¹ Ulo Yesu na basambi bakwe bapalamine ku Yerusalemu kabili balifikile ku Betifage, ku Lupili lwa Miolife, nolu Yesu alitumine abasambi bakwe babili, ² ukulanda kuli bena ati, ''Kabiyeni mu mushi uukonkelepo, kabili ilyo linefye mukosanga punda alikakilwe palya, no musepela pamo nankwe. Mufikakule no kufileta kuli nebo. ³ Umfwa umo alanda ifili fyonse kuli mwebo palwa ifyo, mukolanda ati, 'Shikulu akofikabila,' kabili uyo muntu apopenefye akomupela mwise nafyo.'' ⁴ Nomba ifi fyonse fyalicitike mukufikilisha ifyalandilwe ukupitila muli kasesema, ukwebati, ⁵ ''Eba umwana mwanakashi wa Sione, 'Mona, imfumu yobe ikoisa kuli webo, Iyakufuka kabili ilininine pali punda - na pa musepela, umwana wa mpunda.''' ⁶ Nolu abasambi balile no kucita ifyo Yesu abebele. ⁷ Baliletele impunda no musepela kabili balibikilepo amalaya yabo, kabili Yesu alinininepo no kwikala pa malaya. ⁸ Na bengi mwi bumba balyanshike amalaya yabo mu musebo, kabili bambi bakontwele imisambo ya fimuti no kwanshika mu musebo. ⁹ Nolu amabumba aya tangile pa ntanshi yakwa Yesu na abo abalikumukonka balikubilikisha ati, ''Hosana kuli Mwana Dabidi! Wakupalwa uukoishila mwi shina lyakwa Shikulu! Hosana mu myulu mwa kusansama!'' ¹⁰ Ulo Yesu afikile mu Yerusalemu, onse umusumba walisunkene kabili balilandile abati ''Ninani uyu?'' ¹¹ Amabumba yalyaswike ati, ''Uyu ni Yesu kasesema ukufuma ku Nasareti mu Galili.'' ¹² Nolu Yesu alingile mwi tempele. Alitamfishe bonse abo abalikushitisha no kushita mwi tempele, no kupilibula amatebulo ya bakakabula wa ndalama ne fipuna fya balikushitisha inkunda. ¹³ Alilandile kuli bena ati, ''Calilembwa ati, ''Ing'anda yandi iketwa ing'anda ya mapepo,' lelo mwaicita ininga ya bapupu.'' ¹⁴ Nolu impofu na bakulemana balishile kuli ena mwi tempele, kabili alibondepe. ¹⁵ Lelo ulo bashimapepo bakalamba na bakalemba bamwene ifyakupapa ifyo acitile, kabili ulo baumfwile abaice bakopunda mwi tempele kabili bakolanda ati, "Hosana kuli Mwana Dabidi," balifulilwe sana. ¹⁶ Balilandile kuli ena ati, ''Bushe ulyumfwile ifyo bakolanda?" Yesu alilandile kuli bena ati, ''Ee! Lelo tamwabelenga ati, "Ukufuma mutunwa twa twana utunono no tukoonka emo mwapekanishisha amalumbo'?" ¹⁷ Nolu Yesu alibashile no kufuma mu musumba ukuya ku Betani kabili alisendeme ubushiku kulya. ¹⁸ Nomba ulucelo ulo abwelelemo ku musumba, alyumfwile insala. ¹⁹ Pakumona icimuti ca mukunyu mu mbali ya musebo, alile kuli cena kabili tasangileko nangu cimo kanofye amabula. Alilandile kuli cena ati, "Kwikatala akuba ifisabo kuli webo nakabili,'' kabili apopenefye icimuti ca mukunyu calyumine. ²⁰ Ulo abasambi bamwene ifi, balisungwike no kulanda abati, "Nga kanshi icimuti ca mukunyu cauma shani apapene?" ²¹ Yesu alibaswike no kulanda ati, "Mucine nkolanda kuli mwebo nati, umfwa mulikwete icicetekelo no kukana twishika, tamwakacite fye ici cacitika ku mukunyu, lelo mukalanda kuli ulu lupili, 'Sendwa no kuposwa muli bemba,' kabili fili no kucitwa. ²² Fyonse ifyo mwalomba mwipepo, mulicetekele, mukapokelela." ²³ Ulo Yesu aingile mwi tempele, bashimapepo bakalamba na bakalamba ba bantu balishile kuli ena ulo alikusambilisha kabili balilandile ati, "Bushe ni kunsambu nshi ucitila ifi fintu, kabili ninani akupele ishi nsambu?" ²⁴ Yesu alyaswike no kulanda