wakwa nani?" Balilandile kuli ena ati, "Ni mwana Dabidi." ⁴³ Yesu alilandile kuli bena ati, "Nindo kanshi Dabidi pakuba mu mupashi amukutila ati Shikulu, ukwebati, ⁴⁴ Shikulu alilandile kuli Shikulu wandi ati, "Ikala ku kuboko kwandi ukwakulyo, mpaka nkalenge abalwani bobe icakunyantapo amakasa yobe"'? ⁴⁵ Kanshi Dabidi nga akuta Kristu 'Shikulu,' kuti aba shani mwana Dabidi?'' ⁴⁶ Takwali nangu umo uwamwaswike shiwi, kabili takwali umuntu uwaeseshe ukumwipusha ilipusho ilili lyonse ukufuma pali bulya bushiku.