¹ Calishile kuba ukwebati ulo Yesu apwile ukulanda aya amashiwi, alifumineko ku Galili no kwisa ku citungu ca Yudea icaba kwi shilya lya mu mana wa Yordani. ² Amabumba yakalamba yali mukonkele, kabili alibondepe kulya. ³ AbaFarise balishile kuli ena, mukumwesha, ukulanda kuli ena ati, ''Bushe calisuminishiwa umuntu ukuleka umukashi wakwe pamulandu uuli onse?" ⁴ Yesu alyaswike no kulanda ati, "Bushe tamwabelenga ukwebati uwa balengele pa kutendeka abalengele umwaume no mwanakashi? ⁵ Uwa balengele kabili alilandile ati, 'Pamulandu wa ici umwaume akasha wishi na nyina no kuilunda ku mukashi wakwe, kabili aba babili bakaba umubili umo.' ⁶ Kanshi tabali babili, lelo umubili umo. Eco kanshi ico Lesa alundanya pamo, umuntu nangu umo epatukanya." ⁷ Balilandile kuli ena ati, "Nindo kanshi Mose atukonkomeseshe ukupela icitupa ca kulekaninapo no kumuleka umwanakashi alekuya?" ⁸ Alilandile kuli bena ati, "Ni pa kukosa kwa mitima yenu, Mose amisuminishe ukuleka abakashi benu, lelo tacali muli uyo musango ukufuma mu kutendeka. ⁹ Nkolanda kuli mwebo nati, uyo onse uwaleka umukashi wakwe, no kupa umbi, kanofye pa mulandu wa bulalelale, ninshi acita ubucende." ¹⁰ Abasambi balilandile kuli Yesu ati, "Umfwa cibe fyo ku muntu uuli no mukashi, te cabune ukupa." ¹¹ Lelo Yesu alilandile kuli bena ati, "Te onse uwinga sumina iyi nsoselo, lelo kanofye kuli abo capelwa. ¹² Pantu kwaliba ba mutungwi abafyalwafye ifyo fine ukufuma munda muli banyinabo, kabili kwaliba na bamutungwi abatungulwa na bantu, kabili kwaliba na ba mutungwi abailenga bamutungwi abene beka pa mulandu wa bufumu bwa mu mulu. Uyo uwinga sumina aya masambilisho, lekeni ayasumine." ¹³ Nolu abana banono bamo baliletelwe kuli ena pakwebati abikepo indupi no kupepa, lelo abasambi bali bakalipile. ¹⁴ Lelo Yesu alilandile ati, "Lekeni abana banono, kabili mwibalesha ukwisa kuli nebo, pantu ubufumu bwa mu mulu bwa abo abakuba ngefi." ¹⁵ Alibikele indupi shakwe pa bana, kabili alifumineko kulya. ¹⁶ Moneni, kwalishile umuntu kuli Yesu kabili alilandile ati, "Kasambilisha, bushe cabune nshi mfwile ukucita pakwebati ningaba no mweo wa muyayaya?" ¹⁷ Yesu alilandile kuli ena ati, "Nindo wanjipushisha pa cabune? Ni umo fye ewabune, lelo umfwa ukofwaya ukwingila mu mweo, ubake amafunde." ¹⁸ No muntu alilandile kuli ena ati, "Mafunde nshi?'' Yesu alilandile kuli ena ati, "Wilakwipaya, wilakucita bucende, wilakwiba, wilakushinina bukambone bwabufi, ¹⁹ cindika wiso na noko, ulekutemwa umwina mupalamano obe nga we mwine." ²⁰ Umulumendo alilandile kuli ena ati, "Ifi fintu fyonse nalibela. Bushe findo ncili nkofwaikwa ukucita?" ²¹ Yesu alilandile kuli ena ati, "Umfwa ukofwaya ukuba uwa pwililika, kabiye, ushitishe fyonse ifyo wakwata, no kupela ku balanda, kabili ukakwata ifyuma mu mulu; kabili wise, unkonke." ²² Lelo ulo umulumendo aumfwile ifyo Yesu alandile, alile uwa bulanda, pantu alikwete ifyuma ifingi. ²³ Yesu alilandile ku basambi bakwe ati, "Mucinefye nkolanda kuli mwebo nati, cakwafya umuntu umukankala ukwingila mu bufumu bwa mu mulu. ²⁴ Nakabili nkolanda kuli mwebo nati, cakwangukapo ingamali ukupita mu linso lya nshindano ukucila umuntu umukankala ukwingila mu bufumu bwakwa Lesa." ²⁵ Ulo abasambi baumfwile ici, balipapwike kabili balilandile ati, ''Ninani kanshi uwingapusuka?'' ²⁶ Yesu alibaloleshe no kulanda kuli bena ati, ''Ku bantu ifi fyakukosa, lelo kuli Lesa ifintu fyonse fyakwanguka." ²⁷ Nolu Petero alyaswike no kulanda kuli ena ati, ''Moneni, fwebo twalisha fyonse no kumikonka. Bushe nindo kanshi fwebo tukakwata?" ²⁸ Yesu alilandile kuli bena ati, "Mucinefye nkolanda kuli mwebo nati, "Mucalo cipya ulo Umwana wa Muntu akekala pa cipuna cakwe ica bukata, mwebo mwe bankonka mukekala pa fipuna ikumi na fibili, ukupingula imikowa ikumi na ibili yakwa Isreali. ²⁹ Onse uwasha amayanda, bamunyina, bankashi, wishi, nyina, abana, nangu impanga pamulandu we shina lyandi akapokelela ifya miku umwanda mu bwingi kabili akapyana umweo wa muyayaya. ³⁰ Lelo abengi abantanshi bakaba abakulekelesha, na bakulekelesha bakaba abantanshi.