kuli bena ati, "Nanebo nkomipusha ilipusho limo. Umfwa mwanjasuka, nkomweba mu nsambu ncitila ifi fintu. ²⁵ Ulubatisho lwakwa Yohane - nikwi lwafumine? Ni ku mulu nangu ni ku bantu?" Balilanshenye abene umo babebele, ukwebati, "Umfwa twalanda ati, 'Ni ku mulu,' alatweba ati, 'Ninshi tamwamusuminine?' ²⁶ Lelo umfwa twalanda ati, 'Ni ku bantu,' tukotina ibumba, pantu bonse baishibe ati Yohane ni kasesema.'' ²⁷ Nolu balyaswike Yesu no kulanda ati, "Tatwaishiba." Kabili alilandile kuli bena, "Nanebo nshamwebe mu nsambu ncitila ifi fintu. ²⁸ Lelo mukotontonkanya shani? Umuntu alikwete abana baume babili. Alile ku wa kubalilapo no kulanda ati, "We mwana, kabiye kabombe ilelo mwi bala lya myangashi.' ²⁹ Umwana alyaswike no kulanda ati, 'Nshayeko,' lelo panuma alipilibwile itontonkanyo lyakwe kabili alile. ³⁰ ''Nolu umuntu alile ku mwana wa cibili no kulanda ifintu fimo fine. Alyaswike no kulanda ati, emukwai nkoya, shikulu,' lelo taileko. ³¹ Bushe ninani pali aba abana baume babili uwacitile ubufwayo bwakwa wishi?'' Balilandile ati, ''Uwa kubalilapo.'' Yesu alilandile kuli bena ati, "Mucinefye nkolanda kuli mwebo nati, bakasonkesha bamisonko na banakashi bacilende bakamitangilila ukwingila mu bufumu bwakwa Lesa. ³² Pantu Yohane alishile kuli mwebo mu nshila ya bulungami, lelo tamwamucetekele. Lelo bakasonkesha ba misonko na banakashi bacilende balimucetekele. Lelo mwebo, nangu ulo mwamwene ifi, tamwalapile panuma no ku mucetekela. ³³ ''Kutikeni ku mulumbe na umbi. Kwali umuntu, umwine wa mpanga. Alilimine ibala lya myangashi, alishingulwisheko ulubango, alimbilemo umwakukamina umwangashi, alikulile no lupungu lwakwa kalinda, kabili alilisekeshe ku balimi ba myangashi. Nolu alile ku calo cimbi. ³⁴ Ulo inshita ya kusombola ifisabo yapaleme, alitumine ababomfi bakwe ku balimi ba myangashi ukuya kupokako ifisabo fyakwe. ³⁵ Lelo abalimi ba myangashi balibulile ababomfi bakwe, balyuminepo umo, ukwipaya umbi, no kupola umbi amabwe. ³⁶ Nakabili, umwine we bala alitumine na bambi ababomfi, abengi ukucila abapakubala, lelo abalimi bali bacitile cimo cine. ³⁷ Panuma ya ifyo, umwine alitumine umwana mwaume wakwe kuli bena, ukwebati, 'bakamucindika umwana wandi.' ³⁸ "Lelo ulo abalimi ba myangashi bamwene umwana, balilandile umo babelele ati, 'Uyu empyani. Iseni, natumwipaye no kupyana icabupyani cakwe.' ³⁹ Eco balimusendele, balimufumishe kunse ye bala no kumwipaya. ⁴⁰ Nomba ulo umwine we bala akesa, akabacita shani abalimi ba myangashi?" ⁴¹ Balilandile kuli ena ati, "Akabonaula cibi abo ababifi ba bantu, no kusekesha ibala ku balimi bambi, abantu abenga mupela icakaniko cakwe ica filimwa pa nshita ya busomboshi." ⁴² Yesu alilandile kuli bena ati, "Bushe tamwabelenga mu malembo, 'Ilibwe ilyo bakakula basulile elyaba umutwe wa pa cifutu. Ifi efyacita Shikulu, kabili ca kupapa mu menso yesu'? ⁴³ Eco kanshi nkolanda kuli mwebo nati, ubufumu bwakwa Lesa bukapokwa kuli mwebo no kupelwa ku luko ulukotwala ifisabo fya luko. ⁴⁴ Onse uukaponena pebwe ili akaputaulwa mutupimfya. Lelo uuli onse uo likaponena akashonaulwa." ⁴⁵ Ulo bashimapepo bakalamba na baFarise baumfwile imilumbe iyi, balilwike ati akolanda pali bena, ⁴⁶ Balifwaile ukumwikata, lelo balitinine ibumba, pantu abantu bamwishibile nga kasesema.