¹ ''Pantu ubufumu bwa mu mulu bwaba kubati mwine wa mpanga uwacelele ulucelo ukuya mukwingisha abancito mwibala lya myangashi. ² Panuma yakusuminishanya na babomfi pa ndalama imo ubushiku bumo, alibatumine mwibala lya myangashi. ³ Alibwekelemo nakabili pa nsa iyakulenga shitatu kabili alimwene ababomfi bambi baliminine tabakocita nangu cimo mu cisankano. ⁴ Kuli bena alilandile ati, 'Nemwe bene, kabiyeni mwibala lya myangashi, Kabili nkomipela icilingile!' Eco balile ku kubomba. ⁵ Alibwekelemo nakabili pa nsa iyakulenga mutanda nakabili pansa iyakulenga pabula, nokucita cimo cine. ⁶ Nakabili pa nsa iyakulenga ikumi nalimo alile no kusanga bambi baliminine tabakocita nangu cimo. Kuli bena alilandile ati, "Nindo mwimanine tamukocita nangu cimo akasuba konse?" ⁷ ''Balilandile kuli ena ati, pantu takuli utwingishe incito.' '' Alilandile kuli bena ati, "Nemwe bene kabiyeni mwibala lya myangashi." ⁸ Ulo icungulo cafikile, umwine we bala lya myangashi atile kuli kangalila, ' kuta ababomfi no kubapela amalipilo yabo ukutendekela kuwakulekelesha ukufika kuwakubalilapo. ⁹ Ulo ababomfi abo baingishe incito pa nsa yakulenga ikumi na limo balishile, cila umo alipokelele indalama imo. ¹⁰ Ulo ababomfi bakubalilapo baishile, balitontonkenye ukwebati bakopokelela ukucilapo, lelo nabobene bapokele indalama imo cila muntu. ¹¹ Ulo bapokelele amalipilo yabo, baliilishenye kumwine we bala. ¹² Balilandile ati, 'Aba ababomfi bakulekelesha baposafye insa imo mu mulimo, lelo wabalinganya kuli fwebo, fwebo fwebacicucutika mukubomba mu kasuba no kupya kucikabilila.' ¹³ Lelo umwine alyaswike no kulanda kuli umo uwa muli bena ati, "Cibusa, Nshikulufyenye. Bushe tawa cisuminishanya nandibo indalama imo? ¹⁴ Piita icakaniko cobe ulekuya. Ndisalile ukupela ababomfi abakulekelesha ifyo mpele kuli webo. ¹⁵ Bushe tacasuminishiwa kuli nebo ukucita ifyo nkofwaya ku fintu fyandi? Nangu uli nakafindwe pantu ndi wabune ¹⁶ Eco abakulekelesha bakaba abantanshi, na bantanshi bakaba abakulekelesha." ¹⁷ Ulo Yesu alikuya ku Yerusalemu, alisendele abekumi nababili pambali, na munshila alilandile kuli bena ati, ¹⁸ "Moneni, tukoya ku Yerusalemu, no Mwana wa Muntu akopelwa kuli bashimapepo bakalamba na bakalemba. Bakamupingwila ukufwa ¹⁹ kabili akapelwa ku bena fyalo ku kumuseka, ukumulopola, no kumutanika. Lelo pa bushiku bwakulenga shitatu akabushiwa kubafwa." ²⁰ Nolu nyina wa bana baume bakwa Sebede alishile kuli Yesu na bana bakwe abaume. Alifukeme ku cinso cakwe no kulomba cimo kuli ena. ²¹ Yesu atile kuli ena ati, "Nindo ukokabila?" Atile kuli ena ati, '''konkomesheni ukweba ati aba abana baume bandi babili bakekale, umo ku kuboko kwakulyo na umbi ku kuboko kwakuso, mu bufumu bwenu.'' ²² Lelo Yesu alyaswike no kulanda ati, ''Tawishibe ico ukolomba. Bushe ulilingile ukunwa ulukombo ulo nebo nkanwako?''Balimwebele ati, ''Tulilingile.'' ²³ Alilandile kuli bena ati, ''Mucinefye mukanwa ulukombo lwandi. Lelo ukwikala ku kuboko kwandi ukwa kukulyo nangu ku kwakuso tecandi ukupela, Lelo ca abo abo capekanishiwa na Tata.'' ²⁴ Ulo bambi abasambi ikumi baumfwile ifi, balikalipe sana palwa balya babili bamunyina. ²⁵ Lelo Yesu umwine alibakutile no kulanda ati, "Mwalishiba ukwebati bakateka babena fyalo balatitikisha, kabili abantu bakucindama babomfya amaka pali bena. ²⁶ Lelo tacifwile ukuba muli uyu musango pali mwebo. Lelo, onse uukofwaya ukuba umukalamba pali mwebo afwile ukuba umubomfi wenu, ²⁷ na onse ukofwaya ukuba uwantashi pali mwebo afwile ukuba umubomfi wenu, ²⁸ ngefyo Umwana wa Muntu taishile mukupyungilwa, lelo mukupyunga, no kupela umweo wakwe icilubula ca bengi.'' ²⁹ Ulo bafumine ku Yeriko, ibumba ilikalamba lyalimukonkele. ³⁰ Kwali impofu shibili ishaikele mu mbali ya musebo. Ulo shaumfwile ukwebati Yesu akopita, shalibilikishe, "Shikulu, Mwana Dabidi, tubeleleni uluse." ³¹ Ibumba lyalibakalipile, no kubeba ukwikala tondolo, lelo balibilikishe ukucilapo, "Shikulu, Mwana Dabidi, tubeleleni uluse." ³² Nolu Yesu aliminine kabili alibakutile no kulanda ati, "Nindo mukofwaya nebo micitile?'' ³³ Balilandile kuli ena ati, "Mwe Shikulu, ukwebati amenso yesu yashibulwe.'' ³⁴ Nolu Yesu, pakwikatwa ne nkumbu, alikete amenso yabo. Apopenefye balimwene kabili balimukonkele.